1, 2. Ngöne nemene götrane la kola qaja la huliwa ne la kuli, ka hape, ketre ka ithupë nge tune kaa la aqane aceitunëne ej memine la mekuthethew?

HNENYIPAJIDRI hë, nge kola hmulizië la thupëtresiji hune la ibeetre i nyidrë. Nyiqaane ho jë hi la kuli nyidrë, ke, hnene ej hna drenge la kola malil. Thaa cile ju kö la ka atrekënö, ngo angeic a kötre pi. Ame lo thupëtresij, nyidrëti a sesë uti nyimenyime me lö pi qëhnelö eë, ngo pë hë mejene ho. Kötre tro hë lo atrekënö. Simano catre ju pe hi lo thupëtresij. Maine thaa ka hmeke ju la kuli me ho, nemene la ewekë ka troa traqa? Maine jë troa atrekënö la itre ewekë ne lo lai thupëtresij, maine tro pena a lepi angeic maine humuthe pena.

² Nyimutre la itre hnalapa hna thupëne enehila hnene la itre kuli. Maine ka hmeke la kuli, eje hi lai laka, tro ej a ketre emele së. Ketre ceitune mina fe lai memine la ketre ahnahna ka sisitria hnei Iehova hna hamë së, ene la mekuthethew. (Iakobo 1:17) Maine pë ju mekuthethewe së, eje hi lai laka, ka luuzi hnyawa ha së, pëkö caa ixatua ngöne la mele së. Maine hna huliwaane hnyawa la mekuthethew, eje hi lai laka, tro hë ej a köjane hnyawa la gojenyi ka lolo nyine tro sa xötrëne, matre emele së me nyine tro sa qale catre kow. Haawe, loi e tro sa wange la pengöne la mekuthethew, memine la aqane huliwa ne ej. Thupene lai, tro sa ce ithanatane la itre mekune celë: (1) Nemene la nyine tro sa kuca matre troa inine la mekuthethewe së, (2) pine nemene matre loi e tro sa wanga atrune mina fe la mekuthethewe ne la itre xan, nge (3) nemene la thangane ka loi hne së hna troa kapa qa ngöne la mekuthethewe ka loi.

3. Nemene la sipu aliene la hnëewekë qene Heleni hna hape, “mekuthethew,” nge nemene la huliwa ne ej thene la itre atr?

³ Ame la qene Heleni ne la hnëewekë ka ujëne la “mekuthethew”  e hnine la Tusi Hmitrötr, tre, ka lue pengön. Ame la hnapan, tre, hna hape, “syn” (ce) me “eidesis” (atrehmekune), nge kola qaja la atrehmekune ka eje e kuhu hni ne la atr, ka aijijë angeic troa wange la loi me ngazo.” Thaa ceitu së kö memine la itre xaa hna xupe hnei Akötresie, hna hamë së hnei Nyidrë la atreine ka aijijë së troa isa waipengö së kö. Ijije hi tro sa pane cil me pane isa waipengö së me amekötine la thiina së. Kola huliwa hnene la mekuthethewe së ceitu me ketre atre amekötin, ej a waipengöne la itre huliwa së, memine la itre aqane ujë së, maine itre ewekë pena hne së hna iën. Maine atreine hi tro ej a eatrongë së kowe la ketre mekune e xecie koi së, ka hape, ka loi maine troa hmekë së pena qa ngöne la ketre ewekë ka ngazo. Tro mina fe hë eje a akeukawane la hni së e inamacane la aqane ië ewekë së, maine akötrë së pena e hne së ju hna iëne troa kuca la ewekë ka ngazo.

4, 5. (a) Easa atre tune kaa ka hape isa hetre mekuthethewe i Adamu me Eva ekö, nge nemene la thangane la hnei nyidroti hna ena la wathebo i Akötresie? (b) Nemene la itre ceitune ka amamane la aqane huliwa ne la mekuthethewe thene la itre atr ka mele nyipici ekö ngöne lo itre hneijin qëmekene lo hneijine i Keriso?

