1, 2. Nemene la kepin matre epuni a hnimi Iehova?

 EPUNI kö a hnimi Akötresie? Hnene laka, tru catre la ihnimi epuni koi Nyidrë matre epuni a nue la mele i epuni koi Nyidrë. Eje hi laka, ketre nyipi sinee i epuni hë Nyidrë. Ngo Iehova la ka pane hnimi epun. Öni Tusi Hmitrötr: “Ngo ame easë, easë a ihnim, ke pa i nyidrëti kö hnimi së.”—1 Ioane 4:19.

² Nyimu aqane amamane Iehova la ihnimi Nyidrëti koi së. Hnei Nyidrëti hna hamë së la ihnadro, hnë lapa së ka mingöming, memine ju fe kö la itre xaa ewekë ka nyimutre, matre tro sa mele madrin. (Mataio 5:43-48; Hna Amaman 4:11) Aja i Nyidrë troa imelekeu hnyawa me easë, nge Nyidrëti a ini së la aqane troa atrepengöi Nyidrëti hnyawa. Ame la easa e la Tusi Hmitrötr, easë hi lai a drei Iehova. Nge ame la easa thith, Nyidrëti a drei së. (Salamo 65:2) Nyidrëti a eatrongë së me hamë trengecatre koi së, jëne la uati hmitrötre i Nyidrë ka men. (Luka 11:13) Goi nue fe Nyidrëti la Nekö Hnimina i Nyidrë kowe la fen, matre troa thepe së qa ngöne la ngazo me mec.—E jë la Ioane 3:16; Roma 5:8.

3. Nemene la aqane tro sa imelekeu hnyawa me Iehova?

³ Pane mekune jë la ketre nyipi sinee i epun. Hnei  epuni palahi hna ce ngenu me ce madrin me angeic. Nge ame fe ngöne la itre ijine jol, ke tha patre kö angeic. Maine easa ajan troa imelekeu hnyawa memine la ketre atr ke, hetre nyine tro sa kuca. Ka ceitune hi lai memine la imelekeu së me Iehova. Nyidrëti hi la nyipi sinee së, nge sinee së epine palua. Celë hi matre öni Tusi Hmitrötr: “Tro sa lapa fene la ihnim i nyidrë.” (Iudra 21) Kola hapeue lai? Tusi Hmitrötr a sa ka hape: “Ame la troa hnimi Akötresie, tre ene la troa trongëne la itre hna amekötin hnei Nyidrë, nge eje hi, tha ka hace kö itre ej.”—1 Ioane 5:3.

4, 5. (a) Nemene la “ihnimi Akötresie”? (b) Nemene la ka aciane la ihnimi epun koi Iehova?

⁴ “Ihnimi Akötresie.” Nemene la mekuna i Ioane ngöne la angeic a cinyihane la hnaewekë celë? Angeic a mekun la etrune la ihnimi ne la atr koi Akötresie. Mekune hi epuni lo ijine kola traqa la ihnimi epuni koi Iehova?

⁵ Pane mekune jë lo ijine epuni a hane atre laka, Iehova a ajan tro epuni a mel epine palua ngöne la fen ka hnyipixe. Kolo fe a mama koi epun la itre hnei Nyidrëti hna kuca matre troa eatrën la aja i Nyidrë. E cili, epuni a trotrohnin laka, ame la Nyidrëti a nue la Neköi Nyidrëti kowe la fen ke, celë hi ketre ahnahna ka tru alameken thatraqai së. (Mataio 20:28; Ioane 8:29; Roma 5:12, 18) Hna ketri epun hnene la ejuine la ihnimi Iehova koi epun, matre celë hi ka aciane la ihnimi epuni koi Nyidrë.—E jë la 1 Ioane 4:9, 10.

6. Tro sa amamane tuneka la ihnimi së kowe la atr hne së hna hnim? Nge nemene la hna upi së troa kuca, hnene la ihnimi së koi Iehova?

