1, 2. Nemene la ahnahna qaathei Akötresie ka nyipi ewekë catr enehila nge pine nemen?

HNA hamë së hnene la Tretretro së e koho hnengödrai la ketre ahnahna me trenga mo ka sisitria catr, ene la mele ne la itre atr ka atreine nyitipune la itre thiina i Nyidrë. (Genese 1:27) Pine la ahnahna ka sisitria cili, atreine hi së troa trotrohnine la itre trepene meköti ne la Tusi Hmitrötr nyine loi koi së. Maine tro sa trongëne itre ej, haawe, tro hë së a kökötr me macaj ngöne la götrane la ua, ene pe tro hë së a itre atr ka hni koi Iehova, nge itre ka “majemine huliwane la hni troa wangate hmekune la loi me ngazo.”—Heberu 5:14.

² Ka nyipi ewekë catre troa atreine wanga atrehmekune la itre trepene meköti enehila, pine laka, kola jole catre la fen nge thaa ijije kö troa isa acili wathebone la nöjei ewekë ka traqa koi së ngöne la mele së. Ame la mekune celë, tre, hna amamane hnyawa hnene la sias, ngöne la pengöne la itre drösinöe hna kuca, nge ka hetre wamine mutine madrane tune fe la itre aqane troa nyinyine la itre mec laka hetre madra ngön. Celë hi ketre götrane la ka nyipi ewekë catr nyine troa wanga atrune hnyawa hnene la nöjei ka ajane troa drengethenge Iehova. Ketre, maine tro sa trotrohnine la itre trepene meköti ne la Tusi Hmitrötr ka lolo, haawe, tro hë së a atreine axeciëne hnyawa la itre mekun, ene pe, lolo hnyawa ha la mekuthethewe së nge kolo fe a thupë së kö ngöne la ihnimi Akötresie. (Ite Edomë 2:6-11) Tro sa ce wange la itre xaa trepene meköti cili.

3, 4. Eu la kola xötrei qaja hnene la Tusi Hmitrötr la ehmitrötrene la madra, nge nemene la itre trepene meköti ka nyitrepene lai?

³ Thupene ju hi lo kola humuthi Abela hnei Kaina, Iehova fe hi lai a canga amamane ju la ehmitrötrene la mel memine la madra, me aqane hmitrötre lue ej. Öni Akötresieti ka hape: “Nemene  la hnei ’ö hna kuca? Kola teije la madra ne la jini ’ö koi ni qa kuhu hnadro.” (Genese 4:10) Ame koi Iehova, ke, mele i Abela hi lai madra i angeic, hna canga thupatëne ej. Haawe, aqane treijene hi lai madra i Abela a xëwe koi Akötresie matre tro Nyidrëti a të lai ngazo hna kuca.—Heberu 12:24.

⁴ Thupene la Iwë ngöne lo hneijine i Noa, Akötresie a nue pi kowe la itre atr troa öni la ijön ne la itre öni ngo thaa madra fe kö. Öni Akötresieti ka hape: “Ngo ame la ijöne memine la mele ne ej, ene la madra ne ej’, te, the tro kö nyipunie a öni. Nge nyipici tro ni a nyi thupene la madra i nyipunie, ene la mele i nyipunie.” (Genese 9:4, 5) Ewekë la hna amekötine kowe la itre matra i Noa asë uti fe hë enehila hnedrai së. Kola acatrene hnyawa hmaca lo mekune hnapan hna hamëne koi Kaina hnei Akötresie, laka, ame la u maine mele ne la itre hna xupe asë, tre, eje ngöne la madra. Kola anyipicine fe hnene la wathebo cili, laka, Iehova la Qeqe ne la mel, nge tro la itre atr asë ka thaa metrötrëne la mel memine la madra, a isa qeje thiina koi Nyidrë.—Salamo 36:9.

