1, 2. (a) Ame la easa goeëne la itre ka xötrei faipoipo, nemene la hnying hne së hna xom e itre xaa ijin, nge pine nemen? (b) Nemene la itre hnying hne së hna troa ithanatane ngöne la mekene celë?

KA MADRINE kö nyipunie ngöne la itre ijine faipoipo? Nyimutre la itre ka madrine ngöne la itre ijine faipoipo hnei angatre hna hane sin. Lue trefën a hetrëne la itre iheetr ka mingöming. Nge mama hi ngöne la lue iqëmeke i nyidroti laka, atraqatre la madrine i nyidro! Ame ngöne la drai cili, tre, kola elitrauje la madrine i nyidro, pine laka, nyidroti a lapa mejiune la nöjei ewekë ka troa traqa, nge nyimu ewekë ka lolo hna ithingehnaeanekeune me nyine mejiune kow thatraqane la itre drai elany.

² Ngo mama hnyawa ha enehila, laka, isazikeu catrë hë la itre aqane mekuna ne la itre atr göi faipoipo. Ngacama easa mejiune troa lolo elanyi la mele ne la lue ka xötrei faipoipo, ngo ame itre xaa ijin, hne së hna pane hnyinge ka hape: ‘Ka tro jë kö a mele madrin elanyi la lue ka faipoipo celë? Tro kö a cile huti la faipoipo i nyidro?’ Qanyine kö elanyi la aqane mejiune me aqane trongën hnei trahmanyi me föe la eamo hna hamën hnei Akötresie göi faipoipo. (Ite Edomë 3:5, 6) Nyipi ewekë tro angatr a ujë tune lai matre troa lapa qale catre kowe la ihnimi Akötresie. Tro pena së enehila a wange la aqane sa hnei Tusi Hmitrötr la foa lao hnyinge celë: Pine nemen matre kola faipoipo la atr? Maine epuni a troa faipoipo, drei la hnei epuni hna iën nyine föi epun? Tro epuni a hnëkëne tune kaa la faipoipo? Nge nemene la ka xatuane la lue trefën troa madrine pala hi e hnine la faipoipo?

3. Pine nemen matre thaa ka inamacane kö la atr ka faipoipo pine la itre kepin ka tëtë?

³ Hna mekune hnei itre xan ka hape, ma nyipi ewekë troa faipoipo  matre troa manathith, ke, pëkö madrin me eloine la mele ne la atr ka pë föen. Thaa trenge nyipici kö lai! Iesu la ketre trahmanyi ka thaa faipoipo kö, hnei nyidrëti hna qaja la trahmanyi maine jajinyi qea, ceitune me ketre ahnahna, nge hnei nyidrëti hna ithuecatrene fe la itre ka ijije troa mele tune lai. (Mataio 19:11, 12) Hnei Paulo aposetolo hna hane qaja aloine fe la mele ne la itre ka thaa faipoipo kö. (1 Korinito 7:32-38) Ngo thaa Iesu kö lai me Paulo a ameköti ewekë ne la faipoipo ceitu me wathebo nyine tulu ne mele ne la nöjei atr; pëkö, wange pe, ke, ame la troa “shawa troa faipoipo” tre, celë fe ketre “ihaji ne la ite demoni.” (1 Timoteo 4:1-3) Nyimu ewekë catre hna atreine troa kuca hnene la itre trahmanyi, me jajinyi qea ka ajane troa atrune la aqane nyi hlue koi Iehova hnei angatr. Qa ngöne lai, thaa ka inamacane kö la atr ka faipoipo, pine la itre kepin ka thaa nyipi loi kö, tune la troa nue la itre enehmu troa iuku maine iajojezi.

