1, 2. Nemene la huliwa hne së hna troa kuca, nge pine nemene matre ka nyipi ewekë catre la aqane tro sa huliwa?

NYIPUNIETI a catre huliwa, ke, hetre ewekë hna xup. Nyipunieti pala hi a sisedrën lai huliwa, ke, thaa tru pala kö la hna kuca, nge itre macatre ne tro pala kö a huliwa matre afenesine pi. Ngöne la kola nyiqaane la huliwa, tru la itre jole hna pane cile kow, ngo ame hë enehila, kösë hetre madrine hë, ke, mama trootro hë la itre hna kuca. Nge ngacama jole ju hë, ngo epuni a catre thele matre thaa tro kö a nuetrije la huliwa maine hunyinyi pena la aqane kuca, ke, atre hi epuni laka, ame la aqane huliwa i epun, tre, thaa tro kö a pë thangane kowe la mele i epuni enehila me elanyi mina fe. Pine nemen? Pine laka, ame hi lai hnei epuni hna xup me eköth, tre, nyipunieti hi!

² Hnei Iuda ketre atre dreng hna amamane laka, easë a ketre xup adraië së kö. Ame ngöne la angeic a ithuecatre kowe la itre Keresiano me hape, “thupë nyipunieti ju kö ngöne la ihnimi Akötesie,” hnei angeice fe hna amamane ngöne la xötre cili, la ketre ewekë ka sisitria ka troa xatua së troa ujë tune lai, kola hape: “Xup’ adraië nyipunieti jë ngöne la lapaune i nyipunie ka nyipi hmitöt.” (Iuda 20, 21) Nemene la itre xaa jëne tro nyipunieti a xupe adraië nyipunieti kö, me kuca matre troa acatrene la lapaune i epun, ene pe tro hë epuni a lapa qale catre kowe la ihnimi Akötresie? Tro sa ce wange la köni götran ne la huliwa së ka troa xatua së troa acatrene la lapaune së.

3-5. (a) Satana a ajane troa amenu epun, haawe, tro epuni a goeëne tune kaa la itre hnei Iehova hna amekötin? (b) Nemene la aqane tro sa goeëne la itre hnei Iehova hna amekötin, nge troa ketri së tune kaa hnene la aqane waiewekë cili? Qeje pengöne jë hnene la ketre ceitun.

³ Ame la hnapan, nyipi ewekë tro sa acatrene la lapaune së kowe la wathebo i Akötresie. Ame ngöne la easa waipengöne me inine la itusi celë, hne së hna ce wange la itre hna amekötine hnei Iehova göi aqane ujë. Matre nemene fe la hnei epuni hna hane mekun? Satana a thele troa amenu nyipunie. Aja i angeice tro epuni a goeëne la itre trenge wathebo i Iehova me itre trepene meköti me itre aqane ameköti ewekë i Nyidrë, ceitune me kola cipa epuni la ketre ewekë ka loi, nge nyine akötrë nyipunieti fe. Ketre, hna mekune ka hape, sasaithe menune hë la tulu hnene la itre hna amekötine hnei Iehova. Kolo hi lo aqane nyinyithiina lai ka hetre ethane hë ekö e Edena. (Genese 3:1-6) Hapeu, tro kö a hane amenu nyipunie hnene la aqane nyinyithiina cili? Qanyine kö la aqane waiewekë i epun.

⁴ Tro sa pane xome la ketre ceitun: Epuni a pane tro troa ngenu xötreithe la ketre park ka mingöming, öhne jë hi epuni la ketre götran hna eköhagene hnyawa nge wathebo e troa tro kow. Ngo hnene la emingömingöne lai götrane cili, ene pe pi tro hë epuni kowe la götrane cili troa ihamë. Ame la epuni a xötrei traqa, fetra ju hi kowe la ketre ihag, matre kösë lo kola xome hnöthe la aja ka eje thei epun ngöne lo qaan. Ngo goeëne ju hi epuni hnine lai ihag, kola cile la ketre liona ka pi öni, kola thele tha ngöne la ketre götrane la ihag! Trotrohnine jë hi epuni la enyipi ewekëne lo lai ihag, ke, emele i epuni hi lai wanga troa heji epuni hnene la liona. Hetrenyi kö la ketre öni ka ihej ka thele troa thepe nyipunieti enehila? Kola hmekë së hnene la Wesi Ula i Akötresie, ka hape: “Inamacanepi, me hmekënejë ; ke ithupëjia me nyipunie, ene diabolo, a tro agö, kösë liona a ho, kola thele tha i nyën.”—1 Peteru 5:8.