5, 6. Tune kaa la aqane amamane hnene la Trenge Wathebo i Mose laka, ka hmitrötr nge ka tru alamekene catre la madra? (Wange ju la itre mekune  hna eköhagen, ngöne götrane 78.)

⁵ Lue trenge nyipici hi lai ka tru ka mama hnyawa hnine la Trenge Wathebo i Mose. Hna qaja ngöne Levitiko 17:10, 11 ka hape: “Nge ame la ate . . . öni madra, te, tro ni a goeë tiline la ate öni madra, nge tro ni a thupa tiji angeice qa thene la nöje i angeic. Ke mele ne la ngönetei la madra ; nge hnenge hna hamën’ eje koi nyipunie hune la ita ne huje mate nyi thupene mele i nyipunie ; ke qâ ne la madra troa nyi thupene mele ne la at.”—Wange ju la itre mekune hna eköhagen hna hape,  “Etrune La Aqane Itö Së Hnene La Madra,” ngöne götrane 76.

⁶ E thaa kolo kö a troa huujëne la madra ne la ketre öni hune la ita ne huuj, tre, troa nenge me keleme ej e kuhu hnadro. Kösë kolo hi lai a nue la mel troa bëeke hmaca jë kowe la Atrekë ewekën. (Deuteronomi 12:16; Ezekiela 18:4) Ngo thaa nyipi ewekë kö tro la itretre Isaraela a thele troa trije apëne hnyawa la madra ne la öni. Ame la nyipi ewekë, tre, maine tro la atre Isaraela a humuthe me triji madrane hnyawa la öni, aqane tro angeice lai a hetrenyi la mekuthethewe ka tingeting ngöne la angeic a öni, nge angeice fe hi lai a amamane la metrötre i angeic kowe la Atre Hamë Mel.

7. Tune kaa la aqane ahmitrötrëne Davita la madra?

 ⁷ Davita la “ate ka tune la hni i [Akötresie],” hnei angeic hna trotrohnine la aliene la itre trepene meköt göi madra ka eje ngöne la wathebo i Akötresie. (Ite Huliwa 13:22) Ame ngöne la ketre ijin, pi iji jë hi Davita, ame hna thupe gojenyi pi hnapapaeë hnene la köni atre ne isi i angeic troa jöe tim, ngo ame ngöne lai götrane cili, tre, hna lapane hnene la itre ithupëjia. Nemene la hna kuca hnei Davita?  Öni angeic e hnyinge ka hape, “Madra ne la ala köni hna tro maine meci hë angat?” Ame koi Davita, tre, maine tro angeic a iji la tim, tre, kösë kolo hi lai a iji la madra ne la köni thupëtresij ka nue la mele i angatr troa thele tim. Ngacama atraqatre la pi iji angeic, ngo hnei angeice pe “hna neng’ eje koi Iehova.”—2 Samuela 23:15-17.

8, 9. Hapeu, kolo kö a saze la aqane waiewekë i Akötresie göne la mel me madra, ngöne lo kola acile la ekalesia i Keresiano? Qeje pengöne jë.

⁸ Traqa ha kowe la 2 400 lao macatre thupene la hna hamëne la wathebo koi Noa göi madra, nge 1 500 lao macatre thupene la hna hamëne la isisinyikeu ne la Trenge Wathebo, Iehova a jëne hmaca ju la lapa ne xomi meköti ne lo pane ekalesia i Keresiano ekö troa cinyihane ka hape: “Loi kowe la Uati Hmitöte me eëhuni fe, tha tro kö a nyi atrune la ehnefe koi nyipunie hune la nöjei ewekë celë ka ijij, ka hape ; iananyipi nyipunie memine la nöjei öni hna hujëne kowe la ite idola, me madra, me ite öni hna jele nyinawan, me kuci ngazo.”—Ite Huliwa 15:28, 29.

