1, 2. Maine kola traqa la itre jol kowe la lue trefën tre, hapeu, kolo kö lai a hape, ka luzi hë la faipoipo?

 AHNAHNA i Iehova la faipoipo. Celë hi ketre jëne madrin ka tru kowe la atr. Ngo ame la itre ka faipoipo, tro palakö angatr a ixelë memine la itre jol. Kola mekun hnene la itre xaa trefën e itre xaa ijin ka hape, pëkö nyine la itre jol ka eje thei angatr. Celë hi kepin matre tha catre hmaca kö la ihnimi angatr, tune lo xötrei.

² Tha tro kö sa sesëkötr la kola traqa la itre jol koi së memine la föe së. Tha kolo kö lai a hape, ka luzi hë la faipoipo së. Nyimutre la itre trefën ka melën la itre jol ka catr, ngo hnei angatr hna isin matre troa lolo hmaca la aqane imelekeu i angatr. Celë hi ka acatrene la faipoipo i angatr. Nemene la aqane kuca i angatr?

3, 4. Nemene la ewekë ka traqa e itre xaa ijin kowe la lue trefën?

³ Kola isilekeun hnene la faipoipo la lue atr ka isapengön. Isapengöne la itre aja, tune la aqane waiewekë me aqane huliwa. Ketre, isa hane ngönetrei kö, me isa nöj, me qenenöj. Celë hi kepin matre nyipiewekë tro palahi nyidroti a catr, me xomi ijine troa iatre hnyawa.

⁴ Kola tro la itre macatre nge, maine jë, tro hë nyidroti a isa melën la mele i nyidro. Kösë nyidroti ha nango  iananyi trotro. Nemene la ka troa xatua nyidro troa ce mele hmaca?

5. (a) Nemene la ka xatuane la Keresiano troa fedr kowe la föi angeic? (b) Thenge la tusi Heberu 13:4, nemene la aqane tro sa goeëne la faipoipo?

⁵ Ka sisitria la itre eamo hnei Iehova hna hamëne kowe la itre trefën. Itre ej a xatua së troa easenyi koi Nyidrë me fedr kowe la föe së. (Salamo 25:4; Isaia 48:17, 18) Öni Nyidrë: “Loi e tro nöjei atr a wangatrune la faipoipo.” (Heberu 13:4) Eje hi, ka sisitria la ewekë hne së hna wangatrun. Haawe, Iehova a ajan matre troa sisitria la faipoipo koi së. Celë hi matre nyipiewekë tro sa thupën la faipoipo, nge tha tro pi kö sa mekun ka hape, ka pëkö ejolen la faipoipo.

6. Thenge la tusi Mataio 19:4-6, nemene la aqane goeëne Iehova la faipoipo?

⁶ Iehova la ka acile la pane faipoipo. Önine la nekö i Nyidrë Iesu: “Tha hane kö nyipunieti e ka hape, ame ngöne lo qaan, hnene la atre xup hna isa xupi nyidro, trahmanyi me föe me hape: ‘Celë hi matre, tro la trahmanyi a nue la keme me thine i angeic, me fedre kowe la föi angeic, nge tro nyidroti a ca ngönetrei’? Matre tha ala lue hmaca kö, ngo ca ngönetrei hë nyidro. Haawe, ame la hnei Akötresieti hna isilekeun, tha tro kö a senge hnei ketre.” (Mataio 19:4-6) Qa ngöne la qaan, Iehova a isilekeun la föe me trahmany, jëne la faipoipo, utihë la tro nyidroti a isa mec. Ame la aja i Nyidrë, tre, troa cas la itre atrene la hnepe lapa, me mele madrin epine palua.

7. Nemene la nyine isa kuca hnene la föe me trahmanyi matre troa tro loi la faipoipo i nyidro?

⁷ Ame enehila, kolo palahi a catrehnine catr la itre itupath kowe la itre trefën. Celë hi matre kola mekun hnene la itre xan ka hape, maine jë luzi hë la faipoipo i angatr nge, pë fe hë mejiune i angatr. Nemene la ka troa xatua angatr? Loi tro angatr a pane trotrohnine hnyawa la aqane goeëne Iehova la faipoipo.—1 Ioane 5:3.