⁵ Ceitu i Satana memine la ketre öni ka ses ka thele tha. Thaa aja i Iehova kö tro sa itre nyine öni Satana, celë hi matre acile jë Nyidrë la itre wathebo matre nyine troa thupë së qa ngöne la itre “nyinyithina” ka nyimutre ne la atre iakötrë cili. (Efeso 6:11) Haawe, e tro sa thele troa trotrohnine hnyawa la enyipi ewekëne la itre wathebo i Akötresie, tro hë së lai a wanga atrune itre ej ceitune me hatrene la ihnimi ne la Tretretro së e koho hnengödrai. Maine tro sa goeëne la itre wathebo i Akötresie tune lai, haawe, tro ha thupë së hnene itre ej, nge hetre madrin  hne së hna troa kapa qa ngön. Hna cinyihane hnei Iakobo, ka hape: “Ame la ate thuluëne ngöne la wathebo ka meköti me gufa kö, me cile huti ngön . . . tro ha manathithi la ate celë ngöne la huliwa i angeic.”—Iakobo 1:25.

6. Nemene la nyine troa kuca ka sisitria matre tro sa eköthe la lapaune së kowe la itre wathebo me itre trepene meköti Akötresie? Hamëne jë la ketre ceitun.

⁶ Ame la ketre nyine troa kuca ka sisitria matre troa acatrene la lapaune së kowe la Atre Ithue Wathebo me kowe la einamacanene la itre wathebo i Nyidrë, tre, ene la troa melën la itre hna amekötine hnei Akötresie. Hanawange la ketre ceitun, ame la “wathebo i Keriso,” tre, kola qaja la hna amekötine hnei Iesu, ene la troa inine la itre xan “la nöjei ewekë asëjëihë lo [hnei nyidrë] hna ahnith.” (Galatia 6:2; Mataio 28:19, 20) Ame mina fe la itre Keresiano, tre, angatr a wanga atrune hnyawa la ketre hna amekötin, ene la troa traqa pala hi troa ce icasikeu matre ce hmi me ithuecatrekeu. (Heberu 10:24, 25) Ame la ketre hna amekötine hnei Akötresie, tre, ene la troa thuecatrenyi së troa thithi pala hi koi Iehova cememine la hni ka menyik. (Mataio 6:5-8; 1 Thesalonika 5:17) Ame ngöne la easa melëne la itre hna amekötine cili, ketre easë hë a öhne hnyawa laka itre hna amekötine la hna hamëne jëne la ihnim. Ame la easa drengethenge itre ej, tro hë së a kapa la ketre madrin ka ketrepengöne kö, ke thatreine kö troa öhne la madrine cili ngöne la ketre götrane ne la fene ka ngazo celë. Ame ngöne la easa mekune me thele troa trotrohnine la aqane isa kepe thangane hne së la hna mele thenge  la itre trenge wathebo i Akötresie, hapeu thaa tro kö itre eje lai a akökötrene catrëne la mejiune së me idrengethenge së?

7, 8. Tune kaa la aqane akeukawane hnene la Wesi Ula i Akötresie la itre hni ne lo itre atr ka hnehengazo pine laka, maine jë kola tro la itre macatre nge kola kötrekötre thei angatre la thiina ka meköt?

