Ketre akötr ka tru catr koi së ngöne la kola upetrön eë la ketre atrene la hnepe lapa së maine ketre sinee së qa ngöne la ekalesia, pine laka thaa hnei angeice kö hna ietrane la ngazo i angeic. Ame la aqane ujë së kowe la hna amekötine hnene la Tusi Hmitrötr ngöne la götrane cili, tre, ka tro hi lai a amamane la ejuine la ihnimi së koi Akötresie memine fe la lapaune së kowe la hnei Nyidrëti hna amekötin. * Tro sa ce wange la itre xaa hnying hna amejëne ngöne la götrane celë.

Tune kaa la aqane tro sa ujë kowe la ketre atr hna upetrön eë qa hnine la ekalesia? Önine la Tusi Hmitrötr, ka hape: “E hetre ate thei nyipunie a hape tejin, ngo ate nyi xetë, me meciun, me thithi kowe la ite idola, me cateqë, me iji ka hait, me thepe mo, the ce xeni kö me ite ka tune lai.” (1 Korinito 5:11) Ame göne la ketre atr ka “tha cile huti kö ngöne la ini Keriso,” tre, easa e ka hape: “The kepe angeice kö kowe la ite uma i nyipunie, nge the italofa kö me angeic ; ke ame la ate italofa me angeic, te, kola hane sine la nöjei huliwa ka ngazo i angeic.” (2 Ioane 9-11) Thaa tro pi kö sa ce tro maine ce ithanata pena memine la itre hna upetrön eë qa hnine la ekalesia. Kola qaja ngöne La Tour de Garde ne 15 Diseba 1981, götrane 25, ka hape: “Maine tro hi a ibozu, celë hi ketre jëne tro lai a porotrik memine la ketre hna upetrön eë, nge ketre, ame la pune lai, tre, troa nyiqaane aeasenyi së hmaca memine lai hna helën. Hapeu, ajane kö së troa nyiqaane tune lai memine la ketre atr hna upetrön eë qa hnine la ekalesia?”

Hapeu, ka nyipi ewekë kö troa iananyi catr memine la itre hna upetrön ëe? Eje hi, ke nyimutre la itre kepin. Ame la pane kepin, tre, easë hi lai a amamane la nyipici së koi Akötresie memine la Wesi Ula i Nyidrë. Thaa easë hmekuje kö a drenge thenge Iehova ngöne la itre götrane gaa hmaloi hi, ngo ngöne mina fe la itre götrane ka hace catre koi së e troa drenge thenge Nyidrë. Ihnimi së koi Akötresie la ka troa uku së troa drenge thenge la itre trenge wathebo i Nyidrë asë, me wanga atrehmekune fe laka, ame Nyidrëti, tre, ka meköti me ihnim, nge ame la itre wathebo i Nyidrë, tre, nyine loi koi së. (Isaia 48:17; 1 Ioane 5:3) Ame la hnaaluene kepin, tre, jëne la kola upetrön eë la ketre atr ka thaa ietrane kö la  ngazo i angeic, tre, kolo hi lai a thupë së memine la ekalesia wanga ixötrekeu lai ewekë ka ngazo ngöne la götrane la ua me kowe la thiina së, nge ketre, matre tro pala hi a hlemu loi la ekalesia. (1 Korinito 5:6, 7) Ame la hnaakönine kepin, tre, maine tro sa ce xöle memine la itre trepene meköti ne la Tusi Hmitrötr, tro fe ha hetre thangane lai kowe la hna upetrön eë qa hnine la ekalesia. Maine easa jë thenge la hna axecië mekune hnene la kometr ne iameköti, eje hi lai laka, ijije tro la aqane ujë ka loi së celë a ketr la hni ne la atre kuci ngazo, ene lo ka xele kö uti pala hi enehila troa kapa la ixatua qaathene la itre qatre thup. Qa ngöne la hna thupa la aqane imelekeu i angeice memine la itre hnei angeic hna hnim, eje hi lai ka troa xatua angeic troa “ujë la hni,” me wanga atrehmekune hnyawa la etrune la ngazo i angeic, nge thupene lai, tro hë angeic a thele la aqane troa bëeke hmaca koi Iehova.—Luka 15:17.

Tune kaa e hna upetröne ju la ketre atrene la hnepe lapa së? Ame ngöne la hnepe lapa, ka catre la aqane imelekeu ne la itre atren, celë hi matre e cili hi la hna troa tupathe hnyawa la nyipi ihnimi së kowe la itre wathebo i Iehova. Tune kaa la aqane tro sa ujë kowe la ketre atrene la hnepe lapa së hna upetrön eë? Thaa ijije kö tro sa ithanatan ngöne la itusi celë, la nöjei götrane asë, ngo loi e tro hi sa ce wange la lue götrane ka sisitria.

Ame ngöne la itre xaa ijin, tre, maine jë ka ce mele pala kö epuni memine la ketre atrene la hnepe lapa i epuni hna upetrön eë hë. Ngacama hna upe la ketre atr, ngo thaa kolo kö lai a qaja ka hape, thaa ketre atrene la fami hmaca kö angeic; ijije pala hi tro angeic a hane kuca la itre jol hna kuca o drai hnene la hnepe lapa i angeic. Ngo ame pe, jëne la aqane ujë i angeic, hnei angeice kö hna sipu thë la otrene ka iothekeu angeic memine la hnepe lapa i angeic ngöne la götrane la ua. Haawe, maine easa ajane troa amamane la nyipi ihnimi së koi Iehova, eje hi lai laka, loi e thaa tro kö sa nue la ketre atrene la hnepe lapa së hna upetrön eë, troa hane ce tro me easë ngöne la itre huliwa së thatraqane la hmi koi Akötresie. Drei la ketre ceitun, maine kola inine la Tusi Hmitrötr hnene la hnepe lapa, nge kola hane sine lai hnene la ketre atren hna up, eje hi laka, loi e tro pe hi angeic a hane lapa thaup. Ngo e nekönatre lai hna upetrön, haawe, hnëqa i keme me thine pala kö troa inine me haji nyën. Qa ngöne lai, ijije tro la itre keme me thine ka ihnim a xomiujine la ini Tusi Hmitrötr memine la nekö i nyidro. *—Ite Edomë 6:20-22; 29:17.

 Ngo ame la ketre nyine troa ce wang, tre, ene la ketre atrene la hnepe lapa së ka trene sipu hnalapa ha, ngo hna upetrön eë qa hnine la ekalesia. Ngacama hetrenyi la itre xaa hnepe ijin kola mama laka nyipi ewekë troa iöhnyi me angeic, göi troa ce kuca la itre huliwa ka sisitria ne la hnepe lapa, ngo ame pe, loi e troa thupën matre tro hi sa tuluthe la itre hnepe ijine cili. Ketre, thaa tro kö la itre atrene la hnepe lapa ne Keresiano ka mele nyipici, a thele kepine matre troa iöhnyi memine la ketre sinee hna upetrön eë qa hnine la ekalesia, nge ka mele e tröne la hnalapa. Loi pe, troa uku angatr hnene la aqane nyipici angatre koi Iehova memine la organizasio i Nyidrë, matre troa nyi xölene la itre hna amekötine hnene la Itre Hna Cinyihane thatraqa i ange hna upetrön eë qa hnine la ekalesia. Ame la epuni a catre troa nyipici koi Iehova, tre, nyine loi kowe la atre kuci ngazo, nge ijije fe troa xatua angeic troa kepe thangane qa ngöne la ihaji hnei angeic hna kapa. *—Heberu 12:11.