1, 2. Tune kaa la aqane eköthe Balaama la aqane tro angeic a akötrëne la nöje i Iehova?

AME la atre nyi ie, tre, ketre hetre itha kö hnei angeic hna majemine tro kow. Nge ketre hetre pengöne ie kö hnei angeic hna pi ea. Angeic a iëne ju la ketre maja, ngo thaa nyipi pe, me hnaan la ge i angeic, me hna la itrathinyi angeic. Kolo petre hi a trotro nge kolo fe hë hul, matre kola pej la hajujuny, nge angeic a ea jë la tha i angeic. Angeic a hnyima me madrin, pine laka, ka keukawa hnyawa la maja hnei angeic hna iën.

² Ame ngöne la macatre 1473 M.P.K., * hnene la ketre thupëtresij Balaama la ëjen, hna eköth la ketre mekun nyine maja matre troa jele la itre atr. Ame la pi tha i angeic, tre, ene lo nöje i Akötresie. Angatr a hunuma ngöne la hnapapa ne Moaba, ezine la Nöj Hna Thingehnaean. Traqa pi hi Balaama me siej ka hape, ketre perofeta i Iehova fe angeic, ngo atre meciu ewekë pe me ka thele tro Isaraela a hnëjin. Ngo hnei Iehova hna ujëne matre tro hmaca pena ha Balaama a amanathithi Isaraela. Ngo ajane catre kö Balaama troa kepe thupene qa ngöne lo huliwa ka menu, ene pe mekune ju hi angeice troa pane nyi wana maja kowe la nöje hnene la ketre ewekë ka sis, matre tro kö Akötresieti a sipu ëjine la nöje i Nyidrë. Celë hi matre Balaama a hnaane ju la ketre maja ka thatha, ene la itre föe hmae ne Moaba ka mingöming nge ka iaö.—Numera 22:1-7; 31:15, 16; Hna Amamane 2:14.

3. Tune kaa la aqane eatre hnyawa la mekuna i Balaama?

³ Hapeu, hetre thangane kö la aqane iaö i angeic? Eje hi. Kola e la treen thauzan la etrune la itre trahmanyi ne Isaraela ka kei, ke, hna jele hnene la wana maja celë, ene la hna “qane kuci ngazo la nöje  memine la ite föe ne Moaba.” Hnei angatre fe hna nyiqaane troa thili kowe la itre haze ne Moaba, tune la Baala-peora, ketre haze göi hnaho me hatr, maine haze ne kuci ngazo. Ame hë la pun, 24 000 la etrune la angetre Isaraela ka mec qëmekene troa lö kowe la Nöj Hna Thingehnaean. Hane petre hi la ketre humu atr ka tru!—Numera 25:1-9.

4. Pine nemen matre itre thauzane la etrune la angetre Isaraela ka kei me jötr hnene la kuci ngazo?

⁴ Hnei nemene matre traqa pi kowe la hulö cili? Nyimutre la itre atr ka eköthe e kuhu hni angatr la ewekë ka ngazo, ene pe nanyi hë angatre qaathei Iehova, lo Akötresie ka thepe angatr qaa Aigupito, me ithua i angatr ngöne la hnapapa, me thupë angatr me eatrongë angatr kowe la nöj hna thingehnaean. (Heberu 3:12) Hnei Paulo hna hane mekune hnyawa la ewekë cili, me cinyihane ka hape: “Kete the tro kö sha kuci ngazo, tune la hnei ite xan’ e angate hna kuci ngazo, ame hna mecipi la caate nge könite la o thausane ngöne la drai ka cas.” *—1 Korinito 10:8.

5, 6. Pine nemen matre nyipi ewekë tro sa wanga atrune la aqane edromëne la ngazo hna kuca hnei angetre Isaraela ngöne la itre Hnapapa e Moaba?

