1. Nemene la hnei Iesu hna amamane hnyawa ngöne la jidri tixenuë i nyidrë e celë fen?

AME ngöne la jidri tixenuë i Iesu e celë fen, hnei nyidrëti hna amamane la etrune la aqane hnehengazone nyidrëti la mele ne la itretre drei nyidrë. Hnei nyidrëti fe hna thithi thatraqane lai, me sipone kowe la Tretretro i nyidrë, me hape: “Tha sipo cilieti kö ni, mate tro cilieti a thei angate qa la fen, ngo mate tro cilieti a thupë angate ene la ngazo. Tha itete fene kö angat, nge tunge tha ate fene kö.” (Ioane 17:15, 16) Kola amamane hnei Iesu jëne la thith i nyidrë, la ejuine la ihnimi nyidrëti kowe la itretre drei nyidrë memine la enyipiewekëne lo itre trenge ewekë hnei nyidrëti hna qaja e cili lo kowe la itre xan e angatr; kola hape: “Tha ite sine ne la fene nyipunie.” (Ioane 15:19) Kola mama hnyawa laka, nyipi ewekë catre koi Iesu troa thaa ce sinee me fen hnene la itretre drei nyidrë!

2. Nemene la “fen” hna qaja hnei Iesu?

² Ame la “fen” hna amexeje hnei Iesu, tre, kola qaja la itre atr asë hna thipetrije hnei Akötresie, nge hna musinëne hnei Satana, nge hna hnöthe la mele i angatr hnene la itre thiina ka ngazo, tune la troa mele caas, me hni ne pi tru ka xulu qaathei Diabolo. (Ioane 14:30; Efeso 2:2; 1 Ioane 5:19) Eje hi lai laka, “ithupëjia me Akötesie la kola nyi sine ne la fene hnengödrai.” (Iakobo 4:4) Tune kaa kö la aqane tro la itre atr asë ka ajane troa cile huti ngöne la ihnimi Akötresie, nge ka mele e hnine la fen, a kuca matre thaa tro kö angatr a nyi sinene la fen? Tro sa pane ce wange la faifi lao aqane troa kuca: troa catre nyipici pala hi kowe la Baselaia i Akötresie hna cilën hnei Keriso nge thaa tro kö a hane sine la kuci politik; troa thipetrije la ua ne la fen, ene la itre mekuna ne la fen,  me troa qahmihmi la aqane troa heetr me isej, troa maca la alameke së, me troa xetrëne la ixetre ne isi ngöne la götrane la ua.

3. (a) Tune kaa la aqane goeëne Iesu la kuci politik ngöne lo hneijine i nyidrë? (b) Pine nemen matre kola qaja la itretre drei Iesu lo itre hna iën, ka hape, itre ka nyi trenge ewekë me itre maca i Keriso angatr? (Xome jë la itre ithuemacanyi e cahu fen.)

³ Thaa hnei Iesu kö hna sine la kuci politik ngöne la hneijine i nyidrë, ngo hnei nyidrëti pe hna catre cainöjëne la Baselaia i Akötresie, lo musi hnei nyidrëti hna troa cilën nge nyidrëti la Joxun. (Daniela 7:13, 14; Luka 4:43; 17:20, 21) Qa ngöne lai, ame ngöne la Iesu thei Ponetio Pilato, hnei nyidrëti hna qaja ka hape: “Tha qa kö la fene la baselaiang.” (Ioane 18:36) Kola xötrethenge hnene la itretre drei nyidrë la tulu i nyidrë, hnene la aqane nyipici angatre koi Keriso memine la Baselaia i nyidrë me aqane cainöjëne la Baselaia cili kowe la fen. (Mataio 24:14) Hna cinyihane hnei Paulo aposetolo, ka hape: “Qa ngöne lai, ite maca i Keriso hun, kösë Akötesieti a iele nyipunie hne hun ; eëhuni ite hna i Keriso a iele nyipunie troa iloi me Akötesie.” *—2 Korinito 5:20.

