MEKENE 7
Nemene La Baselaia i Akötresie?
1. Nemene la Baselaia i Akötresie?
Kola mama tune kaa laka Iesu hi la Joxu?—MAREKO 1:40-42.
Ame la Baselaia i Akötresie, tre, celë hi ketre musi e koho hnengödrai. Ej a troa nyihnane la nöjei musi asë, me aejëne la aja i Akötresieti e koho hnengödrai me e celë fen. Drei la ketre maca ka lolo! Easenyi hë matre aejëne jë hnene la Baselaia i Akötresie, la aja ne la atr troa lapa fene la ketre musi ka lolo. Kola troa acasine la nöjei ka troa mele elanyi e celë fen.—E jë la Daniela 2:44; Mataio 6:9, 10; 24:14.
Hetre joxun asë hi la nöjei mus. Hnei Iehova hna acili Iesu Keriso, Hupuna i Nyidrë, matre troa Joxu ne la Baselaia i Nyidrë.—E jë la Hna Amaman 11:15.
Goeëne jë la video Nemene La Hna Hape Baselaia i Akotresie?
2. Hnauëne laka Iesu hi la ka ijij troa Joxu?
Iesu la Hupuna i Akötresie, nyidrëti hi la ka ijije troa joxu, pine laka ka hni ka menyike nyidrë nge ka isigöline la meköt. (Ioane 1:14) Hnene laka nyidrëti e koho hnengödrai nge trene mene nyidrë, haawe, tha jole kö koi nyidrëti troa xatuane la itre atr e celë fen. Thupene lo hna amele nyidrëti hmaca, hnei nyidrëti hna elë hnengödraieë me lapa itreqe ngöne la götrane maca i Iehova. (Heberu 10:12, 13) Ame hë e thupen, hnei Akötresieti hna nue nyidrë troa mus.—E jë la Daniela 7:13, 14.
3. Drei la ka troa ce musi me Iesu?
Hetrenyi la ketre gurup hna hëne ka hape, “ka hmitöte,” angatr a troa ce musi me Iesu e koho hnengödrai. (Daniela 7:27) Ame la itre hna pane iëne ka hmitrötr, tre, ene lo itre aposetolo i Iesu ka mele nyipici. Nge hnei Iehova fe hna hane iëne uti hë enehila la itre xa ka hmitrötr, itre trahmanyi me föe ka mele nyipici. Hna amele angatre fe tui Iesu, matre itre ua fe hë angatr.—E jë la Ioane 14:1-3; 1 Korinito 15:42-44.
Ala ije la itre atr ka troa elë hnengödraieë? Hnei Iesu hna hë angatre ka hape, “mamoe ka xalaith.” (Luka 12:32) Kola qaja pë hë e thupene la etrui angatr, laka, ala 144 000. Angatr a troa ce musi me Iesu qaa koho hnengödrai.—E jë la Hna Amaman 14:1.
4. Nemene la ewekë ka traqa ngöne la Iesu a nyiqaane mus?
Hna nyiqaane acile la Baselaia i Akötresie ngöne lo macatre 1914. * Ame la pane ewekë hna kuca hnei Iesu ngöne la nyidrëti a nyiqaane mus, ke, hnei nyidrëti hna ce helë Satana me itre dremoni angeic a tro celë fen. Ame hna elëhni atraqatre hnei Satana, ene pe angeic a thele troa gomegome la fen. (Hna Amaman 12:7-10, 12) Qaane ju hi lai, kola atraqatre la hleuhleu e celë fen. Kola amamane mina fe hnene la itre isi me itre jiin, me itre meci ka solesol, me itre sa, itre götranene lo “hatren” laka, easenyi catre hë troa musinëne la fen hnene la Baselaia i Akötresie.—E jë la Luka 21:7, 10, 11, 31.
5. Nemene la hna kuca hnene la Baselaia i Akötresie?
Jëne la huliwa ne cainöj e cailo fen, kolo ha acasine hnene la Baselaia i Akötresie la ka ala nyimu atraqatr, itre atr ka fetra qaa ngöne la itre nöj asë. Angatre hë lo itre jini ne la Baselaia hna cilëne hnei Iesu, itre milio la etru i angatr, itre atr ka thiina ka loi. Tro la Baselaia i Akötresie a thupë angatr ngöne la kola apatrene elanyi la fene ka ngazo celë. Haawe, ame la itre ka ajane troa kepe manathithi qaathene la Baselaia i Akötresie, ke, loi e tro angatr a inine troa itre jini ka drengethenge Iesu.—E jë la Hna Amaman 7:9, 14, 16, 17.
Ngöne la 1 000 lao macatre, tro la Baselaia i Akötresie a aejëne lo aja i Nyidrëti ekö kowe la itre atr. Tro ha paradraiso la fene hnengödrai asë. Nge thupene jë hi lai, Iesu ha nue hmaca la Baselaia kowe la Tretretro i nyidrë. (1 Korinito 15:24-26) Hetre atre kö hne së hna pi qaja kow la Baselaia i Akötresie?—E jë la Salamo 37:10, 11, 29.
^ par. 6 Ame koi itre ithuemacanyi ngöne la aqane eatre la hna ahnith göi macatre 1914, ke, wange ju la götrane 215-218 ne la itus Nemene La Nyipi Ini Hna Hamën Hnei Tusi Hmitrötr?
