MEKENE 4
“Itre Ka Thatre Tus Me Itre Atr Menu Hi”
Itre aposetolo a catre huliwa, nge Iehova a amanathithi angatr
1, 2. Nemene la iamamanyikeu hnei Peteru me Ioane hna kuca qëmekene la qëhnelö ne la uma ne hmi?
HNAIPAJÖ hë, nge kola icinyi la jö hune la ka alanyim. Angetre Iudra me itretre drei Keriso a isine troa canga lö ngöne la uma ne hmi. Nge easenyi hë “lo hawa ne thith.” a (Itre hu. 2:46; 3:1) Peteru me Ioane fe a isine troa lö ngöne la qëhnelö hna hape, Hnë Lö Ka Mingöming. Ngacama kola nyi mejen me ipepetrenyi la itre atr, ngo drenge hi la nine ithanata ne la ketre trahmany ka genyi ca a kola sipo ahnahna ne utipin.—Itre hu. 3:2; 4:22.
2 Ame lai atr a öhnyi Peteru me Ioane angeice hmaca hi lai a sipo iel koi nyidro. Cile ju hi nyidro, nge ketre sesëkötre ju hi lai trahmany. Öni Peteru jë hi koi angeic: “Pëkö sileva me gool theng, ngo ame la hnenge hna hetreny, tro ni a hamë eö. Ngöne la ëje i Iesu Keriso atre Nazareta, tro jë!” Pane mekune jë la kola sesëkötr la ka alanyimu la Peteru a ea la ka genyi ca me acilë angeic, nge angeice petre hi lai a hane cile qaane ekö! (Itre hu. 3:6, 7) Pane mekune jë së la angeic a goeëne la lue ca i angeic a lolo hë, me nyiqane nango tro. Trotrohnine hi së la angeic a sesësesë me sue, me atrunyi Akötresie!
3. Nemene la ahnahna ka sisitria nyine tro lai ka genyi ca memine la ka alanyim a kapa?
3 Kola traqa nyimenyim la ka alanyimu koi Peteru me Ioane fene la itre ikapa i Solomona. E cili hi lo hnei Iesu hna inine la itre atr, matre Peteru a qejepengöne jë koi angatr la nyipi aliene la ewekë ka traqa. (Ioane 10:23) Öni Peteru koi angatr memine lo lai genyi ca ka hape, hetre ketre ahnahna ka sisitria kö hune la gool me sileva, me hune la iamele celë. Angeice hi lai a upi angatr troa ietra, matre köletrije la itre ngazo i angatr, me hane xötrethenge Iesu Keriso “Atre Itrosai,” hna acil hnei Iehova.—Itre hu. 3:15.
4. (a) Nemene icilekeu hna amejën hnene la iamamanyikeu? (b) Nemene la itre hnying hne së hna troa sa?
4 Drei la drai ka ketrepengön! Hna aloin la ka genyi ca, nge tro hë angeic. Nge alanyimu la itre atr hnei Peteru hna xatuan troa trotrohnine la aja i Akötresie, me saze. (Kol. 1:9, 10) Celë hi matre kola nyiqane icilekeu hnene la itre mus, me sawa la itretre drei Iesu troa cainöjëne la maca ka loi ne la Baselaia. (Itre hu. 1:8) Nemene la ini hne së hna xom qa ngöne la aqane cainöj me aqane ujë i Peteru me Ioane, “lue atre ka thatre tusi nyidro, nge lue atre menu hi”? b (Itre hu. 4:13) Nge nemene la aqane tro sa nyitipune la aqane cile i nyidro me itre xaa atre dreng ngöne la icilekeu?