4. Tune kaa la aqane nyipici la itre nyipi Keresiano asë kowe la Baselaia i Akötresie? (Wange ju la itre mekune  hna eköhagen ngöne götrane 52.)

⁴ Pine laka ame la itretre tro fë maca, tre, angatre la itre ka nyi trenge ewekëne la nöje i angatr ngöne la ketre mus i trehnyiwa, haawe, thaa angatre kö a hane lö hnine menune la itre jole ka eje ngöne la itre nöj hnei angatre hna huliwa ngön; angatre pe a thele matre thaa tro kö a sine la fen. Nge angatre fe a sajuëne e cili la itre ewekë ne la musi ne la nöj hnei angatre hna nyi trenge ewekën. Ceitune hi lai memine la itre hna iëne hnei Keriso, laka, “ej’ e hnengödrai la nyipi nöje [i angatr].” (Filipi 3:20) Eje hi, pine laka hnei angatr hna catre cainöjëne la maca ne Baselaia, ene pe hna xatuane la itre “xaa mamoe” itre milio la etrun, matre troa  “iloi me Akötesie.” (Ioane 10:16; Mataio 25:31-40) Angatre hi lai itre hna upe hnei Keriso, itre ka xatuane la itre trejine me Iesu hna iën. Kola ce cilëgöline la Baselaia ne la Mesia, hnene la lue lapa ka catre thaa hane sine la fen memine la aqane kuci politike ne ej.—Isaia 2:2-4.

5. Nemene la eisapengönene la ekalesia i Keresiano memine lo Isaraela ekö, nge tune kaa la aqane mama la eisapengönene cili thene la itre Keresiano?

 ⁵ Ame la troa nyipici koi Keriso, tre, thaa celë hmekuje kö la sipu kepine la kola thaa hane sine la fen hnene la itre nyipi Keresiano. Thaa ceitu së kö memine lo Isaraela ekö, laka hnei Akötresieti hi hna hamëne la ketre hnepe götrane koi angatr, ngo ame së, tre, easa mel e hnine la ketre lapa ka ca hae e cailo fen asë. (Mataio 28:19; 1 Peteru 2:9) Qa ngöne lai, maine tro sa sajuëne me lö hnine la kuci politike ne la itre atr, tro ha athixötrëne la itre hne së hna qaja göne la maca ne Baselaia, nge tro fe ha hetre ethane kowe la caasi së itre Keresiano. (1 Korinito 1:10) Ketre, e traqa ju la itre isi elany, tro hë së a isi memine la itre trejine me easë, ene lo itre hna upi së troa hnim. (Ioane 13:34, 35; 1 Ioane 3:10-12) Haawe, itre ewekë lai ka upi Iesu troa qaja kowe lo itretre drei nyidrë troa liine hnine la trengene la taua, nge thaa tro kö a isi. Nge hnei nyidrëti mina fe hna upi angatr troa hnime la itre ithupëjia me angatr.—Mataio 5:44; 26:52; wange ju la itre mekune hna eköhagen, hna hape,  “Eni Kö a Catre Thaa Hane Sine La Fen?” ngöne götrane 55.

6. Qa ngöne laka ase hë epuni nue la mele i epuni koi Akötresie, nemene fe la thangane lai ngöne la aqane imelekeu i epuni me Kaisara?

⁶ Pine laka easë la itre nyipi Keresiano, haawe, hne së hë lo hna nue la mele së koi Akötresie, ngo thaa koi ketre atr kö, maine ketre organizasio i atr, maine nöje pena. Kola qaja ngöne 1 Korinito 6:19, 20, ka hape: “Tha ite ewekë i nyipunieti kö nyipunie? Ke ase hë itö nyipunie hnene la thupen.” Celë hi matre itretre drei Iesu a hamëne koi “Kaisara” la iatruny, me hotr, me drengethenge hna sa tulune hi, nge ame ngöne la ketre götran, angatr a hamëne koi “Akötesie la ite ewekë i Akötesie.” (Mareko 12:17; Roma 13:1-7) Kolo lai a qaja la hmi angatr, memine la aqane pexeje la ihnimi angatr, memine fe la aqane drengethenge me nyipici angatr. Nge maine troa traqa la ketre jole ka tru, tre, angatr a nue la mele i angatr koi Akötresie.—Luka 4:8; 10:27; Ite Huliwa 5:29; Roma 14:8.