⁶ Eje hi laka, kolo petrehi lai a nyiqaan la ihnimi epuni koi Akötresie. Hanawang la ketre ceitun, ame la easa  hnime la ketre atr ke, tha eje kö laka, tro hi a qaja ka hape, “eni a hnimi eö.” Ihnimi së koi angeic la ka upi së troa kuca la itre ewekë ka amadrinë angeic. Ketre tune fe, tro la ihnimi së koi Iehova a upi së troa mele thenge la itre ewekë ka amadrinë Nyidrë. Ame la kola kökötre trotro la ihnimi epun, haawe, epuni hë lai a nue la mele i epun koi Nyidrë me xomi bapataiso. E cili, ame la epuni a sa xepu, epuni hi lai a sisinyi troa nyihlue i Nyidrë, uti hë epine palua. (E jë la Roma 14:7, 8.) Nemene la aqane tro epuni a nyipici kowe la hna sisiny?

7. Nemene la nyine tro sa kuca e ka hnimi Iehova së? Qaja jë la itre xaa hna amekötin hnei Akötresie?

⁷ Hnene la ihnimi së koi Iehova matre easa “trongëne la itre hna amekötin hnei Nyidrë.” Troa tuneka? Easa drengethenge Nyidrë. Jëne la Tusi Hmitrötr, Iehova a ini së la aqane troa mel. Drei la ketre ceitun. Öni Akötresie, ka ngazo la troa thil kowe la ketre ewekë maine ketre atr pena. Nge ka ngazo mina fe la troa hmo hnei kahaitr, me atrekënö me thoi, me ce meköle trefën me ketre ngo tha föe hmunë pe.—1 Korinito 5:11; 6:18; 10:14; Efeso 4:28; Kolose 3:9.

8, 9. Maine pëkö wathebo e hnine la Tusi Hmitrötr göi troa amekötin la ketre jol, tro sa atre tuneka la mekuna i Iehova? Qaja jë la ketre ceitun.

⁸ Ame la troa drengethenge Iehova ke, tha eje hmekuje kö la troa xötrethenge la itre hnei Nyidrëti hna amekötin. Tha hnei Nyidrëti kö hna acili wathebo kowe la itre jol ka isa pengön hne së hna troa melën. Celë hi matre ame e itre xaa ijin ke, pëkö wathebo hna qaja mekötin hnei Tusi Hmitrötr. E cili, tro sa axecië mekune tuneka? (Efeso 5:17) Hetrenyi e hnine la Tusi Hmitrötr, la itre  trepene meköt ka amamane koi së la aqane waiewekë i Iehova. Ame la easa e la Tusi Hmitrötr, easë hi lai a atre Nyidrëti hnyawa. Easa ha trotrohnin la mekuna i Nyidrë, ene la itre hnei Nyidrëti hna hniin me hna sisiin.—E jë la Salamo 97:10; Ite Edomë 6:16-19; wange ju la Ithuemacanyi 1.

⁹ Hanawang la ketre ceitun. Tro sa iëne tuneka la itre hne së hna troa goeën ngöne Televizio maine ngöne Ëternet pena? Tha Iehova kö a qaja mekötine koi së la nyine troa kuca. Ngo tro pe la itre trepene meköti Nyidrëti a xatua së troa axecië mekune hnyawa. Ame enehila, tru pe hi la itre nyine iamadrinë ka amamai isi me huliwa ka sis. Iehova a qaja koi së ka hape, Nyidrëti a “sixelene [maine, methinëne] la ate ka ngazo, memine la ate pi iangazo” nge Nyidrëti a “ahnëjinë angete nyi xetë.” (Salamo 11:5; Heberu 13:4) Matre tuneka la aqane tro la itre trepene meköti a xatua së troa ië ewekë hnyawa? Itre ej a amamane koi së la itre hnei Iehova hna sisiin, tune la kuci ngazo. Ame hë la easa atre la ketre ewekë hnei Nyidrëti hna methinën, haawe, tro hë së lai a thipetrij.

10, 11. Nemene la kepin matre easa drengethenge Iehova?

