1, 2. (a) Nemene la aja ka eje thene la itre ka xötrei faipoipo? (b) Nemene la itre hnying hne së hna troa sa ngöne la tane mekune celë?

 PANE mekune jë la drai ne kola faipoipo hnene la lue trefën. Ka madrine nyidro, nge nyidroti ha ajane troa melëne la mele ne trefën. Nyimutre la itre mekun me itre aja i nyidro. Ame la aja i nyidro, tre, troa cile huti la faipoipo i nyidro, nge tro pala hi nyidroti a madrin.

² Ame la ejolen, nyimutre la itre trefën enehila laka, pëhë madrin, ngacama ka tro loi hi la faipoipo ngöne la qaan. Troa tro loi me madrin e hnine la faipoipo, e hna eatrongëne la lue trefën hnei Akötresie. Tro sa wang la itre mekun ne la Tusi Hmitrötr ka sa la itre hnyinge celë: Nemene la itre eloine la faipoipo? Nemene la aqane tro epuni a iëne la föi epun? Nemene la aqane tro la föe maine trahmanyi a isa amamane la itre thina i nyidroti ka lolo? Nge hnei nemene matre troa cile huti la faipoipo i nyidro?—E jë la Ite Edomë 3:5, 6.

3. Hapeu, nyipici kö ka hape, troa madrin la atr e tro angeic a faipoipo? Qejepengöne jë.

³ Kola mekun hnene la itre xan ka hape, ka hleuhleu  la atr ka tha faipoipo kö. Ngo tha eje kö lai. Öni Iesu ka hape, ame la troa trahmanyi maine jajinyi qea, tre, ewekë lai hna hamën, maine pena, ketre ahnahna. (Mataio 19:11, 12) Nge öni Paulo aposetolo ka hape, nyimu eloine la troa lapa cas. (1 Korinito 7:32-38) Isa qanyi së kö mekun, ka hape, tro sa faipoipo maine ohea. Tha tro kö a musinë së hnene la itre sinee së, maine hnepe lapa së, maine qenenöje së pena troa faipoipo.

4. Nemene la itre eloine la faipoipo ka tro loi?

⁴ Tusi Hmitrötre fe a qaja ka hape, ketre ahnahna qaathei Akötresie la faipoipo, nge nyimutre la itre eloin. Öni Iehova kowe la pane atr, Adamu: “Tha loi kö e troa lapa casi la at; tro ni a kuca thatraqai angeice la ixatua ka ijiji angeic.” (Genese 2:18) Hnei Iehova hna xupi Eva nyine föi Adamu. Celë hi lue pane trefën hune la ihnadro. Haawe, maine troa hetre nekönatr, nyipiewekë tro nyidroti a ihnimekeu, matre hiane la itre nekönatr ngöne la götrane ga tingeting. Ngo tha kolo hmekuje kö a faipoipo göi troa hetre nekönatr.—Salamo 127:3; Efeso 6:1-4.

5, 6. Pine nemene matre kola aceitunëne la faipoipo memine la “eno ka köni wana eamo”?

⁵ Hna cinyihane hnei Solomona joxu ka hape: “Loi la ala lue hune la ala cas, ke tro nyidoti a hete thupene ka loi ne la huliwa i nyido. Maine kei la kete qâne la kete troa ea la sine i angeic, nge ekölö hi ni la ate casi e kei hë, nge pëkö sine i angeice troa e angeic. . . . Nge tha canga xecie kö la eno ka köni wana eamo.”—Ate Cainöj 4:9-12.

⁶ Ame la faipoipo ka cile hut, tre, kola acasine la lue atr ka iatre hnyawa. Nyidroti a itö ixatua, me ihmeku, me ihnimekeu. Ihnim la ka acatrene la aqane imelekeu ne la lue trefën. Ngo tro palakö a cile hut la faipoipo, e  lue ka nyihlue i Iehova asë nyidro. Tro ha ceitune la faipoipo i nyidro, memine la “eno ka köni wana eamo” hna ele acatrene hnyawa. Ka catrecatre kö la eno hna ele könitreen, hune la hna ele luetreen. Haawe, tro ha cile hut la faipoipo, e tro Iehova a lapa nyipi nyidro.

