1, 2. Nemene la nyine tro sa kuca matre tro palahi sa lapa fene la ihnimi Akötresie?

 AJA së asë hi troa catr me egöcatr. Celë hi matre easa thel troa xeni la nyipi xen, me enij, me thupëne hnyawa la mele së. Tha ka hmaloi kö, ngo pine laka, ka hetre eloin, haawe, the cile kö troa kuca itre ej. Ngo hetre ketre götrane kö, laka, nyipiewekë tro fe sa catr me egöcatr.

² Hne së hë hna inin troa atrepengöi Iehova. Ketre ewekë lai ka lolo catr. Ngo ame enehila, nyipiewekë tro sa acatrene la aqane imelekeu së me Nyidrë. Hnei Iudra hna ithuecatr kowe la itre Keresiano “tro pala hi a lapa fene la ihnimi Akötresie.” Öni angeic: “Xup adraiëne jë la lapaune i nyipunie.” (Iudra 20, 21) Nemene la aqane tro sa acatrene la lapaune së?

3-5. (a) Nemene la aja i Satana, göne la aqane tro sa mekun la itre wathebo me itre trepene meköti Iehova? (b) Nemene la mekuna i epun göne la itre wathebo me itre trepene meköti Iehova?

³ Loi troa xecie koi së laka, ame asë hi la itre hnei Iehova hna upi së troa kuca ke, nyine loi koi së. Ame la aja i Satana, tre, tro sa mekun ka hape, ka jole catr palaha troa metrötrën la itre wathebo me itre trepene meköti Akötresie. Aja i angeice tro fe sa mekun ka hape, troa lolo la mele së,  e easë kö la ka axeciën la ka loi me ka ngazo. Celë hi mekun hnei angeic hna eköth ekö e Edena. (Genese 3:1-6) Angeic a kuca enehila, matre tro palahi la itre atr a mejiun kowe la itre trengathoi angeic.

⁴ Hapeu, nyipici Satana kö? Ka catrehnine kö la itre wathebo me itre trepene meköti Iehova? Ohea. Pane mekune jë ka hape, easa nango ngenu ngöne la ketre park ka mingöming. Ngo pane cile ju hi së, ke kola thinge la jë së hnene la ketre hag ka draië. Ame cili, easa hnying ka hape, ‘Pine nemen matre kola thinge la götrane celë?’ Ngo sesëkötre ju hi së la kola ho la liona e tröne lai hag. Easë hi lai a trotrohnin me madrin la kepin matre kola acile lai hag. Kolo lai a hmekë së me thupë së, wanga heji së jë! Ka ceitune hi lai hag memine la itre trepene meköti Iehova, nge ame Diabolo ke liona. Kola hmekë së hnene la Wesi Ula i Akötresie, ka hape: “Waiewekë hnyawa ju, nge hmeke jë! Ke ame Diabolo, lo ithupëjia me nyipunie, angeic a tro kösë liona ka ho, nge ka thele tha.”—1 Peteru 5:8.

⁵ Aja i Iehova troa lolo la mele së. Tha ajane kö Nyidrë troa iaö së hnei Satana. Celë hi kepin matre Nyidrëti a hamëne koi së la itre wathebo me itre trepene meköt nyine thupë së, nge tro sa mele madrin. (Efeso 6:11) Hna cinyihane hnei Iakobo ka hape: “Ame la atre goeëne ajuine la wathebo ka pexej, lo ka nuamacanyi së, nge ka cile huti ngön . . . tro hë angeic a madrin ngöne la nöjei huliwa i angeic.”—Iakobo 1:25.

6. Pine nemene matre ka xecie koi së ka hape, sisitria catr palakö la itre eamo i Iehova?

⁶ Ame la easa xötrethenge la itre eamo i Iehova, kola saze la mele së, nge kola lolo la aqane imelekeu së me Nyidrë. Drei la ketre ceitun, ame la Nyidrëti a upi së troa thithi lapa, nge easa drengethenge, easa kapa la itre manathith. (Mataio 6:5-8; 1 Thesalonika 5:17) Ame la easa  drengethenge la Nyidrëti a upi së troa sine la itre icasikeu, troa atrunyi Nyidrë, me itöithuecatrekeu, ke, easa madrin. Nge ame la easa cainöj trotro me ini Tusi Hmitrötr memine la itre atr, ke, ka tru mina fe la madrine së. (Mataio 28:19, 20; Galatia 6:2; Heberu 10:24, 25) Loi e tro palahi sa lapa mekune la itre manathith hne së hna kapa, qaa ngöne la hne së hna drengethenge Iehova. Celë hi ka xatua së troa acatrene la lapaune së, nge ka xecie hnyawa koi së laka, ka sisitria palakö la itre eamo i Iehova.