Tha Hnene Kö “La Sipu Mene i Nyio” (Itre Huliwa 3:11-26)
5. Nemene la hne së hna inin qa ngöne la aqane ithanata i Peteru kowe la ka alanyim?
5 Kola cile hnei Peteru me Ioane qëmekene la ka alanyim, ngacama atre hi nyidro laka, ame la itre xan, ke kolo itre ka suene la meci Iesu. (Mar. 15:8-15; Itre hu. 3:13-15) Drei la aqane catre i Peteru la angeic a qaja laka, hna amelene lo ka genyi ca jëne la ëje i Iesu! Matre tha ase kö angeic juetrën la nyipici. Hnei angeice hna qaja amamane laka, ame la meci Iesu ke, zöi angatre fe. Ngo tha hnei angeice kö hna xele ma wai angatr, ke hnei angatr “hna kuca thatre la itre ewekë cili.” (Itre hu. 3:17) Hnei Peteru hna hë angatr ka hape, “trejin,” nge hnei angeic hna qaja atrune la itre eloine la maca ne la Baselaia. E tro angatr a ietra me lapaun koi Keriso, ke tro ha traqa koi angatr “la itre ijine iakeukawanyi qaathei Iehova.” (Itre hu. 3:19) Loi e tro fe sa catr me qaja mekötine la itre iameköti Akötresie ka troa traqa elany. Ketre, tha tro pi kö sa pi tru, me catre fë mekun maine iqejegele pena. Loi e tro pe sa goeëne la itre atr hne së hna cainöje kow, ceitu me itre trejine me easë elany. Nge tui Peteru, wangatrune jë pe së la itre eloine la maca ne la Baselaia.
6. Tune kaa la aqane amamane Peteru me Ioane laka, ka ipië nyidro?
6 Ka ipië la itre aposetolo, ke tha hnei angatre kö hna sipu selëne la itre iamamanyikeu hnei angatr hna kuca. Öni Peteru: “Hnauëne la nyipunieti a goeë nyio kösë kola tro la atre ce hnene hi la sipu mene i nyio, maine qa ngöne la aqane mele nyipici nyio koi Akötresie?” (Itre hu. 3:12) Atre hi angeic me itre xaa aposetolo laka, ame la itre huliwa ka loi hnei angatr hna kuca, ke tha qaathei angatre kö, ngo qaathene la mene i Akötresie. Celë hi matre angatre kö a qaja atrunyi Iehova me Iesu, göne la itre huliwa cili nyine hain.
7, 8. (a) Nemene la ahnahna nyine tro la itre atr a kapa? (b) Tune kaa la aqane “ahnyipixene hmaca la nöjei ewekë asë” enehila?
7 Nyipiewekë tro fe sa ipië la easa cainöjëne la maca ka loi ne la Baselaia. Nyipici ame enehila, tha uati hmitrötr hmaca kö a aijijë së troa kuca la itre iamamanyikeu. Ngo ijiji së hi troa xatuane la itre atr troa lapaun koi Akötresie me Keriso, me hane kapa la ahnahna hna qaja hnei Peteru, ene la troa nue la itre ngazo i angatr me kapa la iakeukawanyi qaathei Iehova. Haawe, e nöjei macatre, alanyimu catr la itre atr ka kapa la ahnahna cili, me xomi bapataiso matre hane atre drei Keriso.
8 Tune la hna qaja hnei Peteru, easë hi la a melëne la ijine hna hape, “troa ahnyipixene hmaca la nöjei ewekë asë.” Kola eatrëne lo hna qaja hnene la “itre perofeta ka hmitrötr i nyidrë” laka, hna acile la Baselaia e hnengödrai lo macatre 1914. (Itre hu. 3:21; Sal. 110:1-3; Dan. 4:16, 17) E thupen, hnei Keriso hna xatuane la itretre drei nyidrë troa acile hmaca la nyipi hmi e celë fen. Celë hi ka aijijëne la itre milio lao atr troa hane sine la paradraiso ka ketrepengön, me nyiatrene la Baselaia i Akötresie. Hnei angatr hna unatrij la thiina hnapan “me heetrëne la thiina ka hnyipixe, hna eköth thenge la aja i Akötresie.” (Efe. 4:22-24) Tune la aqane aloine la ka genyi ca, tha hna eatrëne kö la huliwa ne cainöj hnene la trengecatre i atr, ngo hnene la mene i Akötresie. Nge tui Peteru, huliwane hnyawane jë së la Tusi Hmitrötr troa inine la itre atr. Haawe, ame la easa xatuane la ketre atr troa hane xötrethenge Iesu, ke tha hnei easë kö, ngo qaathene la mene i Akötresie.
“Thatreine Kö Nyio Cipane La Itre Ewekë” (Itre Huliwa 4:1-22)
9-11. (a) Tune kaa la aqane ujë ne la angetre Iudra la kola cainöj hnei Peteru me Ioane? (b) Nemene la hna axeciën hnene la itre aposetolo?
