Itre wamine mutine ne la madra. Ame la itre wamine mutin, tre, hna xome qa hnine la foa lao ewekë ka tru hna ithuenyikön matre hetre madra—globules rouges, globules blancs, plaquettes, me plasma. Drei la ketre ceitun, ame e hnine la itre globules rouges, tre, hetrenyi la ketre protéine, hna hape hémoglobine. Hetrenyi la itre xaa drösinöe hna kuca qa ngöne la hémoglobine ne la atr maine öni pena, matre troa nyinyine la meci ne la itre atr ka troa pë madran.

Plasma—e 100 ke 90 la etrune litë tim—kola qatrenge la itre hormones ka nyimutre, sels inorganiques, enzymes, memine la itre xen, ene lo itre mutine dro me suka, e hnine ej. Ketre, ame la plasma, tre, hetrenyi fe la itre nyine troa anyipëne la madra, memine la itre an la itre mec, nge hetrenyi mina fe la itre protéines, tune la albumine. Maine kola troa tithe la ketre atr hnene la ketre mec, kola iup e itre xaa ijin hnene la droketre troa ithinyi matre troa hane kapa la itre gammaglobuline, hna xome pena ha qaathene la ketre atr ka hetrenyi hë e hnine la plasma i angeic lai nyin me an la meci cili. Ame la itre globules blancs, tre, ijije tro ej a thue interférons me interleukines, nge hna xome itre eje matre troa isi memine la itre xaa mec ka xulu qaathene la itre virus me itre kaaser.

Hapeu, ka loi kö e tro la itre Keresiano a kapa la itre drösinöe i droketre ka hetre wamine mutine madran? Thaa hna hamëne asë kö hnei Tusi Hmitrötr la nöjei ithuemacanyi göi aqane troa xome la itre ewekë ne la madra troa nyinyine la itre mec, ngo qanyi së pë hë isa ala  caas troa axeciën la nyine tro sa kuca thenge la mekuthethewe së qëmeke i Akötresie. Maine jë tro la itre xan a xelene la itre wamine mutine ne la madra, pine laka angatr a trotrohnine ka hape, ame ngöne la Trenge Wathebo i Akötresie kowe lo angetre Isaraela göne la madra ne la ketre öni, tre, kola upi angatre troa “neng’ eje hune la hnadro.” (Deuteronomi 12:22-24) Ame la itre xan, hna thipëne troa hamë madra koi angatr maine itre ewekë ka tru ne la madra pena, ngo e kola hamëne la itre aqane inyië ka hetre wamine mutine madra ngön, angatre hi a kapa. Angatre hi a mekune laka, ame la itre wamine mutine hna xome qa ngöne la madra ne la ketre atr, tre, thaa ka nyihatrene hmaca kö la mele i angeice lai.

E tro sa axeciëne la mekune nyine tro sa xötrethenge göi itre wamine mutine madra, loi e tro sa pane wanga atrune la itre hnyinge celë: Eni kö a wanga atrehmekune laka, e thipetrijë hë ni la nöjei wamine mutine madra, tre, kolo lai a hape, thaa tro hmaca kö ni a kapa la itre xaa drösinöe i droketre ka hetre wamine mutine madran troa nyinyin la itre mecing, maine troa anyipëne la madra wanga neni menu jë? Atreine kö ni troa qeje pengöne kowe la ketre droketre la kepine matre eni a thipetrije maine kapa pena la ketre wamine mutine madra?

E kola ixöj. Ame ketre aqane inyiën la atr hna xöj, tre ene la troa agejigejëne la madra. Kolo hna qaja lai ka hape hémodilution. Pane hule jë hi la madra ne la atr hna xöje kowe la imasin, nge kolo fe a athipi timi hna ithuenyiköne me drösinöe troa saan kowe la ngönetrei angeic; thupene lai, masine hmaca a nue koi angeice lo madra hna hul hna nyihnyawane hë me waasin. Ame pena la ketre aqane inyië, tre, ene la troa fuluthe koi imasine la madra qa ngöne lai hna xöj, thupene lai imasin a waasine me abëekëne hmaca jë kowe lai atr hna xöj. Ame lai  madra hna fuluth qa ngöne lai götrane hna xöj, tre, hna waasin maine nyihnyawane ej, nge ase hë kolo hmaca ha abëekën kowe la atrekë madran. Pine laka, isapengöne kö la aqane inyië ne la itre droketre, loi e tro la ketre Keresiano a thele troa atrepengöne hnyawa la itre hnene la droketre i angeic hna troa kuca.

Ame ngöne la easa isa amekötine la pengö së, tre, pane isa mekune ju së ka hape: ‘Maine hna anenine la madrang e trön nge hetre hnepe traeme ne pane thaa neni, tro kö la mekuthetheweng a nue ni troa xome la madra cili ceitune me ketre igötraneng, matre kösë thaa nyipi ewekë kö e troa “neng’ eje hune la hnadro”? (Deuteronomi 12:23, 24) Tro kö a nango jole la mekuthetheweng hna inine hnene la Tusi  Hmitrötr, ngöne la ijine kola troa xome la madrang, me nango saze, me abëekëne me alöne hmaca kowe la ngönetreing? Eni kö a atrehmekune laka, maine tro ni a thipëne la nöjei jëne inyië tune la troa xome la sipu madrang, tre, kolo lai a hape eni a thipëne asë la itre aqane nyinyine la itre mec, tune la analiz, maine dializ maine troa xome la ketre masin ka kuca la huliwa i wenethëhmi me idrefitr hna kuca hnei atr matre troa nyinyine la mecing?’

Ka nyipi ewekë catre tro la ketre Keresiano a ketre sipu amekötine la mekune ka xecie qa kuhu hni angeice göi aqane tro la itre droketre a huliwane la madra i angeic ngöne la kola ixöj. Ketre, ceitune mina fe ngöne lo itre analiz maine itre aqane inyië ka eje enehila laka, kola xome la hnepe madra ne la ketre atr, maine jë nyine troa nango saze, nge thupene lai, troa alöne hmaca.