⁹ Kola mama hnyawa, laka, hna wanga atrehmekune hnene la lapa ne xomi meköti ekö ka hape, ka hmitrötr la madra nge e huliwane menune hë së, nge thaa thenge kö la itre trepene meköt, kösë ceitune hi lai memine la kola kuci idrola me kuci ngazo. Celë hi mekune la hna kapa enehila hnene la itre nyipi Keresiano. Ketre, pine laka thaa itre trenge wathebo kö la hnei angatre hna thele troa trongën ngo itre trepene meköti pe qa hnine la Tusi Hmitrötr, haawe, ijiji angatre hi troa amadrinë Iehova ngöne la aqane troa axecië mekune göi aqane xome la madra.

10, 11. (a) Tune kaa la aqane goeëne la Itretre Anyipici Iehova la xomi madra ka pexej, me itre ewekë ka tru hna ithuenyikön matre madra ju? (b) Ngöne nemene götrane pë hë la kola isapengöne la aqane mekune ne la Itre Keresiano?

¹⁰ Kola atrehmekune hnene la Itretre Anyipici Iehova laka, loi e troa “iananyi . . . me madra,” kolo lai a hape, thaa tro kö a xome menune la madra me hamën ej, maine amë me xeen eje pena. Pine laka angatr a metrötrëne la wathebo i Akötresie, haawe, xele fe angatr ma kapa la eke ewekë ka tru hna ithuenyiköne matre hetre madra, ene la globules rouges, globules blancs, plaquettes, plasma.

¹¹ Ame enehila, tre, atreine hi troa isa hule ijene la itre ewekë ka tru ne la madra me xome qa hnine la caa ewekë ka tru la itre  wamine mutin matre troa kuci pengönën me huliwane itre ej. Ijije kö tro la Keresiano a kapa la itre wamine mutine cili? Angatre kö a xome lai ceitune me “madra”? Isa qanyine pë hë la mekuthetheu troa xatua së troa axeciëne la mekune ka ijije koi së ngöne la götrane cili. Ceitune hi lai memine la itre xaa aqane troa huliwane la itre aqane inyië e kola troa xome la itre wamine mutin ne la madra, tune la dializ, me hémodilution, me sipu madra ne la atr hna thiane qa ngöne la eatre i angeic, nge troa canga hamë angeice hmaca ngo thaa tro pe a xeen amë.—Wange ju la Itre Xaa Mekun, götrane 215-18.

12. Tune kaa la aqane tro sa goeën me cile kowe la itre jol göi mekuthethew?

¹² Pine laka isa qanyi së troa isa axecië mekun, tune kaa, kolo lai a hape thaa ka nyipi ewekë kö koi Iehova la mekune hne së hna xom? Ohea, pine laka, ame Iehova, tre, ka nyipiine Nyidrëti la itre mekune së me itre kepine la aqane ujë së. (Ite Edomë 17:3; 21:2; 24:12)  Qa ngöne lai, thupene la hne së hna thithi koi Iehova me sipo Nyidrë troa atrepengöne hnyawa la itre drösinöe maine aqane troa nyinyin la itre meci së, loi e tro sa drenge la mekuthethewe së hna inine hnei Tusi Hmitrötr. (Roma 14:2, 22, 23) Ketre, thaa qa i itre xane kö troa amekötine koi së maine troa upe iele së troa ujë thenge la mekune hnei angatr hna xom; maine tro pena sa hnyinge ka hape, “Nemene la hnei eö hna troa kuca maine eö ju fe?” Ame e celë, tre, isa qanyine la itre Keresiano troa “isa thue ehnefen.” *—Galatia 6:5; Roma 14:12; wange ju la itre mekune hna eköhagen, hna hape,  “Eni Kö a Hane Ahmitrötrën La Madra?,” ngöne götrane 81.