4. Nemene la trepen hna amë hnene la ketre faipoipo ka lolo, göi troa hetrune la itre nekönatr?

⁴ Hetre itre nyipi kepine kö matre ajane jë së troa faipoipo? Eje hi. Ame la faipoipo, tre, ahnahna lai qaathene la Akötresie ka ihnim. (Genese 2:18) Haawe, hetre itre eloin me manathithi ka tru hne së hna troa kapa qa ngön. Hanawang la ketre ceitun, e ka loi la faipoipo, trepene ka sisitria ej thatraqane la mele ne la hnepe lapa. Nge troa nyipi ewekë koi itre keme me thin troa ce hiane la itre nekönatr ngöne la tingeting, matre troa hamë angatr la ihnim, nge troa haji angatr, me eatrongë angatr. (Salamo 127:3; Efeso 6:1-4) Ngo thaa tro kö a faipoipo göi tro hi a hiane la itre nekönatr, thaa celë hmekuje kö la kepine lai matre faipoipo jë.

5, 6. (a) Tune la hna qaja ngöne Ate Cainöj 4:9-12, nemene la itre xaa thangane ka loi hne së hna kapa qa ngöne la hne së hna othe hnyawa la aqane imelekeu së itre treme enehmun? (b) Tune kaa la aqane aceitunëne la faipoipo memine la köni eno hna ele wanaeamon?

⁵ Tro sa ce wai pengöne lo xötr hna xome nyine nyi trepene la mekene celë, nge troa ce wange memine la itre xaa xötre ka lapa xötreithe ej: “Loi la ala lue hune la ala caas, ke tro nyidoti a hete thupene ka loi ne la huliwa i nyido. Maine kei la kete qâne la kete troa ea la sine i angeic, nge ekölö hi ni la ate casi e kei hë, nge pëkö sine i angeice troa e angeic. Maine ce meköle la ala lu, tro nyidoti a keukawa ; nge troa keukawa tune ka la ala cas? Nge maine kete ate a shepëpi kowe la kete, tro nyidoti a ishi me nyën ; nge tha canga xecie kö la eno ka köni wana eamo.”—Ate Cainöj 4:9-12.

 ⁶ Ame la hnapan, tre, kola amamane hnene la xötre celë la enyipiewekën la troa eköthe hnyawa la aqane imelekeune la itre treme enehmun. Ame hi lai faipoipo, tre, kolo hi lai a qaja la aqane iothekeune catrëne la mele ne la lue atr treme enehmun. Tune la hna amamane hnene la xötre celë, hnene la aqane caasi nyidro matre hetrenyi pi la ixatua, me keukawa, nge hna thupë nyidroti tune lai. Troa catre la faipoipo, e hetre ka nyi nyiköne la caas ne la lue trefën. Celë hi matre qaja jë hnene la xötre celë ka hape, ijije hi troa xecie la lue eno hna ele wanaeamon. Ngo maine tro sa xome la köni eno me ielekeune itre ej, haawe, thaa tro jë kö lai a canga xeci. Maine ame la pane aja ne la trahmanyi me föe, tre, troa amadrinë Iehova, haawe, kola ceitune la faipoipo i nyidro memine la köni eno hna ele wanaeamon. Ka nyipi ewekë catr tro la lue trefën a hni koi Iehova e hnine la faipoipo i nyidro, nge eje hi lai laka, tro ha catre hnyawa la caasi nyidro.

7, 8. (a) Nemene la eamo hna cinyihane hnei Paulo kowe la itre Keresiano ka thaa faipoipo petre kö nge ka cile kowe la itre aja ne troa ce meköle trefën? (b) Nemene la aqane waiewekë ka inamacan göi faipoipo hna hamën hnei Tusi Hmitrötr?

⁷ Hna kapa hnyawa e hnine la faipoipo la itre aja ne troa ce meköle trefën. Ame la ce meköle trefën, tre, ketre ewekë ka lolo me ka thue madrinen la lue trefën. (Ite Edomë 5:18) E traqa ha la ketre atr ka thaa faipoipo petre kö ngöne lo ijin hna hëne hnei Tusi Hmitrötr ka hape, “ijine eng,” ene lo ijine kola mejë nyimenyim la aja ne troa ce meköle hnene la nekö trahmanyi me jajiny, kolo ijine tro nyidroti lai a isa catre isi memine lai itre aja ne la ngönetrei. E thaa hna xomehnöthe kö la itre aja cili, ijije hi troa kei kowe la ngazo. Hna aijijë Paulo hnei Uati Hmitrötr troa cinyihane la eamo kowe la itre ka thaa faipoipo petre kö, kola hape: “E tha ’teine kö angate xomi hni, ange faipoipo jë ; loi e troa faipoipo hune la hededei.”—1 Korinito 7:9, 36, MN; Iakobo 1:15.