9 Hnene la cainöje i Peteru memine la madrine ka ej thene lo ka genyi ca hna enienijëne la iatr, matre hna traqa hnene la atre thupën la uma ne hmi me itre he ne hmi. Kola qaja la angetre Sadukaio, itre atrene la ketre hmi ka trenamo me ka mama ngöne la kuci politik, ka ce huliwa fe angatr memine la angetre Roma. Nge ketre, tha kapa kö angatr la wathebo ne la itre Faresaio, me tha mejiune kowe la melehmaca. c Drei jë kö la elëhni angatr la kola öhnyi Peteru me Ioane ngöne la uma ne hmi a catre cainöjëne la melehmaca i Iesu!
10 Elëhni catr angatr, matre hna akalabusi Peteru me Ioane. Nge ame ju kö lai hmakany, hna trosai nyidro kowe la Hnakootr Ka Tru i angetre Iudra. Ame kowe la itre Sadukaio, ke “lue atre ka thatre tusi nyidro, nge lue atre menu hi,” matre tha ijiji nyidroti kö troa hane hamë ini ngöne la uma ne hmi. Ketre, tha hnei nyidroti kö hna hane ini ngöne la itre uma ne ini ka tru. Ngo kola sesëkötr la hnakootr hnene la aqane catr, me aqane ithanata i nyidro. Drei la ka atreinë nyidro? Kola qaja ka hape, “lue atre drei Iesu nyidro.” (Itre hu. 4:13) Hnene la Maseta hna ini nyidro tune la atre mus, ngo tha tune kö la itretre cinyihan.—Mat. 7:28, 29.
11 Hna amekötin hnene la hnakootr laka, tha tro hmaca kö la itre aposetolo a cainöj. Ame ekö, pëkö nyine qaja e koho hun la itre hna amekötine hnene la hnakootr. Ame ngöne lo itre wiik qëmeken, ke hnene pala hi la hnakootre cili hna amekötine goi Iesu laka, “Loi e tro angeic a mec.” (Mat. 26:59-66) Ngo tha xou pi kö nyidro. Ngacama itre atr ka trenamo, ka inamacan me ka trene mus, ngo öni nyidro cememine la metrötr ka hape: “Maine meköti qëmeke i Akötresie troa drei nyipunie hui Akötresie, qanyi nyipunieti kö. Ngo ame pë hë nyio, thatreine kö nyio cipane la itre ewekë hnei nyio hna öhne me dreng.”—Itre hu. 4:19, 20.
12. Nemene la ka troa acatrene la lapaune së?
12 Hetrenyi kö thei eö la catr? Tune kaa e traqa ju eö a cainöj qëmekene la itre ka trenamo me itre ka trene mus, me itre ka inamacan? Tune kaa e hnyimasai eö jë hnei fami eö, maine sine ini, maine sine huliwa, pine la hmi eö? Tro kö eö a xou? Maine eje hi, ijiji eö hi troa elë hune la xou. Ame lo Iesu e celë fen, hnei nyidrë hna inine la itre aposetolo troa isigöline la lapaune i angatr cememine la metrötr. (Mat. 10:11-18) Thupene lo kola amele nyidrëti hmaca, hnei Iesu hna ahnith kowe la itretre drei nyidrë ka hape, “tro pala hi ni a ce me nyipunie uti hë la troa nyipune la fene celë.” (Mat. 28:20) Nge jëne la “hlue ka nyipici me ka inamacan,” Iesu a ini së troa isigöline la lapaune së enehila. (Mat. 24:45-47; 1 Pet. 3:15) Nyidrëti fe a ini së ngöne la itre icasikeu, tune la icasikeu Mel Me Huliwa Ne Cainöj Ne La Keresiano, me jëne la götrane “Questions bibliques” ngöne jw.org. Eö kö a huliwane hnyawane la itre jia ne huliwa cili? Maine eje hi, tro ha kökötr la catr me lapaune i eö. Celë hi matre, tune la itre aposetolo, tha tro jë kö eö lai a nue la ketre ewekë troa sewe eö troa qaja la itre nyipici ka mingöming, hnei eö hna öhne me dreng.
