1, 2. Nemene la nyine tro sa atre göi Satana me itre dremoni?

 THA aqane mingöminge kö elanyi la mele së, ngöne la fen ka hnyipixe. Easa ha troa mele tune lo aja i Akötresieti ekö, ngöne la qaan. Ngo ame petre kö enehila, easa me le hnine la fen hna musinën hnei Satana me itre dremoni angeic. (2 Korinito 4:4) Ngacama tha öhnyi angatre kö së ngo, ka mel angatr nge ketre, ka catr fe angatr.

² Ame ngöne la tane mekun celë, easa troa ce wange la aqane tro sa easenyi koi Iehova, me aqane troa icilekeu me Satana. Hnei Iehova hna thingehnaean laka, tro kö Nyidrëti a xatua së. Ngo, loi e tro sa pane atre la itre aqane iaö së hnei Satana me itre dremoni, me aqane tro angatr a lepi së.

3. Nemene la hnei Satana hna ajane troa kuca koi së?

³ Satana a qaja ka hape, itre atr a thili koi Iehova pine laka hetre itre loi hna kapa. Ngo maine troa traqa la itre jol ka catr, canga tro hi angatr a cil troa nyihlue i Nyidrë. (E jë la Iobu 2:4, 5.) Maine kola amamane hnene la ketre atr ka hape, aja i angeic troa atrepengöi Iehova, öhne hi Satana me itre dremoni. Ame cili, angatr a thel troa ajojezi angeic. Nge elëhni catre angatr la kola sa xepu hnene la ketre atr koi Iehova, me xomi bapataiso. Tusi  Hmitrötr a aceitunë Diabolo me “liona ka ho, nge ka thele tha.” (1 Peteru 5:8) Aja i Satana troa thë la aqane imelekeu së me Iehova.—Salamo 7:1, 2; 2 Timoteo 3:12.

4, 5. (a) Nemene la hna thatreine kuca hnei Satana? (b) Qejepengöne jë la kola hape, “icilekeu me Diabolo”?

⁴ Ngo tha tro pi kö sa xou e Satana me itre dremoni angeic. Hnei Iehova hna ami ifego i angatr, matre thatreine kö angatr kuca koi së la nöjei ewekë hnei angatr hna ajan. Hnei Iehova hna thingehnaean laka, tro pe kö a mele la itre nyipi Keresiano “ka alanyimu atraqatr,” ngöne la ijine “akötr atraqatr.” (Hna Amaman 7:9, 14)  Thatreine jë kö Satana troa sawa la ewekë cili, pine laka, Iehova a thupëne la nöje i Nyidrë.

⁵ Maine tro sa lapa qale koi Iehova, thatreine jë kö Satana troa thë la aqane imelekeu së me Iehova. Nyidrëti a akeukawanyi së me hape: “Eje kö Iehova ce me nyipunie e ce nyipunie me nyidë.” (2 Aqane lapa ite joxu 15:2; e jë 1 Korinito 10:13.) Ala nyimu la itre hlue i Iehova ekö, ka tui Abela, Enoka, Noa, Sara me Mose, ka icilekeu me Diabolo, ke, hnei angatr hna lapa qale koi Iehova. (Heberu 11:4-40) Ijije hi tro sa xötrethenge la tulu i angatr. Akötresieti a thingehnaeane ka hape: “Icilekeu ju me Diabolo, nge tro hë angeic a ananyi nyipunie.”—Iakobo 4:7.

6. Nemene la aqane isi Satana?

⁶ Ngacama atre hi Satana ka hape, hna ami ifego i angeic hnei Iehova, ngo tro palakö angeic lai a thel, la aqane troa angazone la aqane imelekeu së me Iehova. Ame enehila, angeic a thel la nöjei pengöne aqane tro angeic a lepi së. Celë hi aqane huliwa i angeic qaan ekö nge traqa koi itre thauzan lao macatre. Nemene la itre xaa aqane kuca i angeic?