13. Nemene la hnene la itre wathebo me itre trepene meköti hna amamane göi Iehova? Qeje pengöne jë.

¹³ Kola amamane hnene la itre wathebo me itre trepene meköti qa hnine la Tusi Hmitrötr ka hape, ame Iehova, tre, Atre Ekö Wathebo nge ka inamacane Nyidrë, nge ketre Kem ka ihnim; nge ka hnehengazone Nyidrë la mele ne la itre nekö i Nyidrë. (Salamo 19:7-11) Ngacama thaa hna hamëne kö la hna amekötine celë, ene la troa “iananyi . . . me madra” ceitu me ketre aqane troa nyinyine la itre mec, ngo ame pe, ej a thupë së qa ngöne la itre ejolene la troa hamë madra. (Ite Huliwa 15:20) Eje hi laka, nyimutre la itre droketre ka mekun ka hape, ame la troa ixöji nge thaa tro kö a hamë madra, tre, ceitune me ketre “hna amekötine ka sisitria catr” ngöne la itre aqane nyinyin la itre mec ngöne la hneijine së. Ame kowe la itre nyipi Keresiano, tre, ame lai mekuna ne la itre droketre, tre, kola anyipicine la ejuine la inamacane i Iehova me aqane ihnimi ne la Tretretro së.—Isaia 55:9; Ioane 14:21, 23.

14, 15. (a) Nemene la itre wathebo ka amamane hnyawa la ihnimi Akötresie kowe la nöje i Nyidrë? (b) Tro sa trongëne tune kaa la itre trepene mekoti ka sajuëne la itre hna amekötine nyine iamele?

¹⁴ Kola mama jëne la itre wathebo i Iehova ka nyimutre la aja i Nyidrëti troa mele ka loi hnei Isaraela, nöje i Nyidrë. Drei la ketre ceitun, hnei Nyidrëti hna upe la itretre Isaraela troa xupi öline la itre hune uma i angatr, matre thaa tro kö a kei me mala la itre atr e kola kuci itre huliwa e koho hune uma. (Deuteronomi 22:8; 1 Samuela 9: 25, 26; Nehemia 8:16; Ite Huliwa 10:9) Hnei Iehova fe hna iupe troa thupëne hnyawa la itre kau trahmany ka ses. (Esodo 21:28, 29) E troa wange sixane la itre hna amekötin, ke, kolo hi lai a amamane laka, pëkö metrötre së kowe la mele ne la itre xan, nge zö së e meci pi angatr.

¹⁵ Tune kaa la aqane tro sa trongëne la itre trepene meköti ka nyi trepene la itre wathebo cili? Hapeu matre troa thupëne wanga xulu pi la itre ethane qa ngöne la loto së, me aqane xomi loto së, me itre öni së, me uma së, me hnë huliwa së, me aqane ië nyine iamadrinë hne së? Ame ngöne la itre xaa nöj, nyimu thöthi ka eatr me meci ngöne la itre gojeny, hnene laka, thaa hna hmekëne kö ka hape, ame la itre ewekë, ke, ka tro fe hi a hetre ethan, nge hna inagala fe la aqane xomi loto. Ngo ame la itre thöthi ka ajane troa lapa catre ngöne la ihnimi Akötresie, tre, angatr a wanga atrune la mel, nge thaa angatre kö a thele madrine ngöne la itre ewekë ka troa hetre ethane kowe la mele i angatr. Thaa ka hmo kö angatr matre mekune menune ka hape, thaa tro kö a hane traqa koi angatre la itre hulö. Angatre pe a thupëne troa mele ka loi ngöne la ijine angatr a thöth, ke, hna ananyine la itre ethanyine la mel.—Ate Cainöj 11:9, 10.

16. Nemene la trepene meköti hna xome göi thi upune? (Wange ju fe la ithuemacanyi e cahu fen.)

¹⁶ Ka sisitria catre mina fe xajawa i Akötresie la mele ne la medreng e kuhu hni thin. Ame ekö e Isaraela, tre, maine troa eatr la ketre föe ka upune hnene la ketre atr, nge meci pi hi eahlo maine nekö i eahlo pena, haawe, ame koi Akötresie, ke, ceitui angeic me atre ihumuth, tro angeic a hamëne la “mel thupene la mel.” * (Esodo 21:22, 23) Qa ngöne lai, pane mekune jë la aqane ketri Iehova ngöne la Nyidrëti a öhne la etrune la thi upune ngöne la nöjei macatre, thangane hi la hna isa pi hune fë mekune me aja, matre pë hë ifego ne la kuci ngazo.

