1, 2. Drei la itre ka madrine ngöne la itre ijine kola xomi bapataiso hnene la itre atr?

MA NYIMU macatre ne nyipunieti hë a hane nyi hlue i Iehova, nge anyimua hane hë epuni drenge la itre cainöj göi bapataiso e nöjei ijine asabele me kovasio. Ngacama tru catre ju hë la itre cainöj ne bapataiso hne së hë hna hane sin, ngo ka ketri së pala hi la easa öhne la kola icilenyi lo itre ka troa xome la bapataiso. Ame e cili, kola madrine atraqatr la iatrene la icasikeu lo angatr a xeexe. Ma drei jë kö la kola xölaxöla la itre trenge timidra i epun, la epuni a öhne la itre xaa atr a iëne troa xöle i Iehova. Drei jë fe kö la madrine së ngöne la itre ijine cili!

² Maine itre hnepe ijine hi ngöne la macatre la easa öhne la itre bapataiso ngöne la nöje së, ngo ame itre angela, tre, nöjei ijine la angatr a öhne la kola xomi bapataiso la itre atr. Atreine kö së mekune la etrune la “madine e hnengödrai,” ngöne la kola öhne hnene la itre angela la itre thauzane lao atr e cailo fen, kola lö hnine la organizasio i Iehova e nöjei wiik? (Luka 15:7, 10) Drei jë fe kö la madrine ne la itre angela ngöne la angatr a öhne la aqane elë nyimenyimen la etrune la itre ka xome la bapataiso!—Hagai 2:7.

3. Pine nemen matre Satana a tro “kösë liona a ho,” nge nemene la hnei angeic hna ajane troa kuca?

³ Ketre mama hnyawa fe hi, laka, hetrenyi kö la itre ua ka elëhni atraqatr ngöne la angatre a goeëne la kola xomi Bapataiso hnene la itre atr. Eje hi laka, kola jele la trenge elëhni Satana me itre dremoni, la kola hutrö koi angatr hnene la itre thauzane lao atr, angetre thipe trije la fene ka ngazo celë. Hnei Satana lo hna hune fë laka, ame  la itre atr, thaa angatre kö a nyi hlue i Iehova cememine la ihnim; nge pëkö ala caasi e angatr ka troa mele nyipici ngöne la kola traqa la itre itupathi ka tru. (Iobu 2:4, 5) Ame ngöne la nöjei ijine kola saene hnene la ketre atr göi troa nue la mele i angeic koi Iehova, angeice hi e cili a jele thoi Satana. Traqa koi itre thauzane lao ijin e nöjei wiik ngöne la macatre la kola thaipië Satana. Celë hi matre thaa tro kö sa sesëkötre la angeic a “tro agö kösë liona a ho, kola thele tha i nyën”! (1 Peteru 5:8) Kola canga thele hnene la “liona” cili troa heji së ngöne la götrane la ua, me athixötrë së me thele tro pena a thë la aqane imelekeu së me Akötresie.—Salamo 7:1, 2; 2 Timoteo 3:12.

4, 5. (a) Nemene la lue götrane ka tru ka nyi ifego matre thaa tro kö a elë hun hnene la itre aqane iajojezi Satana? (b) Nemene la ewekë ka xecie hnyawa kowe la nyipi Keresiano?

⁴ Ngacama easa qëmeke kowe la ketre ithupëjia ka iakötrë, thaa tro pi kö sa xou menu. Pine nemen matre thaa tro kö sa xou?  Pine laka, hnei Iehova hna nyi ifegone la mene ne lai “liona [ka] ho” ngöne la lue götrane ka nyipi ewekë catr. Nemene la lue götrane cili? Ame la hnapan, tre, hnei Iehova hna ahnithe ka hape, troa mele pe la “ka ala nyimu atraqat,” ene lo itre nyipi Keresiano ka tro pi qa ngöne la “aköte atraqat” ka troa xulu. (Hna Amamane 7:9, 14) Pëkö hnei Akötresieti hna perofetan ka thaa eatre pe kö. Qa ngöne lai, atre hnyawa hi Satana laka, thatreine jë kö angeic troa jele asë la nöjei hlue i Akötresie ngöne la itre theth i angeic.

