1, 2. Nemene la aqane goeë së hnei Iehova, la easa thel troa huliwa nyipici?

 NEKÖNATR trahmanyi a bëek qa hna ini nge, öhne ju hi nyën la trengene mani ka tiqa hnei mani. Nemene la hnei nyën hna kuca? Maine ju, tro hi nyën a xom. Ngo, hnei nyën hna hamën kowe la atrekë ewekën. Ame la kola atre hnei thin la hnei nyën hna kuca, tha aqane madrine kö eahlo.

² Ka madrin la itre keme me thin ngöne la kola huliwa nyipici la itre nekönatr. “Akötesieti ka nyipici,” Keme së e hnengödrai a madrin la easa huliwa nyipici. (Salamo 31:5) Ketre aja së troa amadrinë Nyidrë me “meköt ngöne la nöjei götran asë.” (Heberu 13:18) Tro sa wang la foa lao götran, laka, tha ka hmaloi kö tro palahi a thina ka meköt. Nge thupene lai, easa troa ce wang la itre eloine la troa hetrenyi la thina ka meköt.

3-5. (a) Nemene la aqane tro sa ketre sipu amenu së kö? (b) Nge nemene la ka xatua së matre tro palahi sa hetrenyi la thina ka meköt?

³ E tro sa nyipici koi itre xan, loi troa pane xecie koi së laka, ka meköt la aqane ujë së. Tha ka hmaloi kö.  Ame lo hneijine ne lo itre pane Keresiano, hnene la itre trejine ne Laodikea hna mekun ka hape, ka madrine Iehova kowe la aqane ujë i angatr. Ngo tha eje kö. (Hna Amaman 3:17) Ketre tu së fe, ijije hi troa tria la aqane goeëne së la sipu pengö së.

⁴ Hna qejepengöne hnei Iakobo ka hape: “Maine ketre a mekune ka hape, hlue i Akötresie angeic, ngo tha xomehnöthe pe la thineme i angeic, angeic hmaca kö a amenune la hni i angeic, nge angeice a hmi menu.” (Iakobo 1:26) Maine jë tro sa mekun ka hape, hnene laka ka loi la itre huliwa së, matre ijiji Akötresieti hi troa kepe së, ngacama easa nango qeje ka sis, maine ihnyimasai, maine thoi pena. Haawe, easë hi lai a amenu së kö. Nemene la ka troa xatua së matre tha tro kö a menu la aqane waiewekë së?

⁵ Ame la easa goeë së ngöne ithulu, easë hi lai a goeën la iqëmeke së. Ngo ame la easa e la Tusi Hmitrötr, easa öhne hnyawa la sipu pengö së. Tusi Hmitrötr a xatua së troa atrehmekune la itre götran the së, ka loi me ka ngazo. Ej a amamane koi së la itre nyine troa saze ngöne la aqane mekun, me aqane huliwa me aqane ithanata. (E jë la Iakobo 1:23-25.) Ngo maine easa mekun ka hape, pë fe kö engazo së, haawe, thatreine jë kö së lai troa hane saze. Celë hi matre, nyipiewekë tro sa nue la Tusi Hmitrötr troa waipengö së hnyawa. (Ite Teije i Ieremia 3:40; Hagai 1:5) Nyipiewekë fe tro sa thith. Tro sa sipo Iehova troa thelethele la hni së, me xatua së matre atre la itre hnepe tria së, me wenë amekötin itre ej. (Salamo 139:23, 24) Tro pala hi sa mekun ka hape: ‘Ke sisi Iehova ene la atre thina ka qali, ngo nyidrëti a isilixelë [ihnim] me itre ka meköt.’—Ite Edomë 3:32, MN.

6. Pine nemene matre nyipiewekë troa inyipicikeu la lue trefën?

⁶ Ka nyipiewekë catr la troa thina ka meköt kowe la hnepe lapa. Ame la kola inyipicikeu hnene la lue trefën, nge pëkö hna juetrën, kola tingeting la mele i nyidro nge nyidroti a imejiunekeu. Nyimutre la itre aqane thoi e hnine la faipoipo. Maine jë tro la ketre e nyidroti a iatre, maine goeë iatr ka sis, maine pena, troa piine la ketre atr ngo tha föe hmunë pe. Hna qaja hnei Dravita ka hape: “Tha hnenge kö hna ce lapa me itete thoi, nge tha tro kö ni a ce tro me angete iaö.” (Salamo 26:4) Maine tro sa thoi kowe la föe së, ngacama ngöne hi  la itre mekun, ngo, troa hetre ethan kowe la mele ne trefën.