7, 8. Nemene la ‘ua ne la fen,’ nge nemene la aqane “huliwa” la ua cili thene la ketre atr?

⁷ Ame la ketre aqane thaa hane sine la fen hnene la itre  Keresiano, tre, ene la troa thipetrije la aqane mekune ne eje ka ngazo. Hnei Paulo hna cinyihane ka hape: “Tha hne shë kö hna kapa la [“ua,” MN] ne la fen, loi pe la [“ua,” MN] qa thei Akötesie.” (1 Korinito 2:12) Öni nyidrëti koi angetre Efeso ka hape: “Hnei nyipunie hna trongën’ ekö . . . e celë fene thenge la tane ate musinën’ e caha nyipine, ene la [“ua,” MN] ate huliwa hnine la ite ka tha idei.”—Efeso 2:2, 3.

⁸ Ame la hnëewekë hna hape “e caha nyipin [eny],” maine ua, tre, kola qaja la ketre trenge catr ka thaa mama koi lue meke i atr, nge ka ukune la itre atr troa thaa drengethenge Akötresie, me sajuëne la “meciunyi ewekë i ngönetei, memine la meciune ne la lue mek.” (1 Ioane 2:16; 1 Timoteo 6:9, 10) Ame la ua cili, tre, eje la “ate musinën” la fen, pine laka ej a xeexe la itre aja së ka ngazo, me iamenu me iwajahuj, nge pine laka ceitune eje memine la enyi hne së hna manon, laka thatreine kö troa isa tro memin. Ketre, ej a “huliwa” hnine la ketre atr, ene pe kola sajuëne thei angeic la itre thiina ka thaa ijiji Akötresieti kö, tune la mele caas, me pi tru, me piine la itre göhnë ka draië, memine la ajane troa ketre eköthe la itre sipu wathebo me icilekeu memine la mus. * Kolo lai a hape, ua ne fen a kuca matre kökötre trootro la itre thiina i Daibolo e kuhu hni ne la atr.—Ioane 8:44; Ite Huliwa 13:10; 1 Ioane 3:8, 10.

9. Nemene la itre aqane troa löthe la mekune së me hni së hnene la ua ne fen?

⁹ Kolo kö a nyiqaane löthe la itre mekune së me lapane la hni së hnene la ua ne la fen? Troa traqa tun, e hne së hna nue ej troa huliwa, nge thaa hmeke kö së. (Ite Edomë 4:23) Ame itre xaa ijin, tre, thaa mama hnyawa kö la aqane iajojezi ne ej, maine jë hna jëne la aqane ce sinee së memine la itre atr kösë ka mama koi së ka hape, itre ka thiina ka meköt, ngo ame pe, tre, pëkö ihnimi angatr koi Iehova. (Ite Edomë 13:20; 1 Korinito 15:33) Canga tro hi a löthi së fe hnene la ua ka ngazo cili, e tro sa e la itre itusi ka ngazo, me itre götran ngöne ëternet ka amamai kuci ngazo maine itre hna qaja pena hnene la itre ka iamenumenu, me itre nyine iamadrinë  ngo ka ngazo pe, me pi hun ngöne la itre hna elo; itre aqane tro hi lai a ithua së hnene la itre mekuna i Satana maine fene i angeice pena.

