MEKENE 7
’Hna Cainöjën Koi Angeic, Me Qaja La Maca Ka Loi Göi Iesu’
Filipo la ketre tulu ngöne la kola cainöjëne la Evangelia
1, 2. Nemene la ewekë ka traqa lo kola mekune troa acilëne la huliwa ne cainöj ekö?
HETRE ketre iakötrë ka tru ka traqa kowe la itre keresiano, hnei Saulo “hna nyiqaane axösisine la itre ekalesia.” Ame la hnëewekë qene Geres, ke kola qaja la ketre iaxösisi ka catrehnin. (Itre hu. 8:3) Hna kötr hnene la itretre drei Iesu, nge hna mekune hnene la itre xan ka hape, tro hë Saulo a acilën la huliwa ne cainöj. Ame pe, hetre ewekë ka traqa la kola kötre mel la itre keresiano. Nemen?
2 Ame lo itre ka kötre mel, ke hnei angatr hna qaja “trongëne la trengewekë i Akötresie” ngöne la itre nöj hna kötre kow. (Itre hu. 8:4) Thatreine kö së qaja! Tha hnene kö la icilekeu hna acilëne la maca ka loi, ngo hna akökötrene pe! Ame la kola isaijei la itretre dreng hnene la iakötrë, ke kolo hi lai a akökötrene la huliwa ne cainöj ngöne la itre nöj gaa nany. Tune la hne së hna troa ce wang, tro hi lai a ceitu memine la hneijine së.
“Itre Ka Kötre Mel” (Itre Huliwa 8:4-8)
3. (a) Drei lae Filipo? (b) Hnauëne laka, xalaithe hi la ka dreng la maca e Samaria, nge nemene la hnei Iesu hna perofetan göne la götrane cili?
3 Filipo fe hi lo ketre “ka kötre mel.” a (Itre hu. 8:4; wange ju la hna eköhagen “ Filipo ‘Atre Cainöjëne La Evangelia.’”) Hnei angeic hna tro Samaria, ketre traone laka, tha tru kö hnei itre ka dreng la maca ka loi. Ke hnei Iesu lo hna qaja kowe lo itre aposetolo ka hape: “The lö kö kowe la itre traon ne la angetre Samaria, ngo tro jë, nge catre jë nyipunie thele la itre mamoe ne Isaraela ka paatr.” (Mat. 10:5, 6) Ngo atre hi Iesu laka, ame lai traone memine la itre götrane cili, ke tro kö lai a cainöjëne la evangelia elany. Qëmeken troa elë e hnengödrai, öni nyidrëti lo: “Tro nyipunie a kapa la men, e traqa pi la uati hmitrötr koi nyipunie. Nge tro hë nyipunie a itretre anyipici ni e Ierusalema, me ngöne la nöje Iudra asë, me e Samaria, me ngöne la nöjei götrane gaa nany ne la fene hnengödrai.”—Itre hu. 1:8.
4. Tune kaa la aqane ujë ne la angetre Samaria la Filipo a cainöj, nge pine nemen?
4 Hnei Filipo hna öhne e Samaria laka, “ijine tro ha menu.” (Ioane 4:35) Mama hnyawa hi ka hape, hnene la maca ka loi hna hamë trengecatre kowe la angetre Samaria. Eje hi, xele kö la angetre Iudra ma imelekeu me angatr, nge tru la itre ka methinë angatr. Ngo hnene la angetre Samaria hna öhne laka, ame la maca ka loi ke, koi nöjei atr, nge tha ka tune kö la itre ini ka tria ne la itre Faresaio. Hnei Filipo hna amamane laka, tha ceitui angeice kö me itre ka xele ma wai angatr. Tha hnei angeice kö hna ië hna hnim, ngo hnei angeic pe hna catre cainöj koi angatr. Celë hi matre tha sesëkötre kö së laka, hnene la ka alanyimu e Samaria “hna cas me drenge hnyawa la itre hna qaja” hnei Filipo.—Itre hu. 8:6.
5-7. Nemene la ka amamane laka, kola akökötrene la huliwa ne cainöj ngöne la kola isaijen la itre Temoë?