17. Tune kaa la aqane tro sa akeukawane la hni ne la ketre atr ka thi upune qëmekene troa inine la itre trepene meköti qaathei Akötresie?

¹⁷ Tro ju hë a tune kaa e ithanata ju memine la ketre föe ka thi upune qëmekene la troa hetrenyi la nyipi atrehmekune qa hnine la  Tusi Hmitrötr? Hapeu, kolo lai a hape thaa tro hë Iehova a amamane la utipine i Nyidrë? Ohea! Eje hi laka, ame la atr ka ietrane hnyawa la ngazo i angeic koi Iehova, tre, ijije hi troa mejiune koi Nyidrë troa senge la ngazo, ke, hna aijijëne lai hnene la madra hna nenge hnei Iesu. (Salamo 103:8-14; Efeso 1:7) Nyipici, hna ketre sipu qaja  hnei Keriso ka hape: “Tha traqa kö ni troa hëne la ite ka meköt, ngo ite ka ngazo pe mate troa ietra.”—Luka 5:32.

18. Tune kaa la aqane qaja amamane hnene la Tusi Hmitrötr la qaane la itre ihumuthi ka nyimutre?

¹⁸ Ketre, thaa Iehova hmekuje kö a sewe së troa akötrëne la itre xan, ngo Nyidrëti fe a upi së troa feje trije qa hnine la itre hni së la qaane la ihumuth, ene la imethinë. Hnei aposetolo Ioane hna cinyihane ka hape: “Ate ihumuth la ate methinëne la tejine me angeic.” (1 Ioane 3:15) Thaa kolo hmekuje kö a methinëne hnene la atre cili la trejine me angeic, ngo kolo fe a ajane tro lai trejine a mec. Maine jë troa mama la aqane imethinë i angeic hnene la aqane ixöjetrije i angeic maine aqane sili trengathoi pena; maine aqane ujë i angeice hi lai, tre, troa xulu koi angeic la iameköti Iehova. (Levitiko 19:16; Deuteronomi 19:18-21; Mataio 5:22) Qa ngöne lai, drei la enyipiewekën la tro sa thele troa xome trije qa kuhu itre hni së la thiina ka ngazo!—Iakobo 1:14, 15; 4:1-3.

19. Tune kaa la aqane goeën hnene la ketre atr ka trongëne la itre trepene meköti ne la Tusi Hmitrötr, la itre mekene tusi tune la Salamo 11:5 me Filipi 4:8, 9?

¹⁹ Ame la itre ka wanga atrune la mel tui Iehova, nge ka ajane fe troa thupë angatre kö ngöne la ihnimi Nyidrë, tre, hetrenyi fe thei angatre la aja troa thipetrije la nöjei pengöne aqane iangazo. Hna cinyihane ngöne Salamo 11:5, ka hape: “Kola sixele la ate ka ngazo, memine la ate pi iangazo hnene la hnatesi nyidë [Iehova].” Ame la xötre hnëewekë celë, tre, thaa kolo caasi kö lai a qaja la thiina i Iehova; ngo ketre trepene meköti pe ka upi së troa eatrongë së ngöne la aqane tro sa mel. Kolo mina fe a upe la itretre hnimi Iehova troa neëne la itre nyine iamadrinë asë ka hetre hnepe iangazo ngön. Ketre tune mina fe, ame la trenge ewekë hna hape, Iehova la “Akötesieti ine la tingeting,” tre, celë hi ka ukune la itretre nyi hlue i Nyidrë troa nyi aliene la mekune me hni angatr hnene la itre ewekë ka lolo, nyine atrun, nge ka hamëne la tingeting.—Filipi 4:8, 9.

