Itre ka ngazo nge ka iakötrë palahi Satana me itre dremoni. Ngöne la itre drai ekö, ke, hnei Satana hna humuthe la ume öni me itre hlue i Iobu lo ketre atr ka nyipici. Ketre hna humuthe fe la treene ne lao nekö i Iobu hnene la hna atraqane la ketre “enyi atraqatr” matre keitranyi angatre ju. Thupene lai, Satana a tro pi me lepi Iobu hnene la “piagotre ka ngazo qaane la lue hnatrapaca uti hë la ulëne he i angeic.”—Iobu 1:7-19; 2:7.

Ngöne la ijine i Iesu, ke, nyimutre la itre ka hum, me itre ka timeke hnene la itre dremoni (Mataio 9:32, 33; 12:22). Hnei angatre hna axösisine la ketre atr me kuca matre tro angeic’ a sipu xöji angeice kö hnei etë (Mareko 5:5). Hnei angatre fe hna ahokötrëne me ajipajipane la ketre nekönatre hune la dro, “me than.”—Luka 9:42.

Enehila, Satana palahi me itre dremoni a isi catr. Thupene lo hna helë angatre qa hnengödrai, ke  angatr’ a akökötrene catrëne la ngazo. Hna wangatrehmekune ngöne la fene hnengödrai la aqane iakötrë i angatr, maine hnei itre mec, maine kola kucahmëne pena la itre xane e jidri matre tha meköle kö, maine kuca matre pu menu. Angatr’a upe la itre xane troa ixöleuthi me iwewëth. Kola hmo la itre xan, me ihumuth, me hnöjua.

Kola qaja hnei Linitina qa Surinam, ka hape, hna humuthe la 16 la atrene lao lapa i angeic, me axösisine la ngönetrei angeice me qanangazone la wangatrehmekune i angeice ngöne la 18 lao macatre hnene la ketre dremoni, maine ua ka ngazo. Tune la hne së hna ce wang, ke, kola amamane hnyawa laka ame itre dremoni ke angatr’a “madrine troa axösisine la itre atr uti hë la mec.”

Ngo eje kö, laka, Iehova a thupëne la itre hlue i Nyidrë me thepe angatre qa ngöne la itre hnö i Satana.—Ite Edomë 18:10.