5 Ame enehila tune ekö, thatreine kö la icilekeu troa acilëne la huliwa ne cainöj. Ame la kola upe la itre hlue i Iehova troa fek kowe la ketre götran, maine akalabusi angatr ngöne la ketre götran, ke celë hi lai ka akökötrene la huliwa ne cainöj. Haawe, ame lo Hnaaluene Isi Ka Tru e Alema, hnene la itre Temoë Iehova hna cainöj ngöne la itre camp de concentration. Önine la ketre atre Iudra: “Ame la eni a öhne la trengecatre ne la itre Temoë Iehova hna akalabusin, ka xecie hnyawa koi ni laka, angatr a lapaune kowe la Itre Hna Cinyihan. Celë hi matre ketre Temoë Iehova ha ni enehila.”
6 Hnene fe la itre xaa ka iakötrë hna kapa la maca ka loi. Thupene la hna ami trejin Franz Desch ngöne la hnë iaxösisi e Gusen (Autriche), hnei angeic hna iöhny memine la ketre officier SS ka ajan troa ini Tus. The qaja kö la madrine i nyidro la nyidroti a iöhny ngöne la ketre asabele ne la itre Temoë Iehova itre macatre thupen. Lue ka cainöjëne hë nyidro la maca ka loi enehila!
7 Itre ewekë lai ka traqa ngöne lo itre ijine kola akötrën me helën la itre keresiano koi ketre nöj. Ame lo macatre 1970, hnene la itre Temoë qa Malawi hna kötr a tro Mozambique matre hnei angatr hna catr cainöj e cili. Ngacama hna hane fe icilekeu ngöne la nöj e cili, ngo tha cile kö la huliwa ne cainöj. Öni Francisco Coana: “Tru la itre hna othe lapan the hun, pine hun catre cainöj. Ngo ame la eahuni a öhne la etrune la atr ka kapa la maca ka loi ne la Baselaia, eahuni a mejiune laka, ixatua lai qaathei Akötresie, tune la aqane xatuane Nyidrë la itre pane keresiano ekö.”
8. Nemene la thangane kowe la huliwa ne cainöj la kola saze la politik, me aqane mele ne la itre atr?
8 Eje hi, tha icilekeu hmekuje kö la ka akökötrene la huliwa ne cainöj ngöne la itre xaa götran. Ame ngöne la itre macatre ka ase hë, alanyim la itre atr ka kötre kowe la ketre nöj pine la itre isi, maine göi troa thele huliwa. Celë hi ka aijijë angatr troa dreng la maca ka loi me ini Tusi Hmitrötr ngöne la nöj hnei angatr hna tro kow. Pine laka, tru hnei itre trenyiwa ka traqa, matre hna fe la itre gurup ka qaja la itre xaa qene hlapa. Eö kö a catre cainöj kowe la itre atr ka xulu qa ngöne “la nöjei nöj, me nöjei tribu, me nöjei hane ngönetrei, me nöjei qene hlapa” ngöne la götrane i eö?—Hna ama. 7:9.
“Pi Tro Fe Hi Ni a Hane Kapa La Atreine Cili” (Itre Huliwa 8:9-25)
“Nge ame la Simona a öhne laka, hna nue la uati hmitrötr jëne la hna ati ime hnene la lue aposetolo, angeic a li mani ju koi nyidro.”—Itre Huliwa 8:18
9. Drei lae Simona, nge nemene la ka ketri angeic?
9 Tru la itre hatren hnei Filipo hna amaman e Samaria. Hnei angeic hna aloine la itre ka peje ca, me amelen la itre atr hna löth hnei dremoni. (Itre hu. 8:6-8) Hna ketri Simona ketre atr ka kuci haze hnene la itre iamamanyikeu cili. Itre atr a qeje angeic ka hape: “Thei angeice la men atraqatr i Akötresie.” Ngo hnei Simona hna öhne la nyipi mene i Akötresie jëne Filipo, matre mejiune fe hë angeic koi Nyidrë. (Itre hu. 8:9-13) Ngo e thupen, hna tupathi angeic. Tune kaa?
10. (a) Nemene la hna kuca hnei Peteru me Ioane e Samaria? (b) Nemene la hnei Simona hna kuca la angeic a öhne la itretre drei Iesu a kapa la uati hmitrötr?