10. Tro sa thipetrije tune kaa la ua ne la fen?

¹⁰ Tro sa thipetrije tune kaa la aqane iajojezine la ua ne fen, me thupë së kö ngöne la ihnimi Akötresie? Loi e troa kepe thangane hnyawa la itre hna hnëkën hnei Iehova ngöne la götrane la ua, me catre thithi pala hi matre troa kapa la uati hmitrötr. Ka draië catre kö Iehova hui Diabolo maine hune la fene ka ngazo  hna musinën hnei Satana. (1 Ioane 4:4) Haawe, drei la enyipiewekën la tro sa lapa qale catre koi Iehova me easenyi Nyidrë hnene la thith!

11. Tune kaa la aqane ajojezine hnene la ua ne fen la itre aqane heetr?

¹¹ Ame la ketre hatren la aja ne la fen thene la ketre atr, tre, ene la aqane heetre i angeic me aqane isej, me aqane nyihnyawane angeic la ngönetrei i angeic. Ame ngöne la itre nöje ka nyimutre, ngazo catre menu hë la aqane heetr ne la itre atr, ene pe qaja jë hnene la ketre atr ka ithanata hnine Televizio, ka hape, ame la pune elany, tro pë hë a cile xöe la itre föe ne gojeny, ke, kolo ha ce heetre me angatr hnene la nöjei jajiny. Ketre tune fe la itre nekö jajiny, laka, thaa thöthi pala kö nyudren, nge kolo ha hane ajojezi nyudren hnene la aqane heetre cili; hna qaja hnene la ketre zonal, ka hape, “kola amamai ngönetrei, nge kola heetr qene hmo.” Ame la ketre hna majemine enehila, tre, ene la troa isosonyi la aqane heetr, ke, nyine troa amamane ka hape, hetre hni ne icilekeu, nge thaa sipu metrötrëne hë la mel.

12, 13. Nemene la itre trepene meköt ka troa xatua së troa thupëne la aqane heetr me iseji së?

¹² Pine laka easë la itre hlue i Iehova, easa ajane troa nyihnyawane la ngönetrei së, nge thaa tro kö a isosonyi la aqane heetre së ngo tro pe a porop, me lolo, me hmekune la itre hne së hna kuca. Ame ngöne la nöjei ijin, tre, loi e tro pala hi së a thupëne la pengö së, matre troa mama la “qahmihmi me metöt,” thiina ka ce tro memine la itre “huliwa ka loi” hna thele thene la itre atr, trahmanyi me föe, itre ka “thina ka ijiji Akötesie.” Nyipici laka, ame la hne së hna troa nyipi ewekën, tre, thaa ene kö la troa goeë së hnene la itre atr, ngo tro pe a “thupë [së] kö ngöne la ihnimi Akötesie.” (1 Timoteo 2:9, 10; Iuda 21) Eje hi, ame la aja së, tre, ene la troa thaipine me amingömingöne la “ate ka sihngödi e kuhu hni [së] . . . , ewekë atraqate xajawa i Akötesie.”—1 Peteru 3:3, 4.

¹³ Loi e tro pala hi sa mekune hnyawa fe, laka, troa ihmeku la aqane heetre së me iseji së memine la aqane troa goeën la itre atr la nyipi hmi. Ame la qene Heleni ne la hnëewekë hna hape, “qahmihmi,”  ngöne la eje a qaja la thiina ne la atr, tre, ej a amamane la mekun, ene la troa thil, me metrötrëne la itre aliene hni maine mekune ne la itre xan. Qa ngöne lai, ame la aja së, tre, ene la troa hane wanga atrune la mekuthethewe ne la itre xan, ngo thaa tro kö sa pane meku së ju hi göi pengöne iheetr hne së hna pi heetrën. Nge ame la ka nyipi ewekë catr, tre, ene la tro sa atrunyi Iehova memine la nöje i nyidrë me troa ketre amamai së ceitune me itre hlue i Akötresie, ka “kuca asë . . . nyine atrunyi Akötesie.”—1 Korinito 4:9; 10:31; 2 Korinito 6:3, 4; 7:1.