⁵ Ame la hnaaluene ifego, tre, ka mama hnyawa ngöne la trenge nyipici hna qaja hnene la ketre qatre trahmanyi ka mele nyipici koi Akötresie. Hna qaja hnei perofeta Azaria koi Asa Joxu, ka hape: “Eje kö Iehova ce me nyipunie e ce nyipunie me nyidë.” (2 Aqane lapa ite Joxu 15:2; 1 Korinito 10:13) Hna amamane fe hnene la itre ceitune ka nyimutre ekö, laka, thatreine jë kö tro Satana troa thapa la itre hlue i Akötresie ka lapa qale catre koi Nyidrë. (Heberu 11:4-40) Ame enehila, atreine hi troa cile me ngaa Diabolo hnene la ketre Keresiano ka easenyi me qale catre koi Akötresie. Kola ithuecatre koi së hnene la Wesi Ula i Akötresie, me hape: “Thipe tiji diabolo pi, nge tro nyën’ a köte qa thei nyipunie.”—Iakobo 4:7.

6. Tune kaa la aqane tro Satana a isi memine la itre Keresiano, angatr isa ala caas?

⁶ Pëkö hune i Satana e kola isi ngöne la götrane la ua, ngo ijije hi tro angeic a ngaa së isa ala caas e thaa hne së kö hna hmek. Atre hi Satana laka, atreine hi angeic thepe së, e hna nanazije la aqane imelekeu së me Iehova. Tune kaa la aqane thele Satana troa traqa kowe lai? Angeic a catre thele troa lepi së isa ala caas, me kuca la itre aqane nyinyithiina i angeic. Tro sa pane wange lai itre sipu aqane nyinyithiina i Satana ka tru catr.

7. Pine nemen matre kola catre isi hnei Satana memine la nöje i Iehova?

⁷ Itre aqane isi ka catr. Hna qaja hnei Ioane aposetolo, ka hape: “Fene hnengödrai asëjëihë a meköle thene la ate ka ngazo.” (1 Ioane 5:19) Eje e hnine la trenge ewekë celë la ketre mekune nyine troa hmekëne la nöjei nyipi Keresiano asë. Pine laka thei Satana asë hë la nöjei atr ka ngazo e cailo fen, caasi ju pe hi enehila la jëne isi angeic, ene la troa catre lepe ahmacane la itre ka utretre hë qaathei angeic, ene la nöje i Iehova. (Mika 4:1; Ioane 15:19; Hna Amamane 12: 12, 17) Atraqatre la elëhni angeic, pine laka, atre hi angeic ka hape, xoxopatre pe hi la ijine i angeic. Haawe, catrehnine catre la aqane isi angeic. Ame ngöne la mele së enehila, tre, tru catre la hna ajojezi së hnei angeic, kola thele troa thë la itre aqane imelekeu së me Akötresie. Qa ngöne lai, nyipi ewekë catre kö koi së enehila troa “wangate hmekune la ite ijin, me ite ewekë troa kuca hne [së].”—1 Aqane lapa ite Joxu 12:32.

8. Nemene la aliene la trenge ewekë i Paulo aposetolo ngöne la nyidrëti a qaja ka hape “eëshë a ikuië” memine la itre ua ka ngazo?

⁸ Easa isa ikuië. Hnei Paulo aposetolo hna hmekëne la itre trejine Keresiano, ka hape: “Eëshë a ikuië . . . me ite ua ka ngazo ngöne la ite hnë e hnengödrai.” (Efeso 6:12) Pine nemen matre Paulo a xome la hnëewekë hna hape, “ikuië”? Pine laka, ame la mekun nyine amaman, tre, ene la kola isi cile me icilaxom hnene la lue ka isi. Haawe, ame hi la Paulo a xome la hnëewekë celë, tre, nyine troa amamane hnyawa la easë isa ala caas a isi memine la itre ua ka ngazo. Ngacama easë ju hë a mele ngöne la ketre nöj ka xome maine ka thaa kapa pena la mejiune kowe la itre ua ka ngazo, ngo loi e thaa tro pi kö sa thëthëhmine ka hape, ame lo easa isa nue la mele së troa nyi hlue i Iehova, tre, easë hi lo lai a nyiqaane ikuië ngöne la götrane la ua. Ame la kola nue hnene la Keresiano la mele i angeic koi Akötresie, angeice hi lai a hane lö hnine la isi. Thaa sesëkötre kö së la Paulo a öhne la enyipiewekëne la troa anyimua ithuecatre kowe la itre Keresiano ne Efeso, matre tro angatr a “cile hut”!—Efeso 6:11, 13, 14.