7, 8. Nemene la itre eamo i Paulo göi itre ka mekune troa faipoipo?

⁷ Thupene la faipoipo, meköti hë koi nyidro troa ce meköle trefën. (Ite Edomë 5:18) Ngo maine kola pi faipoipo hnene la ketre göi ce meköle hi, troa hetre ethane la faipoipo. Celë hi matre Tusi Hmitrötr a qaja ka hape, loi e troa faipoipo thupene lo ijine hna hape, “kola xötrei tru.” Celë hi lo ijine kola catrehnine la itre aja i ngönetrei. (1 Korinito 7:36) Haawe, nyipiewekë troa itreqe hnyawa qëmekene troa faipoipo. Eje hi laka, tro ha lolo la itre mekun, nge atreine hë ië ewekë.—1 Korinito 7:9; Iakobo 1:15.

⁸ Ame la epuni a mekune troa faipoipo, loi e troa mekune hnyawa ka hape, troa hetre jol thene la itre trefën. Öni Paulo, ame la itre ka faipoipo, tre, “troa ixelë me itre akötr.” (1 Korinito 7:28) Ngacama ka catre ju hë la lue trefën, ngo tro fe a hane traqa koi nyidroti la itre akötr. Maine epuni ha mekune troa faipoipo, haawe, loi e tro epuni a iëne hnyawa la hnei epuni hna troa faipoipo memin.

9, 10. Nemene la thangane koi së e hne së hna faipoipo memine la ketre atr ka tha nyihlue i Iehova kö?

⁹ Ame la easa mekun troa faipoipo, loi e troa mekune hnyawa la trepene meköti ne la Tusi Hmitrötr, hna hape: “The isilekeu nyipunieti kö me itre ka tha lapaun.” (2 Korinito 6:14) Ame la ceitune celë, hna xome qa ngöne la itre hna majemine kuca ngöne la hna eëny. Maine  tha ka ihmeku kö la trengecatr me etrune la lue öni hna isilekeun matre troa huliwa ngöne la hna eëny, tre, troa hace me akötr kowe la lue öni. Ceitune hi lai memine la hlue i Iehova. Maine tro angeic a faipoipo memine la ketre ka tha ce hmi kö me angeic, eje hi laka, troa hetre jol koi nyidro. Celë hi matre Tusi Hmitrötr a qaja ka hape, troa faipoipo “thei Joxu hmekuje hi.”—1 Korinito 7:39.

¹⁰ Ame itre xaa ijin, kola qaja hnene la itre xaa keresiano ka hape, ma loi ju kö la tro angatr a faipoipo me ketre atr ne fen, hune la troa lapa cas. Ngo nyipici laka, maine tro sa wangesixane la itre eamo qa hnine la Tusi Hmitrötr, ke, troa hleuhleu me hace la mele së. Pine laka, itre hlue i Iehova së, tro kö a sisitria catre la huliwa së koi Nyidrë hune la nöjei ewekë asë. Ngo tune kaa e tha ce kuca kö epone la huliwa ka sisitria cili? Nyimutre la itre keresiano ka iën troa lapa cas. Tha ajane kö angatr troa faipoipo memine la ketre atr ka tha nyihlue i Iehova kö.—E jë la Salamo 32:8.

11. Nemene la aqane tro epuni a thele la hnei epuni hna troa faipoipo memin?

¹¹ Tha hnene kö laka, ka nyihlue i Iehova la ketre atr, ke, tro hë sa canga sesë troa faipoipo me angeic. Maine epuni a ajane troa faipoipo, thele jë la ketre atr hnei epuni hna hnime hnyawa, nge ka troa trotrohni epun. Xomi ijine jë troa thele hnyawa la ketre atr ka ce mekune me epun. Hetrenyi la itre eamo ka lolo göi faipoipo, hna hamën e hnine la itre itus qaathene la hlue ka nyipici me ka inamacan. Xomi ijine jë troa e, me sinethele itre ej.—E jë la Salamo 119:105.

