Ngo hnauëne laka Satana me itre dremoni a isine troa amenune la itre atr? Pine laka angatr’a ajane tro së a hane ce me angatre ngöne lai icilekeu cili. Angatr’a ajane tro së a thili koi angatr. Angatr’a a ajane fe tro së a hni kowe la itre trengathoi i angatr, me kuca la itre ewekë ka ngazo qëmeke i Iehova. Itre ewekë lai ka ngazo hna öhne e kuhu hnine la itre thina ne nöje göi itre wezipo.

Eje hi laka, ketre hleuhleu atraqatre koi së la kola meci la ketre atr hne së hna hnim, nge nyipici laka, tro së a amamane la hace së. Thupene la hna meci hnei Lazaro, atre ce hni me Nyidrë, ke, hnei Iesu hna treije pi angeic.”—Ioane 11:35.

Nyimutre la itre kutimi ne hnëmec, nge nyimu aqane melëne ngöne la itre nöje e celë fene hnengödrai. Itre xan, tha ka tha icilekeu kö memine la itre ini qa hnine la Tusi Hmitrötr. Ngo hetrenyi fe la itre kutimi hna nyitrepene ngöne la mekun, ene laka, mele kö la itre ka mec, nge angatr’ a goeëne la itre ka mel. Celë hi matre, ame la aqane ce hlë me wezipo, me aqane kelem, ke, hna nyixapengönën’atrune palaha, ke, kola xouene lo ua ne la ka meci hë. Ngo ame la aqane kuca cili, ke, kola cilë göline la itre trengathoi Satana, pine laka “thatre kö la ketre ewekë hnei itre ka meci hë.”—Ate Cainöj 9:5.

Ame itre xaa kutimi me itre xaa aqane kuca, ke, kola xulu qa ngöne  la mekun, ene laka kola aja ixatua hnene la itre ka meci hë thene la itre ka mel, nge e tha hna kapa kö la mekune i angatr, ke, tro angatr’ a iangazo. Celë hi matre ngöne la itre xaa nöj, ke, kola iatrunyi me huuje ngöne la 40 lao drai, maine thupene la caa macatre hna meci hnene lai atr. Kola mekune ka hape, jëne lai, tro ha xatuane la atr ka meci hë, troa ‘tro’ kowe la nöje ne la ua. Ketre, hna majemine mina fe troa hamë xeni me nyine iji kowe la itre ka mec.

Ngo itre ewekë lai ka ngazo, pine laka, kola akökötrene la trengathoi i Satana, göne lo lai itre ka meci hë. Tuneka la mekune i Iehova ngöne la ewekë cili, ajane kö Nyidrëti tro së a kuca la itre ewekë ka eje ngöne la itre qene nöje hna nyitrepene hnene la itre ini qa thei itre dremoni? Ohea!—2 Korinito 6:14-18.

Tha tro kö la itre hlue i Iehova a ixomithina, me hane kuca la itre ewekë ka xatuane la trengathoi i Satana. Ngo loi e tro pe angatr’a catre hnime xatuane la itre ka mel, me thue keukawa koi angatr. Atre hi angatre laka, e meci hë la ketre atr, ke, Iehova hmekuje hi la ka atreine troa xatua angeic.—Iobu 14:14, 15.

Nyimutre la itre atr ka iöhnyi memine la itre dremoni jëne angatre kö, maine jëne pena la la ketre atr trene u ne ta; celë hi la kuci haze lai. Vodu, kuci iöni, mazisië, qeje loi, me hnyinge kowe la itre ka meci hë; celë hi nöjei aqane kuci haze.

Tusi Hmitrötre a isenyine la itre ewekë cili, kola hape: “The tro kö a hetrenyi thei’ö la atr . . . atre nyi haze, me nyinyithina, me sa xepu, me trene haze, me atre xahmi, me trene u ne ta, me perofeta thoi, me atre ithahnata me ua ne wezipo. Ke sisi koi Iehova la itretre kuca la itre ewekë cili.” —Deuteronomi 18:10-12.

Pine nemene matre Iehova a catre upi së troa hmekëne la itre hna majemine kuca cili?

Atraqatre la ihnimi Iehova koi së isa ala cas, celë hi matre Nyidrëti a edromëne la nöjei pengöne aqane kuci haze, matre tro së a canga hmekëne itr’ej. Nyidrëti a hnime me thupëne hnyawa la itre atr, nge atre hi  Nyidrëti laka ame la itre ka easenyine me ce huliwa memine la itre dremoni, ke tro hë angatre a akötr.

Celë hi matre, ame e Berezil, ke, hna akötrëne hnene la itre dremoni la ketre föe, Nileda la ëjen; ketre föe ka trene u ne ta, me kuci haze. Angeic’a qaja ka hape: “Hnene la itre ua . . . hna löthi ni, me iele ni. Celë hi matre eni e akawane la lue pengöne aqane mel; ame e ketre ijin, atrehmekune hi ni koilo, nge ame ketre ijin, ke, thatre kö ni la hnenge hna kuca, ame hna ce ami ni memine la itre ka menu. Nge pine laka, catre la iaxösisi ne la itre dremoni, kola ketr me kucakuca la itre none ngönetreing. Hnenge hna iji wenekasi ne axaponyi none ngönetrei, me nyiqaane iji ka haitre me ufi sixa lapa. Nge hnenge hna mele tune lai ngöne la itre macatre.”

Enehila, qa ngöne la ixatua qa thei Iehova memine la itretre anyipici Nyidrë, pë hë musi ne la itre dremoni koi Nileda, celë hi matre angeic’a mele ka pexeje enehila, lolo hë la ngönetrei i angeic, patre hë la kucakuca. Angeic’a qaja kowe la nöjei atr asë ka hape, the ce trojë pi kö me ce huliwa memine la itre ua [ka ngazo].”