1-3. (a) Tune kaa la aqane goeëne la huliwa hnene la itre atr ka nyimutre? (b) Hnene la Tusi Hmitrötr hna qaja aloine tune kaa la aqane troa waipengöne la atre catre huliwa, nge nemene la itre hnying hna troa ce wange ngöne la mekene celë?

TRU catre hnei atr ka huliwa enehila, ngo thaa hna ithue madrine i angatre kö hnene la huliwa i angatr. E tru hnei hawa ne troa kuca la ketre huliwa, ngo e paatre kö la madrin, tro lai a kuca hunyinyine lai huliwa ngöne la nöjei drai. Troa ithuecatre tune kaa kowe la itre ka ujë tune la, matre tro angatr a wanga atrune la huliwa i angatr, me öhnyi madrine elanyi qa ngön?

² Kola qaja aloine hnei Tusi Hmitrötr la atre catre huliwa. Hna qaja ka hape, ketre manathith la troa huliwa me kapa la itre wene la hna huliwa. Hnei Solomona hna cinyihane ka hape: “E xeni la ate me ij, me madine la loi ngöne la nöjei huliwa i angeic’ asë, celë hi ahnahna i Akötesie.” (Ate Cainöj 3:13) Iehova a hnimi së nge Nyidrëti pala hi a thele la ewekë ka sisitria thatraqane la mele së; aja i Nyidrëti fe tro sa kepe madrine qa ngöne la huliwa së me itre wene ne ej. Maine easa ajane troa lapa qale catre kowe la ihnimi Nyidrë, nyipi ewekë tro sa mele thenge la aqane waiewekë i Nyidrë memine la itre trepene meköti göi huliwa.—Ate Cainöj 2:24; 5:18.

³ Tro sa wange ngöne la mekene celë, la foa lao hnying, hna hape: Nemene la aqane tro sa kepe madrine qa ngöne la hne së hna catre huliwa? Nemene la itre pengöne huliwa ka thaa loi kö kowe la itre nyipi Keresiano? Tro sa tuluthe tune kaa la etrune la huliwa së koi maseta memine la itre huliwa së ngöne la götrane la ua? Nge nemene la huliwa ka nyipi ewekë nyine tro sa kuca? Ame la hnapan, tre, tro sa pane xome la tulu ne la lue ka huliwa catr, e celë fen me e koho hnengödrai, ene Iehova me Iesu Keriso.

4, 5. Tune kaa la aqane amamane hnei Tusi Hmitrötr laka ka catre huliwa Iehova, nge hetre wene ne ej?

⁴ Iehova la Atre Huliwa Ka Sisitria. Kola qaja ngöne Genese 1:1, ka hape: “Hnei Akötesie hna xupe la hnengödrai memine la fene hnengödrai ngöne la qan.” Ame lo Akötresieti a ase xupe la itre ewekë e celë fen, öni Nyidrëti jë hi ka hape, “nyipi loi.” (Genese 1:31) Haawe, atraqatre la madrine i Nyidrë kowe la nöjei huliwa i Nyidrëti e celë fen. Iehova la “Akötesie tene manathith,” eje hi laka, atraqatre la madrine i Nyidrë hnene la hna catre huliwa, me itre wene ne ej.—1 Timoteo 1:11.

⁵ Thaa ka mano kö Akötresieti huliwa. Itre macatre thupene la hnei Nyidrëti hna xupe la fen me itre aliene ej, hnei Iesu hna qaja ka hape: “Hnei Kakati hna huliwa uti hë enehila.” (Ioane 5:17) Nemene la hna kuca hnene la Tretretro? Nyidrëti a huliwa qa hnengödrai kowe la fen, me eatrongëne me thupëne la itre atr. Hnei Nyidrëti hna eköthe la “xupuana ka hnyipixe,” ene lo itre Keresiano hna iëne ka troa ce musi me Iesu e koho hnengödrai. (2 Korinito 5:17) Hnei Nyidrëti fe hna catre huliwa matre troa eatrëne la aja i Nyidrëti kowe la itre atr, ene la tro la itre ka hnimi Nyidrë, a mele epine palua ngöne la ketre fene ka hnyipixe. (Roma 6:23) Kola amadrinë Iehova hnene la itre thangane la huliwa i Nyidrë. Nyimutre la itre atr ka kapa la maca ne Baselaia, itre milio la etrun; hna tro xomi angatr hnei Akötresie me saze la mele i angatr matre troa lapa qale catre kowe la ihimi Akötresie.—Ioane 6:44.