12. Nemene la hna amaman hnei Tusi Hmitrötr thatraqane la itre keme me thin ka thele föe ne la neköi angatr?

¹² Ame ngöne la itre xaa qenenöj, tre, keme me thin la  ka thele föe ne la nekö i nyidro. Hna mekun ngöne la itre hna majemine cili ka hape, öhne hnyawa hi la keme me thin, la hna troa faipoipo memin, hnene la nekö i nyidro. Celë hi itre aqane kuca ekö. Maine kola ajane hnene la hnepe lapa troa xötrethenge lai, loi e troa thele ixatua e hnine la Tusi Hmitrötr. Celë hi ka troa xatuane la keme me thin troa thele la föe ka ijij kowe la nekö i nyidro. Ame la Aberahama a thele föi Isaaka, nekö i nyidrë, tha hnei nyidrëti kö hna goeëne la mani, maine thele ka trenamo pena. Ame la aja i Aberahama, tre, ene la jajinyi ka hnimi Iehova.—Genese 24:3, 67; wange ju la Ithuemacanyi 25.

13-15. (a) Nemene la aqane tro la trahmanyi a hnëkë matre atreine xome la hnëqa e hnine la hnepe lapa? (b) Nge nemene fe la aqane tro la föe a hnëkë?

¹³ Maine epuni a ajane troa faipoipo, loi e troa pane hnëkë hnyawa. Maine jë tro epuni a mekun ka hape, ka hnëkë hë epun. Ngo tro sa pane wang la aliene la hna hape, ka hnëkë hë göi faipoipo. Maine jë thatre kö epun.

¹⁴ Tusi Hmitrötr a qaja ka hape, hetre isa hnëqa ne la trahmanyi me föe ngöne la hnepe lapa. Celë hi matre isa pengöne kö la aqane tro nyidroti a trotrohnin la kola hape, ka hnëkë. Maine trahmanyi ha mekun troa faipoipo, loi e tro angeic a pane mekun ka hape, ijiji angeice jë kö troa xome la hnëqa i angeic, ene la troa he ne la hnepe lapa? Iehova a ajan tro la trahmanyi a huliwa me hnime la föe me hanekönatr. Ame la ka nyipiewekë kowe la trahmany, tre, ene la troa iujine la hnepe lapa ngöne la götrane la u. Tusi Hmitrötre fe a qaja la atr ka tha thupëne hnyawa kö la hnepe lapa, ka hape, “tru catre kö la ngazo i angeic hune la atr ka pë lapaun.” (1 Timoteo 5:8) Haawe, maine nyipunie itre trahmanyi a mekun troa faipoipo, pane lapa mekune jë la trepene meköti celë hna hape: “Hnëkëne jë la huliwa i ’ö e kuhu, me itre hna eënyi ’ö; nge thupene lai tro eö a xupe la uma i ’ö.” Kolo lai a hape, qëmeken troa faipoipo, nyipiewekë troa pane inine la hnëqa i epun, thenge la aja i Iehova.—Ite Edomë 24:27, MN.

¹⁵ Maine kola mekun hnene la ketre föe troa faipoipo, loi e tro angeic a pane mekun ka hape, ijiji angeice jë kö troa hane xome la hnëqa i föe maine thin? Tusi Hmitrötr a qaja ka hape, ame la föe ka lolo thiina, ke, nyimu aqane thupëne angeic la itre nekö i angeic memine la föi angeic. (Ite Edomë 31:10-31) Ame la aja ne la itre  trahmanyi me föe ka faipoipo, tre, troa hnimi angatr hnene la föi angatr. Celë hi aja i Iehova, la tro sa amadrinëne la föe së, ngöne la nöjei drai.