10 Hnene la itre aposetolo hna upi Peteru me Ioane a tro Samaria, ke drenge hë angatr laka, hna kapa la maca ka loi e cili. (Wange ju la hna eköhagen “ Peteru a Huliwane La Itre ‘Kii Ne La Baselaia.’”) Ame la nyidroti a traqa e cili, ke hnei nyidro hna ati im hune la itretre drei Iesu, matre hnei angatr hna kapa la uati hmitrötr. b Matre öni Simona jë hi: “Pi tro fe hi ni a hane kapa la atreine cili, matre tro fe la nöjei atr hnenge hna troa ati ime kow a hane kapa la uati hmitrötr.” Goi hamë mani fe angeic, ke mekuna i angeic laka, nyine itöne la ahnahna cili!—Itre hu. 8:14-19.
11. Nemene la aqane ameköti Simona hnei Peteru, nge tune kaa la aqane ujë i Simona?
11 Sa jë hi Peteru koi Simona ka hape: “Troa ce apatrenyi eö memine la mani eö, ke hnei eö hna thele troa itöne la ahnahna hna hamëne gufan hnei Akötresie. Matre gufa kö la ewekë cili thei eö, ke tha meköti kö la hni eö qëmeke i Akötresie.” Matre hnei angeic hna upi Simona troa ietra qëmekei Akötresie, me hape: “Sipone catrëne jë koi Iehova maine ijij e tro nyidrë a nue la ngazo ne la hni eö.” Tha atr ka ngazo kö Simona, ka ajane angeic troa kuca la loi, ngo hnei angeic hi hna tria. Matre hnei angeic hna sipone ielene la itre aposetolo ka hape: “Xëwe sai ni jë koi Iehova, matre trianyi ni la itre ewekë hnei epon hna qaja.”—Itre hu. 8:20-24.
12. Kola hapeue lai hna hape, “simonie,” nge tune kaa la aqane mama ngöne la hmi ka thoi?
12 Kola hmekëne la itre keresiano enehila, hnene la aqane ameköti Simona hnei Peteru. Ame la hnaewekë qene Wiwi “simonie” ene la kola itö, maine salemëne la ketre göhnë ngöne la hmi, ke ka fetra hi qaathene la trahmany cili, lo ka pi itöne la itre aposetolo. Tru catr la itre huliwa cili hna kuca e hnine la itre hmi ka thoi. Kola mama ngöne la hna 9 ne édition de l’Encyclopædia Britannica (1878) ka hape: “Ka xecie hnyawa kowe la itre ka inine la itre huliwa ne la itre he ne hmi laka, ame la kola acil la ketre paap, ke kolo palahi a kuci simonie. Itre ewekë lai ka ngazo catr, nyine hmahman, nge ka mama cile thene la itre he ne hmi ka hane pi xom la göhnë ne paap.”
13. Tune kaa la aqane tro la itre keresiano a thupë angatr göne la simonie?
13 Nyipiewekë tro la itre keresiano a thupën matre tha tro kö a kei kowe la simonie. Celë hi matre tha tro kö angatr a isine troa hamën atrune la itre ahnahna, maine qaja aloine la itre ka elemeken göne hi matre troa hetre hnëqa ngöne la ekalesia. Ketre mina fe, ame la itre ka elemeken, tha tro kö angatr a thele troa nyisineen hmekuje hi la itre ka trene mani. Huliwa ne simonie la lue aqane ujë cili. Matre ame asë hi la itre hlue i Akötresie, ke loi tro angatr a ujë tune la ‘itre ka co,’ me nue la uati hmitrötre i Iehova troa acili angatr ngöne la itre hnëqa. (Luka 9:48) Ame la atre ‘ka thele la sipu lolo’ i angeic, ke pëkö göhnë i angeic ngöne la organizasio i Akötresie.—Ite edomë 25:27.
“Trotrohnine Kö Eö La Hnei Eö Hna e?” (Itre Huliwa 8:26-40)
14, 15. (a) Drei la “eunuka qaa Aithiope,” nge hna öhnyi angeic tune kaa hnei Filipo? (b) Tune kaa la aqane ujë ne la atre Aithiope la Filipo a cainöj koi angeic, nge hnauëne laka, tha hnei angeic kö hna aca tro sesë koi bapataiso? (Wange ju la ithuemacany.)