6, 7. Nemene la aqane hë Iesu hnene laka ketre atr ka catre huliwa hnyawa?

⁶ Kola hlemu loi fe hnei Iesu hnene la itre huliwa ka tru hnei nyidrëti hna kuca qane ekö catr. Qëmekene tro Iesu a traqa e celë fen me nyi ngönetrei ne atr, hnei nyidrëti hna pane nyi hlue i Akötresie ceitune me “ate xup” la nöjei ewekë asë “e hnengödrai me e celë fen.” (Ite Edomë 8:22-31; Kolose 1:15-17) Ame hë la Iesu e celë fen, tru catr pala hi hnei huliwa i Iesu. Hnei nyidrëti mina fe hna canga inine tratrau sinöe, ene pe hë nyidrëti jë ka hape, “ate tratrau.” *  (Mareko 6:3) Ketre huliwa ka thaa hmaloi kö troa kuca, ke, ka nyimu ejolen; kola jole catre ekö, pine laka, pë fe kö hna xawa sinöe göi troa thupa me salemën, ke, pë petre kö masine tune enehila. Pane meku Iesu ju së e tro troa thele sinöe, maine jë troa sa la itre isinöe me hule itre eje kowe la götran hnei nyidrëti hna troa tratraune itre ej! Pane meku nyidrëti ju hne së e kuci uma, tro lai a hnëkëne me acile la itre agö ne hune la uma, me can la itre iqëhnelö, me hane kuca la itre icea me itre xaa ewekë nyine aliene la uma! Eje hi lai, atrepengöne hnyawa hi Iesu la madrine ka xulu qa ngöne la ketre huliwa hna atreine kuca hnyawa.

⁷ Iesu la ketre atr ka catre tro fë hnyawa la huliwa ne cainöj. Ngöne la köni macatre nge sin, hnei Iesu hna nue apexejen la mele i nyidrë, kowe la huliwa ne cainöj. Thaa hnei nyidrëti kö hna aluuzine la traeme i nyidrë, ke, catre la aja i nyidrëti troa cainöj matre ketr la itre atr ka nyimutre, ene pe nyidrëti a nyiqaane e hmahmakany me huliwa uti hë heji lapa. (Luka 21:37, 38; Ioane 3:2) Ame ngöne la drai ka pexej, tre, “nyidëti a trongëne la nöjei lapa, me nöjei hnalapa, kola cainöjën, me amamane la maca ka loi ne la baselaia i Akötesie.” (Luka 8:1) Nyimutre nge nanyi la itre gojenyi hnei Iesu hna trongën; kola trongë iwaca ngöne la itre gojenyi gaa so hnei hna thotho, matre troa tro fë la maca ka loi kowe la itre atr.

8, 9. Tune kaa la aqane öhnyi eloine Iesu la huliwa hnei nyidrëti hna catre kuca?