¹⁰ Pine nemene matre easa drengethenge Iehova? Tha hnene kö laka easa xou wanga tranyi së jë, maine xouene pena la itre ethanyine la hne së hna axecië mekun. (Galatia 6:7) Ohea, easë pe a drengethenge Iehova pine laka easa hnimi Nyidrë. Tune la aqane ajane la nekönatr troa amadrinën la kem, haawe, easë fe a ajan troa amadrinën la Keme së e koho hnengödrai. Ketre madrin ka tru la easa atre laka, Iehova a kepe së!—Salamo 5:12; Ite Edomë 12:2; wange ju la Ithuemacanyi 2.

¹¹ Tha easë kö a drengethenge Iehova e ka loi hi koi së. Ketre, tha easë kö a iëne la itre wathebo ka hmaloi troa  trongën. (Deuteronomi 12:32) Easa drengethenge Nyidrë ngöne la nöjei ijin, tune la hna cinyihane ngöne la tusi Salamo ka hape: “Nge tro ni a aciacine [maine, madrin] la ite wathebo i cilie, lo hnenge hna hniin.” (Salamo 119:47; Roma 6:17) Easa ajan troa hane tui Noa. Hnei angeic hna amaman la ihnimi angeic koi Iehova, ngöne la angeic a kuca asë la itre hnei Nyidrëti hna ahnithe koi angeic. Önine la Tusi Hmitrötr: “Tune hi lai hnei angeice hna kuca.” (Genese 6:22) Ajane fe kö epun tro Iehova a hane qaja tune lai koi epun?

12. Nemene la aqane tro sa amadrinën la hni Iehova?

¹² Nemene la mekuna i Iehova la easa drengethenge Nyidrë? Easa “amadrinën la hni Nyidrë.” (Ite Edomë 11:20; 27:11) Pane mekune jë, easa amadrinëne la Atre Xupe la hnengödrai memine la fene hnengödrai asë, la easa drengethenge Nyidrë! Ngo tha Nyidrëti kö a musinë së. Hnei Nyidrëti hna xupi së cememine la atreine troa ië ewekë, kola hape, isa qanyi së kö iën la nyine troa kuca. Ame la aja i Iehova ke, ihnimi së koi Nyidrë la ka troa upi së troa axecië mekune hnyawa. Haawe, tro hë së lai a hetrenyi la nyipi mel.—Deuteronomi 30:15, 16, 19, 20; wange ju la Ithuemacanyi 3.

13, 14. Hapeu, ka jole kö troa drengethenge Iehova? Qaja jë la ketre ceitun.

¹³ Maine jë tro sa mekun ka hape, jole catre palaha troa xötrethenge la itre hna amekötin hnei Iehova ke, itre ej a hnöthe la mele së. Tusi Hmitrötr a qaja hnyawa ka hape: “Tha ka hace kö itre ej.” (1 Ioane 5:3) Ame la hna ujën qene Geres ne la hnaewekë ka hape, “ka hace” ke, kola hape “ka jol.” Ame ngöne la itre xaa xötr, tre kola qaja la itre hna amekötin ka tha loi kö, maine itre  atr ka iaxösisi, ka thel troa akötrë itre xan me imusinë. (Mataio 23:4; Itre Huliwa 20:29, 30) Hna ujën la 1 Ioane 5:3 ngöne la Tusi Hmitrötr Nouvelle Bible Segond ka hape: “Tha iehnefe kö la itre hnei Nyidrëti hna amekötin.” Tha ka “hace kö” troa trongën itre ej. Kolo lai a hape, tha ka jole kö koi së troa xötrethenge. Ame asë hi la itre hnei Iehova hna upi së troa kuca ke, ijiji së hi troa eatrën.