⁸ Ngacama isa hetre kepin matre kola pi faipoipo hnene la atr, ngo loi e troa inamacane la aqane wai ewekë. Öni Paulo lo göi itre ka faipoipo, “tro ha hete aköte i ngönetei la ite ka tune lai.” (1 Korinito 7:28) Hetre itre jol ka troa traqa koi itre ka faipoipo, ngo thaa ka hane kö ketr la itre ka thaa faipoipo kö. Nge maine epuni a mekune troa faipoipo, nemene la nyine tro epuni a kuca matre thaa tro kö la itre jol a thahe la madrin memine la mele ka loi e hnine la faipoipo? Ame ketre nyine troa kuca, tre, ene la troa iëne inamacanëne la hna troa faipoipo memin.

9, 10. (a) Tune kaa la aqane amamane Paulo jëne la ketre ceitun, la engazon e troa iothekeu së memine la itre ka thaa ce hmi kö me easë? (b) Nemene la itre thangan e itre xaa ijin, la hna xele ma drenge la eamo qaathei Akötresie, ene laka thaa tro kö a faipoipo memine la ketre atr ka thaa ce hmi kö me easë?

⁹ Jëne la uati hmitrötr matre Paulo a cinyihane ju la ketre trepene meköti ka nyipi ewekë catr, nge nyine troa mekune hnyawa e kola thele la atr nyine troa faipoipo memin; öni nyidrë: “The isile menune keu nyipunieti kö me angete tha lapaune kö.” (2 Korinito 6:14) Hnei nyidrëti hna eköthe la ceitune i nyidrë, hnene la hna öhne ekö ngöne la hna eënyi. Maine hna isilekeune la lue öni ka thaa ihmeku trenge catren, haawe lue ka tro asë hi nyidroti lai a xomi akötr. Ka ceitune hi lai e hna faipoipone la ketre ka hmi me atr ka thaa hmi kö, eje hi lai laka, tro nyidroti a isazikeu e hnine la faipoipo. E aja i ketre e nyidroti lue trefën, troa lapa qale catre ngöne la ihnimi Iehova, nge xelene fe ketre la mele cili, haawe, itria ha la itre ewekë hnei nyidroti hna troa amë panën ngöne la mele i nyidro, ene pe cia jë hi la akötr e hnine la faipoipo. Celë hi matre Paulo a upe ju la itre Keresiano troa faipoipo “göi Joxu hmekuje hi.”—1 Korinito 7:39.

¹⁰ Ame la itre xaa Keresiano ka thaa faipoipo petre kö, öni angatr ka hape, ka loi ju kö troa isilekeune atr ka hmi me ketre atr menu hi, hune la troa lapa caas. Celë hi matre thipetrije pi hi hnei itre xane la eamo qa hnine la Tusi Hmitrötr, troa faipoipo memine la ketre atr ka thaa nyi hlue i Iehova kö. Hleuhleu e itre xaa ijin, la thangane lai. Hetre ka faipoipo fe memine la ketre atr ka thaa hane kö ithanatane la itre ka nyipi ewekë ngöne la mel. Ame la pun, tre, ma loi hmaca ju kö ekö lo kola lapa caas qëmekene troa faipoipo. Eloine pe, ala nyimu la itre ka thaa faipoipo petre kö ka mejiun, me fedre catre kowe la eamo qaathei Akötresie göi faipoipo. (Salamo 32:8) Ngacama angatr a mekune troa hane faipoipo ngöne la ketre ijin, angatr a catr troa lapa caas uti hë la öhne angatr la hnei angatr hna troa faipoipo memin thene la itre ka nyi hlue i Iehova Akötresie.

11. Nemene la ka troa xatua epuni troa iëne inamacanën la hnei epuni hna troa ikötresae memin? (Wange ju fe la itre mekune  hna eköhagen, ngöne götrane 114.)