⁷ Ame itre xan, tre, kola tro la itre macatre, nge ma hace jë hë koi angatr e troa drengethenge la itre trenge wathebo i Iehova. Xou i angatre hë, ke, kola mekune ka hape tro angatre a kei. Maine mekune i epuni fe hi lai, ami hniine ju la itre trenge ewekë celë, kola hape: “Dei la hna ulatine hnei Iehova, ate itö mele i ’ö, Kahmitöte i Isaraela, Ini Iehova Akötesi ’ö, ate ini ’ö troa hete thangan, ate e eö ngöne la gojenyi tro eö a trongën. Watipë hë ma denge ju hi eö la ite wathebong, mate tune la hneopegejë la tingetinge i ’ö, nge tune la ite hoke ne gejë la thina ka meköti ’ö.” (Isaia 48:17, 18) Thaa hnei epuni jë kö hna nango thëthëhmine la ekeukawane la itre trenge ewekë celë?

⁸ Iehova hi la a amekunë së hmaca la itre manathithi nyine tro sa isa kapa e tro sa drengethenge Nyidrë. Hnei Nyidrëti hna thingehnaeane la lue manathith, e tro sa drengethenge. Ame la hnapan, tre, kola aceitunëne la tingetinge së memine la ketre hneopegejë, laka ka haodrai, me atraqatr, nge thaa ka ae kö. Ame la hnaaluen, tre, kola aceitunën la meköti së memine la itre hoke ne gejë. Maine tro sa cile ngöne la hnangöni me goeëne la itre itro gejë e traqa itrai, canga mama ju hi koi së laka, aqane trongene itre eje hë lai uti hë epine palua. Ka qaane hë ekö la kola xötrei hetre hnagejë la kola kaca tran la hnangöni hnene la itre hoke ne gejë, nge aqane trongene pala pë hë lai. Iehova a qaja ka hape, ame la meköti së, ene la thiina ka meköti së, tre, tro ej a cile hut, e hne së hna drei Iehova. Maine tro sa catre thele troa mele nyipici pala hi koi Nyidrë, thaa tro jë kö Nyidrëti a nue së troa kei! (Salamo 55:22) Hapeu, thaa kolo kö lai a acatrene la lapaune së koi Iehova me kowe la itre wathebo i Nyidrëti ka meköt, hnene la itre hna thingehnaeane ka iakeukawanyi celë?

9, 10. (a) Pine nemene matre ame la troa macaj, tre, celë hi ketre ewekë ka lolo nyine tro la itre Keresiano a eatrën? (b) Tro la aqane waiewekë ngöne la ua a hamë madrine tune kaa koi së?

⁹ Ame la hnaaluene aqane tro sa eköth la huliwa, tre, eje a mama jëne la itre xötre celë, hna hape: “Tro shë kowe la hna tixenuë.” (Heberu 6:1) Ame la troa tro kowe la hna tixenuë, maine troa macaje pena,  tre, celë hi ketre ewekë ka lolo lai nyine troa eatrën hnene la Keresiano. Maine nyipici laka, atr ka pexeje hmekuje hi la ka atreine troa eatrëne lai, ngo ame pe la troa macaj, tre, ijiji së fe hi troa hane traqa kow. Ketre, tru catre pala kö la madrinene la itre Keresiano troa nyi hlue i Iehova e itre ka macaje hë angatr. Nemene kepine lai?

¹⁰ Ame la Keresiano ka macaj, tre, ketre atr ka egöcatr ngöne la götrane la ua. Angeic a wanga atrune la nöjei ewekë tune la aqane waiewekë i Iehova. (Ioane 4:23) Hna cinyihane hnei Paulo ka hape: “Hna hnine la ite ewekë ne la ngönetei ; hnei angete xöte thenge la ngönetei, ngo ite ewekë ne la ua hnei angete xöte thenge la ua.” (Roma 8:5) Ame la aqane waiewekë i atr, tre, hnepe madrine ka co catre hi la hna kapa qa ngön, ke kolo pe a thele la aja ne ngönetrei, nge pëkö wanga atrehmekun, tru hi la hna nyinyape thele la itre mo ne fen. Ame la aqane waiewekë ngöne la ua, tre, ka ithue madrine pala hi, pine laka, trepene thei Iehova, “Akötesie tene manathith [madrin].” (1 Timoteo 1:11) Ame la atr ka egöcatre ngöne la ua, tre, angeic a thele troa amadrinë Iehova nge ka madrine angeic ngöne la kola cile kowe la itre itupath. Pine nemen? Jëne la itre itupath easa anyipicine ka hape, ka sili trenga thoi lae Satana, nge cia ha the së la inyipicikeu, nge celë hi ka sisitria kowe la Tretretro së e koho hnengödrai.—Ite Edomë 27:11; Iakobo 1:2, 3.