20-22. Nemene la aqane ujë hnene la itre Keresiano kowe la fen, nge pine nemen?

²⁰ Ame koi Akötresie, ke, zöne la fene hnengödrai i Satana asë la  kola neni la madra. Nyimutre catre la itre atr hna humuth hnene la itre organizasio ka kuci politik, hna aceitunë angatr memine la itre öni ka ses; nyimutre mina fe la itre hlue i Iehova hna humuthe hnei angatr. (Daniela 8:3, 4, 20-22; Hna Amamane 13:1, 2, 7, 8) Kola ce huliwa hnene la itre musi cili memine la itre organizasio ka thele manie memine la aqane kökötre la inamacan jëne la Sias; angatre lo itre ka kuca la itre jiane isi ka tru me salemëne kowe la itre mus, celë hi itre jëne manie ka tru. Drei la enyipicine lo hna qaja ka hape, “fene hnengödrai asëjëihë a meköle thene la ate ka ngazo”!—1 Ioane 5:19.

²¹ Pine laka, ame la itretre drei Iesu, tre, “tha ite sine ne la fene” kö angatr, haawe, thaa angatre kö a hane sine la kuci politik me lö hnine la itre isi; angatr a neëne troa anenine la madra, angatr isa ala caas maine cememine pena la ka ala nyim. * (Ioane 15:19; 17:16) Nge angatr a xötrethenge la tulu i Keriso, hnene laka, thaa angatre kö a itëkeune la kola icilekeu me angatr. Angatre pe a hnime la itre ithupëjia me angatr, me thithi sai angatr.—Mataio 5:44; Roma 12:17-21.

²² E hune la nöjei ewekë asë, kola neëne hnene la itre nyipi  Keresiano troa lö hnine la “Babulona atraqat,” lo hmi ka thoi ka musi e cailo fen nge atre anenine la madra ne la ka ala nyim. Kola qaja hnene la Wesi Ula i Akötresie, ka hape: “Hna öhne thei nyido la madra ne la nöjei perofeta, me ange ka hmitöt, me angat’ asë hna humuth e celë fen.” Celë hi matre kola hmekë së ka hape: “Nöjenge fe, tropi qa thei nyido.”—Hna Amamane 17:6; 18:2, 4, 24.

23. Nemene la aliene la hna hape, troa tro pi qaathei Babulona Atraqatr?

²³ Ame la troa nuetriji Babulona Atraqatr, tre, thaa ene hmekuje kö la troa köletrije la itre ëje së qa ngöne la hmi. Kolo fe a qaja la troa sisine la itre huliwa ka ngazo hna kapa me kuca hnene la hmi ka thoi, maine troa sajuëne pena la itre ewekë cili, tune la kuci ngazo, me kuci politik, memine la troa nyinyape thele mo. (Salamo 97:10; Hna Amamane 18:7, 9, 11-17) Drei la etrune la madra hna anenine hnene la itre ewekë cili!

24, 25. Nemene la ka aijijë Akötresie troa amamane la utipine i Nyidrë kowe la ketre atr ka ietra pine la hna anenine la madra, nge nemene la ka nyihatrene lai ekö lo hneijine i Isaraela?

²⁴ Qëmekene troa nyiqaane xome la nyipi hmi, hne së isa ala caas hna sajuëne ekö la itre xaa götrane ne la fene i Satana, ene pe zö së fe la hna anenine la madra. Ngo pine laka hne së hna saze la aqane ujë së, me lapaune kowe la thupene mele i Keriso, nge hne së hna nue la mele së koi Akötresie, ene pe kolo ha kepe së hnei Akötresie, me thupë së hnei Nyidrë qa ngöne la itre ewekë ka troa angazone la aqane imelekeu së me Nyidrë. (Ite Huliwa 3:19) Hna nyihatrene la aqane ithupë cili, hnene lo itre traon hnë zae ekö e Isaraela.—Numera 35:11-15; Deuteronomi 21:1-9.