¹¹ Ame la ketre götran, thaa ijije kö e tro hi a mekune ka hape, e ka nyi hlue i Iehova la ketre atr, tre, ka loi hi troa faipoipo memin. Maine  epuni a pi faipoipo, thele jë la ketre atr ka tui epun, ene la ka ihmeku la itre thiina i epun, me itre aja nyine troa ce eatrëne ngöne la götrane la ua, nge ka hnimi Akötresieti tui epun. Hna hamëne jëne la itre itus hnene la hlue ka nyipici me ka inamacan, la itre ini ka qeje pengöne la mekune cili, nge loi e tro epuni a wanga atrune la itre eamo qa hnine la Tusi Hmitrötre thatraqane lai ngöne la thith, me nue ej troa eköthe la mekune ka tru cili hnei epuni hna troa axeciën. *—Salamo 119:105.

12. Nemene la hna majemine kuca ngöne la itre nöj ka nyimutre göi faipoipo, nge tulu i drei la hna hamën hnei Tusi Hmitrötr nyine troa eatrongë së ngöne la götrane cili?

¹² Ame ngöne la itre nöj ka nyimutre, hna majemine troa ihujë, tro la itre keme me thin a iëne la trahmany maine föe ne la nekö i nyidro. Celë hi ketre hna majemine lai ka hlemu la aqane kuca celë ngöne la itre xaa nöj, ke, qa ne la itre keme me thin troa qeje aja, pine laka, kola mekune ka hape, sisitria la inamacane i angatr nge itre ewekë lai hnei angatre hna melëne hë. Ame thene la itre xaa trefën hna ihujën, tre, ka lolo la mele i angatr, tune lo itre faipoipo ekö ngöne lo hneijine i Tusi Hmitrötr. Kola tune lo tulu i Aberahama ekö, hnei nyidrëti lo hna upe la hlue i nyidrë troa thele föi Isaaka; ketre ini lai nyine troa xomi tulun hnene la itre keme me thin ka mele tun enehila. Thaa manie kö me götrane qa la ka tru koi Aberahama. Hnei nyidrëti pe hna iupi troa thele föi Isaaka thene la itre ka hmi koi Iehova. *—Genese 24:3, 67.

13-15. (a) Tune kaa la aqane tro la trepene meköti ngöne Ite Edomë 24:27 a xatuane la nekö trahmanyi ka mekune troa faipoipo? (b) Nemene la nyine troa kuca hnene la jajiny ka hnëkë troa faipoipo?

¹³ Maine epuni ha mekune hnyawa laka tro hë epuni a faipoipo,  loi e tro epuni a pane isa hnying ka hape, ‘Hapeu, ijijinge jë fe hë troa hane faipoipo?’ Thaa tro hmekuje kö la itre aliene hni së tune la ihnim, me pi ce meköle trefën, me ce elo, maine hia nekönatr pena, a uku së troa sa la hnyinge celë. Ngo hetrenyi kö la itre ewekë hna ajan ka sisitria nyine troa wanga atrune hnyawa hnene la trahmanyi maine föe.

¹⁴ Loi e tro la nekö trahmanyi ka thele föe a mekune hnyawa la trepene meköti celë, hna hape: “Hnëkënejë la huliwa i ’ö e kuhu, me polepolëne ngöne la hnite la nöjei ewekë i ’ö ; nge thupene lai tro eö a xupe la uma i ’ö.” (Ite Edomë 24:27) Nemene la hna amamane hnyawa hnene la mekune celë? Ame ngöne la itre ijin enehila, tre, maine kola ajan hnene la ketre trahmanyi troa “xupe la uma i [angeic],” maine troa faipoipo me hnaho, nyipi ewekë tro angeic a ketre thele ka hape, ‘Ijijinge kö elanyi troa thupën me xatuane la föe me haa nekönatr, e traqa ju hetre nekö i nyiho elany?’ Ame la pane nyine tro angeic a kuca, tre, troa huliwa, ene la troa eëny. Thaa saze kö la aqane troa melëne la trepene meköti celë. Ame la nekö trahmanyi ka ajane troa faipoipo, tre, nyipi ewekë tro angeic a hnëkë hnyawa matre troa xome la hnëqa cili. Maine ka egöcatre angeic, tro angeic a huliwa. Kola amamane hnene la Wesi Ula i Akötresieti laka, ame la trahmanyi ka thaa thupëne kö la itre atrene la hnalapa i angeice ngöne la götrane la ngönetrei, me itre aja ne la hni, me itre nyine mele ne la hnepe lapa i angeic ngöne la götrane la ua , tre, atraqatre la ngazo i angeice hune la atre thaa lapaune kö!—1 Timoteo 5:8.