7, 8. Nemene la aqane tro sa inine la itre nekönatr, jëne la Tusi Hmitrötr, la enyipiewekën la troa mele nyipici?

⁷ Loi tro fe la itre nekönatr a trotrohnin la enyipiewekëne la troa huliwa nyipici. Ijije hi tro la itre keme me thin a ini nyudren troa mele nyipici, jëne la Tusi Hmitrötr. Tusi Hmitrötr a amaman la itre tulu ka ngazo. Akana, hna atrekënö. Geazi la ketre, hnei angeic hna thoi matre troa kapa la manie ka tru. Nge Iudra, ka atrekënö la mani me hnihni Iesu koi 30 lao mani sileva.—Iosua 6:17-19; 7:11-25; 2 Ite Joxu 5:14-16, 20-27; Mataio 26:14, 15; Ioane 12:6.

⁸ Ngo Tusi Hmitrötre fe a qaja la itre atr ka mele nyipici, tui Iakobo. Hnei angeic hna upe la itre nekö i angeic troa hamëne hmaca la mani hna öhn, kowe la itre atrekë manien. Ketre tui Iefetha. Hnei angeic memine la nekö i angeic jajiny hna eatrën la hna nyi xepu (sisinyi) koi Iehova. Nge ame Iesu, hnei nyidrëti palahi hna mele nyipici, hnine la itre jol ka tru. (Genese 43:12; Angete Amekötin 11:30-40; Ioane 18:3-11) Celë hi itre ceitun ka troa xatuan la itre nekönatr troa trotrohnin la enyipiewekën la troa mele nyipici.

9. Nemene la itre eloin kowe la itre nekönatr, la troa mele nyipici hnene la itre keme me thin?

⁹ Ka nyipiewekë catr la trepene meköti celë kowe la itre keme me thin. Kola hape: “Pine laka eö a ini itre xan, hnauëne laka tha pane ini eö kö? Eö a qaja ka hape, ‘The atrekënö kö,’ nga hnauëne kö la eö a atrekënö?” (Roma 2:21) Maine kola qaja la ketre ewekë hnene la itre keme me thin, ngo tha trongëne pe, ke, öhne hi itre nekönatr lai. Nge maine easa qaja koi angatr ka hape,  troa mele nyipici nge tha ka mele nyipici kö së, tro hë lai a amenu nyudren. Ketre, ame la nyudreni a goeën laka, kola thoi, maine nango thoi la itre keme me thin, haawe, ka xecie lai laka, tro fe nyudreni a hane tun. (E jë la Luka 16:10.) Ngo maine nyudreni a öhn laka, ka nyipici la keme me thin, tro lai a xatua nyudren troa itre keme me thin ka nyipici elanyi nge, hna mejiune kow hnene la itre nekön.—Ite Edomë 22:6; Efeso 6:4.

10. Nemene la aqane tro sa nyipici ngöne la easa ithanata memine la itre trejin Keresiano?

¹⁰ Nyipiewekë mina fe tro sa nyipici kowe la itre trejin Keresiano. Saqe hi tro sa iqej me ixöjetrij, jëne la itre hnepe porotrike së. Maine tro sa kötre fë ithanata nge tha ka nyipici kö, easë hë lai a ahlemune la trengathoi. Loi pe tro sa ‘xomehnöth la ukeineqë së.’ (Ite Edomë 10:19) Ame la troa nyipici, tre, tha ene kö la troa qaja la nöjei hne së hna mekun me atre, me hna dreng. Ngacama ka nyipici la ewekë hne së hna atre, ngo maine tha nyine qaja kö, ke loi tro pe sa lapa thaup. (1 Thesalonika 4:11) Kola catre fë mekun hnene la itre xaa atr me qaja ka hape, “Eni hi lai a qaja la trenge nyipici.” Ngo pine laka itre hlue i Iehova së matre, madrine së troa ithanatane la itre ewekë ka loi, cememine la hni ka menyik.—E jë la Kolose 4:6.