14. Nemene la itre hnying nyine tro sa thel, göi pengö së me ngönetrei së?

¹⁴ Ka nyipi ewekë catre tro sa thupëne la aqane heetre së me iseji së, nge troa porope hne së ngöne la easa cainöj ngöne la itre hnalapa trootro, maine sine pena la itre icasikeu i Keresiano. Isa thele jë së ka hape: ‘Hapeue la pengö së memine la ngönetrei së, canga goeën amenyi së kö hnene la itre atr? Thaa kolo jë kö a athixötrëne la itre xan? Eni kö a sipu meku ni me itre emeköting, hune la itre hnëqa ka eje theng e hnine la ekalesia?’—Salamo 68:6; Filipi 4:5; 1 Peteru 5:6.

15. Pine nemen matre thaa hna e wengëne kö hnene la Wesi Ula i Akötresie la itre wathebo göi aqane troa heetr, me isej, me pengö i ngönetrei?

¹⁵ Thaa Tusi Hmitrötre kö a amë wengëne la itre wathebo nyine troa trongëne hnene la itre Keresiano, göi aqane heetr me isej, me pengöne la ngönetrei. Thaa Iehova kö a hnöthe la mele së me sewe së troa ië mekun, me huliwane la aqane waiewekë së. Nyidrëti pe a ajane tro sa itre atr ka macaj, nge ka eköthe la aqane thele ewekë së hune la itre trepene meköt, nge “angete majemine  huliwane la hni troa wangate hmekune la loi me ngazo.” (Heberu 5:14) Nge ame la ka nyipi ewekë catr, tre, ene laka, Nyidrëti a ajane troa musinë së hnene la ihnim, ene la ihnimi së koi Akötresie me kowe la itre atr easenyi së. (Mareko 12:30, 31) E hnine la itre trepene meköti cili, ijije hi troa xome la itre pengöne aqane heetr me isej ka nyimutre. Kola mama hnyawa lai ngöne la eisapengönene la itre hane i heetr ne la itre atre i Iehova ka ala nyim, itre ka madrine angatr asë ngöne la hnë icasikeu i angatr e cailo fen.

16. Tro la ua ne la fen a icilekeu tune kaa memine la ini i Iesu, nge nemene la itre hnying hne së hna troa isa thel?

¹⁶ Ka iaö catre la ua ne la fen, nge ej a upe la itre atr, itre milio la etrun troa thele manie me mo matre troa manathith. Ngo hnei Iesu hna qaja ka hape: “Tha mele kö la ate hnene la etrune la nöjei ewekë hnei angeice hna heteny.” (Luka 12:15) Ngacama thaa hna kapa kö hnei Iesu la troa hnöthe menune pala ha la mele së, me sasaithi tulu la aqane huujëne ej, öni nyidrë e qaja ka hape,  troa kapa la mel me nyipi manathithi hnene la itre ka “pë ewekë ngöne la ua” me itre ka “maca” mek, tre, angatr a wanga atrune catrëne la aqane imelekeu i angatr me Akötresie. (Mataio 5:3; 6:22, 23) Isa hnyinge jë ka hape: ‘Eni kö a hane mejiune hnyawa kowe la hnei Iesu hna inin, maine hna ajojezi ni hnene la “keme ne [la thoi]”? (Ioane 8:44) Nemene la hna amamane hnene la itre trenge ewekëng, me itre ajang, me itre ewekë hnenge hna amë panëne ngöne la meleng?’—Luka 6:45; 21:34-36; 2 Ioane 6.