7. Pine nemene matre Satana a isi memine la itre hlue i Iehova?

⁷ Hna cinyihane hnei Ioane aposetolo ka hape: “Fene hnengödrai asë a lapa fene la musi ne la atre ka ngazo.” (1 Ioane 5:19) Satana la ka musinëne la fen celë ka ngazo. Nge aja i angeice fe troa musinëne la nöje i Iehova. (Mika 4:1; Ioane 15:19; Hna Amaman 12:12, 17) Atre hi Diabolo ka hape, hohopatre pe hi la ijine i angeic. Celë hi matre angeic a akötrëne la mele së, isa ala cas, matre canga tro hi sa nue Akötresie. Ame itre xaa ijin, canga mama hi koi së la angeic a lepi së. Ngo hetre itre ijin laka, tha nyipi mama kö.

8. Nemene la nyine troa trotrohnine hnene la Keresiano?

 ⁸ Easa e ngöne la tusi Efeso 6:12 ka hape: “Easë a isi . . . memine la itre trongene isi ne la itre u ka ngazo e hnengödrai.” Easë itre Keresiano, easë isa ala cas a troa isi me Diabolo me itre dremoni. Loi tro sa trotrohnine ka hape, ame la itre ka sa xepu koi Iehova, ke, angatr asë hi a isi. Ame ngöne la tusi Paulo aposetolo kowe la angetre Efeso, hnei nyidrëti hna anyimua qaja kowe la itre Keresiano ka hape, loi tro angatr a “cile catr.”—Efeso 6:11, 13, 14.

9. Nemene la hna thel troa kuca koi së, hnei Satana me itre dremoni?

⁹ Satana me itre dremoni a thele la nöjei aqane troa iaö së. Tha hnene kö laka, hne së hna atreine cil kowe la ketre itupath, matre tha tro hë angeic a tra thethi së. Diabolo a thele the së la itre aja ka ngazo, matre troa iaö së. Ngo tha tro pi kö sa nue angeic troa iaö së. Tusi Hmitrötr a amamane koi së la itre aqane iaö i angeic. (2 Korinito 2:11; wange ju la Ithuemacanyi 31.) Ame la ketre aqane iaö së hnei angeic, tre, ene la kuci haze.

10. (a) Nemene la aliene la kuci haze? (b) Nemene la aqane goeëne Iehova la kuci haze?

¹⁰ Ame la kuci haze, tre, ene la troa hë itre dremoni jëne la itre iamamanyi itre dremoni. Ka tune la troa kuci iöni, me iangazo, maine ithanata pena me itre ka mec. Hna qaja hnene la Tusi Hmitrötr ka hape, ewekë “ka sis” koi Iehova la kuci haze, nge thatreine kö tro sa kuci haze, me hmi koi Iehova. (Deuteronomi 18:10-12; Hna Amaman 21:8) Loi tro la itre Keresiano a thipetrij asë la nöjei aqane kuci haze.—Roma 12:9.

11. Nemene la ewekë ka traqa koi së e ka ajane catre së la itre iamamanyi itre dremoni?

¹¹ Atre hi Satana ka hape, maine ka ajane catre së la itre  iamamanyi itre dremoni, hmaloi hi koi angeice troa akeinyi së ngöne la kuci haze. Kola troa thë la aqane imelekeu së me Iehova, hnene la nöjei pengöne aqane kuci haze.

12. Nemene la aqane thele Satana matre troa amenun la mekuna së?

¹² Ame la aja i Satana tre, troa amenune la mekuna ne la itre atr. Angeic a kuca matre troa luelue la itre atr, utihë la tro angatr a mekun ka hape, ame “la ngazo, te, loi; ngo loi, te, ngazo.” (Isaia 5:20) Diabolo a iaöne la itre atr matre tro angatr a mekun ka hape, ka pë thangane la itre eamo ne la Tusi Hmitrötr, nge kola hnöthi së hnene la itre wathebo me itre trepene meköti Akötresie.

13. Nemene la aqane amejëne Satana la luelu thene la itre atr?

¹³ Ame la troa amejëne la luelu thene la itre atr, tre, celë hi ketre hnö i Satana ka hetre thangane catr. Ka qaane hë ekö la hnö cili. Hnei angeic hna thele la ketre aqane, matre troa luelu hnei Eva ngöne la hlapa e Edena. Hnei angeic hna hnyinge ka hape: “Hape u, ase hë ulatine hnei Akötesie ka hape, The tro kö nyipoti a xeni qa ngöne la nöjei sinöe asëjëihë ne la hlapa?” (Genese 3:1) Ame e thupen, ngöne lo hneijine i Iobu, hnei Satana hna hnyingë Iehova, qëmekene la itre angela ka hape: “Hape u gufa kö la qou i Iobu e Akötesie?” (Iobu 1:9) Nge thupene la hna bapataiso Iesu, hnei Satana hna tupathi nyidrë. Öni angeic: “Maine neköi Akötresieti nyipë, qaja ju kowe la itre etë celë troa nyi falawa.”—Mataio 4:3.

