Isa hetre atr pala hi ka thiina ka loi ngöne la nöjei hmi asë. Maca ka loi la angatr a atre laka, öhnyi angatre hnyawa hi hnei Akötresie nge Nyidrëti a hane hnehengazo angatre fe. Ame la engazon, tre, hna kuca pala hi la itre ewekë ka ngazo ngöne la ëje ne la hmi. (2 Korinito 4:3, 4; 11:13-15) Hetrenyi la itre ithuemacanyi ka amamane la aqane ujë ne la itre xa hmi, laka, itre ej a lö hnine lo isi hna hape, teroris, me ihumuthi ka tru ne la itre tribu, me angazone la itre nekönatr. Drei jë kö la hleuhleu thene la itre ka hmi ka thiina ka loi!​—E jë la Mataio 24:3-5, 11, 12.

Kola atrunyi Akötresie hnene la nyipi hmi, nge itre hmi ka thoi pe kö a ahleuhleunyi Nyidrë. Itre ej a hamëne la itre ini me itre mekune ka patre fe kö e hnine la Tusi Hmitrötr, tune la itre trenga thoi göi Akötresie me göne la itre ka mec. Ngo aja i Iehova tro la itre atr a atre la nyipici göi Nyidrë.​—E jë la Ate Cainöj 9:5, 10; 1 Timoteo 2:3-5.

Eloine hi laka, tha hna iaö Iehova kö hnene la itre hmi ka uune ka hape, angatr a hnimi Nyidrë ngo kolo pe a ajane la fene i Satana. (Iakobo 4:4) Kola aceitunëne hnene la Wesi Ula i Akötresie la nöjei hmi asë ka thoi, me “Babulona Atraqatr.” Babulona hi lo traone ekö, hna hnene ngön lo hmi ka thoi ka nyiqaane mama thupene lo Iwë ekö ngöne lo hneijine i Noa. Easenyi hë matre aca tro apatrene pi Akötresie la itre hmi ka iamenu me ka iaxösisi.​—E jë la Hna Amaman 17:1, 2, 5, 16, 17; 18:8.

Ngo tha hnei Iehova kö hna thëthëhmine la itre atr ka hni ka menyik, hna amenune hnene la itre hmi ka thoi ne la fen. Nyidrëti a iacasinekeune la itre atr cili me ini angatre la nyipici.​—E jë la Mika 4:2, 5.

Iehova a hnehengazone la itre atr ka ajane la nyipici nge ka thele troa kuca la ewekë ka loi. Nyidrëti a upe nyimenyimë angatr troa canga tro trije la itre hmi ka thoi. Ame la atr ka hnimi Nyidrë, ke, tha jole kö koi angeice troa trije la itre aqane ujë ka ngazo memine la hmi ka thoi, matre troa amadrinë Nyidrë.​—E jë la Hna Amaman 18:4.

Ame ngöne lo hneijine i Iesu, hna kapa madrine hnene la itre atr ka menyike la itre ini qaa hnine la Tusi Hmitrötr hna tro fë hnene la itre aposetolo. Hnei angatre hna atre qaathei Iehova la ketre aqane mele ka hnyipixe, ka hamë madrin, nge ka hetre aliene me mejiune kowe la mel. Itre tulu angatre koi së, pine laka, lolo la aqane kapa angatre la maca ka loi, nge kola mama ngöne la aqane amë panë Iehova hnei angatr ngöne la mele i angatr.​—E jë la 1 Thesalonika 1:8, 9; 2:13.

Iehova a kapa e hnine la lapa ka cahae ne la itre hlue i Nyidrë, la itre atr ka tro trije la itre hmi ka thoi. Maine tro nyipunieti a kapa la ihë i Nyidrë, sinee i Nyidrëti fe hë epun, tro fe hë epuni a hane sin la lapa ka lolo i ange trejin, me kapa elanyi la mele ka tha ase palua kö.​—E jë la Mareko 10:29, 30; 2 Korinito 6:17, 18.

Ketre maca ka loi elany, ngöne la kola troa amekötine la itre hmi. Kola troa thapa la itre atr qaa ngöne la iaxösisi. Tha tro hmaca kö la itre hmi thoi a amenune me aisane la itre atr. Tro asë pë hë la nöjei hna xupe asë hnei Akötresie, e koho hnengödrai me e celë fen, a cengöne casi elanyi me ce thili kowe la nyipi Akötresieti ka cas.​—E jë la Hna Amaman 18:20, 21; 21:3, 4.