17. Qaja jë la itre xaa manathith hna kapa hnene la itre ka maca alamek.

¹⁷ Öni Iesu ka hape: “Hna qaja amekötine la inamacane hnene la nöjei huliwa ne ej.” (Mataio 11:19) Tro sa pane ce wange la itre xaa manathith hna kapa hnene la itre ka maca mek. Angatr a öhne la keukawa e hnine la huliwa ne la Baselaia. (Mataio 11:29, 30) Angatr a neëne troa hnehengazone menune pala ha la itre ewekë, ene pe thaa ketri angatre kö hnene la itre akötr ngöne la mekun me e kuhu hni. (1 Timoteo 6:9, 10) Qa ngöne laka, angatr a melëne hi la itre ka ijij, haawe, tru catre hë hnei traeme i angatr thatraqane la hnepe lapa i angatr memine la itre sine ce huliwa i angatr Keresiano. Qa ngöne lai, meköle hnyawa angatr. (Ate Cainöj 5:12) Eje thei angatr la ketre madrin atraqatr troa ham, nge angatr a kuca asë la hnei angatr hna atrein. (Ite Huliwa 20:35) Nge “tru la mejiu” i angatr, nge hetrenyi angatre la ketre tingeting e kuhu hni angatr me mejihnin. (Roma 15:13; Mataio 6:31, 32) Ka tru alamekene catre la itre manathithi cili!

18. Tune kaa la aqane qeje pengöne hnei Tusi Hmitrötr la ithupëjia me easë, memine la itre nyinyithiina i angeic, memine la pengöne aqane isi së?

¹⁸ Ame kowe la itre ka thupë angatre kö ngöne la ihnimi Akötresie, tre, kola thupë angatr ngöne la ua wanga ajolë angatre jë hnei Satana troa nyi hlue i Akötresie; angeice hi lo ka thele troa thingejëne la itre Keresiano, matre pë manathithi angatr nge pë mele ka tha ase palua kö mina fe. (1 Peteru 5:8) Hna qaja hnei Paulo, ka hape: “Tha eëshë kö a ikuië me ate, ngo ite joxu pe, me itete mus, me ite tane la jidi e celë fen, me ite [“ua,” MN] ka ngazo ngöne la ite hnë e hnengödrai.” (Efeso 6:12) Ame la hnëewekë hna hape, “ikuië,” tre, kola qaja ka hape, ame la isi së, tre, thaa iananyi kö së  kowe la hne së hna isi memin, matre easa thele troa iakeiny. Ketre, ame la hnëewekë hna hape “ite joxu,” me “ite mus,” me “ite tane la jidi e celë fen,” tre, kola amamane laka, ame la itre isi ka xulu qa ngöne la götrane la ua, tre, hna eköthe me hnëkëne hnyawa.

19. Qeje pengöne jë la ixetre nyine ishi ne la Keresiano ngöne la götrane la ua.

¹⁹ Ngacama ka ngazo së nge hna nyifegone la hne së hna atreine troa kuca, ngo ame pe, ijije hi tro sa hun. Troa tune kaa? Hnene la hna xome “la ite nyine ishi asë qa thei Akötesie.” (Efeso 6:13) Drei la aqane qeje pengöne ngöne Efeso 6:14-18, kola hape: “Hawe, cile huti ju kö nyipunie, hna oteëne la nyipici, nge hna xetëne la mano hnene la ixete ne ishi, ene la thina ka meköt ; nge hna sile la ite tengene hnatrapaca i nyipunie ene la hna hnëkëne la maca ka loi ne tingeting ; nge ce me it’ ej’ asë xomejë fe la pete ene la lapaune, mate cate nyipunie troa apine la ite jo ne hazo eë ne la ka ngazo. Nge xomejë fe la itrapete ne ishi [maine mejiun] ene la mel, memine la taua ne la Ua, ene la wesi ula i Akötesie ; nge kola thithi pala hi nyipunie, ene la thithi sipo asë ngöne la Ua.”