⁸ Hetre eloine kö la hnei Iesu hna kapa qa ngöne la hna catre huliwa ngöne la hna cainöje trootro? Eje hi! Hnei nyidrëti hna traan la itre itine la nyipici ne la Baselaia, nge nyidrëti a nue pe, thupe i nyidrë, la itre hlapa ka elehmedrë hë troa menuën. Ngöne la ketre ijine Iesu a kuca la huliwa i Akötresie, hnei nyidrëti hna pane thipëne la xen, ke, ame la ka sisitria koi nyidrë, tre, ene la troa tro pane la aja ne la Tretretro i nyidrë. (Ioane 4:31-38) Pane mekune ju së la madrine i nyidrë ngöne lo nyidrëti a umuthe la huliwa i nyidrëti e celë fen, ene pe nyidrëti a qaja jë kowe la Tretretro i nyidrë e koho hnengödrai, ka hape: “Ase hë ni atrunyi cilieti e celë fen ;  ase hë ni umuthe la huliwa hnei cilieti hna nunuë nie troa kuca.”—Ioane 17:4.

⁹ Iehova hi me Iesu lo lue ka pane amamai tulu hnyawa kowe la itre atr ka ajane troa öhnyi eloine la hnei angatr hna catre huliwa. Tro la ihnimi së koi Iehova a upi së troa “nyi tupu Akötesie.” (Efeso 5:1) Kola uku së fe hnene la ihnimi së koi Iesu troa “xöte thenge la ite thupa ca i nyidë.” (1 Peteru 2:21) Haawe, tro sa ce wang enehila la aqane tro së a hane kepe eloine la hne së hna catre huliwa.

10, 11. Nemene la ka xatua së troa eëne la ketre aqane waiewekë ka lolo göne la huliwa së?

¹⁰ Hetre göhnene fe la huliwa i maseta ngöne la mele ne la nyipi Keresiano. Aja së fe la troa kepe madrin me öhnyi thangane ka loi qa ngöne la huliwa hne së hna kuca koi maseta, ngo troa ketre jole ka tru e upi së jë troa kuca la ketre huliwa hne së hna xelen. Matre ngacama thaa aja së kö, ngo nemene hö la aqane tro sa kepe thangane qa ngön?

¹¹ Hnene la hne së hna wanga aloine la itre ewekë. Ame la itre xaa ewekë qëmeke së, tre, pengönë hë itre eje lai nge pëkö atreine troa saze, ngo ame pe, tre, ijije hi tro sa saze la aqane tro sa waipengöne itre ej. Maine tro sa thele troa trotrohnine hnyawa la aqane waiewekë i Akötresie, hetre ixatua ha koi së troa eëne la aqane tro sa wanga aloine la huliwa hne së hna kuca. Hanawange la ketre ceitun, maine epuni la hene ne la ketre hnepe lapa, pane mekune ju la isa pengöne huliwa nyine tro epuni a kuca, ngacama hetre hnei epuni hna xele ma kuca, ngo ame pe, tre, sipu hnëqa i epuni hi lai hnine la fami. Celë hi matre, ame hi lai epuni a aeatrëne lai göi troa thupëne la itre hnei epuni hna hnim, tre, thaa ewekë ka co kö lai xajawa i Akötresie. Kola qaja hnene la Wesi Ula i Nyidrë ka hape, ame la hene ne la fami ka thaa xome kö la hnëqa i angeic e hnine la fami, tre, “atraqate la ngazo i angeice hune la ate thipetriji Iehova.” (1 Timoteo 5:8; ithuemacany e cahu fen, MN) Maine tro sa atrehmekune hnyawa laka, ame la huliwa së, tre, ka tro lai a sajuëne la aja së, ene la troa eatrëne la hnëqa hnei Akötresieti hna athipe koi së, haawe, tro ha hetre madrine së troa kuca la huliwa cili, nge celë hi itre loi lai ka sihngödri kowe la itre sine huliwa së.

