Pëkö atr ka tui Iesu, laka, hna pane mele e koho hnengödrai ceitune me angela, qëmekene troa uti a tro celë fen. (Ioane 8:23) Nyidrëti hi la pane xupuana i Akötresie, nge thupene lai, hnei nyidrëti pë hë hna ixatua ngöne la kola xupe la itre xa ewekë. Hna xupe meköti nyidrëti hnei Iehova, ene pe, hë nyidrëti jë hi ka hape, Hupuna “ka utiwati [ka cas]” ne la Tretretro. (Ioane 1:14) Nge pine laka, hnei Iesu fe hna nyi trenge ewekë i Akötresie, ene pe hë nyidrëti jë fe hi ka hape, “logo.”​—E jë la Ite Edomë 8:22, 23; Kolose 1:15, 16.

Hnei Akötresieti hna amë la mele ne la Hupuna i Nyidrë hnine la trengene hnaho i Maria ketre nyipi jajiny, ene pe kola hnaho Iesu pi e celë fen. Haawe, trotrohnine hi së la kola qaja ka hape, pëkö keme i Iesu atr. (Luka 1:30-35) Iesu a uti a tro celë fen matre (1) troa inine la nyipici göi Akötresie, (2) troa amamai tulu ngöne la aqane troa kuca la aja i Akötresie, ngacama tru la itre jol, nge (3) troa huujëne la mele i nyidrëti ka pexej, nyine “thupene mel.”​—E jë la Mataio 20:28.

Ame la thupene mel, tre, ketre thupen hna hamëne nyine troa itöne la mele ne la atr, matre tha tro kö a humuthi angeic. (Esodo 21:29, 30) Tha celë kö la aja i Akötresieti ekö ngöne la qaan, la troa qatr me meci la atr. Nemene la ewekë ka traqa ekö? Hnei Akötresieti hna qaja koi Adamu lo pane trahmany, ka hape, maine tro angeic a kuca lo ewekë hna hëne hnei Tusi Hmitrötr ka hape, “ngazo,” haawe, tro hë angeic a mec. Celë hi matre, maine tha hnei Adamu ju hna ena la wathebo, tha tro jë kö angeic a mec. (Genese 2:16, 17; 5:5) Tune la hna qaja hnei  Tusi Hmitrötr, hna “traqa” la meci kowe la fen hnei Adamu. Haawe, zöi Adamu la kola ngazo asë la itre matra i angeic, nge ame hë la pune koi angatr, tre, mec. Nyipi ewekë koi së la thupene mel, pine laka, ej a troa thepe së qa ngöne la mec, lo edrö së qaathei Adamu.​—E jë la Roma 5:12; 6:23.

Drei la ka ijije troa hamëne la thupene mel matre troa thepe së qa ngöne la mec? Ame la easa mec, kolo hi lai a të la itre sipu ngazo së. Thatreine kö troa të hnene la ketre atr ka tha pexeje kö, la ngazo ne la itre xan.​—E jë la Salamo 49:7-9.

Ka pexeje Iesu, tha tu së kö. Celë hi matre tha nyipi ewekë kö tro nyidrëti a mec, ke, pë fe kö ngazo i nyidrë. Ngo nyidrëti pe a meci thatraqane la ngazo ne la itre xan. Kola mama la etrune la ihnimi Akötresie ngöne lo Nyidrëti a upe la Hupuna i Nyidrë matre troa meci pi së. Kola mama fe la ihnimi Iesu koi së, ngöne laka, hnei nyidrëti hna drengethenge la Tretretro i Nyidrë me huujëne la mele i nyidrë thatraqane la itre ngazo së.​—E jë la Ioane 3:16; Roma 5:18, 19.

Goeëne Jë La Video Hnauëne La Iesu a Mec?

Ame lo nyidrëti e celë fen, hnei Iesu hna aloine la meci ne la itre atr, me amelene hmaca la itre ka mec, me thapa la itre xan qaa ngöne la itre hulö. Nyidrëti hi lai a amamane hnyawa la hnei nyidrëti hna troa kuca elany, thatraqane la itre atr asë ka drengethenge. (Mataio 15:30, 31; Ioane 5:28) Thupene la hna meci hnei Iesu, hnei Akötresieti hna amele nyidrëti hmaca matre troa mele ceitune me ketre ua. (1 Peteru 3:18) Thupene lai, hnei Iesu hna lapa ngöne la götrane maca i Akötresie me treqene tro Iehova a hamëne koi nyidrëti la men, matre troa musi ceitune me ketre Joxu hune la fen asë. (Heberu 10:12, 13) Ame enehila, Iesu a Joxu e koho hnengödrai, nge kola cainöjëne hnene la itretre drei nyidrë la maca ka loi e cailo fen.​—E jë la Daniela 7:13, 14; Mataio 24:14.

Easenyi hë matre huliwane jë Iesu Joxu la mene i nyidrë, me apatrene la nöjei akötre asë memine la itre ka iakötrë. Ame asë hi la itre atr ka lapaune koi Iesu me drengethenge nyidrë, tro asë hi angatr elanyi a madrine troa mele e hnine la paradraiso e celë fen.​—E jë la Salamo 37:9-11.