Koi Nyipunie itre ka hnimi Iehova memine la Trengewekë i Nyidrë, ene la Tusi Hmitrötr:

Öni Iesu: “Tro hë nyipunieti a atre la nyipici, nge tro la nyipici a nuamele nyipunie.” (Ioane 8:32) Pane mekune jë lo epuni a xötrei atre la nyipici e hnine la Tusi Hmitrötr! Tru la madrine së laka, ijije fe hi troa atre la nyipici ngöne la fene celë ka ngazo.—2 Timoteo 3:1.

Iehova a ajan tro sa atre la nyipici. Easa hnime la itre atr matre easa ajan troa hane ini angatr. Ngo ame la ka sisitria, tre, troa nyihlue i Akötresie. Ka tru koi së la itre trepene meköti Iehova, matre easa isin troa xötrethenge hnyawa la tulu i Iesu ngöne la mele së. Hnei Iesu hna qejepengöne la aqane tro sa amamane la ihnimi së koi Akötresie. Öni nyidrë: “Maine tro nyipunieti a drengethenge la hnenge hna amekötin, tro hë nyipunie a lapa fene la ihniming, tune lo aqane drengethenge ni la itre hna amekötin hnei Kaka, me lapa fene la ihnimi nyidrë.”—Ioane 15:10.

Tru la ihnimi Iesu kowe la Keme i nyidrë. Iesu a kuca asë la hna qaja hnene la Kem. Maine tro sa xötrethenge la tulu i Iesu ngöne la mele së, haawe, tro Iehova a hnimi së nge tro fe sa madrin. Öni Iesu, “Maine atre hë nyipunieti lai, tro hë nyipunie a madrin e tro nyipunie a kuca.”—Ioane 13:17.

Eahuni a mejiun laka, tro la itusi celë a xatua nyipunie troa mele thenge la nyipici ne la Tusi Hmitrötr, me troa hane nyisinee i Akötresie. Eahuni a thith matre tro palahi a kökötr la ihnimi nyipunie koi Akötresie. Nge ketre, matre tro ‘nyipunieti a lapa fene ngöne la ihnimi Akötresie . . . me mejiun kowe la mele ka pë pun.’—Iudra 21.