12. Nemene la itre loi hna troa kapa hnene la atre catre huliwa nyipici koi maseta?

 ¹² Hnene la hna catre huliwa me nyipici. E hne së hna catre me thele troa atreine kuca hnyawa la huliwa së, tre, celë hi ka troa aijijë së lai troa kapa la itre manathith ka nyimutre. Hna wanga atrune hnene la itre maseta la itre ka atreine huliwa hnyawa. (Ite Edomë 12:24; 22:29) Pine laka easë la itre nyipi Keresiano, haawe, loi e tro sa nyipici ngöne la easa kuca la huliwa së, ene laka thaa tro kö a atrekënö manie, maine itre jiane huliwa, maine traeme i maseta pena. (Efeso 4:28) Tune la hne së hna wange hë ngöne lo mekene hnapan, ame la atr ka nyipici, tre, tro angeic a manathith. Hna mejiune kow la atr ka huliwa nyipici. Nge ngacama thaa hna canga  wanga atrehmekune hnene la maseta së la itre huliwa së ka loi, ngo ame pe, eje the së la madrin ka xulu qa ngöne laka hetrenyi së la “mekuthethewe ka loi” nge atre hi së laka, easa amadrinëne la Akötresie hne së hna hnim.—Heberu 13:18; Kolose 3:22-24.

13. Nemene la thangane la thiina së ka lolo ngöne la hne së hna huliwa?

¹³ Hnene la hna atrehmekune laka ijije hi tro la thiina së a atrunyi Akötresie. Maine tro sa catre melëne la thiina ne Keresiano ngöne la hne së hna huliwa, tro hi a öhne lai hnene la itre xan. Nemene jë la thangane la aqane ujë së? Easë hi lai a “alolone . . . la ini Akötesie Ate amele shë.” (Tito 2:9, 10) Tro fe hë la thiina ka loi së a upe la itre xan troa hane öhne la elolone la aqane hmi së, ene pe ajane jë fe troa hane atrepengön. Drei jë kö elanyi e ajane jë la ketre sine huliwa së troa atre la nyipici ne la Tusi Hmitrötr, qa ngöne la hnei angeice hna öhne la elolone la aqane ujë së ngöne la hna huliwa! Ngo hetre ketre ewekë fe ka nyipi ewekë catr, ene la ketre manathithi ka sisitria kö hune la troa atre laka, kola atrunyi Iehova hnene la aqane ujë së, nge kolo mina fe a amadrinëne la hni Nyidrë.—Ite Edomë 27:11; 1 Peteru 2:12.

14-16. Ame ngöne la easa axecië mekune göi troa xome la ketre huliwa, nemene la itre hnying nyine tro sa wanga atrune hnyawa?

¹⁴ Thaa hnene kö la Tusi Hmitrötre hna hamëne asë la nöjei ithuemacanyi göi huliwa i maseta nyine troa atre ka hape, ka loi maine ka ngazo pena. Thaa kolo kö lai a hape, tro sa canga kapa ju hi la nöjei huliwa ka traqa koi së. Ijije hi tro la Tusi Hmitrötr a xatua së troa iëne la huliwa ka hetre thangane ka loi, me ka meköti xajawa i mus, nge troa thipetrije la huliwa ka thaa nyipi loi kö koi Akötresie. (Ite Edomë 2:6) Qëmekene tro sa axeciëne ka hape tro kö sa kapa la ketre huliwa i maseta, lue ewekë ka tru nyine troa nyipi ewekëne hnyawa.

¹⁵ Hapeue la huliwa hne së hna troa kuca, thaa hna jele ngazone jë kö hnei Tusi Hmitrötr? Kola jele ngazone hnyawa hnene la Wesi Ula i Akötresie la atrekënö, me sili trenga thoi, me kuci idola. (Esodo 20:4; Ite Huliwa 15:29; Efeso 4:28; Hna Amamane 21:8) Loi e tro sa thipetrije la huliwa ka huli së troa lö e hnine la itre ewekë cili. Loi e troa sewe së pala hi hnene la ihnimi së koi Iehova troa  kapa la ketre huliwa ka uku së troa kuca la itre ewekë ka ena la itre hna amekötine hnei Iehova.—1 Ioane 5:3.