9. (a) Pine nemen matre kuca jë Satana me itre dremoni la itre “nyinyithiina” ka nyimu pengön? (b) Pine nemen matre Satana a thele troa apuingazone la itre mekuna së, nge tro sa cile catre tune kaa koi angeic? (Wange ju la itre mekune  hna eköhagen ngöne götrane 192-3.) (c) Nemene la aqane nyinyithiina i Satana hne së hna troa ce wange enehila?

⁹ Itre aqane nyinyithiina i angeic. Hnei Paulo hna ithuecatre kowe la itre Keresiano troa cile huti qëmekene la “ite nyinyithina” i Diabolo. (Efeso 6:11) Tune la easa öhne e celë, laka, Paulo a qaja la nyimu aqane nyinyithiina, thaa caasi kö. Thaa caa aqane nyinyithiinane kö la itre ua ka ngazo, ngo nyimu pengöne pe, nge ka hetre nyipi kepine matre angatr a xome itre ej. Kola tro la itre macatre nge ame la itre xaa ka nyi hlue i Iehova, tre, angatr a cile catr ngöne la ketre pengöne itupath, nge thaa cile huti kö ngöne la ketre. Haawe, kola alamekëne hnyawa hnei Diabolo me itre dremoni la aqane ujë së  isa ala caas, göi troa atrehmekune la itre hnepe götrane gaa puje the së. Thupene lai, ame ju hi la itre götrane gaa kucakuca së ngöne la götrane la ua, celë hi la hnë tro angatre lai a kuca la itre nyinyithiina i angatr. Eloine pe, ijije hi tro sa atrehmekune la itre aqane nyinyithiina Diabolo ka nyimutre catr, pine laka, hna qeje pengöne hnyawa ha itre ej e hnine la Tusi Hmitrötr. (2 Korinito 2:11) Ame petre kö ngöne la qaane la itusi celë, hne së hë hna ce ithanatane la itre aqane nyinyithiina cili, tune lo ketre ihnö, ene la pi aja mo, tune mina fe la troa nyi sineen la itre atr ka troa huli së koi ngazo, me kuci ngazo. Tro pena sa wange enehila la ketre aqane nyinyithiina i Satana, ene la troa kuci haze.

10. (a) Nemene la kuci iöni? (b) Tune kaa la mekuna i Iehova göne la kuci iöni, nge nemene la aqane tro sa goeëne lai?

¹⁰ Ame la atr ka kuci iöni maine ka hëne la itre dremoni, tre, angeice hi lai a ithanata meköti memine la itre ua ka ngazo. Hetrenyi la itre xaa aqane troa kuci iöni, ene la troa nyi haze, me troa trene haze, me xahmi, me ithanata me itre ka mec. Thaa sihngödri kö koi së laka, Iehova a xome la kuci iöni, ceitune me ewekë “ka sis.” (Deuteronomi 18:10-12; Hna Amamane 21:8) Pine laka easë fe, tro fe sa hane ‘sisine la ngazo,’ haawe, thaa tro pi kö sa thele troa hane nyi sineen la itre ua ka ngazo. (Roma 12:9) Drei la ketre aqane ujë ka sis me ka wanaxoeë Iehova, Tretretro së e koho hnengödrai!

11. Pine nemen matre ketre isi ka tru hna thapa hnei Satana e traqa ju angeic atreine iaö së matre troa kuci iöni? Hamëne jë la ketre ceitun.