⁴ Ame la atreine cili ka eje thene la trahmanyi memine la föe, tre, ka qaane hë ekö catre ngöne la qaan la kola xupi nyidro. Hna isa amamane hnei Eva me Adamu laka isa hetrenyi thei nyidro la mekuthethew. Easa öhne hnyawa la enyipicine lai ngöne la aqane hmahma i nyidro, thupene lo hnei nyidroti hna ena la wathebo. (Genese 3:7, 8) Pine la hna cia thei nyidro la mekuthethewe ka ngazo, ene pe upi nyidroti pi troa kuca la ketre ewekë ka ngazo. Hnei nyidroti hna thë troa mele hutrö kowe la wathebo i Akötresie. Ene pe, kola hë nyidroti, ka hape, lue ka icilekeu me ithupëjia me Iehova Akötresie. Pine laka lue atr ka pexeje nyidro ngöne la qaan, haawe, nyidroti lai a kuca atreen la ngazo, celë hi matre thatreinë hë nyidroti troa bëeke koi Akötresie.

⁵ Thaa ceitui Adamu kö me Eva memine la itre atr ka nyimutre, angetre drenge la hna qaja hnene la mekuthethewe i angatr, ngo thaa itre atr ka pexeje pe angatr. Drei la ketre ceitun, hna qaja hnei Iobu ketre thupëtresiji ka mele nyipici, ka hape: “Ini a xölehuje catëne la thina ka meköting, nge tha tro kö ni a nu ; tha tro kö  la hning’ a qaja angazo ni e kete draing.” * (Iobu 27:6) Iobu la ketre trahmanyi ka huliwane hnyawa la mekuthethewe i nyidrë. Nyidrëti a thele matre tro pala hi nyidrëti a drenge la mekuthethewe i nyidrë, me nue ej troa amekötine la itre huliwa i nyidrë me itre mekun hnei nyidrëti hna axeciën. Qa ngöne lai, ijije hi tro nyidrëti a qaja amamane la madrine i nyidrë, pine laka, thaa hna iaö nyidrëti kö hnene la mekuthethewe i nyidrë, maine ahmahmanyi nyidrë me nyi zö nyidrëti pena. Hanawange la eisapengöi Iobu me Davita. Ame la ketre ijin, thaa hnei Davita kö hna metrötrë Saulo, lo joxu hna iëne hnei Iehova, “thupene lai ame hna thine la hni Davita.” (1 Samuela 24:5) Eje hi laka, hna kepe eloine hnei Davita la kola huliwa la mekuthethewe i nyidrë, me ini nyidrëti troa thupëne matre thaa tro kö a gufa thei nyidrë la metrötr.

6. Nemene la ka amamane ka hape, ame la mekuthethew, tre, celë hi ketre ahnahna hna hamën kowe la nöjei atr asë?

⁶ Hapeu la mekuthethew, ahnahna thatraqane hmekuje hi la itre hlue i Iehova? Tro sa pane wange la itre trenge ewekë hna qaja hnei Paulo aposetolo, kola hape: “E kuca xanëne kö hnei angete ethen, ka pë wathebo, la nöjei ewekë ka ijije la wathebo, pëkö wathebo i angat, ngo angate kö la wathebo i angat ; nge angate a amamane la huliwa ne la wathebo hna cinyihane ngöne la ite hni angat, kola anyipicine hnene la mekuthethewe i angat, nge ite mekune i angate a isa jele ngazone me isa jele loinyi angate kö.” (Roma 2:14, 15) Celë hi matre, ame angetre thatre la itre wathebo i Iehova, tre, kola ameköti angatre fe e itre xaa ijin hnene la mekuthethewe i angatr troa huliwa thenge la itre trepene meköti Akötresie.