¹⁶ Maine tro sa xome la huliwa celë, easë kö a hane lö hnin me enexölen la ketre hna majemine kuca ka ngazo? Tro sa xome la ketre ceitun. Pëkö engazon e troa cilëne ngöne la ketre hna huliwa la hna ikep maine seketere pena. Ngo tune kaa ju hë e hamëne ju kowe la ketre Keresiano la ketre huliwa ngöne la ketre pital ne thi upune? Eje hi laka, thaa nöjei ka huliwa asë kö la hna ketr mekötine hnene la itre jëne troa thi upune. Ngo hapeu, thaa kolo  jë kö lai a ce kuca la ngazo, ke, atre hi së laka kola acile lai pital matre hnë thi upune, nge atre hnyawa hi së laka ka isazikeu la hna majemine cili memine la Wesi Ula i Akötresie? (Esodo 21:22-24) Pine laka easë la itre ka hnimi Iehova, thaa ajane kö së troa ahnuthi së hnene la itre hna majemine kuca ka ifeketh memine la Tusi Hmitrötr.

17. (a) Nemene la itre ewekë nyine tro sa wange hnyawa ngöne la easa axecië mekune göi troa xome la ketre huliwa? (Wange ju la itre mekune  hna eköhagen ngöne götrane 177.) (b) Tune kaa la aqane tro la mekuthethewe së a xatua së troa axeciëne la itre mekune ka amadrinë Akötresie?

¹⁷ Ijije hi troa sa la itre hnyinge ka nyimutre göi huliwa, e hne së hna wange hnyawa la itre mekune ka sa la lue hnying ka tru hna hamëne ngöne la paragarafe 15 me 16. Ketre, hetrenyi la itre xaa ewekë nyine tro sa hane wanga atrune qëmekene tro sa axeciëne ka hape, ka loi maine thaa ka loi kö la huliwa koi së. * The mekune  menune kö ka hape tro la hlue ka nyipici a acile la itre trenge wathebo ka troa eatrongë së ngöne la nöjei ewekë ka traqa koi së. Celë hi matre nyipi ewekë catre la tro sa atreine troa waiewekë. Tune la hne së hna goeëne hë ngöne la Mekene 2, nyipi ewekë troa eköthe me wenë la mekuthethewe së hnene la hna inine la aqane troa trongëne la Wesi Ula i Akötresie ngöne la nöjei drai ne mele së. Maine hne së hna “majemine huliwane la [mekuthethewe së],” tro hë ej a xatua së troa axeciëne la itre mekune ka amadrinë Akötresie me aijijë së troa lapa qale catre kowe la ihnimi Nyidrë.—Heberu 5:14.

18. Pine nemen matre thaa ka hmaloi kö troa atreine tuluthe hnyawa la itre ewekë ngöne la götrane la ua?

¹⁸ Thaa ka hmaloi kö tro sa axeciëne la itre mekune ka xatua së matre troa kepe së pala hi hnei Iehova, pine laka, easa melëne la itre “drai hnapin” cememine la “nöjei ijine ka aköt.” (2 Timoteo 3:1) Ketre ewekë ka jole catr enehila la troa thele huliwa, ngo e öhne pena ha së, tre, ketre hace la troa thupëne hutin. Pine laka easë la itre nyipi Keresiano, easa atrehmekune la enyipiewekëne la troa catre huliwa, ke, nyine emelene la hnepe lapa së. Ngo maine thaa hmeke kö së, canga tro hi la itre itupathi ngöne la hna huliwa së maine itre iajojezine la aja mo ne fen a sewe së troa eatrëne la itre aja së ngöne la götrane la ua. (1 Timoteo 6:9, 10) Loi e tro sa wange hnyawa la aqane tro sa tulu ewekë, me atrehmekune “la nöjei ewekë ka nyipi ewekë catr.”—Filipi 1:10.