The nue pi kö la ketre ewekë troa sewe epun troa cainöjëne la itre trenge nyipici ka mingöming hnei epuni hna kapa
“Angatr a Ce Thithi Jë Koi Akötresie” (Itre Huliwa 4:23-31)
13, 14. Nemene la nyine tro sa kuca e kola icilekeu, nge pine nemen?
13 Thupene la hna nue nyidro, hnei Peteru me Ioane hna canga tro troa iöhny memine la itre atrene la ekalesia troa “ce thith . . . koi Akötresie” me sipone la trengecatr, matre catre cainöj. (Itre hu. 4:24) Atre hi Peteru laka, tha tro kö sa mejiune kowe la sipu trengecatre së, ngöne la easa kuca la aja i Akötresie. Ame hi lo itre wiik qëmeken, hapeu tha ase kö angeice lo qaja koi Iesu ka hape: “Maine tro asë hi angatre la a nuetriji nyipë, ngo tha tro kö ni a hane nuetriji nyipë!” Ngo tune lo hnei Iesu hna qaja amë, hnei Peteru hna xoue atr me nuetriji nyidrë, lo atre hamë ini, me sinee i angeic. Eloine pe, hnei angeic hna xomi ini qa ngöne la tria i angeic.—Mat. 26:33, 34, 69-75.
14 Maine easa ajan troa anyipici Keriso, tha tro hmekuje kö a hetre aja. Matre ame la itre ithupëjia a isine troa thë la lapaune i eö me sewe eö troa cainöj, haawe, nyitipu Peteru jë me Ioane. Sipo trengecatre jë thei Iehova. Nge thele ixatua jë ngöne la ekalesia. Nge qaja jë kowe la itre qatre thup me itre trejine ka macaj, la itre jole hnei eö hna melën. Ke ka mene catr la thithi ne la itre xan.—Efe. 6:18; Iako. 5:16.
15. Pine nemen matre tha tro kö a kucakuca hnene la atr ka tha cainöje hë?
15 Maine hnei eö hna hane xou me cile troa cainöj, catre pi! Mekune hi eö lo: hnene lo itre aposetolo hna pane cil troa cainöj thupene la meci Iesu, ngo hnei angatre hmaca hna catre cainöj. (Mat. 26:56; 28:10, 16-20) Haawe, catre pi pe, nge the mekune hmaca kö la itre hnei eö hna melën ekö, xomi ini jë pe, matre troa xatuane la itre xan.
16, 17. Nemene la hna ini së hnene la aqane thith ne la itretre drei Iesu e Ierusalema?
16 Nemene la nyine tro sa sipone koi Akötresie la kola icilekeu me easë hnene la itre mus? Tha hnene kö la itretre drei Iesu hna thith matre troa apatrene la itre jol. Ngo mekune pala hi angatr lo hnei Iesu hna qaja: “E hnei angatr hna axösisi ni, tro fe angatr a hane axösisi nyipunie.” (Ioane 15:20) Celë hi matre hnei angatr hna thithi koi Iehova troa “wange” la itre nyinyithina ne la itre ithupëjia me angatr. (Itre hu. 4:29) Matre ame hë la angatr a öhne la itre jol ka traqa, angatre hi lai a wangatrehmekune laka, kolo ha eatrëne la itre hna perofetan. Atre hi angatr laka, troa eatr la aja i Akötresie “e celë fen,” tune la aqane ini angatr hnei Iesu ngöne la thith, ngacama tha madrine kö la itre he ne la mus.—Mat. 6:9, 10.
17 Atraqatr la aja i angatr troa nyihlue i Akötresie, matre hnene la itretre drei Iesu hna thithi iele nyidrë ka hape: “Aijijëne jë la itre hlue i nyipë troa catre cainöjëne la itre trengewekë i nyipë.” Nge hnei Iehova hna canga sa la thithi angatr! “Enienije jë hi la götran hnei angatr hna icasikeu ngön, nge tiqa ju hi angatr hnei uati hmitrötr, matre angatr a isa catre cainöjëne jë la trengewekë i Akötresie.” (Itre hu. 4:29-31) Pëkö ka atreine sewe Akötresie troa kuca la aja i Nyidrë. (Is. 55:11) Ngacama ka tru ju hë la jol maine catre ju hë la itre ithupëjia, ngo e hnei easë hna sipo ixatua koi Akötresie jëne la thith, xeci koi së laka, tro kö Nyidrëti a hamë trengecatre koi së matre tro pala hi sa catre cainöjëne la maca ka loi.