20. Nemene la eisapengö së memine la ketre sooc?

²⁰ Pine laka ame lai ixetre nyine isi ngöne la götrane la ua, tre, ketre ewekë hna hnëkëne lai hnei Akötresie, haawe, tro ej a thupë së pala hi e hne së hna xetrëne hnyawa pala hi. Ame la itre sooc, tre, hetrenyi e itre xaa ijin, la itre hnepe ijine ka qeadridri kola pane tingeting, ngo thaa ceitune kö lai memine la itre Keresiano laka, angatre pala hi e hnine la isi, nge umuthe jë kö la isi elanyi e ase pi Akötresieti apaatrene la fene i Satana me kuiëne kowe la hnaope la nöjei ua ka ngazo asë. (Hna Amamane 12:17; 20:1-3) Pine laka nyipi ewekë tro asë hi së a “xom’acone” la ngönetrei së matre tro sa qale catre koi Iehova, haawe, thaa tro pi kö sa hmaca troa isi memine la itre ngazo së maine itre aja së ka ngazo. (1 Korinito 9:27) Matre, ame la easa thaa isi, tre, kolo hi lo ijine tro së lai a waipengö së hnyawa!

21. Tro hmekuje hi sa hune tune kaa ngöne la isi së ngöne la götrane la ua?

²¹ Ketre, thatreine kö tro sa ketre sipu hun ngöne la isi cili. Celë hi matre Paulo a amekunë së la enyipiewekëne troa ujë koi Iehova me “thithi sipo asë ngöne la Ua.” Nge easë mina fe a drengethenge  Iehova hnene la hna inine la Wesi Ula i Nyidrë me caasi memine la itre trejin me easë, “itre sooc” ngöne la nöjei ijin, ke, eje hi lai laka, thaa easë caasi hmekuje kö ngöne la isi ngo hetre ka xatua së! (Filemo 2; Heberu 10:24, 25) Ame la itre ka catre ngöne la nöjei götrane cili, tre, thaa angatre hmekuje kö a troa hun, ngo kolo fe a aijijë angatre troa ekögölithe la lapaune i angatr ngöne la kola traqa la itre jol.

22, 23. (a) Pine nemene matre nyipi ewekë tro sa hmeke ngöne la nöjei ijin troa cilëgöline la lapaune së, nge nemene la itre hnying hne së hna troa isa thel? (b) Nemene la topik hne së hna troa ithanatan ngöne la mekene ka troa xulu ne la itusi celë?

²² Hnei Iesu hna qaja ka hape: “Ngöne laka tha ite sine ne la fene nyipunie . . . celë hi laka methinë nyipunie hnene la fen.” (Ioane 15:19) Qa ngöne lai, loi e tro sa hmeke troa cilëgöline la lapaune së me ujë tune lai cememine la metrötr memine la hni ka menyik. (1 Peteru 3:15) Isa thele jë ka hape: ‘Eni kö a trotrohnine la kepine matre kola cile catr la Itretre Anyipici Iehova me thipetrije la ketre mekune ka isazikeu ka hlemu ngöne la nöj? Ame la kola pane tupath la lapauneng hnene la ketre mekune ka isazikeu nge ka hlemu e cailo fen, tre, xecie kö e kuhu hninge laka, ame la hna qaja hnei Tusi Hmitrötr memine la hlue ka nyipici me ka inamacan, tre, ka meköti pala hi thaa nyine tro kö a lueluën? (Mataio 24:45; Ioane 17:17) Nge e traqa jë së kuca la ewekë ka meköti xajawa i Iehova, hapeu, hne së kö hna mekune troa isapengöne la aqane ujë së me fen, nge easë kö a madrine troa ujë tune lai?’—Salamo 34:2; Mataio 10:32, 33.

²³ Ame itre xaa ijin, kola tupath la aja së troa ananyine la fen, ngöne la itre hnepe götrane ka thaa mama hnyawa kö. Hanawang la ketre ceitun, tune lo hne së hna ce wange hë, kola thele hnei Diabolo troa tupathe la itre hlue i Iehova me uku angatr troa hane lö hnine la itre aqane kuci madrinene la fen. Tro sa iëne tune kaa la itre nyine madrine ka troa akeukawanyi së me hamë së la ketre mekuthethewe ka lolo? Tro pë hë la mekene hne së hna troa ce wange thupen, a ithanatane la mekune celë.