⁵ Nyimutre la itre ini ka tru ngöne la tusi Numera ka qaja la itre ewekë ka traqa koi angetre Isaraela ekö; itre ini nyine tulu kowe la nöje i Akötresieti enehila, qëmekene tro angatr a lö kowe la nöj hna thingehnaean  ka tru catre kö hune lo nöje Kanana. (1 Korinito 10:11) Hanawang la ketre ceitun, thaa isapengöne kö la aqane kuci ngazo ne la angetre Moaba ekö, memine la itre atr ne la hneijine së; ngo ame pe enehila hna haöth asë hë la fene hnengödrai. Ketre, nyimutre la itre Keresiano ka kei kowe la kuci ngazo, tune lo angetre Isaraela ekö hna iaöne hnene la ewekë cili. (2 Korinito 2:11) Zimeri lo atre traqa fë la föe ne Midiana kowe la lapa ne la itre trejin me angeic, lo itre nekö i Isaraela me lö fë kowe la uma maano i angeic; ame la itre xaa ka ce memine la nöje i Akötresieti enehila, tre, hnei angatr hna tui Zimeri, laka, hnei angatr hna ajojezine tune lai la ekalesia i Keresiano.—Numera 25:6, 14; Iuda 4.

⁶ Pane mekune jë së laka ka tune lo easë fe hi e hnine la ketre itupath ka tune ekö ngöne lo itre hnapapa ne Moaba. Mama cile hnyawa fe hi koi epuni lo mo hna thingehnaean, ene lo nöj ka hnyipixe hna lapa treqen laka calemi hë? Haawe, nga kuca jë hö së la hne së hna atrein matre troa lapa qale catre ngöne la ihnimi Akötresie, ene la troa trongëne hnyawa la hna amekötine celë, hna hape: “Kötenepi la kuci ngazo.”—1 Korinito 6:18.

7, 8. Nemene la “kuci ngazo,” nge tune kaa la aqane troa menuëne hnei itre ka kuci ngazo la itre hnei angatr hna traan?

⁷ Ame la hnepe hnëewekë hna qaja hnei Tusi Hmitrötr, ka hape, “kuci ngazo” (Qene Heleni, por·neiʹa), tre, kola qaja la itre aqane ce meköle trefën hnene la lue atr ngo thaa ka faipoipo kö, kola ena la hna amekötine hnei Tusi Hmitrötr. Kolo lai a qaja la nyi xetë, me nyi föe ne gojeny, me ce meköle trefën hnei lue ka thaa ikötresae petre kö, tune mina fe la nöjei pengöne aqane qene sodoma, laka, trahmanyi a amë la kahmitrötre i angeic ngöne la qe i föe nge tui föe fe, itre xane a jëne la hna kötrengönëeë la kola ce meköle trefën; kola huliwane menune fe la götrane gaa kahmitrötre ne la ketre atr ngo thaa föe hmunë kö. Kolo fe lai a qaja la itre ewekë ka sis hna kuca hnene la lue trahmanyi maine lue föe pena, nge tune mina fe la troa ce meköle me itre öni. *

⁸ Ka mama hnyawa ngöne la hna qaja hnei Tusi Hmitrötr, ka hape:  Ame angetre catre kuca pala hi la ngazo, tre, troa upe qa hnine la ekalesia i Keresiano, nge thaa tro kö a mele epine palua. (1 Korinito 6:9; Hna Amamane 22:15) Ketre, nyimutre fe la nöjei akötr ka traqa koi angatr enehila, pë mekune ka loi, pë hë hna mejiune kow, isa lapa me föe; thaa tingetinge hë la mekuthethew, hnaho gojeny, me tith hnei mec, maine meci pena ha. (Galatia 6:7, 8) Pine nemene matre trongëne jë angatre la ketre gojenyi ka tiqa hnei nöjei pengöne akötr? Qa ngöne laka, ala nyimu la itre atr ka thëthëhmine ka hape, ame lai ewekë ka ngazo hna traan, hnei angatre hi lai hna troa menuën elany, hna pane nyiqaane hi hnei hna goeë film ka ngazo me itre iatr ka amamai kuci huliwa ka sis.

