Tusi Hmitrötre a qaja ka hape Satana la atre “amenune la fene hnengödrai asëjëihë” (Hna Amaman 12:9). Tha ajane kö angeice me itre dremoni angeic, e tro së a lapaune kowe la wesi ula i Akötresie, ene la Tusi Hmitrötr. Nge angatr’a tupathe me kuca matre tro la itre atr a mekune ka hape troa mele kö e ketre götrane la itre ka meci hë, ngöne la nöje ne la ua. Tro sa ce wange la aqane kuca i angatr.

Hna inine hnene la itre hmi ka nyimutre ka hape isa hetre u ne la itre atr, hna tropi kowe la nöje ne la ua thupene lo hna meci la ngönetrei. Angatre a qaja ka hape kola meci la ngönetrei, ngo tha meci kö la u. Eje hi laka, angatr’a qaja catrëne ka hape tha ijije kö troa meci la u nge thatreine jë kö tro ej’a mec.

Ngo tha celë fe kö la hna inine hnene la Wesi ula i Akötresie. Tusi Hmitrötre a amamane ka hape, u la atr, ngo tha ketre ewekë kö e hnine lai atr. Hanawange la ceitun; ngöne la aqane xupi Adramu, Tusi Hmitrötre a amamane ka hape: “Hnei Iehova Akötresie hna xupe la atre xaxau qa ngöne la hnadro, me mano kowe la lue hnafiji angeice la mano ne mel; ene pe u ka mele la atr.” (Genese 2:7) Celë hi matre, tha hna hamë u kö koi Adamu; ngo u hi angeic.

 Itre u fe la itre öni.—Genese 1:20, 21, 24, 30.

Ame la sipu aliene la u ngöne la Tusi Hmitrötr, ke, atr, celë hi matre tha sesëkötre kö së troa atre pengöne laka ijije troa meci la itre u, nge tro fe itr’ej a mec. Tusi Hmitrötre a qaja ka hape:

• “Ame la u ka kuca la ngazo—ke tro hë angeic’ a mec.” —Ezekiela 18:4.

• “Öni Samasona fe ka hape: ‘Tro la ung a ce meci me angetre Filisiti.’ ”—Angete Amekötin 16:30.

• “Hapeu, ijije kö troa kuca la loi ngöne la sabath, maine troa kuca la ngazo, troa amelen, maine troa amecine la u?”—Mareko 3:4.

Itre xaa xötre a amamane laka atreine hi troa apatrene la itre u (Genese 17:14), troa lepe itr’ej hnene la taua (Iosua 10:37), troa tha mano (Iobu 7:15), nge troa nunucil (Iona 2:5). Qangöne lai, ijije troa meci fe la u.

Maine tro epuni a e la Tusi Hmitrötr, qa ngöne la qaane uti hë la pun, ke, tha tro jë kö epuni a öhne la hna ewekë celë: “Tha ka meci kö la u.” Tha ua kö la u ne la atr. Tha ini qa thei Tusi Hmitrötre kö la kola hape, tha ka meci kö la u. Ngo ini qa thei Satana me itre dremoni angeic. Xele Iehova ma wange la trengathoi ne la itre hmi.—Ite Edomë 6:16-19; 1 Timoteo 4:1, 2.

Hetre ketre jëne amenune la nöjei atr hnei Satana: ene lo itre trene u ne ta. Ame la trene u ne ta, ke, ketre atr ka kapa mekötine la ithuemacanyi qa ngöne la götrane ne la ua. Nyimutre la itre atr, ketre tune fe la itre trene u ne ta, ka lapaune ka hape angatr’a kapa la itre ithuemacanyi cili qa thene la itre ua ne la itre ka mec. Ngo tune la hne së hna ce wange ngöne la Tusi Hmitrötr, ke, thatreine kö troa eje lai.—Ate Cainöj 9:5, 6, 10.

Ngo, qa thei drei kö la itre ithuemacanyi cili? Qa thene hi la itre dremoni! Atreine hi la itre dremoni troa goeëne la atr ngöne la angeic’a mel; atre hi angatre la aqane ithahnatane la atr, maine ka tune ka angeic, maine itre hna kuca hnei angeic, maine itre hnei angeice hna atrein. Celë hi matre, tha jole kö koi angatre troa nyitipune la itre atr ka meci hë.—1 Samuela 28:3-19.

Satana fe a nyixane la trengathoi göi itre ka mec, jëne la itre edromë ka pëkö enyipicin. Celë hi matre, ijije la itre edromë cili troa ujëne la itre atr qa ngöne la nyipicine la Tusi Hmitrötr.—2 Timoteo 4:4.

Nyimutre catre e Afirik la itre ifejicatre kola qaja la itre atr ka meci hë, ngo kola amamany. Nge hna öhnyi angatre ngöne la itre xaa  götrane ka nanyi qa ngöne la hnei angatre hna mele ekö. Ngo isa hnyinge ju së ka hape: ‘Hapeu, ka loi kö laka tro la ketre atr ka atreine troa bëeke qa hna mec, a bëeke pena ha troa mele ananyine la fami angeice me itre trejine me angeic?’