7. Pine nemene matre kola amenu së e itre xaa ijin hnene la mekuthethew?

⁷ Ngo ame itre xaa ijin, tre, mekuthethewe hmaca pena ha a iamenu. Pine nemen? Mekune ju së lo kuli, laka ka gufa lai kowe la hnalapa e ka meköle thaup ej. Nge ame pena trene kuli, tre, e thaa semesinene kö angeice lai kuli e ho, haawe, tro ha ngazo la pune koi angeic. Ketre tune fe la hni së, laka, maine troa ajojezine ej hnene la itre sipu aja së, haawe, tro hë la mekuthethewe së a amenu së. Nge  maine thaa hna xome kö la Wesi Ula i Akötresie troa köja gojenyine hnyawa la mekuthethewe së, haawe, thatreine jë kö tro sa atrehmekune hnyawa la loi memine la ngazo ngöne la itre götrane ka tru ne la mele së. Eje hi lai laka, nyipi ewekë catre tro sa nue la uati hmitrötre i Iehova troa eatrongë së matre troa tro xomi së hnyawa. Hna cinyihane hnei Paulo, ka hape: “Hnene la mekuthethewe ni xajawanëti la Uati Hmitöt.” (Roma 9:1) Troa xecie tune kaa koi së ka hape, ka huliwa la mekuthethewe së thenge la uati hmitrötre i Iehova? Ijije hi tro sa kuca tune lai, e hne së hna inine ej.

8. (a) Troa ajojezine tune kaa la mekuthethewe hnene la hni së, nge nemene la hne së hna troa wanga atrune hnyawa ngöne la easa axecië mekun? (b) Pine nemene matre e hna ajojezine la mekuthethewe ne la ketre Keresiano, tre, thaa ijije hë kowe la Keresiano cili troa drengethenge la mekuthethewe i angeic? (Wange ju la ithuemacanyi e cahu fen.)

⁸ Tro nyipunieti a nue tune kaa la mekuthethewe troa nyi trepene la itre mekune hnei epuni hna axeciën? Ame la itre xaa atr, tre, thaa thele ewekë kö angatr, matre mama ju laka, hnene hi la aqane sipu wai ewekë i angatre hna amekötine la itre sipu mekune me itre aliene hni angatr, me axeciëne la mekune nyine troa kuca. Nge öni angatre jë hi, “Haawe, thaa ka isazikeu kö la memine la mekuthethewe i eni.” Ngo e hna hune la itre aja ne la ngönetrei, haawe, ase hë lai ajojezine la mekuthethew. Kola qaja hnei Tusi Hmitrötr, ka hape: “Ate nyipi iaö la hni hune la nöjei ewekë asëjëihë, nge nyipi ngazo ej ; dei la ate ate hmekun’ ej?” (Ieremia 17:9) Qa ngöne lai, thaa tro pi kö sa nue la itre aja ne la hni së troa eköthe la itre mekun hne së hna troa axeciën. Loi e tro pe sa wanga atrune panëne la ewekë ka amadrinë Iehova Akötresie. *

9. Nemene la xoue Akötresie, nge nemene la aqane tro ej a hetre thangane kowe la mekuthethewe së?

⁹ Maine hna eköthe hnyawa la mekuthethewe së jëne la itre ewekë  hne së hna inin, tro hë eje lai a amamane koi së la nyipi aqane troa xoue Akötresie, nge tro ha thahe la itre sipu aja ne la hni së. Tro sa ce wange la ketre ceitun. Nehemia la ketre hlue i Akötresie ka trene hnëqa ka tru; matre hna amekötine tro angeic a kapa thatraqa i angeice qaathene la nöj e Ierusalema la itre manie ne la itre xaa ewekë hna salemën me hna hotr. Ngo hnei angeice hna thipëne la pengöne cili. Pine nemen? Pine laka kola huliwa catre la mekuna i angeic, qou i angeice e tria pi la aqane musinëne la nöje i Akötresie nge thaa amadrinë Nyidrëti jë hnei angeic. Öni angeic: “Tha hnenge kö hna kuca tune qa ngöne la qoung’ e Akötesie.” (Nehemia 5:15) Nyipi ewekë catr tro sa xoue Akötresieti hnyawa, troa eje e kuhu hni së la xou troa kuca la ketre ewekë ka troa ahleuhleune la Tretretro së e koho hnengödrai. Celë hi xou lai ka hetre hni ne metrötr, atre upi së troa nue la Wesi Ula i Akötresie troa eatrongë së ngöne la easa troa axecië mekun.