9. Ka pë ethane kö la kuci huliwa ka sis, tune la aqane qaja i itre xan? Qeje pengöne jë.

⁹ Cia hlöeë hë la kuci huliwa ka sisi enehila, ngöne la nöjei nöj; kola amamane hnene la itre zonal, me miuzik, me televizio, me ëternet. * Hapeu, ka pë ethane kö lai tune la aqane qaja hnei itre xan? Ohea! Ame la itre ka goeëne la itre iatr ka tun, tro hë angatre lai a majemine huliwaane menune la itre kahmitrötre i angatr, nge tro ha cia hlöeë thei angatr la itre “aja ka sis,” ene pe, thatreine hë angatr nue la kuci huliwa ka sis, jilapa ha thei angatre la itre mekune hmo, kökötre hë la isazikeu e hnine la hnepe lapa, uti fe hë la sei hna cil. * (Roma 1:24-27; Efeso 4:19) Hna aceitunën la troa majemine kuci huliwa ka sis, memine lo meci hna hape iutr. Önine la ketre atr ka thele ewekë, ka hape: “Ej a kökötr me jilapane la mele ne la atr. Thatreine hmaca kö tro sa una trij, nge ka jole catr e troa apaatrene me nyinyin.”

10. Tune kaa la aqane tro sa xötrethengene la trepene meköt, hna cinyihane ngöne Iakobo 1:14, 15? (Wange ju fe la itre mekune  hna eköhagen, ngöne götrane 101.)

¹⁰ Tro sa ce wange la ketre hnëewekë hna cinyihane ngöne Iakobo  1:14, 15, kola hape: “Hna isa tupathe la nöjei ate e hna huli angate hnene la ite aja i angate kö, me hnihnin. Nge e upune hë la aja, ame hnen’ eje hna hnahonepi la ngazo ; nge e macajë hë la ngazo ame hnen’ eje hna hnahonepi la mec.” Haawe, maine mama pi hi ngöne la itre mekune së, la ketre ewekë ka ngazo, loi e troa canga thipetrij ej! Drei la ketre ceitun, maine mama pi hi la itre iatr ka ngazo, canga saze hna goe pi, maine thinge pena ju la ordinatör, maine saze nyine wange pena ngöne televizio. Loi e tro sa catre thel troa neën e ijine petre kö, wanga canga kökötre jë ej, nge tro hë sa thatreine cil me neëne la itre aja ne kuci ngazo!—Mataio 5:29, 30.

11. Ame ngöne la easa cile kowe la itre aja ka ngazo, tune kaa la aqane troa sa amamane la mejiune së koi Iehova?

¹¹ Celë hi nyipi kepine matre, kola ithuecatre koi së hnene la Atre Xupi së, ke, atre easë hnyawa kö hnei Nyidrë, öni Nyidrë: “Qangöne lai, humutheju hnei nyipunie la ite hnepe ngönetei nyipunie  e celë fen ; ene la kuci ngazo, me thina ka sis, me qene tratraij, me aja ka ngazo, me meciun, celë hi kola thithi kowe la idola.” (Kolose 3:5) Nyipici laka, celë hi ketre ewekë la ka jole catre e troa trongëne lai. Ngo mekune hnyawa pala hi së, laka, hetrenyi së la ketre kem, e koho hnengödrai, ka ihnim me ka xomihni ahoean, nyine tro sa xëwe kow.’ (Salamo 68:19) Qa ngöne lai, canga epe jë koi Nyidrë ngöne la kola löthe la he së hnene la itre mekune ka ngazo. Thithi jë matre troa hetrenyi la “men, ngo tha qa the [së] kö,” nge feje trije jë la mekune së ka ngazo matre nyi göhnene pena ha ngöne la he së la itre ewekë ka loi.—2 Korinito 4:7; 1 Korinito 9:27; wange ju la itre mekune hna eköhagen, hna hape, “Tro Ni a Utretre Tune Kaa Qa Ngöne La Ketre Hna Majemine Kuca Ka Ngazo?,” ngöne götrane 104.

