Tro Iehova elanyi a köletrije la nöjei ewekë ka ngazo asë hnei Satana hna kuca. Hnei Iehova hna acili Iesu troa joxu ngöne la fene hnengödrai asë. Fene la hna nyijoxu hnei Nyidrë, ke, tro ha cile hmaca la paradraiso.—Daniela 7:13, 14; Luka 23:43.

Iehova a thingehnaeane la itre ewekë celë:

• PË HMACA KÖ JIIN: “Ase hë wa la fene hnengödrai; tro ha amanathithi shë hnei Akötresie, ene la Akötresi shë.” “Loi e eje la qitre ka nyimutre ngöne la nöj, hune la hene la itre wetr; tro ha nangenange la itre wen’eje tune la Labona; nge tro angatr’a mana ngöne la lapa tune la hnënge haö ne la fene hnengödrai.”—Salamo 67:6; 72:16.

• PË HMACA KÖ ISI: “Trohemi ma wange la hna longëtine hnei Iehova, lo atre apë wenëne la fene hnengödrai. Kola nyipune la isi uti hë la cane la fene hnengödrai.”—Salamo 46:8, 9.

• PË HMACA KÖ ATR KA NGAZO: “Ke tro ha thupa triji angetre kuca la ngazo; . . . nge pana acas, ame hna patre pi la atr ka ngazo; nge tro eö a wange hnyawa la hne i nyën, ngo patre hë nyën.”—Salamo 37:9, 10.

•  PË HMACA KÖ KUCAKUCA, HLEUHLEU, ME MEC: “Ame hna troa ahlëne la itre lue meke ne la itre timek, me fe pi la itre lue hnangenyë ne la itre ka sim; ame hna troa sesë draië la itre ka genyi ca, tune la aila, nge troa nyima la sesepeneqe ne la hum; ke xulu hë la timi ngöne la hnapapa me itre hneopegejë ngöne la ga cepunikë.”—Isaia 35:5, 6.

  “Nge tro Nyidrëti Akötresieti a ceme angatr, ene Akötresi angatr. Nge tro Nyidrëti a köletrije la nöjei trenge timidra asëjëihë qa ngöne la itre lue meke i angatr, nge pë hmaca kö meci me hace hni me treij, me akötr; ke patre hë la itre ewekë hnapan.”—Hna Amaman 21:3, 4.

Pëkö trengathoi thei Iehova, tha ka tui Satana kö me itre dremoni angeic. Ame la itre ewekë hnei Nyidrë hna thingehnaean, ke, tro asë hi itr’ej’a traqa (Luka 1:36, 37). Iehova a hnimi epun, nge Nyidrëti a ajane tro epuni a hane mele hnine la paradraiso hnei Nyidrëti hna troa kuca. Celë hi matre thele jë la itre hlue i Iehova matre atrepengöne hnyawa la wesi ula i Akötresie. Eje hi laka maine tro epuni a trongëne me melëne la nyipici, ke, tro hë epuni a nunue qa ngöne la ehacene la itre ewekë hna xouen, itre ewekë hne së hna tha öhn. Celë hi matre hnei Iesu hna qaja ka hape: “Nge tro hë nyipunie a atre la nyipici, nge tro hë nue amaca nyipunie hnene la nyipici.”—Ioane 8:32.