Hetrenyi la itre ua! ngöne la nöje ne la ua ka tha mama kö, ke, nyimu ua ka loi nge hetre ka ngazo fe. Hapeu, angatre kö lo itre ka mec, thupene la hna mele e celë fen?

Ohea. Ngacama kola mekune tuune hnei itre xan, ngo, ame la nyipici, ke, e meci hë la ketre trahmanyi maine ketre fö, tha mele hmacakö angeic’e ketre götran. Ngo qaa ka lai mekune cili? Qa hnine la Tusi Hmitrötr. Ame la nyipici, ke, eje hnine la Tusi Hmitrötr, itusi hna hamëne koi së hnene la Akötresie ka sisitria, ame la ëje i anganyidrë, ke, Iehova. Nyidrëti la atre xupe la itre atr; qangöne lai, atre hmekune kö Nyidrëti la pengöne la itre atr thupene la mec.—Salamo 83:18; 2 Timoteo 3:16.

Tusi Hmitrötre a qaja ka hape hnei Akötresieti hna xupi Adamu, pane atr, “xaxau qa ngöne la hnadro.” (Genese 2:7) Akötresieti a ami angeice ju ngöne la Paradraiso, hnine la hlapa e Edrena. Maine hnei Adamu ju hna drenge thenge la itre wathebo i Iehova, ke, tha tro jë kö angeice a mec; ma ce easë hi la enehila e celë fene hnengödrai. Ngo ame la Adamu a tro sasaithe la wathebo i Iehova, ke hnei Akötresieti hna qaja koi angeice ka hape: “Tro eö a hmaca kowe la hnadro; ke hna xomi’ö qa lai. Ke xaxau eö, nge tro hmaca eö kowe la xaxau.”—Genese 3:19.

Nemene la aliene la mekune celë? Hawe, eka Adamu ekö qëmekene la tro Iehova a xupi angeice qa hnine la xaxau? Patre petre kö angeic. Ketre tha uati kö e koho, hna troa malaane e celë fen. Tha ka mele petre kö angeic. Celë hi matre ame la Iehova a qaja koi Adamu ka hape tro angeic’a ‘bëeke hmaca kowe la xaxau’, ke, Nyidrëti hi lai a qaja mekötine  laka tro hë Adamu a mec. Ketre, tha kolo pena kö a troa lapa itreqe ngöne la nöje ne la ua. Ngo ame la ijine kola meci hnei Adamu, ke, patre pi hi lo hnamano, patre pi hi la mel. Ame la mec, ke, ene la kola patre la hnamano; pë hë emelen.

Ngo tuneka fe lo itre xaa ka meci hë? Hapeu, hetre hnepe emele i angatre pala kö? Tusi Hmitrötre a sa ka hape:

• “Nyidroti asë [nöjei atr me öni] a tro kowe la hnë ka cas. Ka xulu nyidroti asë qa ngöne la dro, nge tro nyidroti asë a hmaca hnadro eë.”—Ate Cainöj 3:20 [NW].

• “Itre ka mec . . . ke patrë hë la mekune i angatr.”—Ate Cainöj 9:5.

• “Ketre patrë hë la ihnimi angatre enehila, me imethinë i angatre me ikucanyi angatr.”—Ate Cainöj 9:6.

• “Ke pëkö huliwa, me mekun, me wangatrehmekun, me inamacan, ngöne la [hua] eö a tro kow.”—Ate Cainöj 9:10.

• “[atr] a hmaca ju kowe la dro i angeic; ngöne la drai cili, patrë hë la itre mekune i angeic.”—Salamo 146:4.

 Hapeu, hmaloi kö maine hace kö koi epuni troa kapa la itre trenge ewekë qa hnine la Tusi Hmitrötr? Maine eje hi, ke, wange ju la mekune celë: Ngöne la itre fami, ke trahmanyi la ka huliwa mani nyine e melene la lapa i angeic. Ngo e meci hë angeic, ke, xomi akötre atraqatre pëhë kowe la fami i angeic. Ngöne la itre xaa ijin, ke, tha ijije kö la maniene la föe me ha kuku troa xomi xen, maine hna qanangazo angatre pena hnene la ithupëjia memine lo föi angeic. Pane isa hnyinge ju epuni ka hape: ‘Hapeu, maine ka mele kö lai atr ngöne la götrane ne la ua, ke, hnauëne laka tha cilëne kö lo lai hnëqa ene la troa thele xeni thatraqane la fami? Ketre hnauëne laka tha thupëne kö angeice la lapa i angeice qëmekene la itretre iangazo?’ Pine laka nyipici Tusi Hmitrötr: pëkö hna atreine troa kuca hnene lai atr, pine laka pë hë mel.—Salamo 115:17.

Ngo hapeu, kola hape tha tro hmacakö la itre ka meci a mele hmaca? Ohea, pëkö. Tro së edrahe a ithahnatane la pengöne la melehmaca. Ngo eje hi lo laka, kola hape thatre kö hnene la nöjei ka meci la hna kuca hnei epun. Tha öhnyi epuni kö hnei angatr, ketre tha drei epuni kö, maine tha ithahnata pena kö koi epun. Tha tro kö epuni a xoue angatr. Tha tro jë kö angatre lai a xatua epun, maine akötrë epun.—Ate Cainöj 9:4; Isaia 26:14.