Nyidrëti lo nyipi Akötresie, Atre Xupe la nöjei ewekë asë. Ka pëkö qaane i Nyidrë, nge ka pëkö pun. (Salamo 90:2) Nyidrëti hi lo Qaane la itre maca ka lolo, e hnine la Tusi Hmitrötr. (1 Timoteo 1:11) Pine laka hnei Nyidrëti hna hamë së la mel, haawe, loi e tro hmekuje hi sa thili koi Nyidrë.​—E jë la Hna Amaman 4:11.

Pë fe kö atr ka öhnyi Akötresie, ke, ketre Ua Nyidrë. Tha ceitui Nyidrëti kö me atr, nge ketre, ka draië catre kö hune la itre hna xupe ka mele e celë fen. (Ioane 1:18; 4:24) Ame pe, ijije hi tro sa atre pengöne la thiina i Nyidrë, hna jëne la itre hnei Nyidrëti hna kuca. Kola mama ngöne la aqane xupe la nöjei pengöne wene sinöe me iengen, laka, ka ihnimi nge ka inamacane Nyidrë. Kola mama fe la mene i Nyidrë ngöne la aqane xupe Nyidrëti la hnengödrai memine la fen.​—E jë la Roma 1:20.

Ijije fe tro sa atre hnyawa la thiina i Akötresie, e hne së hna e la Tusi Hmitrötr. Ej a qaja la hnei Akötresieti hna ajan, memine la hnei Nyidrëti hna xelen, memine la aqane ujë i Nyidrëti kowe la itre atr, me aqane qëmeke Nyidrëti kowe la nöjei pengöne jol.​—E jë la Salamo 103:7-10.

Hnei Iesu hna qaja ka hape: “Tetetro i anganyihunieti e kohoti hnengödrai, jiniati e hmitöte la atesiwa i enëtilai.” (Mataio 6:9) Ngacama nyimu aqane hë Akötresie, ngo casi hi la ëje i Nyidrë. Nge isa aqane qaja kö ngöne la itre qene hlapa. Ame qene Drehu, tre, “Iehova.”​—E jë la Salamo 83:18.

Hna xome trije la ëje i Akötresie qaa hnine la itre Tusi Hmitrötre ka nyimutre, nge hna nyihnane pena ha hnei Joxu maine Enëtilai. Ngo ame lo kola cinyihane ekö la Tusi Hmitrötr, ke, a 7 000 lao mama la ëje Akötresie.  Hnei Iesu pala hi hna qaja amamane la ëje cili, ngöne la nyidrëti a ithanata memine la itre atr.​—E jë la Ioane 17:26.

Goeëne Jë La Video Hapeu, Hetre Ëje i Akötresie Fe Kö?

Hapeu, ijije kö tro sa qaja ka hape, kola akötre enehila la itre atr, ke, hna nue axöji angatr hnei Iehova Akötresie? Ame itre xa atr, öni angatre ka hape, Nyidrëti a akötrë së matre troa pane tupathi së, ngo trenga thoi lai.​—E jë la Iakobo 1:13.

Hnei Akötresieti hna nue së tro sa isa axecië mekun. Easë kö a madrine la hna nue së troa isa iëne troa nyi hlue i Akötresie? (Iosua 24:15) Nyimutre la itre atr ka iëne troa kuca la ngazo, ene pe kola hane akötrëne la mele ne la itre xan. Kola treije la hni Iehova ngöne la Nyidrëti a goeëne la ngazo.​—E jë la Genese 6:5, 6.

Ame Iehova, tre, Nyidrëti a hnehengazo së. Aja i Nyidrëti tro sa madrin. Easenyi hë matre apatrene pi Nyidrëti la akötre memine la itre ka iakötrë. Ngo ame petre kö la, ke, hetre nyipi kepine matre Nyidrëti a nue la hnepe ijine troa akötre la atr. Ame ngöne Ini 8, tro pë hë sa ce wange lai kepine cili.​—E jë la 2 Peteru 2:9; 3:7, 13.

Iehova a könë së troa easenyi catre koi Nyidrë me ithanata koi Nyidrë jëne la thith. Nyidrëti a wangatrunyi së isa alacas. (Salamo 65:2; 145:18) Aja i Nyidrë troa nue la ngazo së. Öhne kö Nyidrëti la trenge catre hne së hna kuca troa amadrinë Nyidrë, ngacama hne së hna tria ngöne la itre xa ijin. Haawe, ngacama itre ka ngazo së, ngo ijije hi tro sa acatrene hnyawa la aqane imelekeu së me Akötresie.​—E jë la Salamo 103:12-14; Iakobo 4:8.

Pine laka Iehova la qeqene la mele së, haawe, loi e troa atraqatre catre la ihnimi së koi Nyidrë nge co ju pë hë koi itre xan. (Mareko 12:30) Ame hë la nyipunieti a amamane la ihnimi nyipunie koi Akötresie hnene la hna inine me thele troa atre Nyidrëti hnyawa, me kuca la hnei Nyidrëti hna amekötin, e cili, tro hë nyipunieti a easenyi catre koi Nyidrë.​—E jë la 1 Timoteo 2:4; 1 Ioane 5:3.