14. Nemene la aqane tro Satana a kuca matre tro la itre atr a mekun ka hape, tha ka ngazo kö la kuci haze?

¹⁴ Ame enehila, Diabolo palahi a thel matre troa luelu la itre atr. Angeic a kuca matre tro la itre atr a mekun ka hape, pëkö engazone la kuci haze, nge tha nyine xouene  kö. Celë hi matre thëthëhmine hnyawa ha itre xan ka hape, ka ngazo catr la kuci haze. (2 Korinito 11:3) Haawe, nemene la aqane tro sa isa thupën? Tro sa wange la lue götran nyine troa hmekën, matre tha tro kö sa kei. Ene la itre nyine iamadrinë me aqane troa nyinyine la itre meci së.

15. Nemene la aqane tro la itre nyine iamadrinë a nyi jë së kowe la itre dremoni?

¹⁵ Aja ne la itre atr troa kuci madrin. Ame enehila, kola mama hnyawa ngöne Ëternet la kuci haze, me itre iamamanyikeu i itre dremoni, tune mina fe ngöne itre film, me televizio me itre video. Ala nyimu la itre atr ka mekun ka hape, itre nyine iamadrinë hi lai, nge ka pëkö engazon. Ngo thatre kö angatr ka hape, ka ngazo la troa nue jëne la itre dremoni ngöne la mele i angatr. Ijije hi troa kei la ketre atr kowe la kuci haze jëne horoscope, maine e ngöne ihnatrapaim me kuci dröne hano, me goeë wene boule de cristal. Diabolo a kuca matre tro sa mekun ka hape, itre nyine madrin ka lolo, nge ka ketre pengön. Ngo angeice pe a juetrën koi së laka, hna mecin. Hnene laka tha ka kuci haze fe kö së, matre, maine jë tro sa mekun ka hape, pëkö engazone la tro sa goeë film ka amamai kuci haze me iamamanyi itre dremoni. Ngo pine nemen matre tha loi kö troa mekun tune lai?—1 Korinito 10:12.

16. Pine nemene matre loi e tro sa thipetrij la itre nyine iamadrinë ka amaman la mene ne la kuci haze?

¹⁶ Thatreine kö Satana me itre dremoni troa atre la itre hne së hna mekun. Ngo ijiji angatre hi troa atre la itre aja së me itre mekuna së, jëne hi la hna goeëne la itre ewekë hne së hna iëne koi së me kowe la hnepe lapa së. Ceitune  hi memine la itre nyine iamadrinë. Maine tro sa iëne la itre film me miuzik, maine itre itus pena ka qeje kuci haze me iangazo, me itre atr hna löthe hnei dremoni, me trene iöni, me vampire, me itre xaa ewekë ju kö ka tune lai, tro ha atre hnei Satana me itre dremoni ka hape, ka ajane së la itre ewekë cili. Ame cili, tha jole hë koi angeic troa iaö së troa kuci haze.—E jë la Galatia 6:7.

17. Nemene la aqane tupathi së hnei Satana jëne la aja së troa pi mel?

¹⁷ Öhne hi Satana laka, ka pi mele së, matre angeice fe a tupathi së ngöne la götrane cili. Ala nyimu enehila la itre atr ka hetre itre sine mec. Ame itre xan ke, tru la  nöjei pengöne drösinöe hna thel, ngo pëkö ka ie. (Mareko 5:25, 26) Nge maine pë hnyawa ha nyin, ame hi la drösinöe ka mama, ke, hna sesë hi kow. Ngo ame së itre Keresiano, nyipiewekë tro sa thupën. Tha tro pi kö sa kapa la ketre drösinöe “ka hetre nyikön.”—Isaia 1:13.

