Itre ka loi asë hi ekö la itre atrene la ua hnei Iehova hna xup. Ngo hna ngazo thina hnene la ketre angela; angeice lo satana diabolo. Satana a ajane tro la itre atr e celë fene a thili koi angeic, ngo tha koi Iehova kö. Drei la aqane nyiqaane ekö:

Nyimutre la nöjei sinöe ka wa loi, ngöne la hlapa e Edrena. Ame hnei Iehova hna qaja ju koi Adamu me Eva föi angeic, ka hape, ijiji nyidroti troa xeni wenene la nöjei sinöe asë cili. Ngo ca sinöe hnei Akötresieti hna wathebo nyidroti troa xeni wen. Öni Nyidrëti ka hape, maine tro nyidroti a xeni qa ngön’ej, ke tro hë nyidroti a mec.—Genese 2:9, 16, 17.

Ngöne la ketre ijin, hna ithahnata koi Eva hnene la un. Eje hi laka tha une kö la ka sipu ithahnata; Ngo Satana diabolo hi la ka kuca matre kösë une la ka ithahnata. Nge hnene la une hna qaja koi Eva ka hape, maine tro angeic’a xeni lo lai wene hna wathebon, ke, tro hë angeice a inamacane tui Akötresie, nge ketre, tha tro jë kö angeic’a mec. Ngacama trengathoi asë hi lo lai itre hnei Satana hna qaja, ngo Eva kö a drei angeice me xeni la wene la sinöe. Thupene lai, hna hamëne fe koi Adamu, ame hnei angeice hna hane xen—Genese 3:1-6.

Qa ngöne la isitoare celë ka nyipici, easë a atre laka, atre icilekeu Satana, nge atre thoi fe angeic. Hnei angeice lo hna qaja koi Eva ka hape, maine tro Eva a tha drenge thenge Akötresie, tha tro jë kö angeic’a mec. Trengathoi lai, ke meci pi kö Adamu me Eva. Ngacama tha meci fe kö Satana, loi pe, tro fe kö angeic’a hane meci thupen, pine laka ka ngazo fe angeic. Ngo enehila, mele pala kö angeic, nge angeice palahi a amenune la fene hnengödrai. Atre thoi palahi  angeic, nge kola upe la itre atr troa sasaithe la itre wathebo i Akötresie.—Ioane 8:44.

Thupene lai, hna tria fe hnene la itre xaa angela. Hnei angatre hna meciune la emingömingöne la itre föe e celë fen, me ajane troa iatre me nyudren. Celë hi matre, angatr’a uti pi kowe la fen, me nyi ngönetrei ne atr trahmany. Ame hnei angatre hna isa xomi föen. Tha celë kö lo lai mekuana i Akötresie.—Genese 6:1, 2; Iuda 6.

Celë hi atre axulune la gomegome ngöne la fene hnengödrai. Hnene la itre föe ne la itre angela hna hnahone la itre nekönatr, ngo tha itre nyipi nekönatre kö. Tru jë hi nyudren’a itre ka isi, itre ka qeadridri, nge itre ka iakötrë. Nge pine laka tiqa ha la fene hnengödrai hnene la iangazo, ame hnei Iehova hna mekune troa apatrene la itre atr ka ngazo hnene la ketre iwë atraqatr. Noa hmekuje pe hi me lapa i angeice la ka mele qa ngöne lai iwë, pine laka atre thina ka meköti angeic.—Genese 6:4, 11; 7:23.

Ame lo itre angela ka ngazo, ke, hnei angatre hna bëeke hmaca kowe la nöje ne la ua; tha meci ju fe kö angatr. Ngo hetre pune ka ngazo koi angatr. Tha tro hmaca kö angatre a hane mele hnine la lapa i Akötresie, ene pë hë lo itre angela ka thina ka meköt. Ketre, tha hnei Iehova hmaca kö hna nue angatre troa nyi ngönetrei ne atr. Ngo tro hë angatr’a meci ngöne la ijine amekötine ngöne la drai atraqatr.—2 Peteru 2:4; Iuda 6.

Ngöne la qaane la hneijine së, ke, hna isi e hnengödrai. Tusi hna amamane a qeje pengöne lai me hape: “Nge kola isi e hnengödrai; Mikaela [Eje i Iesu lo thupene hna mele hmaca] me itre angela i nyën [ka loi] a itö isi memine la drakona [Satana], nge drakona me itre angela [ka ngazo] i nyën’a itö isi me angatr, nge tha catre kö nyudren, ketre pa hmaca kö hne i nyudreni e hnengödrai. Ame hna helëne pi la drakona atraqatr, celë hi une ekö, ëjene diabolo nge Satana, atre amenune la fene hnengödrai asëjëihë; hna helë nyëne pi kowe la fene hnengödrai, nge hna ce helë nyëne me itre angela [ka ngazo] i nyën.”

Nemene hë la thangane lai? Önine la Tusi Hmitrötre ka hape: “Qa ngöne lai madrine jë, nöjei hnengödrai, me angetre lapa ngöne itr’ej!” Celë hi matre nyipi ijije troa madrine hnene la itre angela ka loi, pine laka pë hë göhnë i Satana memine lo itre angela ka ngazo, itre ua e hnengödrai. Ngo, hapeu, nemene la thangane kowe la itre atr e celë fene hnengödrai? Tusi Hmitrötre a qaja ka hape: “Ekölö hi ni la hnadro me hnagejë, qa ngöne la hna utipi koi nyipunie la diabolo ka tru trenge elëhni, ke trotrohnine hë nyëne laka xoxopatre pe hi la ijine i nyën.”—Hna Amamane 12:7-9, 12.

Nyipici laka, Satana me itre angela ka ngazo i angeic’a amenune me akötrëne la itre atr e celë fene hnengödrai,hna ati ëje i angatr itre dremoni. Itre ithupëjia angatre me Akötresie. Itre ka ngazo asë hi angatr.