8, 9. (a) Eu la ijine tro sa xötrethenge la itre eamo i Iehova göi faipoipo? (b) Nemene la aqane tro sa amaman ka hape, ka sisitria koi së la faipoipo së?

⁸ Nyine loi koi së la itre eamo hnei Iehova hna hamën koi së. Tune lo hne së hna wange hë, ame la aja i Nyidrë, tre: “Tro la nöjei atr a wangatrune la faipoipo.” (Heberu 13:4; Ate Cainöj 5:4) Celë hi matre, ngacama  jol e itre xaa ijin, ngo nyipiewekë tro sa xötrethenge la itre eamo i Iehova. E cili, tro hë sa kapa la itre thangan ka lolo.—1 Thesalonika 1:3; Heberu 6:10.

⁹ Maine ka sisitria koi së la faipoipo së, eje hi laka, tha tro pi kö sa qaja, maine nue la ketre ewekë, troa ajojezine la faipoipo së. Tro pe sa kuca asë la hne së hna atrein, matre acatrene la ihnimi së memine la föe së. Troa tune ka?

10, 11. (a) Nemene la jol ka tru hna melën hnene la itre xaa trefën? (b) Ka nyipiewekë kö la aqane tro sa ithanata kowe la föe së?

¹⁰ Nyimu aqane iakötrë ne la föe maine trahmany kowe la föe hmunë. Atre hi së laka, tha tro pi kö la itre Keresiano a lepe maine qanangazone la föi angatr. Ngo ijije hi troa iakötrë hnene la aqane ithanata. Ka isi la itre trenge ithanata. Önine la ketre föe: “Kola lepi eni hnene la föeng, hnene la itre ithanata i nyidrë.” Öni Nyidrë, ketre ehnefe ni koi nyidrë nge, “ka pë hnënyöngön.” Eje hi, tha mama kö koi atr la akötreng, ke wenethëhming la hna thin hnene la itre ithanata i nyidrë. Önine pena la ketre trahmanyi hna qaqane me thaipiëne lapan hnene la föe hmunë ka hape: “Tha itre nyine qaja kö la itre hna qaja koi ni hnene la föeng. Ketre thatreine hë ni ithanata me angeic, matre eni a pune lapa aqeanyi ju ngöne la hna huliwang. Ka loi hi koi ni hune la troa canga bëeke koi hnalapa.” Ame enehila, hna majemine iqaqa me ijelë, me qaja la itre trenge ka akötr.

¹¹ Ame la kola ijelë hnene la lue trefën, ke, eje hi, tro pa ha lapa e kuhu hni ketre, la itre trenge ka akötr hna  qaja. Tha aja i Iehova kö tro la lue trefën a mele tune lai. Ame itre xaa ijin, thatre kö së ka hape, easa akötrëne la föe së. Maine jë easa mekun ka hape, ka lolo hi la thina së. Ngo nemene jë la mekuna ne la föe së? Maine epuni palakö a qaja la itre trenge ka akötr, hapeu, aja i epuni kö troa saze?—Galatia 5:15; e jë la Efeso 4:31.

12. Nemene la ka troa ajojezine la aqane imelekeu ne la ketre atr ka faipoipo, me Iehova?

¹² Ka nyipiewekë catr koi Iehova la aqane ithanata së kowe la föe së, ngöne la ga tru atr, me ngöne la easë cas. (E jë la 1 Peteru 3:7.) Iakobo 1:26 a amekunë së ka hape: “Maine ketre a mekune ka hape, hlue i Akötresie angeic, ngo tha xomehnöthe pe la thineme i angeic,  angeic hmaca kö a amenune la hni i angeic, nge angeice a hmi menu.”