12. Nemene la aliene la hnëewekë hna hape “hni” së, nge pine nemene matre nyipi ewekë tro sa thupëne hnyawan ej?

¹² Hnene la ketre ka inamacan, ene Solomona, hna cinyihane ka hape: “Nyipi thupëne hnyawa ju la hni ’ö, ke xulu hë la mele qa ngön’ ej.” (Ite Edomë 4:23) Ame la hna hape “hni,” tre, kolo hi lai a qaja la nyipi aliene hni së, lo sipu pengö së ka thaa sihngödri kö koi Akötresie. Ketre, thaa celë kö la aqane goeë së hnei atr, ngo ene pe la aqane goeëne Akötresieti la itre “hni” së; eje hi lai ka aijijë së troa hane kapa la mele ka thaa ase palua kö. Thaa ka jole kö e troa trotrohnin. Ngo ketre ewekë pe thaa nyine tro kö sa wanga ahmalohmaloeën. Qa ngöne lai, hnene lo ketre atre mele nyipici koi Iehova, ene Iobu hna isisinyikeu memine la lue meke i angeic, matre thaa tro kö a hetre mekune ka ngazo kowe la ketre jajiny. (Iobu 31:1) Drei la ketre tulu ka loi koi së! Celë hi aqane waiewekë fe hnene la ketre atre cinyanyine la tusi Salamo, nge ka mama ngöne la nyidrëti a thith, ka hape: “Ëzineju la lue mekenge mate tha tro kö ni a goeëne la thoi.”—Salamo 119:37.

13. Drei lae Dina, nge pine nemene matre qaja jë ka hape, gufa kö la inamacane thei angeic ngöne la kola ië enehmu?

¹³ Tune lo aqane wange së ngöne lo Mekene 3 ne la tusi celë, troa xulu koi së la thangane ka loi maine ka ngazo qa ngöne la aqane imelekeu së memine la itre enehmu së. (Ite Edomë 13:20; 1 Korinito 15:33) Hanawang la ewekë ka traqa koi Dina, nekö i Iakobo jajiny. (Genese 34:1) Ngacama hna ini angeice hnyawa qa ngöne lo kola co,  ngo hnei Dina hna majemine thele sine ce elo thene la itre jajinyi ne Kanana. Caasi hi ekö la pengö i angetre Moaba me Kanana, itre ka hlemu troa kuci ngazo. (Levitiko 18:6-25) Hna goeë Dina jë hi ekö hnei itre thupëtresiji ne Kanana, laka Sekema fe hi la ketre, ngacama nekö trahmanyi lai “ka hlemu loi” ngöne la lapa ne la keme i angeic asë, ngo ame jë fe Dina koi angeic, tre, ketre jajiny nyine jele ngöne la ihnö matre kuci ngazo memin.—Genese 34:18, 19.

14. Nemene la hulö ka traqa, pine la hna ië sine ce elo menu hnei Dina?

¹⁴ Maine jë, thaa traqa kö la meku kuci ngazo fe koi Dina, lo lai angeic a öhnyi Sekema. Ngo ame pe Sekema, mekuna i angeice hi lai, ke, thiinan ne hi la angetre Kanana lai, thaa ka hmitrötre fe kö koi angatre la kuci ngazo. Maine hnei Dina jë hna thele troa jipa me nue triji Sekema, ngo thaa ijije kö la trenge catre i angeic, hane hi lai Sekema a “xomi nyëne” me “angazo nyën.” Maine mama pë hë e thupene laka, kola “hnimi” Dina hnei angeic, ngo ase hë kuca lo ewekë ka ngazo. (Genese 34:1-4) Ketre, thaa Dina hmekuje kö la ka akötre pine lai. Ngo itre hulö fe ka kösau a xulu pi qa ngöne la aqane ië sine ce elo i angeic, ame hna ahleuhleune me adrone la ëje ne la lapa i angeic.—Genese 34:7, 25-31; Galatia 6:7, 8.

15, 16. Tro sa kapa tune kaa la nyipi inamacan? (Wange ju fe la itre mekune  hna eköhagen, ngöne götrane 109.)

 ¹⁵ Nyipici laka, hetre ini hna xom hnei Dina, ngazo pe ini pë hë a traqa nge ase hë angazo angeic. Ame koi itre ka hnimi Iehova me drengethenge Nyidrë, tre, atreine hi tro angatr a neëne la ini hna hamëne hnei akötr. Jëne la idrengethenge i angatr koi Akötresie, ene pe iëne ju angatre troa ‘ce tro me ite ka inamacan.’ (Ite Edomë 13:20a) Haawe, angatre ha trotrohnine la “ite jëne ka loi asë,” me neëne troa  ajojezi angatre menu hnene la itre jol me itre akötr.—Ite Edomë 2:6-9; Salamo 1:1-3.