¹⁵ Ame la föe ka mekune troa faipoipo, tre, kösë hetre aja i angeice troa kapa madrine la itre hnëqa ka tru e hnine la faipoipo. Kola qaja aloine hnei Tusi Hmitrötr la itre xaa hna atrein me itre thiina ka nyipi ewekë kowe la föe matre angeic a xatuane la trahmany me thupëne la itre atrene la hnepe lapa. (Ite Edomë 31:10-31) Ame la trahmanyi me föe ka canga sesë troa faipoipo nge thaa hna pane hnëkëne kö troa xome la itre hnëqa cili, eje hi lai laka, nyidroti hi a pane isa meku nyidro, nge sixane pë hë la itre nyine tro nyidro a ithawakeune elany. Manathithi hë la nöjei ka ajane troa faipoipo, e tro angatr a hnëkë hnyawa ngöne la götrane la ua.

16, 17. Ame koi itre ka hnëkë troa faipoipo, nemene la itre trepene meköti nyine tro angatr a sine thel?

¹⁶ Ame la troa hnëkë troa faipoipo, tre, kolo fe lai a hape, troa mekune  hnyawa la itre hnëqa hnei Akötresie hna ahnithe kowe la trahmanyi memine la föe. Nyipi ewekë troa atre hnene la trahmanyi la aliene la hna hape, angeic la he ne la hnepe lapa Keresiano. Thaa hna hamëne kö la hnëqa cili koi angeice matre tro la aqane musi angeice a thahluë atr. Loi e tro pe angeic a xomi tulu qa ngöne la aqane cilëne Iesu la musi nyidrë. (Efeso 5:23) Ketre tune mina fe, nyipi ewekë troa trotrohnine hnene la föe Keresiano la hnëqa ka lolo ka eje thei nyiidro. Tro kö nyiidro a lapa fene la “wathebo ne trahmany qa kuhu hni nyiidro”? (Roma 7:2) Nyiidro hë fene la wathebo i Iehova me Keriso. (Galatia 6:2) Ngo ame la musi ne la trahmanyi nyiidro e hnine la hnalapa, tre, celë hi ketre wathebo lai. Ijije kö tro nyiidro a sajuën me kapa me drengethenge la musi ne la ketre atr ka ngazo? Maine thatreine pala kö nyidro troa kapa madrine la itre ewekë cili nyine tro nyiidro a kuca elany, haawe, ma ka loi pala kö troa pane itreqe.

¹⁷ Ngacama isa hetre ewekë ka tru hna isa ajane hnene la lue trefën, ngo nyipi ewekë tro ketre e nyidro a atreine wanga atrune panëne la hna ajane hnei ketre. (Filipi 2:4) Hna cinyihane hnei Paulo, ka hape: “Ngo loi e tro nyipunie a isa hnime föene tui nyipunieti kö ; nge ame la föe kete troa metötëne la trahmany.” Jëne la uati hmitrötre i Akötresie, hnei Paulo hna atrehmekune laka, ka nyipi ewekë catr kowe la trahmany ngöne la angeic a drenge laka kola metrötrë angeice hnyawa hnene la föi angeic. Nge ketre nyipi ewekë mina fe tro föe a drenge e kuhu hni nyiidro la ihnimi ne la föi nyiidro.—Efeso 5:21-33.