10, 11. Nemene la ixatua hne së hna troa kapa qa ngöne la itre trepene meköti ne la Tusi Hmitrötr, ngöne la kola ithanatane la iji kahaitr, nge tune kaa la aqane tro sa nue Akötresieti troa eatrongë së ngöne la easa thele troa melëne itre ej?

¹⁰ Hanawange la ketre ceitun, ame la mekune nyine tro sa pane ce wang, tre ene la iji kahaitr. Mekune la nyine tro sa cile kow nge nyine troa axeciën ngöne la easa caa lapa memine la itre xaa atr; ene la tro sa atre ka hape tro sa ue, tro kö sa ij maine thaa tro pena kö sa ij? Loi e tro sa pane nyiqaane isa ini së kö. Nemene la hna qaja hnene la itre trepene meköti ne la Tusi Hmitrötr, göne la ewekë cili? Eje hi laka, thaa Tusi Hmitrötre kö a jele ngazone la troa iji ngöne la tulu la kahaitr. Eje pe a atrunyi Iehova hnene la ahnahna hnei Nyidrëti hna hamën, ene la waina. (Salamo 104:14, 15) Ngo Tusi Hmitrötre pe a jele ngazone la troa truune la kuci madrin me hmo hnei kahaitr. (Luka 21:34; Roma 13:13) Ketre, hna ce ukëne hi la iji kahaitr atrunyi memine la itre xaa huliwa ka sis xajawa i Iehova, ene la tro kuci ngazo me nyi xetë. *—1 Korinito 6:9, 10.

¹¹ Hna inine me ketr la mekuthethewe ne la ketre Keresiano hnene la itre trepene meköti cili. Haawe, ame la easë a troa axecië mekun göi iji kahaitr e traqa ju së itronyi me caa lapa memine la itre xan, loi  e canga pane mama pi la itre hnyinge celë: ‘Nemene la kepine matre easa caa lapa? Tune kaa e thatreine ju xomihni, nge sasaithi tulu jë la aqane troa kuci madrin? Nemene la itre aja ne la hning ka jol e tro ni a xomehnöth? Hapeu, ka tru e kuhu hning la iji kahaitr, nge ka jole e tro ni a nue, nge tune kaa, eje la ka akökötrene la itre aliene hning me itre aqane ujëng? Hetrenyi kö thenge la xomi hni matre atreine ni tuluthe la aqane tro ni a ij?’ E ase hë së mekune hnyawa la itre trepene meköti ne la Tusi Hmitrötr memine la itre hnying hnene eje hna amejën, loi e tro fe sa sipo Iehova ngöne la thith troa eatrongë së. (Salamo 139:23, 24) Easë hi lai a sipo Iehova troa eatrongë së jëne la uati hmitrötre i Nyidrë. Easë mina fe a inine la mekuthethewe së troa huliwa thenge la itre trepene meköti qaathei Akötresie. Hetrenyi fe la ketre nyine tro sa wanga atrune hnyawa ngöne la easa troa axecië mekun.

12, 13. Nemene la itre xaa kepin ka aisapengönëne la aqane huliwa la itre mekuthethewe ne la itre Keresiano, nge nemene la aqane tro sa ujë e traqa tune ju lai?

¹² Ame itre xaa ijin, tre, maine jë tro epuni a sesëkötr, laka, thaa ceitu kö la aqane huliwa ne la mekuthethewe thene la itre Keresiano. Ame kowe la ketre atr, tre, kola öhnyi engazone la ketre hna majemine kuca maine ketre qene nöje pena; ame ketre, tre, aja i angeice lai, nge thaa hna wathebone kö lai. Ame göi ce iji kahaitr, maine jë tro ketre a madrine troa pane acaa ver memine la itre xaa sinee ngöne la caa hej göi tro hi a pane nyi pengön; ame ketre, tre, hna ajolëne la hni angeic hnene la hna majemine cili. Pine nemene matre isapengöne kö la lue aqane ujë i nyidro, nge troa ketr tune kaa la aqane tro sa axecië mekun?