¹⁶ Ame la inamacan qaathei Akötresie, tre, eje thene la itre ka thele ej, me melëne ej, hnene la hna catre thith, me inine pala hi la Wesi Ula i Akötresie, memine la itre itus hna hnëkëne hnene la hlue ka nyipici me ka inamacan. (Mataio 24:45; Iakobo 1:5) Ketre ka nyipi ewekë fe la hni ka ipië, thiina ne la atre thele troa trongëne la itre eamo qa hnine la Tusi Hmitrötr. (2 Ite Joxu 22:18, 19) Hanawange la ketre ceitun, maine jë troa kapa hnene la ketre Keresiano la ini ka qaja la pengöne la hni angeic, laka ka iaö me nyipi ngazo. (Ieremia 17:9) Ngo tune kaa e traqa ju koi angeic la ketre jol, nge gufa kö thei angeice la aqane waiewekë ka inamacan, ka tru jë kö lai thei angeice la hni ne ipië, ene pe tro hë angeic a kapa la itre eamo ne ihnim, me itre nyine ixatua?

17. Qaja jë la ketre ewekë hna melën e hnine la ketre hnepe lapa, nge amamane jë la aqane tro la ketre kem a ithanatane lai memine la nekö i nyidrë jajiny.

¹⁷ Hanawange la ketre ewekë hna melën hnene la ketre atr. Thaa hna nue kö hnene la kem la nekö i nyidrë jajiny troa ce tro memine la ketre Keresiano trahmany, nge pëkö sine tronge i nyidro. Öni jajinyi ka hape: “Kakaa, ka tune lo thaa mejiune kö nyipëti koi ni? Pëkö hnei nyiho hna troa kuca ka ngazo!” Maine jë ka hnimi Iehova la jajiny, nge thaa angeice kö a meku ewekë ka ngazo, ngo hapeu, angeice kö lai a “trongëne la inamacane” i Akötresie? Angeice kö lai a ‘kötrene la kuci ngazo’? Maine angeice pena a qene hmo me “lapaune kowe la hni angeice kö”? (Ite Edomë 28:26) Maine jë, mekune fe hi së la itre xaa trepene meköt ka troa xatuane la keme memine la nekö i nyidrë jajiny, troa ce ithanatane la mekune cili.—E jë la Ite Edomë 22:3; Mataio 6:13; 26:41.

18, 19. Nemene la ketre itupath hna melëne hnei Iosefa, nge tune kaa ha la aqane cile angeic kowe la itupathi cili?

¹⁸ Hnei Iosefa, ketre nekö trahmany ka mingöming me lolo thiina, nge ka hnimi Akötresie, hna kötrene la kuci ngazo; angeice la ketre trejine me Dina. (Genese 30:20-24) Nekönatre petre kö Iosefa, nge angeic a öhne la itre ethane la ngazo hna kuca hnei Dina. Kola mama hnyawa, ka hape, celë hi itre ewekë hnei Iosefa hna lapa mekune pë hë; ketre tune mina fe la aja ka eje thei angeic troa lapa qale  catre kowe la ihnimi Akötresie; itre ewekë lai ka thupë angeic ngöne lo itre macatre thupen, lo kola tupathi angeic “o drai,” hnene lo föe ne la maseta i angeic e Aigupito. Ketre, thaa ijiji Iosefa kö troa nuetrije pi hi la hnëqa i angeic me tro! Hnei angeic hna catre cil kowe la jole cili, jëne la inamacan. Thaa mano kö angeice hna thipëne pala hi la sipo i föi Potifara, uti hë la angeic a kötre eahlo.—Genese 39:7-12.

¹⁹ Pane mekune jë së la ewekë celë: maine hna kei ju la hni Iosefa kowe lai föe, me nyi göhnene la itre mekune ka ngazo ngöne la he i angeic, ke tro kö angeice lai a catre mele nyipici koi Akötresie? Ohea. Ngo thaa hna löthi Iosefa kö hnene la itre mekune ka sis, loi pe hnei angeic hna wanga atrune la aqane imelekeu i angeic me Iehova, celë hi hna amamane hnene la aqane sa i angeic kowe la föi Potifara. Öni angeic, ka hape: “Tha [hnene kö la tixeng] hna cipa ni la kete ewekë, nyipoti pe hi, ngöne laka isola i nyidëti nyipo ; nge tro ni a kuca tune ka la ngazo atraqate cili, nge ngazo koi Akötesie?”—Genese 39:8, 9.