¹¹ E lö hnine hë së la kuci iöni, tre, kolo hnyawa hi lai a wanaxoeë Iehova, haawe, Satana a catre thele matre tro la itre xan e easë a hane kuca la ewekë ka sisi cili. Ame mina ju hi la Satana a iaöne la ketre atr troa ce me itre dremoni, kösë angeice hi lai a thapa la ketre isi ka tru. Pine nemen? Pane mekune ju së la ceitune celë: Maine hna ukune jë hi la ketre sooc troa tro trije la trongene la itre sine isi angeic, ke, hna iaö angeice matre tro hmaca pena ha a ce xöle memine la ithupëjia, eje hi lai laka, tro ha madri lai tane isi cili. Maine jë tro nyidrëti a tro fë amamane lai atre iwanaxoeë ceitu me ketre mo ka tru hna kapa matre thapa pi la isi, nge kolo lai matre hmahma pi pe lo ketre tane isi. Ceitune hi lai memine la Keresiano ka kuci iöni, laka, angeice hi lai a sipu triji Iehova me nue Nyidrë  troa lapa pena ha fene la musi Satana. Pane mekune ju së la madrine ka tru thei Satana, ngöne la angeic a ea draiëne la atre nuetriji Iehova, ceitune me ketre mo ka tru hnei angeic hna kapa qa ngöne la hnei angeic hna thapa la ketre isi! Ajane kö la ketre e easë troa nue Satana troa thapa la isi cili? Ohea! Thaa itre ka iwanaxoeë kö së.

12. Nemene la ketre aqane nyinyithiina hna xom hnei Satana nyine troa ajojezine la aqane tro sa wange la kuci iöni?

¹² Maine tro pala hi sa sisine la kuci iöni, thatreine jë kö tro Satana a thepe së hnene la aqane nyinyithiina cili. Haawe, angeic a atrehmekune laka, ma loi e troa amenune la aqane mekuna së. Troa tune kaa? Angeic a thele la itre jëne troa amenune la itre Keresiano me kuca matre troa mekune hnene la itre xane ka hape, ame “la ngazo, te, loi ; ngo loi, te, ngazo.” (Isaia 5:20) Satana a mejiune kowe la ketre aqane nyinyithiina i angeic ka hetre thangane hë, ene la troa fe la itre hnying nyine troa alueluëne la itre atr.

13. Nemene la aqane nyinyithiinane Satana la itre hnying matre fe jë troa alueluëne la itre atr?

¹³ Tro sa pane ce wange la aqane nyinyithiina i Satana ekö. Ame ekö e Edena, hnei angeice hna hnyinge koi Eva ka hape: “Hape u, ase hë ulatine hnei Akötesie, ka hape, The tro kö nyipoti a xeni qa ngöne la nöjei sinöe asëjëihë ne la hlapa?” Ame ngöne la hneijine i Iobu, hmekune lo kola pane icasikeu e koho hnengödrai hnei Iehova me itre angela, hna traqa hnei Satana troa hnyinge ka hape: “Hape u, gufa kö la qou i Iobu e Akötesie?” Nge ame lo Iesu a nyiqaane lo huliwa ne cainöje i nyidrë e celë fen, hnei Satana hna tupathi nyidrë me qaja ka hape: “Maine cilieti la Hupuna i Akötesie, te, ulatinejë mate aretopi la it’ etë celë.” Pane mekune ju së la hna kuca koi Iesu, hnei Satana hna mekune troa thaipië Iehova ngöne lo angeic a xome hmaca la itre trenge ewekë hnei Nyidrëti hna qaja ngöne lo sikisi lao wiik qëmekene la ijine cili; kolo Nyidrëti a qaja ka hape: “Dei la Nekönge hniminang ; ini a madi nyidë”!—Genese 3:1; Job 1:9; Mataio 3:17; 4:3.

14. (a) Tune kaa la aqane nyinyithiina i Satana matre troa luelue la mekuna ne la itre atr göi kuci iöni? (b) Nemene la hne së hna troa ce wange enehila?