¹³ Nyimu kepin matre kola isapengöne la mekunane la itre atr. Isapengöne catre la itre ewekë hna melëne ekö hnene la itre atr. Ame itre xan, tre, atrehmekune hnyawa hi angatre la ewekë ka jole hnei angatr hna melëne ekö, maine jë ka nango jole pala hi koi angatre troa elë sasaith la ewekë ka jole cili. (1 Ite Joxu 8:38, 39) Matre ame la kola qeje kahaitr, canga ketri angatre hi itre ka melëne la jole cili ekö. Maine tro epuni a kapa la ketre atr ka tune lai ngöne la hnalapa i epun, maine jë tro la mekuthethewe i angeic a upi angeic troa thipën, e traqa ju epuni hamë nyine iji koi angeic. Tro kö epuni a wesitre  koi angeic? Tro kö epuni sipone iele angeice troa ij? Ohea. Nge maine atre hi epun maine thatre pena kö epuni la itre kepin, maine jë itre kepin ka upi angeic troa ketre sipu axecië mekun, haawe, loi e tro la ihnimi trejine a sewe epuni troa iele angeic troa ij.

14, 15. Ngöne nemene ewekë la kola isapengöne la aqane huliwa la itre mekuthethewe ne la itre atrene la ekalesia ngöne la hneijine i Iesu, nge nemene la ixatua hnei Paulo hna hamën?

¹⁴ Hnei Paulo aposetolo hna öhne la aqane isapengöne la mekuthethewe ne la itre Keresiano ka mele ngöne la hneijine i Iesu. Ame ngöne hneijine cili, hna huliwa la mekunane la itre xaa Keresiano göne la itre xaa göxeni hna huujëne hë kowe la itre idrola. (1 Korinito 10:25) Thaa huliwa fe kö la mekuthethewe i Paulo kowe lai itre göxeni cili hna salemëne pë hë ngöne la hna maaketr. Ame koi angeic, tre, ka gufa me pë mele ne la itre idrola; ketre ame la xen, tre, thaa ewekëne kö la itre idrola, ke, ka xulu lai qaathei Iehova nge ewekë i Nyidrë. Atre hi Paulo ka hape, thaa hna kapa kö hnene la itre xan la aqane waiewekë i angeic göne la ewekë cili. Ame itre xan, tre, ka catre angatre ekö hmi koi idrola qëmekene troa hane hmi Keresiano. Ame koi angatr, tre, ka ngazo la ewekë ka hetre itretrengekeu hë memine la itre idrola. Haawe, nemene la aqane tro Paulo a sei qene la jole celë?

¹⁵ Öni Paulo ka hape: “Qa shë angete ateine troa xatuane la ite ka kucakuca me tha ’tein, nge the amadi shë kö. Ke ame Keriso, te, tha hna amadi nyidëti kö.” (Roma 15:1, 3) Hnei Paulo hna qaja laka, loi e troa tro pane la aja ne la itre trejine me easë nge pine ju pë hë la itre sipu aja së. Öni angeice fe, ka hape, thaa tro hmaca kö angeic a hane öni miitr wanga athixötrëne jë la ketre mamoe ka sisitria, ke, Keriso hi lo ka hamëne la mele i nyidrë thatraqane la neköi mamoe cili.—1 Korinito 8:13; 10:23, 24, 31-33.

16. Maine ka huliwa la mekuna së ngöne la ketre götran, pine nemene matre thaa tro kö sa jele ngazone la itre ka ketrepengöne aqane waiewekë pena ha thenge la mekuthethewe i angatr?

¹⁶ Ame ngöne la ketre götran, thaa tro kö la itre ka huliwa mekuthethew a xöjetrije la itre xan, me catre fë la aqane waiewekë i angatr thenge la mekuthethewe i angatr. (Roma 14:10) Eje hi laka, ame la mekuthethew, tre, hna huliwane hnyawane matre tro ej a ameköti së, ngo thaa göi tro kö a amekötine pena ha la itre xan. Mekune hnyawa kö së lo itre trenge ewekë i Iesu, kola hape: “The meku hnine kö, mate tha meku hni nyipunie.” (Mataio 7:1) Loi e tro asë hi së  itre atrene la ekalesia a neën, wanga sasaithi tulune pi la aqane tro sa ithanatane la itre mekune hne së hna xom thenge la mekuthethewe së. Loi e tro pe sa thele la itre aqane troa akökötrene la ihnim me caas, me ithuecatrekeu, ngo thaa tro kö sa thë la lapa së itre trejin.—Roma 14:19.