18. Nemene la itre drösinöe nyine troa thipetrij hnene la Keresiano?

¹⁸ Ame ekö e Isaraela, hnene la itre xan hna kuci haze matre troa nyinyine la itre sine mec. Öni Iehova koi angatr: “Nge e tro nyipunie a li ime draië, tro ni a juetë qëmeke e nyipunie; nge e tro nyipunie a nyimu a thith, tha tro kö ni a deng.” (Isaia 1:15) Pane mekune jë: Tha hnei Iehova kö hna drenge la itre thithi angatr! Tha ajane kö së troa kuca la ketre ewekë ka troa angazone la aqane imelekeu së me Iehova. Celë hi ka troa sewe Nyidrë troa xatua së ngöne itre ijine easa wezipo. (Salamo 41:3) Ame la easa thele nyine la itre meci së, loi tro palahi sa hnyingëne thel ka hape, hapeu, ka hetre nyiköne kö la drösinöe celë? (Mataio 6:13) Haawe, maine easa mekuhni, tha tro pi kö sa xom la aqane inyië cili!—Wange ju la Ithuemacanyi 32.

19. Pine nemene matre alanyimu la itre atr ka xoue Diabolo?

¹⁹ Hna mekun hnene la itre xan ka hape, pëkö Diabolo nge ketre pëkö dremoni. Ngo ame koi itre xan, ke, hnene la hnei angatr hna melën matre, ka mele Diabolo memine la itre dremoni. Alanyimu la itre atr ka xouene la itre u ka ngazo matre, hna othi angatr hnene la itre hna majemine kuca ka ngazo. Itre xan a qaja trongën la aqane iakötrë ne la itre dremoni, matre kola xou la itre atr. Eje hi, ajane catr la itre atr troa porotrikëne la itre ewekë cili, me qaja trongën koi itre xan. Celë hi kepin matre, kola xoue Diabolo hnene la itre atr.

20. Nemene la aqane tro sa hane sajuën la itre trengathoi Satana?

 ²⁰ Pane mekune jë : Aja i Satana tro la itre atr a xoue angeic. (2 Thesalonika 2:9, 10) Celë hi atre thoi, nge ka atreine iaöne la itre atr ka aja kuci haze. Angeic a iaö angatr matre troa jelenyipicine la ka thoi. Maine jë, troa qaja hnene la itre atr cili la itre hnei angatr hna öhn me dreng. Pine laka hna qaja lapan, matre kolo fe ha atrune trongëne la itre porotrike cili. Tha ajane kö së troa sajuën la aja i Satana, ene la troa ithanatane lapan la itre ewekë cili, ka axouene la itre atr.—Ioane 8:44; 2 Timoteo 2:16.

21. Nemene la itre ewekë nyine tro sa porotrikën?

²¹ Maine hna melën hnene la ketre Atre Anyipici Iehova la itre ewekë cili, haawe, tha nyipiewekë kö tro angeic a porotrikëne koi itre xan. Tha tro pi kö la itre hlue i Iehova a xouene la itre nyinyithina i Diabolo me itre dremoni. Loi e tro pe sa goeëne catrë Iesu memine la mene hnei Iehova hna hamëne koi nyidrë. (Heberu 12:2) Tha hane kö Iesu qeje itre dremoni kowe la itretre drei nyidrë. Hnei nyidrëti pe hna catre cainöjën la maca ne Baselaia, me itre “ewekë nyine haine i Akötresie.”—Itre Huliwa 2:11; Luka 8:1; Roma 1:11, 12.

22. Nemene hë la nyine tro epuni a kuca?

²² Tha tro kö sa thëthëhmine laka, ame la aja i Satana ke, troa thë la aqane imelekeu së me Iehova. Tro angeic a kuca asë la hnei angeic hna atrein matre troa eatr la aja i angeic. Ngo atre hi së la itre aqane nyinyithina i angeic. Celë hi matre loi tro sa isine troa cile catr kowe la nöjei pengöne aqane kuci haze. Tha tro pi kö sa “nue jë i Diabolo,” ngo loi tro pe sa catr me hmek. (E jë la Efeso 4:27.) Haawe, maine tro sa cile catr koi Diabolo, tha tro pi kö sa kei kowe la itre hnö i angeic. Ketre, tro sa lapa tingeting, ke Iehova a thupë së.—Efeso 6:11.