13. Nemene la aqane tro la trahmanyi maine föe a akötrëne la föi angeic?

¹³ Hetre itre xaa götran laka, nyipiewekë tro la föe maine trahmany a thel troa trotrohnin la mekuna ne la föi angeic. Drei la ketre ceitun. Nemene la hna troa mekun hnene la föi epun, e tro epuni a ce tro lapa memine la ketre atr? Maine jë troa ce cainöj, maine göi ixatua. Ngacama pëkö engazon, ngo hapeu, tha tro jë kö lai a akötrë angeic? Önine la ketre Keresiano föe: “Kola akötrë ni la kola ce tro lapa hnene la föeng memine la ketre trejine föe, nge nyidrëti a epe catr koi angeic. Hace catre koi ni.”

14. (a) Nemene la trepene mel koi së ngöne Genese 2:24? (b) Nemene la aqane tro sa isa hnying?

¹⁴ Pine laka itre Keresiano së matre, hetre itre hnëqa së kowe la itre keme me thine së, me kowe la itre trejin ne la ekalesia. Ngo maine ka faipoipo së, pane hnëqa së la föe së. Öni Iehova ka hape, tro la trahmanyi a “fede kowe la fö‘ i angeic.” (Genese 2:24) Loi e troa tru koi së la itre mekuna ne la föe së. Isa hnyinge jë së ka hape: ‘Eni kö a xomi ijine troa ce memine la föeng? Ka tru palahi angeic koi ni? Eni kö a amamane la ihniming koi angeic?’

15. Pine nemene matre troa thupën hnene la itre Keresiano ka faipoipo, matre tha tro kö a epe catr kowe la ketre trejin nge tha föi angatre kö?

¹⁵ Maine tro sa imajemikeu catr memine la ketre atr ngo tha föe së pe, tro ha xulu la iwesitrë hnine la faipoipo. Ketre, tro hë së lai a nyiqane epe kowe lai atr me pi iatre me angeic. (Mataio 5:28) Tro fe hë lai a kökötre la aja cili, me uku së troa kuca la ketre ewekë ka troa adrone la faipoipo së.

16. Nemene la hna amekötin e hnine la Tusi Hmitrötr göi faipoipo?

¹⁶ Thupene la hna qaja ka hape: “Loi e tro nöjei atr a wangatrune la faipoipo,” önine la Tusi Hmitrötr: “The tro pi kö a adrone la faipoipo, ke tro Akötresieti a amekötine la itre ka kuci ngazo me ka nyixetë.” (Heberu 13:4) Ame ngöne la xötr, ame la hnaewekë “faipoipo,” tre, kola qaja la ce meköle trefën ne la trahmanyi me föe ka faipoipo. (Ite Edomë 5:18) Nemene la aqane tro sa metrötrëne la ce meköle trefën?

17. (a) Nemene la aqane mekune ne la itre xan göi nyixetë? (b) Nge nemene fe la mekuna ne la itre Keresiano?

¹⁷ Ame enehila, kola mekun hnene la itre xan ka hape, pëkö engazone la troa nyixetë. Tha tro pi kö sa kapa la mekune cili. Iehova a amamane hnyawa ka hape, methi Nyidrëti la nyixetë, memine la itre huliwa ka sis. (E jë la Roma 12:9; Heberu 10:31; 12:29) Ame la easa ce meköle trefën memine la ketre atr ngo tha föe së kö, easë hi lai a adrone la faipoipo së. Easë fe hi lai a amaman ka hape, pëkö metrötre së kowe la itre trepene meköti Iehova. Ketre, easë hi lai a thë la aqane imelekeu së me Nyidrë. Celë hi kepin matre tha tro pi kö sa kuca la ketre ewekë ka uku së troa nyixetë. Ka tune la tro sa meciune la ketre atr ngo tha föe së pe.—Iobu 31:1.

18. (a) Pine nemene matre ceitune hi la nyixetë me thili koi itre haze? Nemene la aqane goeëne Iehova la nyixetë?