7, 8. Nemene la ka xatua së e traqa ju së xouene la itre jol?

⁷ Maine jë tro sa xouene elanyi la itre jol ka troa ajojezine la lapaune së, nge ka catrehnine catr. Ame cili, tro sa mekun lo hna qaja hnei Iehova ka hape: “Ini Iehova Akötesi ’ö, ate ini ’ö troa hete thangan, ate e eö ngöne la gojenyi tro eö a trongën. Watipë hë ma dengeju hi eö la ite wathebong,  mate tune la hneopegejë la tingetinge i ’ö, nge tune la ite hoke ne gejë la thina ka meköti ’ö.”—Isaia 48:17, 18.

⁸ Maine tro sa drengethenge Iehova, tro ha ceitu la tingetinge së, memine la hneopegejë ka tha ae kö. Nge ame la thina së ka meköt, tro ha ceitun memine la itre hoke ne gejë ka kaca pala hi. Haawe, ngacama troa traqa koi së la nöjei pengöne jol, ngo ijije hi tro sa mele nyipici koi Iehova. Tusi Hmitrötr a thingehnaean ka hape: “Nue pi koi Iehova la ehnefe i eö, nge tro nyidrëti a sajuë eö. Tha tro palua kö nyidëti a nue la ka meköti wanga enijën.”—Salamo 55:22, MN.

9, 10. Nemene la aliene la hna hape, troa macaj?

⁹ Ame la easa acatren la aqane imelekeu së me Iehova, easë hi lai a “isine troa macaj.” (Heberu 6:1) Nemen la aliene la hna hape, troa macaj?

¹⁰ Tha hnene kö laka easa qatre trootro, matre troa qaja ka hape, Keresiano ka macaje së. Ame la troa macaj, tre, ene la troa nyisinee Iehova, me thel troa waiewekë tui Nyidrë. (Ioane 4:23) Hna cinyihane hnei Paulo ka hape: “Ame la itre ka mele thenge la ngönetrei, angatr a lapa mekune la itre ewekë ne la ngönetrei, ngo ame la itre ka mele thenge la ua, angatr a lapa mekune la itre ewekë ne la ua.” (Roma 8:5) Ame la Keresiano ka macaj, tre, tha ka thele lapane kö la itre nyine iamadrinë. Tha ka hni kö angeic koi mo. Huliwa i Iehova la hnei angeic hna amë panën ngöne la mele i angeic, nge ka inamacan palahi la aqane axecië mekun. (Ite Edomë 27:11; e jë la Iakobo 1:2, 3.) Thatreine kö troa iaö angeic hnene la ketre ewekë maine ketre atr pena. Ame la atr ka macaj, atre hnyawa hi angeic la itre ewekë ka loi nyine troa kuca.

11, 12. (a) Nemene la hna qaja hnei Paulo göne la hnaewekë, hna “majemine huliwan” hnene la Keresiano? (b) Nemene la aqane tro la Keresiano ka macaj a ceitu memine la ketre atr ka kuci elo?

 ¹¹ Nyipiewekë tro palahi sa isin troa macaj. Hna cinyihane hnei Paulo ka hape: “Ame la nyipi xen, tre thatraqane la itre ka macaj, itre ka majemine huliwane la atreine i angatr troa wangatrehmekune la loi me ngazo.” (Heberu 5:14) Ame la hnaewekë, “majemine huliwan” tre, kola amekunë së lo ketre atr ka kuci elo.

¹² Ame la easa goeëne la atr ka catr ngöne la hna kuci elo, easa mekun la itre hawa me trengecatr hna nue, matre traqa pi kowe la hna ajan. Tha ka kuci elo kö angeic la kola hnaho angeic. Ame la kola hnahone la nekönatr, thatreine kö angeice huliwane la lue ime me lue ca i angeic. Ngo ame la kola tru trootro, nyën a inine xolouthi ewekë, me inine tro. Haawe, hnene la hna majemine huliwan, tro hë nyëne lai a ketre atr ka kuci elo. Ka ceitune hi lai memine la Keresiano. Loi troa inine lapan me melën la nyipici, matre troa ketre Keresiano ka macaj.