11, 12. (a) Nemene la hna qaja hnei Paulo göne la “hni” ne la ketre Keresiano, nge nemene la aliene la hnëewekë ka ujëne la hna hape hna “huliwan”? (b) Nemene la hna troa kuca kowe la ngönetrei matre tro ej a macaj me maca?

¹¹ Ka nyipi ewekë catre koi së troa kepe ixatua me ini e hetre aja së troa egöcatr ngöne la götrane la ua. Drei la hna qaja ngöne la xötre celë: “Ame la xeni, te, thatraqane la ite ka tru, ene angat’ angete majemine huliwane la hni troa wangate hmekune la loi me ngazo.” (Heberu 5:14) Ame lo Paulo a hape, troa “huliwane” la atrehmekun, tre, hna majemine drenge la hnëewekë celë ngöne la itre hna kuci elo ekö e Heleni; ene pe ujëne jë pë hë Paulo qa ngöne lai hna hape, ‘hna inin tune la ketre atr ka elo.’ Mekune hnyawa ju së la pengöne ini cili.

¹² Ame ngöne la kola hnaho së, tre, thaa hna huliwane pala kö la ngönetrei së. Hanawange la ketre ceitun: E medrenge petre kö la nekönatr, thatreine kö nyëne troa atre la hmekune la lue im me lue ca i nyën. Ngo kolo hi a enijëne menune la lue iwanakoim, me lepe la iqëmeke i nyën, ene pe sesëkötre ngazo ju hi me akötr. Qa ngöne lai, hnei nyëne hna enijëne lapane me huliwane la itre götrane la ngönetrei nyën, jëne tro hi nyëne lai a hetrenyi la itre ini. Ijije jë hë la medrenge  troa feke ca, me tro, uti hë la nyinyape nyën. * Haawe, nge tune kaa fe lo pengöne lo ka kuci elo? Ame la easa goeë angeic e sesë me ujë hnyawa e caha, nge lolo nge pëkö itria la aqane enije i angeic, haawe, thaa sihngödri kö koi së laka, menyike hë la itre ijune i angeic, hna hutri junë angeice hnyawa göi troa kuca la itre ewekë cili. Thaa ka traqa xane kö la atrein kowe lai ka elo; ame la angeic a atreine troa sesë me kuca la itre xaa ewekë ju kö, tre, hnene laka nyimutre catre la itre hawa hnei angeic hna xome göi troa pane hnëkëne me huliwane la ngönetrei angeic. Ame la troa huliwane la ngönetrei, hna qaja hnei Tusi Hmitrötr, ka hape, “co hi la thangan.” Ngo drei kö la esisitriane la thangane nyine tro sa kapa qa ngöne la hne së hna huliwane la atrehmekune së ngöne la götrane la ua!—1 Timoteo 4:8.

13. Tro sa inine me huliwane tune kaa la atrehmekune së?

¹³ Ame ngöne la itusi celë, tre, ase hë së lo ithanatan atrune hë la ewekë ka troa xatua së matre troa huliwane la atrehmekune së, ene pe ijiji së hë troa mele nyipici koi Iehova ceitune me ketre atr ka egöcatre ngöne la götrane la ua. Loi e troa mekune hnyawa la itre trepene meköti me itre wathebo i Akötresie, me thithi fë itre ej ngöne la easa axecië mekune ngöne la nöjei drai. Ame ngöne la nöjei easa axecië mekun, thele jë ka hape: ‘Nemene la itre wathebo maine itre trepene meköti ka ihmeku memine la ewekë celë? Tro ni a tro thenge tune kaa? Nemene la mekune nyine axeciën ka troa amadrinë Tretretroti e koho hnengödrai?’ (Ite Edomë 3:5, 6; Iakobo 1:5) E xecie hë la itre mekune së, ke, hne së hna nyi trepene hnene la itre wathebo maine itre  trepene meköti pena, haawe, atreine hë së lai wanga atrehmekune la loi qa ngöne la ngazo. Tro la ini memine la aqane huliwa cili a xatua së troa itre atr ka egöcatre ngöne la götrane la ua.