17. Nemene la ewekë ka traqa kowe la itre mekuthethewe ne la itre atr ka ala nyimu enehila?

¹⁷ Hnei aposetolo Peteru hna cinyihane ka hape: “Nge nyipunie a hetenyi la mekuthethewe ka loi.” (1 Peteru 3:16) Ame la mekuthethewe ka wië xajawa i Iehova Akötresie, tre, celë hi ketre manathithi ka tru lai. Thaa tune kö la mekuthethewe ne la itre atr ka ala nyimu enehila. Hnei Paulo hna qaja la itre atr hna “deuthe la mekuthethewe i angate hnene la fao ka pö.” (1 Timoteo 4:2) Ame la ijöne hna dreuth hnei fao, tre, hadrë ju pë hë lai thupen, nge thaa drenge hë së  la götrane hnepe ijö cili. Nyimutre la itre trene mekuthethew, ngo thaa idrei hë, kösë meci hë, ene pe thaa huliwa ha me ihmekë, nge thaa cile hë kowe la ketre mekune ka ngazo, maine pë hë hmahma me hlohlo pena la hni së qa ngöne laka hna kuca la ngazo. Nyimutre la itre atr ka madrin enehila, hnene laka angatr a thahe la aliene hni cili, tune la troa iupezö.

18, 19. (a) Nemene la eloine la troa huliwa la mekuthethewe së nge tro sa hmahma? (b) Nemene la nyine tro sa kuca maine kolo pala hi a upezö së me huliwa la mekuthethewe së pine la itre ngazo hne së hë hna kuca ekö nge hne së hë hna ietra pin?

¹⁸ Nyipici laka e hni së a upezö së, tre, kolo hi lo mekuthethewe lai ka qaja koi së ka hape, ka ngazo lo lai ewekë hne së hna kuca. E drenge hë la atr ka hape, hetre zö i angeic nge kola upi angeice troa ietra, eje hi lai laka, ngacama ketre ewekë ka sisi ju hë hna kuca, ngo ijije hi troa senge trij. Drei la ceitune i Davita joxu, laka, hetre zö i nyidrë qa ngöne lo ngazo ka tru hnei nyidrëti hna kuca, ngo hna senge  trije eje hnyawa, pine laka, hnei nyidrëti hna ietrane e kuhu hni nyidrë la ngazo hna kuca. Hnene la aqane sisine nyidrëti la ngazo i nyidrë memine la hni ne ajane i nyidrëti troa drengethenge pë hë e thupene la itre wathebo i Iehova, ene pe nyidrëti a pane sipu öhne hnyawa e cili laka “ka loi cilieti, Joxu, ate sheng.” (Salamo 51:1-19; 86:5) Ngo tune kaa kö e kolo pala hi a huliwa la mekune së nge easë pala hi a hmahmane la hne së hna kuca, ngacama ka ietra hë së nge ase hë kapa la qeje menu së?

