Aja i Iehova tro la itre ka faipoipo a nyipici kowe la hnei angatr hna sisiny. Ame lo Nyidrëti a acaasine lo lue pane trefën, öni Iehova, ka hape: “Tro la trahmanyi a . . . fedre kowe la fö’ i angeic ; nge  tro nyidroti a ca ngönetei.” Nge thupene la itre macatre ka nyimutre, hnei Iesu hna amexeje hmaca la trenge ewekë celë me qaja fe ka hape: “Qa ngöne lai, ame la hnei Akötesie hna isilekeun, the tro kö a shenge hnei ate.” (Genese 2:24; Mataio 19:3-6) Haawe, ame la aqane goeëne Iehova me Iesu la faipoipo, tre, kösë ketre otrene ka catr, tro hi a senge hnei mec. (1 Korinito 7:39) Ketre ewekë hna acil me ahmitrötrëne la faipoipo, haawe, thaa nyine elone kö la sei hna cil. Methi Iehova la ka sei hna cile e thaa ka ihmeku kö la kepine memine la hna qaja hnei Tusi Hmitrötr.—Malaki 2:15, 16.

Nemene la trepene meköt qa hnine la Tusi Hmitrötr ka aijijëne la lue trefën troa sei hna cil? Atre hi së lo laka, methi Iehova la nyi xetë me kuci ngazo. (Genese 39:9; 2 Samuela 11:26, 27; Salamo 51:4) Ka sisi catre koi Iehova la kuci ngazo, celë hi matre caasi hi la kepin hna aijijëne hnei Nyidrë troa sei hna cil, e hna kuca hnei ketre e nyidro lue trefëne la ngazo celë. (Wange ju fe la itre mekune ka qeje pengöne la kuci ngazo ngöne lo Mekene 9, paragaraf 7, matre atrepengöne hnyawa la aliene la hnëewekë cili.) Iehova a nue kowe lai trahmanyi maine föe hna nyi xetë trij troa amekötine la pengö i nyidro, ene la troa iloi, maine tro pena a sei hna cil. (Mataio 19:9) Qa ngöne lai, maine amekötine jë hnene lai hna nyi xetë trij troa sei hna cil, meköti angeic, ke, thaa ka ifekethi kö memine la mekuna i Iehova. Ngo itre atrene la ekalesia, thaa kolo kö lai a fe gojenyi së troa sei hna cil. Nyipici, kola mama thene la itre xaa trefën, laka, hnene lo hna nyi xetë trij hna loihni ketre, pine la hna nyipi ietra. Ngo ame koi atre mekune troa sei hna cil thenge la hna amekötine hnei Tusi Hmitrötr, isa qanyi angatre kö axeciën me isa kepe thangan.—Galatia 6:5.

Hnene la itre xaa Keresiano hna isa lapa memine la föi angatr, nge itre xan a sei hna cile pena pine laka tru catre menu pala ha la hna akötrë angatr, ngo thaa hnei hna inyi xetë triji kö. Ame ngöne la götrane cili, Tusi Hmitrötr a qaja ka hape, ame lai ka tro, tre, loi e tro angeic a ‘lapa caas, maine iloi’ hmaca memine la föi angeic. (1 Korinito 7:11) Thaa ijiji angeice pe troa hane faipoipo hmaca. (Mataio 5:32) Tro sa ce wange e celë, la itre aqane iakötrë hna thue hnei ketre e nyidro lue trefën matre isa lapa pi.

Hna thë hi troa lapa menu nge pëkö ixatua koi ketre. Kola mele puafala la ketre hnepe lapa, pëkö nyine itö xen me itre mo ka nyipi ewekë catr kowe la mele i angatr, nge ka egöcatre hi la trahmany; ngo kolo hi a lapa menu thaa thele huliwa kö troa thupëne la itre atrene la hnepe lapa i angeic. Öni Tusi Hmitrötr ka hape: “Maine kete ate a tha thupëne  hnyawa . . . la lapa ka cahae me angeic, angeic’ a kelikelëne la lapaun, nge atraqate la ngazo i angeice hune la ate tha lapaune kö.” (1 Timoteo 5:8) Nge maine thaa saze kö trahmanyi la thiina i angeic, ijije tro la föi angeic a waipengöne thei mus matre troa isa lapa. Eahlo a thele matre hmaloi jë pe hi la mele i eahlo me haa nekönatr. Eje hi laka, loi e troa öhne hnyawa hnene la itre qatre thup me xecie koi angatre la pengöne lai Keresiano ka xele ma thupëne me xatuane la hnepe lapa i angeic. Ijije hi troa upetrön eë qa hnine la ekalesia la atr ka xele kö ma thupëne la hnepe lapa i angeic.

Ka isi angazony. E ka isi angazonyi la ketre e nyidro, tro lai a tria jia me meci hnei ketre. Maine ame la ka isi, tre, Keresiano angeic, loi e tro la itre qatre thupe ne la ekalesia a wai nyidro matre atre jë ka hape, ka nyipici kö maine itre ithanata menu. Ijije troa upetrön eë la atre iwesitrë lapa, me isi lapa qa hnine la ekalesia.—Galatia 5:19-21.

Kola angazone la mele ne la ketre ngöne la götrane la ua. Maine jë tro ketre a thele pala hi troa sawa la föi angeice troa melëne la nyipi hmi, maine tro pena a iuku troa ena la ketre hna wathebon hnei Akötresie. Ame ngöne la itre götrane cili, tre, sipu qanyine lai hna angazon troa amekötine ka hape, loi e troa isa lapa matre tro angeice a “denge thenge Akötesie hune la at.”—Ite Huliwa 5:29.

E ithanatane jë ngöne la ketre götran, la itre aqane mele ka iakötrë ka tune la, haawe, loi e thaa tro kö sa thele troa ukune lai hna akötrën e nyidro lue trefëne troa isa lapa maine ce lapa pena ha me ketre atr. Itre qatre thup me itre keresiano ka macaj, hmekëne kö la kola hamë ixatua me eamo qa hnine la Tusi Hmitrötr, hetre itre ewekë ngöne la mele ne la lue trefën hnei epuni hna thatre. Iehova hmekuje hi la ka ijije troa öhne lai. Nyipici laka, thaa kolo kö a atrunyi Akötresie, memine fe lo itre hna isisinyikeu, e tro la föe maine trahmanyi keresiano a wanga atrune menune la itre hnepe jole ka pë pengön, ke, kolo hi a nyi jëne troa isa lapa. Thatreine kö troa sihngödri koi Iehova la itre ewekë hnei Nyidrëti hna eköthe göi isa lapa, ngacama kuca juetrëne ju hë hnene la ketre atr. Eje hi laka, “leulawa me mamapi hë la nöjei ewekë asëjëihë kowe la lue xajawa i nyidë, ene lo hne shë hna troa isa amamai thina kow.” (Heberu 4:13) Ngo e ngazo pala hi la aqane akötrëne la mele ne la ketre keresiano, nge ijine tro pala kö a neëne wanga tria jia pi, e xecie hë koi angeice troa isa lapa, haawe, thaa tro kö la ketre a jele ngazone la hnei angeic hna amekötin. Hna qaja lo ka hape, “tro asë sha isa qeje thinane koi Akötesie.”—Roma 14:10-12.