19. Pine nemene matre meköti e tro sa mejiune hnene la hni së ka pexeje koi Iehova, nge nemene la ixatua hne së hna kapa qa ngöne la mejiune cili?

¹⁹ Lapaune ju koi Iehova hnene la hni nyipunieti ka pexej. (Ite Edomë 3:5, 6) Ka loi kö la tro sa mejiune koi Nyidrë? Thaa ka sihngödri hmaca kö koi së laka Nyidrëti a thupë së. (1 Peteru 5:7) Atre hnyawa kö Nyidrëti la ka nyipi ewekë koi së, nge Nyidrëti a hamë ixatua koi së. (Salamo 37:25) Haawe, loi e tro sa drenge la kola amekunë së hnene la Wesi Ula i Nyidrë ka hape: “The aja mani kö nyipunie ; meji hnine ju nyipunie la ite ewekë hna heteny, ke ase hë [Akötresie] ulatin, ka hape, Tha trojë kö ni a nue eö, nge tha trojë kö ni a tiji ’ö.” (Heberu 13:5) Nyimutre la itre hlue i Akötresie ka  cainöj ngöne la drai ka pexej, ka jele nyipicine la aqane hamëne Akötresieti la itre ka nyipi ewekë nyine emele i angatr. Maine tro sa mejiune hnyawa laka tro Iehova a thupë së, thaa tro hë së a hnehengazo menu ngöne la easa thupëne la hnepe lapa së. (Mataio 6:25-32) Thaa tro pi kö la huliwa i maseta a ananazijë së me upi së troa wanga hmalohmaloeëne la itre huliwa ngöne la götrane la ua, tune la troa cainöjëne la maca ka loi memine la troa sine la itre icasikeu.—Mataio 24:14; Heberu 10:24, 25.

20. Nemene la aliene la hna hape, troa maca la alamek, nge tune kaa la aqane atrune la aqane waiewekë cili?

 ²⁰ Loi e troa maca la alameke së. (Mataio 6:22, 23) Ame la troa maca la alameke së, tre, kola hape thaa tro kö a sili xaa ejolen la mele së. Ame la alameke ne la Keresiano ka maca, tre, caa jëne goeë ewekë hi, ene la troa kuca la aja i Akötresie. Maine ka maca hnyawa la alameke së, haawe, thaa tro jë kö a thepe së hnene la pi aja manie, wanga nyinyape thele menune jë së la mani matre kapa atrun, me thele la ketre aqane mele ka iadraië. Thaa tro pi kö a iaö së hnene la itre ka salemë mo, lo angatr a qaja aloine la itre ewekë ka hnyipixe me itre jiane huliwa ka sisitria, kolo hi matre tro sa mejiune kow me mekune ka hape, e pë kö së, thaa madrine hë së. Nemene la nyine tro sa kuca matre tro pala hi a maca la alameke së? Troa neëne troa thue la itre gufa ka thaa nyipi ewekë kö kowe la mel. Thaa tro pi kö sa nyi ejolene la mele së hnene la itre ewekë ka troa xome menune pala ha la traeme së me itre mekune së. Loi e tro pe sa xome la eamo qa hnine la Tusi Hmitrötr, ene la troa mejihnine “xeni me ixet.” (1 Timoteo 6:8) Thele jë troa ahmaloeëne la mele së.

21. Pine nemen matre nyipi ewekë tro sa eköthe la itre nyine troa kuca panën ngöne la mele së, nge nemene la nyine tro sa amë panëne ngöne la mele së?