¹⁴ Tro sa pane xome la ketre ceitun. Epuni a troa xatuan la ketre sinee i epun ka troa saze hnalapa. Hnei angeice hë hna qatreng amë la itre ewekë e hnine la itre kareto. Ka hmaloi la itre xan, ngo ame itre xan ke, ka hace catr matre, loi e troa ce kapa hnei ala lu. Hapeu? Tro kö lai sinee i epuni a sipo epuni troa ajöne casiine lai kareto ka hace? Ohea. Pine nemen? Pine laka, angeic a thupën wanga eatre pi epun. Haawe, ceitui Iehova hi memine lai sinee. Tha tro jë kö Nyidrëti lai a upi së troa kuca la ketre ewekë, nge tha ijiji së pe. (Deuteronomi 30:11-14) Atre hnyawa hi Iehova la pengö së. Nge trotrohni së hnyawa hi hnei Nyidrë. “Ate kö nyidë la aqane tratrau [maine, xupi] shë; nyidëti a mekune laka so ne hnadro shë.”—Salamo 103:14.

15. Hapeu, nyine loi kö koi së la itre hna amekötin hnei Iehova?

¹⁵ Hnei Mose hna qaja koi angetre Isaraela ka hape, nyine loi koi angatre la itre wathebo i Iehova. Nge e tro angatr a drengethenge, tro angatr a mel. (Deuteronomi 5:28-33; 6:24) Ka tune mina fe enehila, laka, ame asë hi la itre hnei Iehova hna upi së troa kuca ke, nyine loi kowe la mele së. (E jë la Isaia 48:17.) Atre kö Iehova Keme së la ka loi koi së. (Roma 11:33) Öni Tusi Hmitrötr: “Akötresieti la ihnim.” (1 Ioane 4:8) Haawe, kola mama la ihnimi Iehova ngöne la nöjei ewekë hnei Nyidrëti hna qaja me kuca.

16. Ijije kö tro sa drengethenge Akötresie, ngacama tha ka pexeje kö së, nge easë ngöne la fen ka ngazo?

 ¹⁶ Nyipici, tha ka hmaloi kö troa drengethenge Akötresie. Easa mel ngöne la fen hna musinëne hnei Diabolo. Angeic a thele jën matre tro la itre atr a kuca la ngazo. (1 Ioane 5:19) Easë mina fe a troa isi memin la pengö së, laka, tha ka pexeje kö së. Nyipici laka, hetrenyi palahi the së la itre aja me itre mekun ka ngazo, ka upi së troa ena la itre wathebo i Akötresie. (Roma 7:21-25) Ngo hnene la ihnimi së koi Iehova, matre easa catr kuca la loi. Öhne kö Iehova la aqane isine së troa drengethenge Nyidrë. Nge Nyidrëti a xatua së jëne la uati hmitrötr. (1 Samuela 15:22, 23; Itre Huliwa 5:32) Ka mene la uati hmitrötre i Nyidrë, nge ej a xatua së troa eëne la itre thiina ka lolo.—Galatia 5:22, 23.

17, 18. (a) Nemene la hne së hna troa inin ngöne la itusi celë? (b) Nemene la nyine tro sa ithanatan ngöne la tane mekune thupen?

¹⁷ Ame ngöne la itusi celë, easa troa inin la aqane troa mel thenge la aja i Iehova. Easë fe a troa wang la aqane troa melën la itre trepene meköt, me eën la itre thiina ka lolo i Nyidrë. Mekune palakö, tha Iehova kö a musinë së troa drengethenge Nyidrë. Ame la easa drengethenge Nyidrë ke, kola tro loi la mele së, nge ka catr la mejiune së kowe la mel ka mingöming elany. Ngo ame la ka sisitria ke, ame la easa drengethenge Akötresie, easë hi lai a amaman la etrune la ihnimi së koi Nyidrë.—Wange ju la Ithuemacanyi 4.

¹⁸ Hnei Iehova hna amë the së la mekuthetheu, ka aijijë së troa atre la loi me ngazo. Haawe, nyipiewekë tro sa inine la mekuthetheu së ke, ej a troa xatua së troa “drengethenge la itre hna amekötin hnei Nyidrë.” Ngo nemene la mekuthetheu? Nge tro sa inine tuneka la mekuthetheu së? Tro pë hë sa ce wang ngöne la tane mekune thupen.