18. Pine nemene matre loi e tro la lue ka iatre a hetrenyi la xomihni?

¹⁸ Ketre mina, ame la ijine iatre, tre, thaa kolo kö matre tro hi a ce elo me ce madrin. Ohea, ketre ijine lai ka aijijën la trahmanyi memine la föe troa inine troa ikucakeune la loi, me igoeë thiina matre isa xecie hnyawa pi koi nyidro ka hape, ijije kö maine thaa ijije pena troa faipoipo. Ketre ijine tro fe lai a xomihni! Maine jë troa catrehnine la ihnimi thene la lue ka iatre, nga tro hi sa trotrohnine lai, ke, pengöne hi la atr lai. Ngo eje hi lai laka, ame la lue atr ka ihnimi nyipicikeu, tre, tro nyidroti a neën wanga traqa pi la ngazo nge adrone pi la isa aqane imelekeu i nyidro me Akötresie. (1 Thesalonika 4:6) Haawe, maine epuni a iatre, nge epuni a catre eënyine la xomihni; troa hetre thangane lai kowe la mele i epun, ka faipoipo ju hë epun maine thaa ka ikötresae pena.

19, 20. Nemene la ka aisapengönëne la aqane goëne la itre Keresiano la faipoipo, memine la itre atr ka nyimutre ngöne la fene celë? Hamëne jë la ketre ceitun.

¹⁹ Maine kola ajane hnene la lue atr troa cile huti la faipoipo i nyidro, haawe, nyipi ewekë tro nyidroti a mekune hnyawa la aliene la hna hape, troa saen troa faipoipo. Kola mama hnyawa ngöne la mele ne la atr, laka, ame la faipoipo, tre, thaa pune kö la ketre ewekë, ngo kolo pe a xötrei xejë la ketre ewekë hnei Iehova hna troa acile hutin. (Genese 2:24) Ngazo pe, thaa celë kö la aqane mekuna ne la fene enehila. Ame ngöne la itre xaa nöj, kola xome hnene la itre atr la faipoipo ceitune me “lue sine eno hna isilekeun.” Maine jë thaa nyipi trotrohnine kö angatr la aliene la ceitune celë ngöne la aqane wange la faipoipo hnene la itre atr ka ala nyimu. Tune kaa la aqane tro sa trotrohnine lai? Nyipici laka, troa catre la lue eno hna isilekeune hnyawa, ngo ame ngöne la ketre götran, tre, maine thaa jole kö troa sil, ketre thaa jole mina fe troa senge lue ej.

²⁰ Nyimutre la itre atr enehila ka xome la faipoipo ceitune me ketre ewekë ka tëtë. Thaa jole menu kö koi angatr troa lö hnine la faipoipo, ke, angatr a mekune ka hape, jëne tro hi lai a nyinyin la itre aja i angatr, ngo e traqa ha la itre xaa jole elany, canga saqe i angatre hmaca hi thupatën. Pane mekune jë lo ceitun hna xome hnei Tusi Hmitrötr, ngöne lo kola aceitunëne la otren la faipoipo me eno. Ame la itre eno nyine thatraqane la itre he ka tru, tre, hna kuca matre thaa tro kö a canga xeci, nge thaa tro jë kö itre ej a isa lapa maine ijolekeu pena, ngacama catrehnine ju hë la eny maine wene. Ketre, hna acile la faipoipo matre troa cile hut. Pane mekune ju së la hna qaja hnei Iesu, kola hape: “Ame la hnei Akötesie hna isilekeun, the tro kö a shenge hnei ate.” (Mataio 19:6) Maine epuni a ajane troa faipoipo, nyipi ewekë tro epuni a xome la aqane waiewekë cili. Hapeue la pengöne hnëqa cili, ka hace kö e troa thue? Ohea.

21. Nemene aqane ujë ka nyipi ewekë nyine tro pala hi la trahmanyi me föe a ikucakeun, nge nemene la ka troa xatua nyidro troa mele tune lai?

