Akötresieti a hëne la nöjei atr asë troa easenyi Nyidrë jëne la thith. (Salamo 65:2) Ngo tha Nyidrëti kö a dreng, maine kapa, la nöjei thithi asë. Drei la ketre ceitun, ame la trahmanyi ka qanangazone la föi angeic, tro ha nyi ejolene la thithi angeic. (1 Peteru 3:7) Ketre, ame lo kola catre kuca la ngazo hnei angetre Isaraela, tha hna kapa kö la itre thithi angatre hnei Akötresie. Ngo ijije hi tro Akötresieti a kapa la thithi ne la itre atr ka kuca la ngazo, e hnei angatre hna ietra. Eje hi lai laka, ame la thith, tre, celë hi ketre hnëqa ka tru.​—E jë la Isaia 1:15; 55:7.

Goeëne jë la video Akötresieti Kö a Drenge La Nöjei Thithi Asë?

Ame la thith, ke, celë hi ketre aqane troa thili koi Akötresie. Celë hi matre, loi e tro hmekuje hi sa thithi koi Iehova, Atre Xupi së. (Mataio 4:10; 6:9) Loi e tro sa thithi ngöne la ëje i Iesu, pine laka, hnei nyidrëti hna meci thatraqai së itre atr ka ngazo. (Ioane 14:6) Tha ajane kö Iehova tro sa e gufan maine e ngöne pepa la itre thithi së. Aja i Nyidrë tro sa fe la itre sipu mekuna së me aliene hni së ngöne la easa thith.​—E jë la Mataio 6:7; Filipi 4:6, 7.

Drenge fe hi la Atre Xupi së la itre thithi hne së hna qaja thaupun. (1 Samuela 1:12, 13) Nyidrëti a hë së troa thithi ngöne la nöjei ijin, maine ngöne la kola nyiqaane maine umuthe la drai, maine ngöne lo ijine xen, maine ngöne la easa qëmeke kowe la itre jol.​—E jë la Salamo 37:5; Mataio 15:36.

Tha ka hmaloi kö troa easenyi koi Akötresie, pine laka, easa mele e nyipine la itre atr ka tha lapaune kö koi Nyidrë, nge ka hnyima fë la hnei Nyidrëti hna thingehnaean, ene la troa mele tingetinge ngöne la fen. (2 Timoteo 3:1, 4; 2 Peteru 3:3, 13) Haawe, easa ajane troa casi pala hi memine la itre ka ce hmi me easë, ketre tui angatre fe, angatr a ajane troa ce me easë.​—E jë la Heberu 10:24, 25.

 Maine tro sa ce tro pala hi memine la itre atr ka hnimi Akötresie, haawe, tro ha xatua së troa easenyi Nyidrë. Ka lolo catre la itre icasikeu ne la Itretre Anyipici Iehova, ke, celë hi itre ijine kola hane ithuecatre koi së hnene la lapaunene la itre xan.​—E jë la Roma 1:11, 12.

Ijije hi tro epuni a easenyi koi Iehova, hnene la hna sine thele la itre hnei epuni hna inin qaa hnine la Wesi Ula. Mekune hnyawa ju la itre huliwa i Nyidrë, me itre eamo memine lo itre hnei Nyidrëti hna thingehnaean. Maine tro epuni a sine thel me catre thith, tro ha akökötrene la hni ne ole i epuni kowe la ihnimi Akötresie memine la inamacane i Nyidrë.​—E jë la Iosua 1:8; Salamo 1:1-3.

Tro epuni a easenyi koi Akötresie, e hnei epuni hna mejiune me lapaune koi Nyidrë. Ngo ame la lapaun, tre, kola tune la feja, laka, loi e troa ithuan. Loi e tro pala hi epuni a ithuane me acatrene la lapaune i epun, me goeëne la trepene la itre ini hnei epuni hna kapa.​—E jë la Mataio 4:4; Heberu 11:1, 6.

Iehova a hnehengazone la itre atr ka hnimi Nyidrë. Ijije hi tro nyidrëti a thupë epuni qaa ngöne la nöjei ka troa athixötrëne la lapaune i epun, me sewe epuni troa mele epine palua. (Salamo 91:1, 2, 7-10) Nyidrëti a hmekë epuni qaa ngöne la itre aqane mel ka troa angazone la mele i epun, nge ka troa sewe epuni troa madrin. Nyidrëti a ini epuni la nyipi mel.​—E jë la Salamo 73:27, 28; Iakobo 4:4, 8.