¹⁸ Ame ngöne la Wathebo i Mose, ekö e Isaraela, ketre ngazo atraqatr la nyixetë. Ceitune hi la ngazo cili memine la troa thili koi itre haze. Troa humuthe la ka nyixetë, tune la ka thili koi itre haze. (Levitiko 20:2, 10) Pine nemen matre ceitune hi la nyixetë memine la troa thili koi itre haze? Maine troa thili koi itre haze la atre Isaraela, angeice hi lai a thoi kowe la hna isisinyikeu me Iehova,  ene la troa nyipici koi Nyidrë. Nge maine angeic pena a nyixetë, angeice hi lai a thoi kowe la hna isisinyikeu, laka troa nyipici kowe la föi angeic. (Esodo 19:5, 6; Deuteronomi 5:9; e jë la Malaki 2:14.) Celë hi ka amaman ka hape, ame ekö, ketre ngazo atraqatr koi Iehova, la nyixetë.

19. Nemene la ka xatua së matre troa xeci e kuhu hni së laka, tha tro kö sa nyixetë?

¹⁹ Nge tune ka fe enehila? Tha easë hmaca kö fene la Wathebo i Mose. Ngo tha saze kö la aqane goeëne Iehova la nyixetë. Ame la aqane sisine së la troa thili koi itre haze, aqane tro hi së lai a sisine troa nyixetë trije la föe së. (Salamo 51:1, 4; Kolose 3:5) Ame la easa thoi kowe la föe së, ke easë hi lai a wangesixane la faipoipo së, me Iehova fe.—Wange ju la Ithuemacanyi 26.

20. Nemene la thangane kowe la faipoipo e ka inamacane së?

²⁰ Nemene la aqane tro epuni a acatrene la ihnimi epuni memine la föi epun? Önine la Wesi Ula i Akötresie: “Kola xupi uma ngöne la inamacan, nge kola acaten’ eje ngöne la trotrohnin.” (Ite Edomë 24:3) Hetre uma ka lepany nge ka pë alien, nge hetre uma ka keukawa, ka lolo la hnin, nge ka tingeting. Ceitune hi lai memine la faipoipo. Ame la ka inamacan, angeic a kuca asë matre troa madrin me tingeting la mele i angeic me föi angeic.

21. Nemene la aqane tro sa acatren la faipoipo së hnene la hna ini Tusi Hmitrötr?

²¹ Önine hmaca la Tusi Hmitrötr göne lo uma ka hape: “Nge ate hmekun’ a atiqane la ite hnahage hnei nöjei nyipi mo me ite ka sheming.” (Ite Edomë 24:4) Troa xatua epun göne la faipoipo, hnene la hnei epuni hna inine la Tusi Hmitrötr. (Roma 12:2; Filipi 1:9) Ame la epon lue trefën a ce e Tusi Hmitrötr memine la itre itus, ce ithanatane  jë la aqane tro epon a trongën la hnei epone hna inin. Mekune jë la itre aqane tro epon a isa amaman, ketre koi ketre, la ihnim me aqane tro epon a imetrötrekeu. Ketre tune la troa loi thina, me thele palahi la aqane troa xatua ketre. Sipo Iehova jë troa xatua epun troa eëne la itre thina ka troa acatrene la faipoipo i epun. Kola qaja la itre thina ka troa hamë aja kowe la föi epun, troa catre hnimi epun.—Ite Edomë 15:16, 17; 1 Peteru 1:7.

22. Nemene la enyipiewekëne la tro sa hnim me metrötrën me wangatrun la föe së?

²² Loi e tro sa kuca asë la hne së hna atrein matre troa hnim, me metrötrën, me wangatrune la föe së. Celë hi ka troa acatrene la faipoipo së, me xatua së troa fedre kowe la föe së. Nge ame la ka nyipiewekë catr, tre, easa amadrinë Iehova.—Salamo 147:11; Roma 12:10.