16, 17. Maine epuni ha mekun troa faipoipo, nemene la itre ewekë nyine tro epuni a pane mekun?

¹⁶ Qëmekene troa faipoipo, pane mekune jë la aja i Iehova göne la isa hnëqa i nyidro. Thaa hnene kö laka, he ne hnepe lapa la trahmany, ke, meköti koi angeic troa iakötrë, me qanangazon la itre atrene la hnepe lapa. Tro angeic a xötrethenge la tulu i Iesu. Ka ihnimi nyidrë me loi thina kowe la itre atr hnei nyidrëti hna hnim. (Efeso 5:23) Ame la föe ka lolo, angeic a ce huliwa me sajuën la itre mekuna ne la föi angeic. (Roma 7:2) Celë hi matre, loi e tro la föe a pane mekune hnyawa la aliene la hnëqa cili. Nyipiewekë troa pane mekun ka hape, tro jë kö angeic a madrin troa drengethenge la trahmanyi ka tha pexeje kö? Maine angeic a mekun ka hape, tha ijije pala kö, haawe, ma ka loi kö la tro angeic a pane lapa cas.

¹⁷ Nyipiewekë tro la trahmanyi maine föe a thel troa pane amadrinëne la föi angeic, nge pi angeice pë hë. (E jë la Filipi 2:4.) Hna cinyihane hnei Paulo ka hape: “Nyipiewekë troa isa hnimi föen, tune la aqane hnime nyipunie la itre ngönetrei i nyipunie. Nge nyipiewekë mina fe tro la itre föe a metrötrëne hnyawa la itre föi angatr.” (Efeso 5:21-33) Ajane asë hi la itre trahmanyi me föe troa metrötrë angatr me hnimi angatr, hnene la itre föi angatr. Nge nyipiewekë tro la trahmanyi a atre ka hape, kola metrötrë angeic me hnimi angeic hnene la föi angeic, ketre tune mina fe kowe la föe. Celë hi ka acatrene la faipoipo.

18. Pine nemene matre nyipiewekë troa hmek hnene la trahmanyi me föe ngöne la ijine iatre?

¹⁸ Ketre ijine ka lolo catr la kola pane iöhnyi hnene la  nekötrahmanyi me jajiny. Celë hi ijine tro nyidroti a thele troa pane iatre hnyawa. Ngo ijine fe tro nyidroti a mekun ka hape, eje kö e kuhu hni nyidro la ajane troa ce mel uti hë mec? Ame ngöne la ijine iatre, nyidroti a ifekeune la itre mekun, me thele troa atre hnyawa la isa pengöi nyidro. Ame hë la nyidroti a nyiqane imajemikeu, ke nyidroti a iaja. Kösë aqane trongene kö lai. Ngo ame pe, tha ka faipoipo pala kö. Celë hi matre nyipiewekë tro nyidroti a thupën la aqane tro nyidroti a ifekeune la itre aliene hni nyidro, wanga kei pi nyidro kowe la kuci  ngazo. Nyipi ihnim la ka troa xatua nyidro. Celë hi ka troa sewe nyidro troa kuca la ketre ewekë ka troa thë la aqane imelekeu i nyidro, me aqane imelekeu i nyidroti me Iehova.—1 Thesalonika 4:6.

19, 20. Nemene la aqane goeëne la faipoipo hnene la itre Keresiano?

¹⁹ Hna nyipune la itre itus me itre film hnei faipoipo ka madrin. Ngo ngöne filme lai. Ame ngöne la nyipi mel, tre, faipoipo la ka nyiqaan. Ame koi Iehova, ame la faipoipo tre, kola iothhekeune la trahmanyi me föe, nge uti hë mec.—Genese 2:24.