¹⁹ Ame itre xaa ijin, tre, maine sasaithi tulu pala ha la aqane jele ngazo së hnene la mekuthethew pine la ketre ngazo hne së hna kuca, tro ha tru menu la hleuhleu së, nge tro fe a hetre ethane koi së, qa ngöne laka, tro la itre mekune ka ngazo cili ka eje ngöne la hni së a sewe së elanyi troa eatrëne la itre mekune ka lolo. Celë hi matre, nyipi ewekë troa xecie hnyawa e kuhu hni së laka, ka draië catre kö Iehova hune la itre aliene hni ne la nöjei atr asë. Nyipi ewekë tro sa kapa me lapaune kowe la ihnimi Nyidrë me aqane senge Nyidrëti la ngazo së, tune lo aqane ithuecatre së kowe la itre xan troa hane ujë tune lai. (1 Ioane 3:19, 20) Ame ngöne la ketre götran, ame la trene mekuthethewe ka wië, tre tro angeic a hetrenyi la tingeting e kuhu hni angeic, nge lapa hnyawa la mekuna i angeic, nge eje thei angeic la ketre madrine ka tru ka sihngödri trootro hë ngöne la fene celë. Nyimutre la itre ka kuca la itre ngazo ka tru, ka melëne hë la inuamacanyi ka lolo celë, nge ijiji angatre enehila troa lapa fë la ketre mekuthethewe ka lolo ngöne la angatr a nyihlue i Iehova Akötresie.—1 Korinito 6:11.

20, 21. (a) Hna hnëkëne la itusi celë matre troa xatua nyipunie troa u? (b) Pine laka itre Keresiano së, haawe, nemene inuegufa la hna hamë së, nge tune kaa la aqane tro sa huliwane ej?

²⁰ Hna hnëkëne la itusi celë matre troa xatua nyipunie troa hetrenyi la madrine celë, ene la troa mele cememine la ketre mekuthethewe ka lolo, ngöne la itre drai tixenuë nge ka jole catr ne la fene ka ngazo i Satana. Nyipici laka, thaa ka pexeje kö la aqane qeje pengöne eje la nöjei trenge wathebo asë hnine la Tusi Hmitrötr me itre trepene meköti ka nyipi ewekë nyine tro epuni a lapa mekune me trongëne ngöne la nöjei drai ne mele nyipunie. Ketre, thaa tro kö sa mekune ka hape tro sa öhnyi wathebo ka hmaloi me ka caas, göne la pengöne la mekuthethew. Ame la kepine matre kuca jë la itusi celë, tre, göi troa xatua epuni troa eköth me ketr la mekuthethewe i epun hnene la hna inine la aqane troa trongëne la Wesi Ula i Akötresie ngöne la nöjei drai ne mele nyipunie. Ame la “wathebo i Keriso,”  tre, ej a könën la itre ka trongëne ej, troa mele thenge la mekuthethewe memine la itre trepene meköt, celë hi matre ka ketrepengöne kö ej hune la Trenge Wathebo i Mose, ene lo itre wathebo hna cinyihan. (Galatia 6:2) Haawe, matre Iehova a nue kowe la itre Keresiano tro angatr a isa wai mekun me axeciën, thaa hnei Nyidrëti kö hna xomi angatre ceitu me itre hna oth. Ngo, ame pe, tre, Wesi Ula i Nyidrë a amekunë së ka hape, thaa tro pi kö sa xome la inuegufa cili “nyine he la iangazo.” (1 Peteru 2:16) Loi e tro pe la inuegufa cili a aijijë së hnyawa troa amamane la etrune la ihnimi së koi Iehova.

²¹ Ame ngöne la easa thithi fë la aqane tro sa melëne hnyawa la itre trepene meköti ne la Tusi Hmitrötr, nge thupene lai easa axecië mekune ngön, celë hi ewekë lai hne së hna troa kuca pala pë hë, nge kolo hi lo hne së lai hna nyiqaane kuca ha ekö ngöne lo easa xötrei atre Iehova. Tro ha eköthe “la hni” së hnene la hne së hna “majemine huliwane la hni” së. (Heberu 5:14) Maine tro sa eköthe la mekuthethewe së hune la Tusi Hmitrötr, eje hi lai laka, tro ha hetre thangane ka loi nyine tro sa kapa hnyawa ngöne la nöjei drai ne mele së. Tune la kuli ka ho e hnenyipajidr a hmekë së wanga troa traqa koi së la ketre ewekë ka ngazo, haawe, ketre tro fe la mekuthethewe së a xatua së troa xome matre melëne së la itre mekune ka loi nyine amadrinëne la hni ne la Tretretro së e koho hnengödrai. Celë hi ketre jëne ka nyipi lolo la, maine easa ajane troa thupë së kö ngöne la ihnimi Akötresie.