20. Tune kaa la aqane mama thei Iosefa la itre pengö i Akötresie?

²⁰ Pane mekune jë së la etrune la madrine Iehova, ngöne la Nyidrëti a goeë Iosefa e thele troa mele nyipici koi Nyidrë o drai, ngacama nanyi angeic qaathene la lapa i angeic. (Ite Edomë 27:11) Ame hë thupene lai, thaa hnei Iehova hmekuje kö hna kuca matre troa thepe Iosefa qaa kalabus, ngo hnei Nyidrëti fe hna kuca matre troa ketre atr ka sisitria e Aigupito thupe i Farao, angeice la atrekë qan la troa elemekene la huliwa ne thewe xen! (Genese 41:39-49) Drei la enyipicine la trenge ewekë hna cinyihane ngöne Salamo 97:10, ka hape: “Angete hnine koi Iehova fe, sisinejë la ngazo ; nyidëti a thupëne la ite u i ange hnimina i nyidë ; tro nyidëti a thepe angate qa ngöne la ime ne la nöjei ka ngazo”!

21. Tune kaa la aqane amamane hnene la ketre trejine trahmany ne Afrik la elolone me ecatrene la mekune hnei angeice hna axeciën?

 ²¹ Ketre tune fe enehila, tru la itre hlue i Iehova ka amamane ka hape, angatr a “methinëne la ngazo, me hnine la loi.” (Amosa 5:15) Kola mekune hmaca hnene la ketre trejine trahmany qaa Afrik, lo kola tupathi angeic; hnene la ketre sine ce ini me angeic jajiny hna qaja ka hape, maine tro angeic a ixatua ngöne la ijine itupath, haawe, tro hë la jajinyi a ce meköle me angeic. Önine la trejine trahmany: “Hnenge hna canga thipëne la sipo ne la jajiny. Hnene la aqane catre mele nyipicing, matre eje kö thenge la sipu pengö i eni, me hetre metrötre kowe la meleng, ewekë ka tru alameken hune la gool me sileva.” Nyipici, ame la troa “madine fë la ngazo ka canga pat,” tre, hnepe ijine hi lai ka xoxopatr, nge ka afetrane la itre akötr ka nyimutre. (Heberu 11:25) Ketre, ka pë pengöne la madrine cili e tro sa hane goeëne la itre manathithi ka epine palua, thangane la hne së hna drengethenge Iehova.—Ite Edomë 10:22.

22, 23. (a) Maine hna kuca la ketre ngazo ka tru hnene la ketre Keresiano, pine nemen matre thaa ka luuzi kö angeic? (b) Nemene la ixatua ka lolo thatraqane la ketre atr ka kuca la ngazo?

²² Pine laka itre atr ka ngazo së, easa isine troa he la itre aja ne la ngönetrei së, me kuca la thiina ka meköt xajawa i Akötresie. (Roma 7:21-25) Atrehmekune hnyawa hi Iehova la ewekë cili, me “mekune laka so ne hnadro shë.” (Salamo 103:14) Ngo ame ngöne la itre xaa ijin, maine jë tro la ketre Keresiano a kuca la ketre ngazo ka tru. Hapeu, ka luuzi hë angeic? Ohea! Eje hi lai laka, ame la atr kuca la ngazo, tre, tro kö angeic a menuëne la ngazo, tui Davita joxu. Ngo ame Iehova, tre, “ate sheng” pala hi Nyidrë la itre ngazo ne la itre atr ka ietrane me ‘iamamanekeune’ la itre ngazo i angatr.—Salamo 86:5; Iakobo 5:16; Ite Edomë 28:13.

²³ Ketre, hnei Akötresieti hna hamën ce memine la ihnim la “itre atr nyine ahnahna,” ene la itre qatre thup ka macaje ngöne la götrane la ua; nge hna aijijë angatr troa canga hamë ixatua. (Efeso 4:8, MN, 12; Iakobo 5:14, 15) Ame la hnëqa i angatr, tre, ene la troa xatuane la atr ka kuca la ngazo matre troa iloi hmaca me Akötresie me akökötrene la aqane imelekeu i angeic me Nyidrë; nge tune la hna qaja hnene la atr ka inamacan, “hete hni angeice hë,” haawe, thaa tro hmaca kö angeic a kuca la ngazo.—Ite Edomë 15:32.