13. Nemene la ka xatua së troa mekune tui Iehova?

¹³ Hne së hna wang hnine la itusi celë, la aqane troa mekun me waiewekë tui Iehova. Hne së fe hna trotrohnine la enyipiewekëne la itre wathebo me itre trepene meköti Nyidrë, memine la aqane tro sa hniine itre ej. Ame ngöne la easa axecië mekun, loi tro sa pane thel ka hape: ‘Nemene la itre wathebo maine trepene meköti ne la Tusi Hmitrötr, ka xatua së ngöne la götrane cili? Nemene la aqane tro ni a trongën itre ej? Nemene la ewekë hnei Iehova hna ajan tro ni a kuca?’—E jë la Ite Edomë 3:5, 6; Iakobo 1:5.

14. Nemene la nyine tro sa kuca matre troa acatrene la lapaune së?

¹⁴ Nyipiewekë tro palahi sa acatrene la lapaune së koi Iehova. Tro sa egöcatr e hne së hna xeni la nyipi xen. Ketre tun, ame la easa thel troa atrepengöi Iehova, tre, kola xatua së troa acatrene la lapaune së. Qane lo easa ini Tusi Hmitrötr,  hne së hna atre la itre nyipici göi Iehova memine la itre aqane ujë i Nyidrë. Ngo nyipiewekë palakö tro sa trotrohnine la itre ini ka jui. Celë hi mekuna i Paulo ngöne la angeic a cinyihane ka hape: “Ame la nyipi xen, tre thatraqane la itre ka macaj.” Ame la easa trongëne la hne së hna inin, tre, easa inamacane trotro. Önine la Tusi Hmitrötr: “Kasisitia la inamacan.”—Ite Edomë 4:5-7; 1 Peteru 2:2.

15. Pine nemene matre ka nyipiewekë catr la tro sa hnimi Iehova memine la itre trejin me easë?

¹⁵ Maine jë ka catr me egöcatr la ketre atr, ngo loi tro palahi angeic a thupën hnyawa la mele i angeic. Celë hi matre atre hnyawa hi la Keresiano ka macaj, laka, loi tro palahi angeic a catr matre lolo la aqane imelekeu i angeic me Iehova. Kola amekunë së hnei Paulo ka hape: “The mano kö nyipunie isa tupathe ka hape, nyipunieti kö ngöne la lapaun. Nge catre jë isa waipengöi nyipunie.” (2 Korinito 13:5) Ngo tha ene hmekuje kö la troa catre lapaun. Nyipiewekë tro fe a kökötr la ihnimi së koi Iehova me kowe la itre trejin. Öni Paulo: “Maine hna hamë ni . . . la atrehmekune la nöjei ewekë, nge hetrenyi ni la lapaune ka atreine enienijëne la itre wetr, ngo e patre kö thenge la ihnim, ka gufa lai.”—1 Korinito 13:1-3.

16. Nemene la aja i Satana?

¹⁶ Aja i Satana, tro sa mekun ka hape, tha ijiji së fe kö troa hane amadrinë Iehova. Ame la ketre aja i angeic tre, tro sa kucakuca me mekun ka hape, ka pë nyin la itre jol hne së hna melën. Xele angeic tro sa hane madrin, me mejiun kowe la itre trejin me easë. (Efeso 2:2) Atre hi Satana laka, e troa ngazo la itre mekuna së, ke tro hë lai a ajojezine la aqane imelekeu së me Akötresie. Eloine pe, hetre ewekë hnei Iehova hna hamë së, ka troa xatua së troa lepetrij la itre mekun ka ngazo. Hnei Nyidrëti hna hamë së la mejiun.

17. Nemene la enyipiewekëne la mejiun?

 ¹⁷ Ame ngöne la tusi 1 Thesalonika 5:8, Tusi Hmitrötr a aceitunën la mejiun memine la itrapetre ne la sooc, ngöne la hna isi. Hna hëne ka hape, “mejiun kowe la iamele.” Ame la troa mejiun kowe la itre hnei Iehova hna thingehnaean, tre kola thupë së, matre tha tro kö a ajojezine la he së hnene la itre mekun ka ngazo.

18, 19. Nemene la aqane aegöcatrenyi Iesu hnene la mejiun ka eje thei nyidrë?

