Thenge la hna qaja hnei Tusi Hmitrötr, eu nge pine nemene matre loi e tro la ketre föe Keresiano a atu he? Loi e tro sa ce wange la götrane celë, jëne la hnei Paulo, ketre atr hna aijijën hnene la uati hmitrötr troa cinyihan. Nyidrëti a hamëne la itre hna amekötine ka nyipi ewekë catre koi së matre troa axeciëne hnyawa la itre mekune ka atrunyi Akötresie. Ame ngöne 1 Korinito 11:3-16, Paulo a qaja amamane la köni ewekë nyine tro sa wanga atrun: (1) Itre huliwa ka upe la ketre föe troa petrëne la ketre sine maano, (2) Itre ijine tro nyiidro a kuca lai, nge (3) Itre kepine matre nyiidro a trongëne la hna amekötine celë.

Itre huliwa. Lue huliwa hna amexeje hnei Paulo; ene la kola thithi me kola perofeta. (Xötre 4, 5) Eje hi laka, ame la kola thith, tre, celë hi aqane tro së lai a fe la itre hni së koi Iehova cememine la qou. Ame enehila, ame la kola perofeta, tre, ene la troa hamëne la ini hna nyi trepene hnene la Tusi Hmitrötr, ketre huliwa hna kuca hnene la ketre Keresiano ka cainöj. Hapeu, Paulo kö a qaja ka hape, loi e tro pala hi la föe a petrë sine maano e nöjei ijine nyiidro a thithi me inine la itre trenge nyipici ne la Tusi Hmitrötr kowe la ketre atr? Ohea. Ketre hetre  ijine kö e tro la föe ka thith a petrë sine maano maine kola hamë ini pena.

Itre ijin troa atu he. Lue ijine hna amexeje hnei Paulo, maine lue götrane hnë kuci huliwa, ene ngöne la hnepe lapa me e hnine la ekalesia. Öni nyidrëti, ka hape: “Trahmanyi la he i fö . . . Ame la föe ate thithi me perofetan, nge tha hna pete kö, te, kola tha metötëne la he i nyidro.” (Xötre 3, 5) Ame la hna amekötine kowe la hnepe lapa, tre, trahmanyi caasi hi la hnei Iehova hna iëne matre troa he ne la föe. Maine thaa nyiidro kö a wanga atrehmekune ka hape föi nyiidro la ka mus, tro hë nyiidro a ahmahmane la föi nyiidro, e traqa fe nyiidro a hane xome menune la itre hnëqa hnei Iehova hna athipe kowe la trahmany. Drei la ketre ceitun, maine ka nyipi ewekë koi eahlo tro la föi eahlo a hane sine la eahlo a xomiujine la ketre ini Tusi Hmitrötr, eje hi laka, tro hë eahlo a wanga atrehmekune la musi ka eje thei nyidrë jëne la hna petrë sine maano. Tro eahlo a kuca tune lai ngacama hna bapataiso nyidrë maine thaa ase pala kö, pine laka nyidrëti la he ne la hnepe lapa. * Maine nyiidro a thithi maine hamë ini pena qëmekene la nekö i nyiidro trahmanyi hna bapataisone hë, eje hi laka, tro nyiidro mina fe a atu he, thaa hnene kö laka angeice la he ne la hnepe lapa, ngo hnene laka hna hamëne la musi kowe la itre trahmanyi ne la ekalesia ne Keresiano.

Ame mina fe ngöne la götrane la ekalesia, öni Paulo e amexej, ka hape: “Maine kete ate a pi kelikelë, te, pëkö thina lai the huni ka tune, me ite ekalesia i Akötesie.” (Xötre 16) Ame ngöne la ekalesia ne Keresiano, tre, hna hamëne la musi kowe la itre trahmanyi hna bapataison. (1 Timoteo 2:11-14; Heberu 13:17) Kolo hmekuje hi lo itre trahmanyi hna acile troa qatre thup me drikona, lo itre ka troa kuca la hnëqa hna hamëne hnei Akötresie, göi troa hiane hnyawa la itre mamoe i Nyidrë. (Ite Huliwa 20:28) Hna traqa la itre xaa ijin, hna hëne la ketre föe Keresiano matre troa cilëne la ketre hnëqa, nyine cilëne hnene la ketre trahmanyi ka bapataiso hë. Drei la ketre ceitun, maine jë tro eahlo a xomiujine la icasikeu thatraqane la huliwa ne cainöj, pine laka pëkö, maine paatre ju kö la trejine trahmanyi ka troa cile fë la hnëqa celë. Maine pena, eahlo a xomiujine la ketre ini Tusi Hmitrötr hna sa ha, nge hetre trahmanyi ka bapataiso hë ka hane sin. Pine laka, ame la itre huliwa celë, tre, sine trongene pala hi lo itre xaa hnepe hna amekötine nyine troa kuca hnine la ekalesia, qa ngöne lai, tro eahlo a  petrëne la ketre sine maano. Aqane tro eahlo lai a atrehmekune laka hnëqa lai hna athipe thatraqane la trejine trahmany.

