Xoxopatre pe hi la itre drai ne iamenu i Satana me itre dremoni angeic. Ase hë Iehova helëne triji angatre qa hnengödrai (Hna Amaman 12:9). Nge ngöne la itre drai ka calemi, ke, Iehova a troa ujë hmaca koi Satana me itre dremoni i angeic. Ngöne la ketre hna amamane qa thei Akötresie, hnei Ioane Aposetolo hna qaja ka hape: “Nge hnenge hna goeëne la ketre angela kola uti qa hnengödrai, thei Nyidrëti la ki ne la hnaope ka thatre hmekun, nge ngöne la iwanakoime i Nyidrë la eno fao atraqatr. Nge Nyidrëti a xölehuje la drakona, ene la une ekö, celë hi diabolo nge Satana, me othi nyëne uti hë ca thauzane lao macatre, me kuië nyëne kowe la hnaope ka thatre hmekun, me thinge me pele hatrene hui nyën, matre tha tro hmaca kö nyën’a amenune la nöjei nöj, uti hë pexeje hë la itre macatre ka ca thauzan; nge thupene lai ijije troa shei nyëne hmacapi, ngöne la ijine ka xoxopatr.” (Hna Amaman 20:1-3) Ame la pune koi diabolo me itre dremoni angeic, ke, meci palua.—Hna Amaman 20:10.

Itre atre ka ngazo a troa ce patre me angatr.—Salamo 37:9, 10; Luka 13:5.

Thupene la hna othi Satana me itre dremoni, tro Iehova a nunuëne la nöjei manathithi kowe la fene hnengödrai. Wangatrehmekune hë epuni lo laka, pë hë hna atreine kuca hnene la itre ka meci hë. Hnei Iesu hna aceitunëne la meci memine la kola meköl!—kola hmulizië (Ioane 11:11-14). Atre hi Nyidrë laka, troa traqa la ijine troa hlë matre mele lo itre ka meköle ngöne la mec. Hnei Nyidrë hna qaja ka hape: “Ke calemi hë la ijine tro la nöjei atr ngöne la itre hua a drenge . . . me tro pi.”—Ioane 5:28, 29; wange ju fe la Ite Huliwa 24:15.

Nge troa amele angatre e celë fen. Celë hi matre pë hmaca kö troa ithuemacanyine la ëjene la itre ka meci hë, ngo troa atraqatre la madrine troa qaja me ithuemacanyine la ëjene la itre ka mele hmaca qa hna mec! Eje hi laka, ketre madrine ka tru lai, ene la troa iöhnyi hmaca me kapa la itre atre hne së hna hnim, kola bëeke qa hnine la hua!