14. Nemene la aja ka troa eje the së matre tro sa kökötr ngöne la götrane la ua, nge nemene la nyine tro sa hmekëne me mekune hnyawa?

¹⁴ Maine ijije hi troa macaj hnene la ketre atr, ngo ame göi troa kökötr ngöne la götrane la ua, tre, ka pëkö ifegon. Kola kökötre la atr e hna xen. Celë hi matre hnei Paulo hna qaja ka hape: “Ame la xeni, te, thatraqane la ite ka tru.” Ame la ketre aqane troa eköthe la lapaune së, tre, ene la troa catre xome pala hi la xeni ka catr ngöne la götrane la ua. Ame la easa trongëne la itre hne së hna inin, tre, celë hi la inamacane lai, nge kola qaja hnei Tusi Hmitrötre ka hape: “Kasisitia la inamacan.” Qa ngöne lai, nyipi ewekë tro sa akökötrene la aja the së kowe la itre nyipici hna hamëne hnene la Tretretro së. (Ite Edomë 4:5-7; 1 Peteru 2:2) Nyipici, ame la troa hetrenyi la atrehmekune memine la inamacane qaathei Akötresie, tre, thaa nyine tro kö sa pi mama fë. Nyipi ewekë tro sa isa waipengö së pala hi matre thaa tro kö a nue la pi mama maine itre xaa engazo së pena troa cia me kökötr ngöne la itre hni së. Hna cinyihane hnei Paulo ka hape: “Thelejë e kuhu ite hni nyipunieti kö, hape u, nyipunieti hë ngöne la lapaun ; tupathi nyipunieti ju kö.”—2 Korinito 13:5.

15. Pine nemen matre nyipi ewekë la ihnim e easa ajane troa kökötr ngöne la götrane la ua?

¹⁵ Maine ase hë xupe la ketre uma, thaa fenesi pala kö la huliwa nyine kuca kowe ej, ke, tro hmaca kö lai a lapaa nyihnyawan. Nge nyipi ewekë catre hmaca fe la troa thupëne me nyihnyawane la uma, nge e traqa ju la ketre ewekë ka hnyipixe ngöne la mel, ma tro jë lai a kuca hmaca la ketre hnahag. Maine tro sa macaje me cile huti ngöne la götrane la ua, nemene la ka nyipi ewekë nyine tro sa kuca? Loi e troa tro pane la ihnim. Nyipi ewekë tro sa akökötrene pala hi la ihnimi së koi Iehova, me kowe fe la itre trejine me easë. Ke e paatre kö the së la ihnim, ame asë hi la atrehmekune së memine la nöjei ewekë asë hne së hna kuca, tre, ka tro asë hi itre eje a gufa, tune la ketre mejene ilu menu. (1 Korinito 13:1-3) Tro la ihnim a aijijë së matre ketre Keresiano së ka macaj me ka kökötre lolo pala hi ngöne la götrane la ua.

16. Nemene la aqane mekune hna sajuëne hnei Satana, nge nemene la ewekë hnei Iehova hna hamë së nyine thupë së?

¹⁶ Tro sa pane ce wange la ketre götrane ne la huliwa së. Nyipi ewekë  tro sa thupëne la aqane mekune së, matre tro sa eköthe la mele së me hane atre drei Keriso ka nyipi lolo. Satana la ka musinëne la fene celë, nge ka atreine catre angeic troa ukune la itre atr matre tro angatr a kapa la ketre aqane mekune ka ngazo, ka ahajihajine la nyipi aqane troa goeëne la itre drai elany, kola imekuhni, nge pë hë mejiun. (Efeso 2:2) Thaa tro kö a eje la aqane mekune celë thene la ketre Keresiano, kola aceitunëne lai memine la hnyiqetre ngöne la ketre uma sinöe. Eloine pe, Iehova a hamëne la ketre ewekë ka sisitria nyine troa thupë së, ene la mejiun.