¹⁴ Ame enehila, Satana a xome la ketre aqane iaö ka tune lai, matre menumenu hë nge luelue hë la aqane waipengöne hnene la itre  atr la kuci haze. Matre hetrenyi la itre xaa hlue i Iehova hna amenune hnei angeic, ke, hnei angeic hna fe la itre hnying, ame hna luelue pi la itre mekuna i angatr. Hnei angatr hna nyiqaane hnyingë pengöne la nöjei aqane kuci iöni, me thele ka hape ka ngazo asë jë kö itre ej. Eje hi laka, angatr a mekune ka hape, ‘Hape u, ase hë ulatine hnei Akötesie?’ (2 Korinito 11:3) Tro sa xatuane tune kaa la itre atr cili matre tro angatr a wenë amekötine la itre aqane waiewekë i angatr? Troa xecie tune kaa koi së laka, thaa tro kö a ajojezi së hnene lai aqane nyinyithiina i Satana cili? Ame ngöne la lue götrane ne la mel hnei Satana hna thele troa amenu së ngön, tre, tro së a sa e cili lo itre hnyinge hnei angeice hna fe göi itre xaa pengöne aqane kuci iöni. Ame la lue götrane cili, tre, ene la itre nyine iamadrinë, me aqane troa nyinyin la itre mec.

15. (a) Nemene la mekunene la itre atr ka nyimutre ka mele ngöne la götrane ahuë ne la fen, göi kuci iöni? (b) Tune kaa la aqane ajojezine la itre xaa Keresiano hnene la aqane waiewekë i fen göi kuci iöni?

¹⁵ Kola mama hnyawa ngöne la götrane Ahuë ne la fen, laka, hna wange sixane hë la engazone la troa kuci haze, memine la itre xaa aqane kuci iöni. Kolo ha amamane hnyawa enehila la itre huliwa ne la itre dremoni hna jëne film, me itus, me televizio, me itre elo hnine ordinatör; matre kösë thaa ka ngazo hmaca kö ngo nyine iamadrinë hë, nge hna ajane troa goeën, nge kösë nyine loi nge ka pë ethan kowe la mel. Ame la itre xaa film me itre itus, tre, itre eje a amamane hnyawa la aqane kuci iöni, tune la kuci haze; ka hlemu catre la itre aqane kuci iöni cili, ene pe, kola eköth la itre caa lapa göi troa traqa itronyi la itre ka nyinyape thele la ewekë cili. Mama hnyawa ha ka hape, hetre thangane catre la iajojezi ne la itre dremoni, ke, hnene la itre aqane atreine nyinyithiina i angatr matre kolo ha wanga acone la itre engazone la kuci iöni tune la itre magiciens me itre xane ju kö. Ame la kola xome ahmaloeëne la kuci iöni, tre, hna hane fe kö ajojezine me löthe la mele ne la itre Keresiano? Ame itre xan, tre, hna angazone la mekune i angatr. Hna tune kaa? Hanawange la ketre ceitun, thupene la hnene la ketre Keresiano hna goeëne la ketre film ka amamane la kuci iöni, öni angeice ka hape, “Hnenge hna goeëne la film, ngo thaa ka hane kö ni  kuci iöni.” Pine nemene matre ka ngazo catre la troa mekune tune lai?

16. Pine nemen matre ka ngazo catr troa iëne la itre nyine madrin ka amamane la itre aqane kuci iöni?

¹⁶ Ngacama isapengöne catre la easa kuci iöni memine la easa goeëne ej, ngo thaa tro kö lai a pë ethane kowe la atr ka goeëne hi la itre hna kuca. Pine nemen? Hanawange la ketre mekune nyine tro sa ce wang: Kola amamane hnene la Wesi Ula i Akötresie laka thatreine kö Satana me itre dremoni angeic troa e la itre mekuna së. * Haawe, tune lo hne së hna ce wange hë, maine kola ajane hnene la itre ua ka ngazo troa atre la itre mekuna ne la hni së me ketre ewekë ka ijije troa ananazijëne la aqane imelekeu së me Akötresie, tro hi angatre lai a goeëne hnyawa la itre huliwa së, tune lo itre aqane tro sa iëne la itre nyine iamadrinë. Ame la kola mama hnene la aqane ujë ne la ketre Keresiano laka, kola amadrinë angeice hnene la itre film maine itre itus ka amamane la itre trene u ne ta, me itre ka kuci drösinöe ne ieji, me itre atr hna löthe hnei dremoni, maine itre xaa ewekë ju kö ka caa ngöne hage memine la itre dremoni, kösë angeice hi lai a nyihatr kowe la itre dremoni. Angeice hi lai a thuemacanyi angatre la aja ka ngazo ka eje thei angeic! Haawe, kola sa hnene la itre dremoni me acatrene la aqane tro angatre a ikuië memine lai Keresiano; hna pane iajojezi hi jëne lai aja ka ngazo, uti hë la kola akeinyi angeic. Eje hi lai laka, ame la itre xaa ka kuci iöni, tre, hna pane ahlëne la aja i angatr hnene la itre nyine iamadrinë ka amamane hnyawa la itre pengöne aqane kuci haze enehila.—Galatia 6:7.