Ketre, ame lai atr hna öhn, ke, ma ka ceitune memine lai qëmekene lai atr ka meci hë? Celë hi matre, ngöne la ketre nöj, ke, hna wangatrehmekune hnene la lue hlue keresiano ngöne la nyidroti a cainöje trootro, laka, qea la hna xötrethenge nyidroti hnene la ketre qatr. Nyidroti a hnyingëne ju la kepine lai, nge hna sa koi nyidroti ka hape, nyidrëti a mekune laka, ketre trejine me nyidrë la ketre e nyidro, trejine ka meci hë e cili lo, a nyimu macatre hë. Eje hi laka, tha nyipici kö, ngo kola catre fë hnene la qatre lai mekune ka eje thei nyidrë. Celë hi matre tuneka jë kö elanyi la mejene lai edromë cili thene la itre atr hna atre hnene lai qatr, memine la itre ka lapa ezi nyidrë!

Tha sihngödri kö koi së la itre ewekë ka ketre pengöne hna öhn, hna dreng, maine hna puje pena hnene la itre atr. Nyipici, hna xou la itre atre ka melëne lai itre ewekë cili, itre ewekë ka nyipi ketre pengöne kö. Celë hi matre hnei Marein, ketre föe ne Afirik götrane ahuë hna drenge palahi  e itre jidri la kola hë angeice hnene la qaaqaa i angeice ka meci hë. Ame hna xou atraqatre angeic, nge angeic’a lapa hmekesesë me sue catr, matre kola ahlëne asë la itre atrene la uma. Thupene la itre ewekë cili, hna traqa la menu koi angeic.

Ngo maine nyipici laka, mele kö la itre ka mec, loi kö koi angatre troa akötrëne la itre atr hnei angatre hna hnime hnyawa? Eje hi laka, ohea. Itre dremoni la qaane la itre ithuemacanyi me iangazo cili.

Ngo hapeue la itre ithuemacany, laka kösë kola hamë ixatua me ithue catr? Wange ju së la ceitune ngöne la ewekë ka traqa koi Gebasei, ketre föe ne Siera Leon; hna tithi eahlo hnei mec. Eahlo a puje ju la kola mama koi eahlo lo keme i eahlo ka meci hë. Nyidrë a ahnithe koi eahlo troa sile la dröne la ketre sinöe, matre fica ngöne tim, nge thupene lai troa ij. Tha tro kö eahlo a qajaqaja koi ketre me ketre, qëmekene la tro eahlo a kuca thenge lai. Eahlo pa kuca jë tune lo hna qaja, ame hna loi ju la meci eahlo.

Hna qaja hnene la ketre föe ka hape, hna mama koi angeice la föi angeice lo ketre jidr, thupene la nyidrë a mec. Öni angeice ka hape, mingöminge la hna heetre i nyidrë, nge lolo la qëmek.

Ame la itre xaa ithuemacanyi memine la itre xaa iamamanyikeu, ke, ka tune pi hi lo itre ewekë ka loi, maine itre ixatua pena. Ngo, hapeu, qa thei Akötresieti kö itr’ej? Ohe. Ame Iehova ke, “Akötresie ka  nyipici Nyidrë.” (Salamo 31:5) Tha aja i Nyidrëti fe kö lai, ene la troa qene xetihe së maine angazo së. Itre dremoni hmekuje hi la itre ka huliwa tune lai.

Hapeu, hetre itre dremoni kö ka loi? Ohea. Ngacama kösë kola ixatua hnei angatre e itre xaa ijin, ngo ame pe ke, itre ka ngazo asë hi angatr. Ame lo diabolo a ithahnata ekö koi Eva, ke, kösë lo lue treme sineen, tha ceitune kö me ithupëjia (Genese 3:1). Ngo nemene hë lo pune koi Eva thupene la hnei angeice hna drenge me kuca la hnei Satana hna qaja? Meci hë angeic.

Epuni a trotrohnine hnyawa laka, tha ewekë ka sihngödri kö, e tro la ketre atr ka ngazo a nyi ka loi kowe la itre atr hnei angeice hna mekune troa angazone me amenuun. Kola qaja hnene la ketre edromë ne Afirik, ka hape “wië inyö, ngo wetrewetre pe wenethëhmi.” Nge Wesi ula i Akötresieti a qaja ka hape: “Ke hnei satana hna sipu ujë nyëne kö nyine angela ka lai.”—2 Korinito 11:14.

Tha Akötresieti hmaca kö a ithahnata qa ngöne la götrane ne la ua kowe la itre atr e celë fen, jëne la itre pu, maine itre iamamanyikeu, maine itre mejenaqanewekë. Nyidrëti a amekötine me ini angatre jëne la Tusi Hmitrötr, tusi ka atreine troa “hnëkëne la atr, thatraqane la nöjei huliwa ka loi asëjëihë.”—2 Timoteo 3:17.

Celë hi matre, ame la Iehova a thuemacanyi së me upi së troa hmekëne la itre itupathi diabolo, ke, pine laka Nyidrëti a hnimi së. Atre hnyawa hi Nyidrëti laka itre ithupëjia hnamecine la itre dremoni.