17. Tune kaa la aqane amamane hnene la Wesi Ula i Akötresie la enyipiewekëne la mejiun?

¹⁷ E hnine la Tusi Hmitrötr, kola meköle wengë la itre hnepe götrane ne la ixetre ne isi ngöne la götrane la ua; ka nyipi ewekë catre la ixetre cili ngöne la kola pi lepe akeinyi së hnei Satana memine la fene celë. Ame la ketre götran ka nyipi ewekë ne la ixetr, tre, ene la itrapetr, kolo “mejiune la mel.” (1 Thesalonika 5:8) Ame ngöne lo itre hneijine i Tusi Hmitrötr, atre hnyawa hi hnene la sooc, laka, thatreine kö tro angeic a mele ngöne la hna isi, e paatre kö thei angeice la itrapetr. Hna atuthe la itrapetr fao hnei maano maine ikupeine ne öni, göne matre e traqa ju lepe la he ne la sooc, tre, thaa tro kö angeic a eatre menu. Tune la itrapetr a thupëne la he, kolo mina fe a thupëne la aqane mekune së hnene la mejiun.

18, 19. Nemene la tulu hnei Iesu hna hamën ngöne la aqane troa catre mejiun, nge tune kaa la aqane tro sa xötrethenge la tulu i nyidrë?

¹⁸ Iesu la tulu ka sisitria ngöne la aqane troa catre mejiun matre tro pala hi a cile hut. Pane mekune hmaca ju së lo itre hnei nyidrëti hna xomihnine ahoean ngöne lo jidri tixenuë ne nyidrëti e celë fen. Hna wanaxoeë nyidrë göi manie, hnene hmaca kö lo ketre enehmu i nyidrë. Hna kelikelë nyidrëti fe hnene la ketre atr ka atre nyidrëti hnyawa. Hna nuetriji nyidrëti hnene la itre xan me kötre nyidrë. Hna thipe triji nyidrë hnene la itre atrene la nöje i nyidrë, me sipone catrën matre troa athipi nyidrë hune la sinöe hnene la itre sooc ne Roma. Thaa sihngödri kö koi së laka, hnei Iesu hna qëmeke kowe la itre itupathi ka tru catre kö hune la itre hne së hna cile kow. Nemene la ka xatua nyidrë? Kola qaja ngöne Heberu 12:2, ka hape: “Ate xomi hnine la satauro, nge tha nyipine la hmahma, ngöne la madine hna amë xajawa i nyidë, ame hna munëti ngöne la götrane maca ne la therone i Akötesie.” Thaa hnei Iesu kö hna thëthëhmine “la madrine hna amë xajawa i nyidë.”

¹⁹ Nemene la madrine hna amë xajawa i Iesu? Atre hi nyidrëti laka maine tro nyidrëti a xomihnine ahoeane la itre itupath, tro hë nyidrëti a hane ahmitrötrëne la ëje i Iehova. Tro hë nyidrëti a anyipicine  hnyawa laka, ka sili trenga thoi lae Satana. Pë hmaca ju kö ketre mejiune hmaca ka hamë madrine ka tru koi Iesu! Ketre atre hi nyidrëti laka, tro Iehova a amanathithine la aqane mele nyipici nyidrë, nge hetrenyi qëmeke i nyidrë la ketre ijine ka lolo kola troa caasi hnei nyidrë memine la Keme i nyidrë. Hnei Iesu hna catre lapa xome pala hi la mejiune ka lolo cili ngacama atraqatre ju hë la itre akötre hnei nyidrëti hna cile kow. Nyipi ewekë tro fe sa hane tui nyidrë. Ketre, hetrenyi fe la madrine hna amë qëmeke së. Iehova a atrunyi së me nue së troa xome la hnëqa, ene la troa ixatua matre troa ahmitrötrëne la ëje i Nyidrë ka sisitria catr. Ijije hi tro sa amamane ka hape ka sili trenga thoi Satana, hnene la hne së hna aja Iehova ceitu me Atre Musi Cil me thupë së kö ngöne la ihnimi ne la Tretretro së, ngacama tru ju hë la itre jol me itre itupath hne së hna qëmeke kow.