11, 12. (a) Qejepengöne jë la ewekë ka traqa kowe la atr ka kuca la ngazo, nge tha hna qaja hnyawa kö la nyipici? (b) Maine hna kuca la ketre ngazo ka tru hnene la ketre sinee së, nemene la itre mekun nyine tro sa thipetrij, nge pine nemen? Nemene la aqane tro sa nyipici kowe la organizasio i Iehova?

¹¹ Hnei Iehova hna nue kowe la itre qatre thup la hnëqa ne troa thupëne la ekalesia. Troa hmaloi koi  angatr troa xatua së, e tro sa nyipici koi angatr. Ame la easa tro koi droketre, ke, hapeu, tro kö sa juetrën e nyidrë la itre xaa hnepe ka akötre së? Nga atreine kö nyidrëti e cili troa xatua së? Ceitune hi lai memine la easa kuca la ketre ewekë ka ngazo. Tha tro pi kö sa juetrën maine thoi pena. Tro pe sa wange la itre qatre thup me qaja hnyawa koi angatr la nyipici. (Salamo 12:2; Itre Huliwa 5:1-11) Tro pena sa wang la ketre ceitun. Easa atre laka, hna kuca la ketre ngazo ka tru hnene la ketre sinee së. (Levitiko 5:1) Hapeu, tro kö sa mekun ka hape: “Pine laka sinee së, tha tro pi kö sa qajaqaja”? Maine pena, tro sa mekun ka hape, tro la itre qatre thup a hamën la ixatua ka ijij matre acatrene hmaca la aqane imelekeu i angeic me Iehova?—Heberu 13:17; Iakobo 5:14, 15.

¹² Tro fe sa nyipici kowe la organizasio i Iehova, ngöne la aqane tro sa sija la rapor ne pune treu. Ceitune hi lai memine la aqane tro sa sija lo pepa ne sipon troa pionie, me itre xa pepa ju kö.—E jë la Ite Edomë 6:16-19.

13. Nemene la aqane tro sa nyipici ngöne la easa ce huliwa memine la ketre trejin?

¹³ Troa thupën hnene la itre Keresiano laka, tha tro kö a ce xome la huliwa ne thele mo memine la hmi Akötresie. Tha tro kö sa kuca la itre huliwa ne thele mo e hnine la Uma Ne Baselaia, maine ngöne pena la hna cainöj trotro. Ketre tha tro kö sa musinëne la itre trejin troa löhnine la itre huliwa ne thele mo. Maine kola huliwa koi së hnene la ketre trejin, troa nyithupei angeic ngöne la ijin, me thenge la hna ce axeciën. Nyipiewekë fe troa kuca thenge la hna amekötin hnei Cafat göi drai ne mano me assurance maladie. (1 Timoteo 5:18; Iakobo 5:1-4) Nge maine ketre trejin la maseta së, tha tro kö sa mekun ka hape, tro lai a atrune la thupe së. (Efeso 6: 5-8) Tro sa huliwane hnyawane la itre hawa thenge la hna amekötin, me kuca hnyawa la huliwa hna upi së troa kuca.—2 Thesalonika 3:10.

14. Nemene la nyine tro la Keresiano a kuca, qëmeken troa eköth la huliwa ne thele mani memine la ketre trejin?

¹⁴ Nge maine easa troa ce huliwa ne thele mo memine la ketre trejin, ke, maine jë tro sa ihnöhnö, maine sipo manie pena. Ame cili, ka nyipiewekë la hna qaja hnei Tusi Hmitrötr ka hape: Troa cinyihan asë! Ame la kola itön la ketre hlapa hnei Ieremia perofeta, hnei angeic hna cinanyin la lue pepa nyine anyipicin la ewekë hna itön. Hna sija la ketre hnene la itre ka anyipicin, nge hnei angeic hna amë acone lue ej göne troa ce ithanatan e thupen. (Ieremia 32:9-12; wange ju fe la Genese 23:16-20.) Kola mekun hnene la itre xan ka hape, ame la kola cinanyin ke, kolo lai a hape, pëkö mejiune i ketre koi ketre. Ngo ame pe, aqane tro hi lai a hmekë së, matre tha tro kö a traqa la itre iwesitrë me hleuhleu. Loi troa ej ngöne la he së ka hape, nöjei huliwa ju hë hne së hna kuca, ngo ka sisitria pala kö la tingeting e hnine la ekalesia, hune la nöjei huliwa ne thele mo.—1 Korinito 6:1-8; wange ju la Ithuemacanyi 30.

