Ame lo Iesu e Ierusalema ngöne la Paseka 30 M.K., hnei nyidrëti hna kuca la itre huliwa nyine hain, itre iamamanyikeu. Qa ngöne lai, ala nyimu la itre ka lapaune koi nyidrë. Nge hna hane fe hai nyidrë hnei Nikodremo, ketre Faresaio nge atre sine la hnakootr ka tru i angetre Iudra. Aja i angeic troa drenge la itre xa ini, matre angeic a tro jidri ju troa wai Iesu. Ma angeice jë a xouene wanga qajangazo angeice jë hnei itre xa tane i angetre Iudra.

Matre öni angeic, “Rabi, atre hi huni laka, hna upi nyipë hnei Akötresie göi troa Atre Ini, ke pëkö ka atreine kuca la itre iamamanyikeu hnei nyipëti hna kuca, e tha qaathei Akötresieti kö.” Sa jë hi Iesu koi Nikodremo ka hape, maine ketre atr a pi lö kowe la Baselaia i Akötresie, nyipiewekë troa pane “hnahone hmaca” la atre cili.—Ioane 3:2, 3.

Hnyinge jë hi Nikodremo ka hape: “Tro hmaca a hnahone tune kaa la atr nge ka tru hë? Ke tha ijiji angeice kö troa lö hmaca kowe la hni i thin matre hnahone hmaca pi?”—Ioane 3:4.

Ngo eje hi, tha celë kö la aliene lo hna hape, hnahone hmaca. Matre Iesu a qejepengöne jë me hape: “Tha ijije kö tro la ketre atr a lö kowe la Baselaia i Akötresie, e tha hna pane hnaho angeice hnei tim me ua.” (Ioane 3:5) Ame lo kola bapataiso Iesu, hna uti lo uati hmitrötr koi nyidrë, haawe, kolo hi lai a hnaho nyidrë “hnei tim me ua.” Nge ngöne la ijine cili, hna mexeme la ketre aqane ithanata e hnengödrai me hape: “Nekönge hniminange lai, eni a madri nyën.” (Mataio 3:16, 17) Qa ngöne lai, Akötresie a amamane ka hape, ase hë nyidrë ië Iesu hnei ua troa nekö i nyidrë e hnengödrai, me alö nyidrë hnine la Baselaia e hnengödrai. Lue macatre thupen, ngöne la Penetekos  33 M.K., hna uti la uati hmitrötr kowe la itre xa hna bapataison, matre kolo hi lai a hnaho angatre hmaca troa itre nekö i Akötresie e hnengödrai.—Itre Huliwa 2:1-4.

Ngo jole pala kö koi Nikodremo troa trotrohnine la itre ini Iesu göi Baselaia. Matre Iesu a hamë itre xa ithuemacany göne la hnëqa i nyidrë. Öni nyidrë ka hape, ngacama ketre atre nyidrë, ngo nyidrë la Nekö i Akötresie. Öni Iesu: “Tune lo Mose a athipe la un ngöne la hnapapa, tro fe a athipe la Nekö i Atr. Qa ngöne lai, tro hë la itre ka mejiune koi nyidrë a kapa la mele ka pë pun.”—Ioane 3:14, 15.

Ame lo angetre Isaraela cili, lo itre hna hej ekö hnei itre un hna mecin, e aja i angatr troa mel, nyipiewekë tro angatr a goeëne la une kopa. (Numera 21:9) Ketre tun, nyipiewekë tro la nöjei atr a lapaun kowe la Nekö i Akötresie, matre thepe angatre qa ngöne la ngazo me mec, nge matre kapa jë angatre la mele ka pë pun. Ame hnei Iesu hna amexeje koi Nikodremo laka, thangane la ihnimi Iehova lai, öni nyidrë: “Ke atraqatre la ihnimi Akötresie kowe la fen, matre hnei nyidrëti hna upe la Nekö hnimina i nyidrë ka cas, matre tha tro kö a meci la atre amamane la lapaune i angeic kowe la Nekön, ngo tro pe a hetrenyi la mele ka pë pun.” (Ioane 3:16) Haawe, thupene la sikisi lao treu ne huliwa i Iesu, nyidrëti petre hi a qaja mekötin e Ierusalema laka, nyidrë la jëne iamele koi nöjei atr.

Öni Iesu koi Nikodremo: “Tha hnei Akötresieti kö hna upe la Nekö i nyidrë kowe la fen göi troa amekötin ej.” Kola hape, tha hna upi Iesu kö troa ejine la nöjei atr, me amekötine troa apatrene triji angatr. Ngo tune lo aqane qaja i  Iesu, hna upi nyidrë kowe la fen, “matre tro pe a hetre iamele jëne la Nekön.”—Ioane 3:17.

Hnei Nikodremo hna xou me traqa jidr koi Iesu. Matre ka lolo la aqane nyipune Iesu la porotrike i nyidro, öni nyidrë: “Hane hi la trepene la iameköti: Hna traqa la lai kowe la fen [ene Iesu, qa ngöne la mele i nyidrë me itre ini hna hamën], ngo hnyapa kö la jidr kowe la itre atr, ke ngazo la itre huliwa i angatr. Ke ame la atre kuca la itre huliwa ka ngazo, tre ka methinëne la lai, me ananyine la lai, matre tha tro kö a mama la itre huliwa i angeic. Ngo ame la atre kuca la itre huliwa ka nyipici, tre ka tro kowe la lai, matre mama jë laka, itre huliwa hna kuca thenge la aja i Akötresie.”—Ioane 3:19-21.

Ijine hë koi Nikodremo, ketre Faresaio me atre ini angetre Isaraela, troa mekune la hnei angeic hna inin göne la hnëqa i Iesu qaathei Akötresie.