¹⁸ Hna aegöcatrenyi Iesu hnene la mejiun ka ej thei nyidrë. Hna traqa itrai la itre jol koi Iesu, ngöne lo jidr tixenuë i nyidrë e celë fen. Hna hnihni nyidrë hnene la ketre sipu sinee i nyidrë. Hnene la ketre hna qaja ka hape, thatre Iesu fe kö angeic. Hna kötr hnene la itre xan me nue nyidrëti pe. Hnene la itre atren la nöje i nyidrë hna cil koi nyidrë, me hape, loi troa axösisi nyidrë uti hë mec. Ngo nemene la ka xatua Iesu troa xomihnine la itre akötr cili?  “Ke pine la madrin hna amë qëmeke i nyidrë, hnei nyidrëti hna xomihnine la sinöe ne iaxösisi, me tha nyipiewekëne la hmahma, ame hnei nyidrëti hna lapa ngöne la götrane maca i Akötresie.”—Heberu 12:2.

¹⁹ Atre hi Iesu laka, maine tro nyidrëti a mele nyipici, tro hë nyidrëti a atrune la Keme i nyidrë, me anyipicine ka hape, ka thoi Satana. Hna amadrinë Iesu hnene la mejiune cili. Nge atre hi nyidrë laka, easenyi hë tro nyidrëti a iöhny memine la Keme i nyidrë e koho hnengödrai. Mejiune lai ka xatua nyidrë troa xomihni. Tui Iesu, loi troa lapane la mekuna së hnene la mejiune cili. Celë hi ka troa xatua së troa xomihnin la nöjei pengöne jol ka troa traqa koi së.

20. Nemene la ka troa xatua së matre tro palahi a lolo la aqane waiewekë së?

²⁰ Tha sihngödri kö koi Iehova la lapaun me aqane xomihni nyipunie. (Isaia 30:18; e jë la Malaki 3:10.) Öni Nyidrë ‘tro ni a hamë eö la ite hna sipone hnene la hni ’ö.’  (Salamo 37:4) Loi tro palahi sa lapa mekun la mejiune ka eje the së. Satana a kuca matre tro sa nanazij, me mekun ka hape, tha tro jë pi kö a eatr la itre hnei Iehova hna thingehnaean. Ngo ijije hi tro sa lepetrij la itre mekun ka ngazo. Ketre, maine easa öhne laka, kola ha nyiqaane hajihaji la mejiune së, loi tro sa sipo ixatua thei Iehova. Mekune kö së lo hna qaja ngöne Filipi 4:6, 7: “The hnehengazo kö, ngo ngöne la nöjei ewekë asë, jëne la itre thith, me xëwe, me thithi ne ole, qaja jë la itre sipo i nyipunie koi Akötresie. Nge jëne Iesu Keriso, tro ha thupëne la itre hni me mekuna i nyipunie hnene la tingetinge qaathei Akötresie, tingetinge hna thatreine trotrohnine hnei atr.”

21, 22. (a) Nemene la aja i Iehova kowe la ihnadro (b) Nemene la mekun hnei epuni hna troa axeciën?

²¹ Loi tro palahi sa lapa mekun o drai la itre ewekë ka lolo elany, hne së hna treqen. Easenyi hë matre, Iehova hmekuje pe hi la hna troa thili kow hnene la nöjei atr asë. (Hna Amaman 7:9, 14) Pane mekune jë la mel ngöne la fen ka hnyipixe. Sisitria catre kö hune lo aqane mekune së! Paatre hë Satana me itre dremoni memine la nöjei pengöne iangazo. Tha tro hmaca kö sa wezipo me mec. Ame la easa hlë e hmakany tre, ka egöcatre së me madrine ke, lolo la mele së. Kola ce huliwa la nöjei atr matre troa aparadraison hmaca la ihnadro. Lolo hë la xen, nge hetre hnë tro la itre atr a isa kuci hnalapan me lapa xetietë. Tha ka isi hmaca kö la itre atr me iakötrë. Tro ha mama la thina ka loi me nyipi ihnim. Eje hi laka ame la nöjei atr asë e celë fen tre, “tro ha nuamacanyi angatr tune la itre nekö i Akötresie.”—Roma 8:21.

²² Iehova a ajan tro epuni a sipu sinee i Nyidrë. Haawe, kuca asë jë matre tro palahi epuni a drengethenge me easenyi koi Nyidrë ngöne la nöjei drai. Eje hi, loi e tro asë hi së, isa ala cas, a lapa fene la ihnimi Akötresie, uti hë epine palua!—Iudra 21.