17. Hna jëne nemene aqane nyinyithiina la Satana a ajojezine la itre atr hna tithe hnei mec?

¹⁷ Thaa Satana hmekuje kö a ajojezine la aja së kowe la itre nyine iamadrinë, ngo ene mina fe la aja së troa nyinyine la itre sine meci së. Hna tune kaa? Maine jë troa nanazije la ketre Keresiano hnene laka, ngacama angeic a catre thele la nyin la meci angeic ngo kolo jë hi ka hape, ngazo catre jë. (Mareko 5:25, 26) Tro hë Satana lai me itre dremoni a thele troa ajojezi angeic. Atre hnyawa hi angatr laka,  Wesi Ula i Akötresie a hmekë së troa thele ixatua me tro kowe “la göli angetre kuca la menu.” (Isaia 31:2) Maine jë tro la itre dremoni a kuca matre tro la ketre Keresiano a dreisimine la kola hmekë angeic, nge tro angatr a tupathe lai ka wezipo matre tro angeic a hnehengazo menu; ene pe angeice a nyinyape thele drösinöe me aqane inyië tune la “thithi koi haze,” maine kuci iöni, ketre ewekë ka iakötrë catr. (Isaia 1:13, MN) Maine troa ie la aqane nyinyithiina ne la itre dremoni, tro ha nanazije la aqane imelekeu ne la atr hna tithe hnei mec me Akötresie. Ngöne nemene götran?

18. Nemene la itre aqane inyië hnene la Keresiano hna troa thipe trij, nge pine nemen?

¹⁸ Hnei Iehova hna hmekëne lo angetre Isaraela ka “thithi koi haze,” öni Nyidrë: “E tro nyipunie a li ime draië, tro ni a juetë qëmeke e nyipunie; nge e tro nyipunie a nyimu a thith, tha tro kö ni a dreng.” (Isaia 1:13, MN, 15) Eje hi laka, ame pala hi la aja së, tre, ene la troa neëne la ketre ewekë ka troa thingi jëne la itre thithi së me aene la ixatua hne së hna troa kapa qaathei Iehova, nge ka nyipi ewekë catre lai ngöne la easa lapa fë la meci së. (Salamo 41:3) Haawe, maine kola mama laka, ame la ketre aqane inyië maine ketre drösinöe pena, tre, hna ithuenyikön hnei kuci iöni, haawe, loi e troa thipe trije ej. * (Mataio 6:13) Aqane tro hi lai a ujë matre troa xecie hnyawa koi së laka, tro Iehova a xatua së.—Wange ju la itre mekune hna eköhagen, hna hape,  “Hapeu Kolo Lai a Kuci Iöni?,” ngöne götrane 194.

19. (a) Nemene la aqane iaöne la itre atr hnei Diabolo matre tro angatr a mejiune kowe la mene i angeic? (b) Nemene la itre edromë nyine troa neën hnene la itre nyipi Keresiano?