20. Nemene la ka troa xatua së matre thaa tro kö a athixötrën la mekuna së, nge troa cile huti pala hi la mejiune së?

²⁰ Ngacama Iehova hmekuje kö a troa nyi jun kowe la itre hlue i Nyidrë, ngo sisitria catre pala kö la etrune la aja ka eje e kuhu hni Nyidrë troa kuca lai. (Isaia 30:18; Malaki 3:10) Nyidrëti a aejëne la itre aja ne la itre hlue i Nyidrë. (Salamo 37:4) Haawe, epi thaa tro kö sa thëthëhmine la mejiun ka eje e kuhu hni së, ene la tro sa hane öhne elanyi la kola eatr la nöjei ewekë hna thingehnaeane hnei Akötresie. Thaa tro pi kö sa kei thenge la itre mekune ne la fene i Satana ka ngazo, ka iapoizinë, nge ka qali. Maine easa drenge ka hape kolo mina ha nango löthe la itre hni së hnene la mekune ne la fene celë, haawe, catre jë së thithi koi Iehova matre tro sa hetrenyi “la tingetinge ka sisitia qa thei Akötesie hune la nöjei mekun’ asë.” Tro la tingetinge celë hna hamëne hnei Akötresie, a thupëne la itre hni së memine la itre mekuna së.—Filipi 4:6, 7.

21, 22. (a) Nemene la mejiune ka lolo hna piine hnene la “ka ala nyimu atraqat”? (b) Nemene la götranene la mejiune ne la Keresiano ka nyipi ewekë koi së, nge nemene la ewekë ka xecie hnyawa e kuhu hni së?

 ²¹ Drei la ketre mejiune ka lolo catr nyine tro sa mekune hnyawa pala hi! Maine easë fe la ketre atrene la “ka ala nyimu atraqat,” ka troa “tropi qa ngöne la aköte atraqat,” mekune ju së la mel hna troa amë qëmeke së laka easenyi catre hë. (Hna Amamane 7:9, 14) Pine laka kola troa apaatrenyi Satana me itre dremoni epine palua, haawe, ketre ithuecatre ka tru catre lai, ngacama nango jole pala kö tro sa trotrohnine lai enehila. Matre drei e easë la ka thaa hane kö cile kowe la itre iajojezi Satana? Ngo e paatre hë elanyi la iajojezi cili, drei jë kö elanyi la madrine së troa huliwa me saze la fen matre tro ej a paradraiso, nge kola troa musi e koho hnengödrai hnei Iesu memine lo itretre ce musi me nyidrë, ene lo ala 144 000! Drei kö la madrine së elanyi ngöne la kola troa apaatrene la nöjei meci asë, memine la kola troa mejë hmaca qa hna meci lo itre atr hne së hna hnim, me melëne la mel hnei Akötresieti hna ajane me hnëkëne thatraqai së! Ame hë la easa pexeje trootro, ketre easë fe a kapa la ketre manathithi ka tru, ene lo hna thingehnaeane ngöne Roma 8:21—“hna nue gufane ka hadehadeu ne la ite nekö i Akötesie.”

²² Iehova a ajane troa nuamacanyi së hnyawa, thatreine kö tro sa trotrohnine la etrune la inuamacanyi cili. Hetrenyi la jëne troa hane nuamacanyi së, ene la troa drengethenge. Hapeu, thaa ewekë kö lai ka troa upi së troa kuca asë la hne së hna atreine enehila matre troa drengethenge Iehova ngöne la nöjei drai ne mele së? Qa ngöne lai, epi tro sa xup adraië së ngöne la lapaune së ka nyipi hmitröt, nge lapa qale catre kowe la ihnimi Akötresieti uti hë epine palua!