’Tha Kolo Kö Lai a Thoi Koi Atr, Ngo Koi Akötresie’ (Itre Huliwa 4:32–5:11)
18. Nemene la hna kuca hnene la itretre drei Iesu e Ierusalema?
18 Kola kökötr la ekalesia ka hnyipixe e Ierusalema, traqa ha koi 5 000 lao atren. d Ngacama itre atr ka traqa qa cailo fen, ngo hnene la itretre drei Iesu hna “ce hni me cas.” Matre angatr a casi ngöne la mekun me aqane waiewekë. (Itre hu. 4:32; 1 Kor. 1:10) Tha hnei angatre hmekuje kö hna sipo Iehova troa amanathithine la trengacatre i angatr. Ngo angatre fe a thel troa acatrene la lapaune i ketre me itö ixatua. (1 Ioane 3:16-18) Celë hi matre hnei Iosefa, lo hna hëne ka hape, Banaba, hna salemëne la ketre götrane la hlapa i angeic. Aja i angeic troa xatuane la itre ka traqa qa gaa nany, itre ka pi lapa aqeany e Ierusalema matre acatrene la lapaune i angatr.
19. Hnauën laka, Iehova a humuthi Anania me Safaira?
19 Hnene fe la lue trefën, Anania me Safaira hna hane salemëne la hlapa i nyidro me hamën la thupen nyine ahnahna. Ngo tha hamën asë ju kö nyidro, ke hnei nyidro “hna xome juetrëne la sine la thupen.” (Itre hu. 5:2) Hna humuthi nyidro hnei Iehova. Tha hnene kö laka, hnei nyidro hna hamëne hi la sine la thupen, ngo hnene pe laka, hnei nyidro hna thoi, nge ka ngazo la hni nyidro. Tha hnei nyidroti kö hna ‘thoi koi atr, ngo koi Akötresieti pe.’ (Itre hu. 5:4) Tune lo itre ka lue iqëmek hnei Iesu hna amekötin, hnei nyidro hna thele troa pi mama qëmekene la itre atr, hune la troa kepe nyidro hnei Akötresie.—Mat. 6:1-3.
20. Nemene la ini hne së hna xom göne la aqane tro sa hamë ahnahna koi Iehova?
20 Ame enehila, tune lo hneijine ne la itre pane keresiano e Ierusalema, kola mana la itre ahnahna. Itre milio lao Temoë Iehova ka sajuëne la huliwa ne cainöj e cailo fen, jëne la itre ahnahna hna hamën qa kuhu hni. Tha kolo kö a musinë së troa hamëne la traeme së me manie së thatraqane la huliwa ne cainöj. Tha aja i Iehova kö troa ahacenyi së hnene la huliwa i Nyidrë. (2 Kor. 9:7) Ame la hnei Iehova hna ajan, ke tha ene kö la etrun, ngo aliene hni pe. (Mar. 12:41-44) The tui Anania kö me Safaira, troa pi mama. Ngo tui Peteru, Ioane me Banaba, nyihlue i Iehova jë së cememine la ihnimi nyipici koi Nyidrë, me kowe la itre xan.—Mat. 22:37-40.
a Ame ngöne la uma ne hmi, ka casi hi la itre hawa ne thithi me tro fë huuj, e hmakany me e hej. Nge ame la huuj ne hnaipajö hej, ke kolo “hnaanaenene hawa,” hmekune lo 3h e hnaipajö.
b Wange ju la hna eköhagen “ Peteru, Ka Nyi i Nge Aposetolo Hë” me “ Ioane, Lo Hnei Iesu Hna Hnim.”
c Wange ju la hna eköhagen “ Atre Huuj Ka Sisitria Me Itre Tane i Angetre Huuj.”
d Ame lo macatre 33 e Ierusalema, hetrenyi hi la 6 000 lao Faresaio, nge ala xalaithe pe hi la angetre Sadukaio. Celë hi matre xele catr angatr ma wang la itre ini Iesu.