¹⁹ Maine kola mama laka nyimutre la itre atr ngöne la götrane Ahuë, angatr a wanga ahmalohmaloeën la engazon me itre ethane la mene i Satana, ame pena ha ngöne la itre xaa götrane ne la fen, tre, ketre pengöne kö. Ame e cili, tre, hnei Diabolo hna amenune la ka ala nyim, matre tro angatr a mejiune ka hape ka trene mene angeic. Ame la itre xaa atr, tre, angatr a mel, me xen, me huliwa, me meköle xouene la itre ua ka ngazo. Tru catre hnei edromë ka qeje itre dremoni. Itre edromë lai hna pi porotrikën hnene la itre atr; angatr a haine la itre edromë cili. Tro kö sa hane porotrikëne la itre edromë cili? Ohea, lue kepine ka sawa la itre nyipi hlue i Akötresie troa porotrikëne la itre edromë cili.

20. Maine thaa hna thë kö, ngo tune kaa la aqane tro la ketre atr a haöthe la itre aqane iaö i Satana?

²⁰ Ame la hnapan, tre, ame hi lai kola porotrikëne trongëne la itre  hna kuca hnene la itre dremoni, tre, kolo hi lai a sajuëne la itre aja i Satana. Hna tune kaa lai? Kola qaja hnene la Wesi Ula i Akötresie ka hape, ijiji Satana troa kuca la itre huliwa ka men, ngo eje fe a thuemacanyi së laka, angeic a kuca la “ite iamamanyikeu ka thoi” me “tenge iaö.” (2 Thesalonika 2:9, 10) Pine laka Satana la tane iamenu, atre hi angeic la aqane troa ajojezine la itre mekune ne la itre ka pi kuci iöni memine la aqane troa kuca matre tro angatr a mejiune kowe la itre ewekë ka pëkö nyipici ngön. Maine jë tro la itre atr cili a mejiune hnyawa laka, hnei angatr hna öhne me dreng la itre xaa ewekë me porotrikëne la hnei angatre hna sipu melën ceitune me trenge nyipici. Ame hë thupen, tro hë lai a wanga atrune menune la ewekë cili, ke, hna qaja lapaan. Maine hna haöthe me porotrikëne la itre ewekë cili hnene la ketre Keresiano, tre, kösë kolo hi lai a kuca la aja i diabolo, lo “keme ne” la thoi. Angeice fe hë lai a troa hane haöthe la itre aqane iaö i Satana.—Ioane 8:44; 2 Timoteo 2:16.

21. Nemene la itre nyine tro sa porotrikën?

²¹ Ame la hnaaluen, tre, maine ka lapaa iöhnyi la ketre atr memine la itre dremoni ekö, loi e tro angeic a hnöthe troa porotrikëne la itre edromë cili kowe la itre trejin. Pine nemen? Hna haji së ka hape: “Goeë Iesu, ate nyi qane me apexejene la lapaun.” (Heberu 12:2) Nyipici, tro sa goeë Keriso hnyawa, ngo thaa Satana kö. Kola mama hnyawa ngöne lo Iesu ekö e celë fen, laka, thaa hnei nyidrëti kö hna porotrikën kowe la itretre drei nyidrë la itre edromë ka qaja la itre ua ka ngazo, ngacama tru catr hnei nyidrëti hna atre ngöne la itre hnei Satana hna atreine troa kuca. Hnei Iesu pe hna tro fë pala hi la maca ne Baselaia. Qa ngöne lai, loi e tro sa xötrethenge la tulu i Iesu me itre aposetolo, ene la troa thele troa porotrikëne “la ite huliwa ka mene i Akötesie.”—Ite Huliwa 2:11; Luka 8:1; Roma 1:11, 12.

22. Nemene la nyine tro sa kuca matre tro pala hi a hetrenyi la “madrine e hnengödrai”?

²² Nyipici, Satana a xome la itre aqane nyinyithiina ka nyimu pengön, tune la kuci iöni, matre troa thele troa thë la aqane imelekeu së me Iehova. Ngo maine tro sa sisine la ngazo me fedre hnyawa kowe la loi, haawe, thaa tro hë së a nue jë i Diabolo troa ananazijëne la aja ka eje the së troa thipe trije la nöjei aqane kuci iöni. (Efeso 4:27) Pane mekune ju së la etrune la “madine e hnengödrai,” e traqa së catre “thipe tije la ite nyinyithina i Diabolo” uti hë la troa apaatrenyi angeic elany!—Efeso 6:11.