24, 25. (a) Tune kaa la aqane amamane ngöne Ite Edomë 7:6-23 laka, ka “pë hni” la nekö trahmany? (b) Tro sa ‘hetre hni’ tune kaa?

²⁴ Kola qaja hnei Tusi Hmitrötr la itre atr ka “pë hni” memine la itre ka “hete hni.” (Ite Edomë 7:7) Pine laka ka thaa trotrohnine hnyawa kö nge thaa hna melëne hnyawa petre kö la huliwa i Akötresie hnene la ketre atr, haawe, maine jë ka “pë hni” angeic nge thatreine kö angeic troa atreine waiewekë me amekötine la itre jë i angeic. Tune lo nekö trahmanyi hna qaja ngöne Ite Edomë 7:6-23, maine jë tro angeic a canga kei kowe la ketre ngazo ka tru. Ngo “ame la ate ka hete hni,” tre, tro angeic a waipengöne hnyawa la atr e kuhu hni angeic hnene la hna inine pala hi la Wesi Ula i Akötresie, me catre thithi lapa. Nge ngacama atr ka ngazo, ngo ame pe, tro angeic a kuca la hnei angeic hna atrein matre troa ihmeku memine la aja i Akötresie la itre mekuna i angeic, me itre aja i angeic, me itre aliene la hni angeic me itre aja hnei angeic hna troa eatrën ngöne la mele i angeic. Qa ngöne lai, “kola hnimi angeice kö,” maine thele troa qaja aloinyi angeice kö, me “troa öhnyi loi.”—Ite Edomë 19:8.

²⁵ Isa thele jë ka hape: ‘Xecie hnyawa kö koi ni laka, ka lolo la itre hna amekötine hnei Akötresie? Eje kö thenge la mejiune laka, e hnenge hna fedre catr kowe itre ej, haawe, tro ha atraqatre la manathithi hnenge hna troa kapa?’ (Salamo 19:7-10; Isaia 48:17, 18) Maine hetrenyi the së la hnepe luelue, haawe, thele jë troa cile kowe la jole cili. Mekune hnyawa ju la itre ethane la hna thaa wanga atrune la itre wathebo i Akötresie. Ketre, “demeju, nge atejë laka ate ihnimi Iehova” hnene la hna melëne la nyipici me nyialiene la he i nyipunie hnene la itre mekune ka lolo, tune la itre ewekë ka nyipici, me nöjei ewekë hna qaja aloin, me nöjei ewekë ka meköt, me nöjei ewekë ka wië, me nöjei ewekë ka lolo, me nöjei ewekë ka hlemu loi. (Salamo 34:8; Filipi 4:8, 9) Loi e tro epuni a atre hnyawa laka, maine tro epuni a catre kuca tune lai, ketre tro fe ha kökötre catre la ihnimi epuni koi Akötresie, nge tro fe hë epuni a hnine la itre hnei Nyidrëti hna hnim, me sisine la itre hnei Nyidrëti hna sisin. Thaa atr ka pexeje kö Iosefa. Ngo hnei angeic hna “kötene la kuci ngazo,” pine laka, hnei angeic hna nue Iehova troa wenë la mele i angeic ngöne la itre macatre ka nyimutre, me aijijë angeic troa amadrinë Akötresie. Epi tro fe a eje the së la aqane ujë cili.—Isaia 64:8.

26. Nemene la topik ka nyipi ewekë hna troa ce ithanatane me sisedrën ngöne la lue meken ne la itus?

 ²⁶ Thaa hnene kö la Atre Xupi së hna kuca la itre götrane gaa hmitrötre ne la ngönetrei së matre troa öhnyi madrine hnene la hna huliwaane menune ej, ngo hna kuca lai matre ijiji së troa hnaho nge tro fe a hetre madrine nyine ithawakeun e hnine la faipoipo. (Ite Edomë 5:18) Tro pë hë sa ithanatane me sisedrëne ngöne la lue mekene thupen, la aqane waiewekë i Akötresie göi faipoipo.