²⁵ Nemene la aqane trongene lai hna hnëkëne cili? Maine troa meci la ketre atre Isaraela hnene la ketre, nge thaa hna thë kö, tro angeic a kötre kowe la ketre traone hnë zae. Thupene la hna ithanatane la pengö i angeic hnene la itretre amekötin, tro lai atr a lapa hnine la traon hnë zae uti hë la troa meci hnene la atre huuj ka sisitria. Thupene hë lai, ijiji angeice hmaca ha troa lö pi qa lai me mele ngöne la götrane hnei angeic hna ajan. Drei la ketre tulu ne utipin ka lolo memine la etrune la aqane nyipine Nyidrëti la mele ne la atr! Ceitune hi lai itre traon hnë zae ekö memine la hna hnëkëne hnei Akötresieti enehila, laka, hna nyitrepene lai hnene la thupene mele i Keriso, nge nyine troa thupë së qa ngöne la mec, ke, hne së  hna ena la wathebo i Akötresie göi aqane troa ahmitrötrëne la mel memine la madra, ngo thaa hna thë kö. Epuni kö a wanga atrune la hna hnëkëne cili? Tro epuni a amamane tune kaa laka epuni a wanga atrune lai? Maine jë troa pane hëne la itre xan troa hane lö hnine la traon hnë zae, ke, easenyi catre hë la “aköt atraqat.”—Mataio 24:21; 2 Korinito 6:1, 2.

26-28. Ngöne nemene la kola qaja ka hape, ka ceitu la aqane mele së enehila memine la pengö i Ezekiela perofeta ekö, nge tune kaa la aqane tro sa thupë së kö ngöne la ihnimi Akötresie?

²⁶ Ame la pengöne la nöje i Akötresie ngöne la hnedrai së enehila, tre, ej a amekunë së lo ketre perofeta ekö; ene Ezekiela, hna upi angeic hnei Iehova troa thup me tro fë itre ithuemacanyi nyine hmekëne la lapa e Isaraela. Hna qaja hnei Akötresieti ka hape: “Tro eö a denge la tenge ewekë qa ngöne la qeng, me nyi hate koi angate qa theng.” Maine hnei Ezekiela ju hna wanga acone la hnëqa i angeic, tro ha zö i angeic la madra ne lo itre atr hna anenin ngöne la kola nyithupene koi Ierusalema hnei Akötresie. (Ezekiela 33:7-9) Ngo hna drengethenge hnei Ezekiela, matre thaa zö i angeice kö la kola neni la madra ne la itre atr.

²⁷ Ame enehila, tre, easa qëmeke kowe la pune la fen asë i Satana. Qa ngöne lai, kola wanga atrune hnene la Itretre Anyipicine Iehova la etrune la hnëqa ka eje thei angatr, ene la troa cainöjëne la “drai ne nyi thupene” ka ce tro memine la maca ne la Baselaia. (Isaia 61:2; Mataio 24:14) Epuni kö a hane tro fë hnyawa la huliwa ka sisitria cili? Hna xome hnyawa hnei Paulo aposetolo la hnëqa i Nyidrë, ene la troa cainöj. Öni nyidrëti jë hi ka hape: “Gufa koi ni ene la madra ne la nöjei ate asë. Ke pëkö hnenge hna juetëne la nöjei hna mekuatin’ asë hnei Akötesie.” (Ite Huliwa 20:26, 27) Drei la ketre tulu ka lolo nyine tro sa xötrethenge!

²⁸ Nyipici, maine easa ajane troa thupë së kö ngöne la aqane hnimi së hnei Iehova Tretretro së, haawe, loi e tro sa xome la aqane waiewekë i Iehova göne la mel me madra. Nge nyipi ewekë mina fe tro pala hi sa pë ethan, me hmitrötr, xajawa i Nyidrë; celë hi mekune hne së hna troa ce wange ngöne la ketre mekene la itus.