Drei La Tusi Huni Koi Nyipunie Itretre Hnimi Iehova:

Hnei Iesu hna qaja ka hape: “Tro hë nyipunie a ate la nyipici, nge tro ha nue amacai nyipunie hnene la nyipici.” (Ioane 8:32) Drei la ekeukawane la itre trenge ewekë celë! Nyipici, ijije hi troa atre la nyipici, ngacama easa melëne enehila la itre “drai hnapin” ka akötr, nge kola haöthe la fene hnene la sili trenga thoi. (2 Timoteo 3:1) Mekune hi nyipunieti lo kola xötrei atrehmekune hnei nyipunieti la nyipici tune la aqane qeje pengöne eje hnine la Tusi Hmitrötr? Drei jë kö la etrune, me eloine la itre ewekë hnei nyipunieti hna melëne me hain!

Maine nyipici laka ka nyipi ewekë catre troa hetrenyi la nyipi atrehmekun ne la nyipici me troa hane qaja pala hi kowe la itre xaa atr, ngo loi e tro fe sa mele thenge la nyipici cili. Celë hi matre nyipi ewekë catre tro sa thupë së kö ngöne la ihnimi Akötresie. Kola hapeue lai? Kola sa la hnyinge celë hnene la itre trenge ewekë i Iesu ngöne lo jidri qëmekene troa humuthi nyidrë. Hnei nyidrëti hna qaja kowe la itre aposetolo i nyidrë ka nyipici, ka hape: “Maine nyipunie a trongëne la ite wathebong, tro nyipunie a cile huti ngöne la ihniming ; ke tunge hna trongëne la ite wathebo i Kaka, ame hna cile huti ngöne la ihnimi nyidë.”—Ioane 15:10.

Kola mama laka hnei Iesu hna thupë nyidrëti kö ngöne la ihnimi Akötresie, hnene la aqane drengethenge hnyawa nyidrë la itre trenge wathebo ne la Tretretro i nyidrë. Loi e tro mina fe sa hane mele tune lai enehila. Maine easa ajane troa thupë së kö ngöne la ihnimi Akötresie, haawe, nyipi ewekë tro sa trongëne la nyipici ngöne la nöjei drai ne mele së. Hnei Iesu fe hna qaja ngöne la jidri cili, ka hape: “Maine ate nyipunie la ewekë cili, manathithi hë nyipunie maine nyipunie a kuca it’ej.”—Ioane 13:17.

Eje the huni la mejiune ka catr laka, tro la itusi celë a xatua nyipunie troa catre trongëne pala hi la nyipici ngöne la mele i nyipunie, nge eje hi lai laka, tro hë nyipunie a lapa qale catre “ngöne la ihnimi Akötesie . . . uti hë la mele ka tha ase palua kö.”—Iuda 21.