²⁰ Ame enehila, alanyimu la itre atr ka wangahmalohmaloeëne la faipoipo. Ame koi angatr, ka hmaloi troa faipoipo, nge ketre hmaloi fe hi troa seihnacil. Kola mekune hnei itre xan ka hape, ame hi la kola nyiqaane traqa la itre jol, ijine tro hi lai a itrij me seihnacil. Ngo pane mekune jë së lo eno ka catr, hna ele köni wana eamon. Tha ka canga xecie kö la eno ka köni wana eamo, ngacama traqa ju hë la itre jol ka tru. Haawe, loi tro sa catre sipo ixatua thei Iehova, matre troa cile huti la faipoipo. Öni Iesu: “Ame la hnei Akötresieti hna isilekeun, tha tro kö a senge hnei ketre.”—Mataio 19:6.

21. Nemene la ka troa xatuane la lue trefën troa ihnimekeu?

²¹ Tha itre atr ka pexej kö së, matre, canga tro hi sa öhne la ngazo i ketre. Maine ka tune së lai, thatreine jë kö së troa madrin. Ngo maine tro palahi sa goeën la itre thiina ka lolo thene la föe së, eje hi laka, tro hë sa madrin. Hapeu, ka loi kö la aqane waiewekë cili, nge ka tha pexeje pe la föe së? Eje hi! Öhne hnyawa hi Iehova la itre  tria së, ngo itre thiina së ka lolo la hnei Nyidrëti hna goeën. Pane mekune jë së la pengöi Nyidrë! Önine la ka cinyihane la Salamo ka hape: “IA fe Joxu, maine tro cilieti a ati hatene la ite ngazo, dei la ate troa cil?” (Salamo 130:3) Haawe, loi e tro la lue trefën a xötrethenge la tulu i Iehova. Troa isa wangatrune la itre thiina ka lolo thene la föe hmunë, me saqe inualoinekeun.—E jë la Kolose 3:13.

22, 23. Nemene la ini kowe la itre trefën qa ngöne la tulu i Aberahama me Sara?

 ²² Ijije hi troa acatrene la faipoipo hnene la aqane ce mele ne la lue trefën o drai. Nyimutre la itre macatre ne ce mele Aberahama me Sara, nge hnei nyidroti hna mele madrin. Kola traqa koi 60 nge hetre munën lao macatre i Sara, ngöne lo ijine Iehova a upi Aberahama qa Ure, nöje i nyidro. Pane mekune jë la ejolene koi Sara troa nue la hnalapa i eahlo ka lolo, troa mel e hnine la itre uma maano. Sinee i Sara la föi eahlo. Eahlo a ce huliwa me metrötrë nyidrëti hnyawa. Celë hi matre hnei eahlo hna sajuën la itre mekuna i nyidrë, me kuca matre tro palahi a eatrën itre ej.—Genese 18:12; 1 Peteru 3:6.

²³ Ame la lue trefën ka mele madrin, tre, tha kolo kö lai a hape, ce mekuna i nyidroti palahi. Ame ngöne la ketre ijin, tha kapa kö Aberahama la mekuna i Sara. Öni Iehova koi angeic: “Cengöne denge thenge ju la hna qaja koi ’ö hnei Sara.” Celë hi hna kuca hnei Aberahama, nge ka lolo catr la thangan. (Genese 21:9-13) Haawe, maine epon lue trefën a isazikeu e itre xaa ijin, the hacehnine kö. Ame la ka nyipiewekë, ke, loi tro palahi epon a catre ihnim, me imetrötrekeu.

24. Nemene la aqane tro sa atrunyi Iehova e hnine la faipoipo?

²⁴ Ame thene la itre hlue i Iehova, nyimutre catr la itre trefën ka mele madrin. Maine mekune hë epuni troa faipoipo, mekune hnyawa ju laka, ame la ewekë ka sisitria ngöne la mele i epun, tre, ene la troa pane iëne hnyawa la föi epun. E cili, tro ha hetre thangane ka loi kowe la mele i epun. Haawe, thele ixatua jë thei Iehova matre troa iëne hnyawa la föi epun, me hnëkëne hnyawa ha la faipoipo. Ketre, tro ha catre la aqane imelekeu me ihnimi epon. Nge, celë hi aqane tro epone lai a atrunyi Iehova.