Tune la hna amexeje ngöne 1 Korinito 6:1-8, Paulo aposetolo a qaja la itre iwesitrë ne la itre sine hmi nyidrë angetre iuti sai koi hna kootr. Hace nge thaa madrine kö nyidrë kowe la itre xaa Keresiano ne Korinito, angatr “a cate fë troa ishenyine hnei angete thina ka tha meköti kö.” (Xötre 1) Celë hi matre, Paulo a hamëne ju la itre kepine ka nyipi ewekë göi troa hmekëne la itre Keresiano, matre thaa tro kö angatr a iuti sai koi gaa tru; ngo loi pe troa xötrethenge hnyawa la itre hna amekötine e hnine la ekalesia, göi troa senge la itre jol ka eje thei angatr. Tro hö sa ce wange la itre xaa kepine matre kola hamëne la eamo celë, nge thupene lai, tro sa ce ithanatane la itre xaa hnepe götran ngöne la mele së laka, thaa nyipi ewekë kö troa trongëne la eamo celë.

Maine easë a iwesitrë memine la ketre trejine pi mani, nyipi ewekë tro sa pane thele la mekuna i Iehova me xötrethengen, ngo thaa thenge kö la isa sipu mekuna së. (Ite Edomë 14:12) Tune la hnei Iesu hna amaman, celë hi aqane tro lai a canga thupatëne la iwesitrë së, wanga ngazo catre jë. (Mataio 5:23-26) Ngazo pe, hnene la itre xaa Keresiano hna iwesitrë uti fe hë la troa iuti sai kowe la hna kootr ka tru. Öni Paulo, ka hape: “Celë hi menu i nyipunie laka iuti sai nyipunie.” Pine nemen? Ame la nyipi kepin, tre, tro hë lai a hlemu ngazo la ekalesia memine la ëje i Iehova lo Akötresie hne së hna hmi kow, hnene la itre aqane ujë cili. Qa ngöne lai, loi e tro fe a tru e kuhu hni së la hna hnyinge hnei Paulo, kola hape: “Ue laka tha xomi hnine kö la ngazo ?”—Xötre 7.

Hna qaja mina fe hnei Paulo ka hape, hnei Akötresieti hna hamëne kowe la ekalesia la ketre jëne troa amekötine la itre iwesitrë. Ene la itre qatre thup, itre Keresiano trahmanyi ange hna ainamacanëne jëne la hnei angatre hna atreine wanga atrehmekune la itre nyipici ka ej e hnine la Itre Hna Cinyihan, nge ketre, Paulo a qaja laka, angatre hi lo ka “ateine troa amekötine göi ite tejine” ngöne mina la kola traqa “la ite ewekë ne la mele celë.” (Xötre 3-5) Hnei Iesu hna amamane fe laka, ame la itre iwesitrë, tre, kolo fe a qaja lo itre iwesitrë pi itre huliwa ka ngazo, tune la troa sili trenga thoi me iaö, haawe köni hna amekötin thatraqane lai: ame la hnapan, tre, tro epuni a catre sei jolen hmekuje hi memine la hnei epuni hna iwesitrë memin ngöne la gaa co; ame la hnaaluen, tre, maine thaa iloi pala kö, loi e troa traqa fë la caas maine lue atr ka troa anyipici epun; nge ame la hnaakönin,  tre, maine thaa ie kö la hna amekötine hnapan, haawe loi e tro epuni a qaja kowe la ekalesia, kola qaja la itre qatre thup.—Mataio 18:15-17.

Eje hi laka, ame la itre qatre thup, tre, thaa itretre amekötine kö angatr göi mus maine itre ka huliwa thele manie pena, nge thaa nyipi ewekë kö tro angatr a ujë tune lai. Thaa angatre kö la itre ka ami trepene la itre hna amekötine göne la troa nyi nyin la itre iwesitrë thene la itre trejine pi mani. Ngo angatre pe a thele troa xatuane la lue ka iwesitrë, matre troa trongëne la Itre Hna Cinyihane me kapa ngöne la hni ka tingeting la mekun hna axeciën. Ngo ame ngöne la itre götrane ka tru ejolen, ijije tro angatr a sipone troa wange me ithanata memine la atre thupëne la sirkoskripsio maine memine pena la filial ne la Itretre Anyipicine i Iehova. Ngo ame itre xaa ijin, thaa nyipi ewekë kö troa trongëne lo hna eamon hnei Paulo. Itre ijine ka ue lai itre xaa ijine cili?

Ame ngöne la itre xaa ijin, kola iuti sai göi tro hi a nyi aliene la itre xaa pepa, maine kola tro thenge la hna amekötine göi troa thele troa iloi me thele tingeting. Drei la ketre ceitun, ijije troa iuti sai pine laka caasi hmekuje hi la hna amekötine ka ijij troa hetrenyi la pepa ne sei hna cil, troa thupëne caasine la ketre nekönatr, troa axeciëne la etrune manie thatraqai nyëne pala pë hë, troa kapa la ixatua qaathei assurance, hna e fe itre ej thene la itre ka tru trenge gufa, nge ketre troa anyipicine ngöne la pepa i mus la itre aja së göne la itre ewekë së, maine e meci hë së. Hetrenyi mina fe la itre xaa götrane ngöne laka, maine jë nyipi ewekë tro la ketre trejine a tro fë la jole koi gaa tru, göi matre troa thupë angeic. *

Thaa kolo kö a thele iwesitrë hnene la itre ka iuti sai pine la itre ewekë cili, nge ketre, ame la hnei angatre hna kuca, tre, thaa ka ifekethi kö memine lo eamo hna hamëne hnei Paulo. * Ngo kola ahmitrötrëne pala hi la ëje i Iehova me thele tingetinge me caasi e hnine la ekalesia, celë hi itre ewekë nyine troa pane thele hnene la Keresiano. Ame la ewekë ka sisitria, nge hatre i angetre xötrethenge Keriso, tre, ene la ihnim, nge “ihnim . . . tha ate thele ewekë i nyëne kö.”—1 Korinito 13:4, 5; Ioane 13:34, 35.