15. Nemene la aqane goeëne Iehova la itre ka salem qene atrekënö?

¹⁵ Qa së troa nyipici kowe la nöjei atr, uti fe hë lo itre ka tha Temoë i Iehova. Ka nyipiewekë koi Iehova la tro sa nyipici. “Sisi koi Iehova la tulu ne athipe ka iaö; ngo aja i nyidë la tulu ne hace ka pexej.” (Ite Edomë 11:1; 20:10, 23) Ame ekö, kola tuluth ngöne itulu la nyine salemën maine nyine itön. Ngo hetre itre ka salem qene atrekënö. Co hi la hna hamën kowe la itre ka  nyithupene hnyawa. Maine pena, kola atrune menun la thupen kowe la itre ka itö. Tru palahi enehila hnei atr ka huliwa qene atrekënö. Tune la aqane sisine Iehova ekö la itre ka huliwa qene atrekënö, ka sisine palahi Nyidrëti la itre ka huliwa tun enehila.

16, 17. Nemene la itre aqane huliwa atrekënö enehila hne së hna troa thipetrij?

¹⁶ Hetre itre ijine laka, kola upi së troa thoi, tune la easa cinyanyi tus ne thele huliwa. Ka tune la easa nyialiene la itre pepa thatraqai mus. Maine pena, lo kola itupath ngöne la hna ini. Ala nyimu la ka mekun ka hape, pëkö engazon la troa thoi, maine atrun pena la itre hna qaja. Tha sesëkötre kö së. Hna qaja amë hë hnei Tusi Hmitrötr ka hape, ame ngöne la itre drai tixenuë, tro la itre atr a “hnimi angatre kö, me hni koi mani, . . . me xelene la loi.”—2 Timoteo 3:1-5.

¹⁷ Ame e itre xaa ijin, easë hi a öhn laka, ka lolo la mele ne la itre ka huliwa atrekënö. (Salamo 73:1-8) Pine laka ka huliwa nyipici la Keresiano, matre maine jë troa pë huliwa me pë mani, maine pena troa qanangazo angeic, ngo sisitria kö la madrin hnene la hna nyipici, hune la itre akötr. Pine nemen?

18. Pine nemene matre ka nyipiewekë catr la troa qaja aloinyi së?

¹⁸ Xalaithe pe hi enehila, la itre atr ka mele nyipici nge hna mejiune kow. Ngo ijiji së asë hi troa hetrenyi la itre thina cili. (Mika 7:2) Maine jë troa hnyimasai epun me jele hmo epun, pine laka ka mele nyipici epun. Ngo, hetre itre xan ka madrin, nge ka mejiun koi epun. Kola mama e cailo fen la aqane mele nyipici ne la Itretre Anyipici Iehova. Kola aja angatr hnene la itre maseta  pine laka, itre ka nyipici. Ame itre xaa ijin, hna upe la itre sine huliwa i angatr pine la hna huliwa atrekënö.

19. Hapeu, ka sisitria kö koi Iehova la aqane mele nyipici së?

¹⁹ Maine tro sa mele nyipici ngöne la nöjei götrane la mele së, troa tingetinge la hni së, nge lolo la mekuthetheu së. Easa ajan troa qaja tui Paulo ka hape: “Xecie hnyawa koi huni ka hape, wië la itre mekuthetheu hun.” (Heberu 13:18) Ngo ame la ka sisitria, tre, Iehova, Keme së ka hnimi së a madrin, nge öhne hi Nyidrëti la aqane catre së troa mele nyipici.—E jë la Salamo 15:1, 2; Ite Edomë 22:1.