²¹ Loi e troa eköthe la itre nyine troa pane kuca ngöne la ua, me cile huti ngöne itre ej. Pine laka hna nyi ifegone hi la traeme së, nyipi ewekë tro sa eköthe amë la itre aja hne së hna mekune troa eatrën. Maine thaa hmekëne kö së, canga tro hi a thapa la traeme së hnene la itre mekune ka thaa nyipi ewekë kö nge tro itre ej a he lo itre aja së ka tru. Matre nemene la nyine tro sa amë panëne ngöne la mele së? Nyimutre la itre atr e celë fen ka amë panën me kuca la itre ini ka tru, göi troa hetrenyi la ketre huliwa hna wanga atrune hnene la fene celë, nge tru la trenge thupen nyine troa kapa. Ngo Iesu a ithuecatre kowe la itretre drei nyidrë, me hape: “Pane thelejë nyipunie la Baselaia i Akötesie.” (Mataio 6:33) Haawe, pine laka, itre nyipi Keresiano së, loi e tro sa amë panëne la Baselaia i Akötresie ngöne la mele së. Ame la aqane mele së, ene la itre hne së hna iën, me itre aja hne së hna eköth amë, me itre huliwa hne së hna catre xom, tre, itre eje hi lai a amamane laka, ka nyipi ewekë  catre kö la itre ewekë ne la Baselaia memine la aja i Akötresie koi së, hune la troa nyinyape thele mo me itre aja ne la fen.

22, 23. (a) Nemene la huliwa ka tru hna troa xome hnene la itre nyipi Keresiano, nge tro sa amamane tune kaa laka ka nyipi ewekë catre koi së la huliwa cili? (Wange ju la itre mekune  hna eköhagen ngöne götrane 180.) (b) Nemene la ewekë ka xecie hnyawa koi së göi huliwa i maseta?

²² Thaa sihngödri kö koi së laka, easenyi catre hë së kowe la pune la fen, haawe, loi e tro sa wanga atrune hnyawa la huliwa ka tru hna troa xome hnene la itre nyipi Keresiano, ene la troa cainöj me inine la itre atr. (Mataio 24:14; 28:19, 20) Tune lo Tulu së, ene Iesu, easa thele troa catre xome la huliwa cili ka troa amelene la itre atr. Tune kaa la aqane tro sa amamane ka hape, ka nyipi ewekë catre koi së la huliwa cili? Nyimutre la itre hlue i Akötresie ka catre cainöjëne la maca ka loi hnene la hni ka pexej, ene lo itretre cainöj e hnine la ekalesia. Itre xan a eköthe la mele i angatr matre troa pionie maine mesinare pena. Ame itre keme me thin, tre, angatr a wanga atrehmekune la enyipiewekëne la troa eköthe la itre aja ngöne la ua, ene pe angatr a ithuecatre kowe la itre nekö i angatr troa nue la mele i nyudren kowe la huliwa i Iehova. Hetre eloine kö hna öhne hnene la itre trejine qa ngöne la hnei angatr hna catre cainöjëne la Baselaia? Eje hi, hetre thangane ka loi hnei angatr hna kapa! Ame la troa nyi hlue i Iehova hnene la hni së ka pexej, tre, celë hnyawa hi ka troa hamë madrine lai koi së, nge thatreine kö troa e la itre manathithi hna troa kapa qa ngön.—Ite Edomë 10:22.

²³ Ala nyimu së itretre huliwa ngöne la drai ka pexeje koi maseta, matre troa thupëne la hnepe lapa së ngöne la götrane la ngönetrei. Mekune hnyawa kö së laka, aja i Iehova tro sa öhnyi eloine la hne së hna catre huliwa. Ame ngöne la easa nyi trepene la itre mekuna së me itre huliwa së ngöne la aqane waiewekë i Iehova memine la itre trepene meköti Nyidrë, ene pe kola hetre madrine së mina fe troa kuca la huliwa së. Ngo loi e thaa tro pi kö sa nue la huliwa i maseta troa thingi jë së troa kuca la huliwa ka tru nyine tro sa xom, ene la troa cainöjëne la maca ka loi ne la Baselaia i Akötresie. Maine tro sa amë panëne la huliwa cili ngöne la mele së, easë hi lai a amamane la ihnimi së koi Iehova, ene pe easë fe a hane lapa qale catre kowe la ihnimi Nyidrë.