²¹ Nyipi ewekë tro la trahmanyi memine la föe a hetrenyi pala hi la aqane waiewekë ka loi ngöne la aqane tro nyidroti a imelekeu. Maine troa isa catre thele troa goeëne la itre thiina ka lolo memine la trenge catr hna kuca hnei ketre, haawe, tro hë la faipoipo a ketre jëne madrin me iakeukawany kowe la mele i nyidro. Hapeu, ka menu kö la troa pane isa goeëne la ketre götrane ka loi thene la ketre e nyidro lue trefën,  lue atr ka ngazo? Ohea, ke, ame Iehova, tre, ka meköti la aqane waiewekë i Nyidrë, nge easa mejiune laka hlemu loi së xajawa i Nyidrë. Hna hnyinge hnene la atre cinyihane la Salamo, ka hape: “IA fe Joxu, maine tro cilieti a ati hatene la ite ngazo, dei la ate troa cil?” (Salamo 130:3) Nyipi ewekë tro la itre trahmany memine la itre föi angatr a xome la aqane waiewekë ka loi cili, me hane inuekeune la ngazo i ketre me ketre.—Kolose 3:13.

22, 23. Tune kaa la aqane hamëne Aberahama me Sara la ketre tulu ka lolo kowe la itre atr ka faipoipo enehila?

²² Ijije hi troa kapa jëne la faipoipo la itre manathithi me madrin  atraqatr, nge tro ej a cile hut ngöne la itre macatre. Kola amamane koi së hnei Tusi Hmitrötr la pengöne la lue trefën, ene Aberahama me Sara, ngöne lo qatre hë nyidro. Thaa ka pëkö akötren me ejolen la mele ne trefëne i nyidro. Pane mekune jë së lo pengö i Sara, ketre föe ka 60 lao macatre; hnei eahlo hna tro trije la hnalapa i eahlo e Ure, ketre traon gaa mana hnene la mo, ngo hnei eahlo hna trotrije matre lapa hnine la itre uma maano ngöne la mele i eahlo ka pexej. Ngo hnei eahlo pala hi hna lapa fene la musi ne la föi eahlo. Lolo catre la aqane xatua Aberahama hnei eahlo, nge hnei eahlo hna metrötrë nyidrëti pala hi me thele matre troa tro loi la itre mekune e tro nyidrëti a axeciën. Nge thaa ka tëtë kö la aqane drengethenge i eahlo. Ke hnei eahlo mina fe hna qaja e kuhu “hni” eahlo, la trahmanyi eahlo me hë nyidrëti ka hape, joxu. (Genese 18:12; 1 Peteru 3:6) Ame la aqane metrötrë Aberahama hnei eahlo, tre, ka xulu qa kuhu hni.

²³ Nyipici laka, thaa kolo kö lai a hape, caasi pala hi la aqane goeëne nyidroti la nöjei pengöne ewekë, pëkö hna hane isazikeu la lue mekune i nyidro. Ame ngöne lo ketre ijin, hnei Sara hna fe la mekuna i nyiidro koi Aberahama, qa ngöne lai kola “aköte atraqate” hnei nyidrë. Ngo hnene la hni ne ipië thei Aberahama hna nue koi Iehova troa ameköti nyidrë, me drenge la nine ula ne la föi nyidrë; ene pe kola kepe thangane ka loi hnene la lapa i nyidrë. (Genese 21:9-13) Ame enehila, nyipi ewekë mina fe kowe la itre trahmanyi me föe, ngacama ka nyimu macatre ne faipoipo hë, troa hetrenyi pala hi thei angatr la tulu ne la lue trefën ka fedre catre koi Akötresie.

24. Nemene la itre faipoipo ka atrunyi Iehova Akötresie, nge pine nemen?

²⁴ Ame hnine la ekalesia i Keresiano, nyimutre catre la itre trefën ka öhnyi madrine jëne la faipoipo i angatr. Nge e hnine la faipoipo cili laka atraqatre la metrötr ne la föe kowe la föi eahlo, nge trahmanyi a hnime me atrune la föi nyidrë, nge nyidroti a ce huliwa me catre thele troa amë panëne la aja i Iehova ngöne la mele i nyidro. Maine epuni a mekune troa faipoipo, loi e tro epuni a inamacan ngöne la aqane tro epuni a iëne hnyawa la hnei epuni hna troa faipoipo memin, nge troa hnëkë hnyawa kowe la faipoipo, me huliwa matre troa hetre tingetinge me ihnim e hnine la mele ne trefën ka troa atrunyi Iehova Akötresie. Eje hi lai laka, tro hë la faipoipo i epuni a xatua epuni hnyawa troa lapa qale catre ngöne la ihnimi Akötresie.