Ketre, hetrenyi la itre xaa götrane ne la hmi, laka, thaa nyipi ewekë kö kowe la ketre trejine föe troa petrëne la ketre sine maano. Hanawange la ketre ceitun, thaa ka nyipi ewekë kö koi eahlo troa atu he ngöne la eahlo a qeje mekun ngöne lo itre icasikeu ne Keresiano, me ngöne la eahlo a ce cainöje trootro me föi eahlo ngöne itre hnalapa maine me ketre trejine trahmanyi pena, maine ngöne la eahlo caasi hi a ini tusi maine thithi cememine la itre nekö i eahlo trahmany ngo ka thaa bapataiso kö. Nyipici, maine hna amejëne la itre xaa hnying, nge thaa xecie hnyawa kö kowe la ketre trejine föe la nyine troa kuca, loi e tro eahlo a thele mekun. * Nge maine thaa xecie hnyawa pala kö e kuhu hni eahlo nge kolo pala hi a huliwa la mekuthethewe i eahlo, thaa ka ngazo kö e troa petrëne la ketre sine maano.

Itre kepin. Ame ngöne la xötre 10, tre, easa öhne la lue kepine matre kola ajane hnene la trejine föe troa ami nyine petr, kola hape: “Ijije kowe la föe troa hete hatene la musi hune la he i nyido pine la nöjei angela.” Ame la pane kepin, tre, kola mama ngöne la trenge ewekë hna hape, “hatene la musi.” Ame la kola ami nyine petr, tre, celë hi ketre aqane tro la föe a amamane, laka, atrehmekune hi eahlo la musi hnei Iehova hna amë thene la itre trejine trahmanyi e hnine la ekalesia. Qa ngöne lai, eahlo a amamane la ihnimi eahlo me nyipici koi Iehova Akötresie. Ame la hnaaluene kepin, tre, kola mama ngöne la itre hnëewekë, hna hape “pine la nöjei angela.” Tune kaa la aqane troa ketr la itre ua ka trene men hnene la hna atu he hnene la ketre trejine föe?

Hetre hni ne aja ne la itre angela troa goeëne laka, hna wanga atrehmekune la musi Akötresie jëne la organizasio i Iehova, e koho hnengödrai me e celë fen. Angatre mina fe a kepe thangane qa ngöne la itre tulu ne la itre atr ka ngazo, ngöne la götrane celë. Eje hi laka, loi e tro mina fe angatr a hane drengethenge la hnei Iehova hna amekötin; nge celë hi ketre itupathi ekö kowe la itre angela ka ala nyim, pine laka thaa hnei angatre kö hna idrei. (Iuda 6) Ame enehila, kola  goeëne hnene la itre angela la ketre föe Keresiano ka amamai tulu, ngöne laka ka maca hnyawa ha eahlo, me ka hetre wanga atrehmekun, nge tru la atreine i eahlo ngacama co pë hë thene la ketre trejine trahmanyi e hnine la ekalesia; ngo ame pe, eje pala hi thei eahlo la hni ne ajane troa drengethenge la musi nyidrë. Ame ngöne la itre xaa ijin, ame la föe, tre, ketre Keresiano hna iën eahlo, ka troa ce musi elanyi me Iesu. Tro hë eahlo a hane lapane la ketre göhnë ka draië kö hune la hna kapa hnene la nöjei angela, nge tro mina fe eahlo a hane ce musi me Iesu e koho hnengödrai. Drei la ketre tulu ka lolo catre kowe la itre angela troa goeëne lai enehila! Nyipici, drei la ketre hnëqa ka tru hna aijijëne la itre trejine föe asë, troa amamane la idrei angatr cememine la hni ka ipië jëne la aqane nyipici me idrengethenge hnei angatr, qëmekene la itre milio lao angela ka mele nyipici!