14 Ame la ijine cili, hnene la angela i Iehova hna upi Filipo troa xome la gojeny ne Ierusalema a tro Gaza. Canga trotrohnine ju hi Filipo la kepin la angeic a ixelë memine la ketre eunuka qaa Aithiope ka “e catrëne la hna cinyihan hnei Isaia perofeta.” (Wange ju la hna eköhagen “ Pengöne La ‘Eunuka’ ”) Hnene la uati hmitrötr i Iehova hna aijijë angeic troa nyiap ezin la ikariota ne la eunuka. Öni Filipo: “Trotrohnine kö eö la hnei eö hna e?” Sa jë hi lai atr ka hape: “A tro ni a trotrohnine tune kaa nge pë pe atre qejepengöne koi ni?”—Itre hu. 8:26-31.
15 Ame hnene la eunuka hna aelë Filipo ngöne la ikariota. Pane mekune jë la porotrike i nyidro! Tha hna trotrohnine kö la hna perofetane hnei Isaia göne la “mamoe,” memine la ‘hlue.’ (Is. 53:1-12) Matre hnei Filipo hna qejepengöne trongëne kowe la eunuka, la hna perofetan celë laka, hna eatrën hnei Iesu. Tune la itre hna bapataison lo Penetekos 33, ketre ka xom la hmi angetre Iudra lai atre Aithiope, matre trotrohnine hnyawa hi angeic la nyine tro angeic a kuca. Öni angeic, “Hanawange la tim! Nemene pe kö la ka ajolë ni troa xomi bapataiso?” Ame hnei Filipo hna canga bapataiso angeic! c (Wange ju la hna eköhagen “ Bapataiso Ngöne ‘La Tim.’”) Nge e thupen, hnei Filipo hna tro Azota, troa cainöjëne la maca ka loi.—Itre hu. 8:32-40.
16, 17. Nemene la hnëqa ne la itre angela ngöne la huliwa ne cainöj enehila?
16 Ceitu hi la huliwa ne la itre keresiano enehila memine la huliwa i Filipo ekö. Angatr a cainöjëne la maca ka loi ne la Baselaia kowe la itre atr hnei angatr hna ixelë memin, tune la kola ngenu ngöne la ketre nöj. Tha iöhnyi menu kö angatr memine la itre atr ka kapa la maca. Ngo hna kuca kö lai, ke Tusi Hmitrötr a qaja ka hape, itre angela la ka xomi ujine la huliwa ne cainöj matre troa ketr la “nöjei nöj, me nöjei tribu, me nöjei qene hlapa, me nöjei atr.” (Hna ama. 14:6) Celë hi lai hna perofetan hnei Iesu. Hnei Iesu hna xome la ceitune la qitr me zizania, me hape, ame la ijine menu, ke kola qaja la pune la fene celë. Nge “ame la itre ka troa menu, ke itre angela.” Tro angatr a “xawane me trije qa ngöne la Baselaia i nyidrë, la itre atr ka kuca la ngazo.” (Mat. 13:37-41) Ketre, tro angatre fe a xawane la itre hna iën. Nge e thupen tro angatr a acasine la “ka ala nyimu atraqatr,” ene la ‘itre xa mamoe,’ hnei Iehova hna iën troa hane sine la organizasio i Nyidrë.—Hna ama. 7:9; Ioane 6:44, 65; 10:16.
17 Itre ewekë lai ka traqa. Ame la itre xaa atr hne së hna cainöje kow, ke angatr a qaja ka hape, hnei angatr hna thith matre troa hane atre la Tusi Hmitrötr. Tune la ketre ijin, hna cainöj la lue trejine memine la ketre nekönatr. Nge ame ju hi la angatr a mekun ka hape, ase hë angatr cainöj, hnene la nekönatr hna pi fenafena hmaca la ketre qëhnelö. Celë hi hnei nyën hna kuca, matre fe pi hi la qëhnelö hnene la ketre föe, nge hna ithanata koi eahlo hnene la lue trejin. Tha sesëkötre kö angatr la föe a qaja ka hape, hnei eahlo hna thith koi Akötresie matre troa upe la ketre atr troa xatua eahlo troa trotrohnine la Tusi Hmitrötr. Matre hnei angatre hë hna nyiqane ini Tus.
“Akötresieti fe, epi xatua ni hnei nyipë”
18. Hnauëne laka, tha tro pi kö sa wangacone la huliwa ne cainöj?
18 Ketre manathith ka tru la troa ce huliwa memine la itre angela ngöne la huliwa ne cainöj, hna kuca ngöne la fen asë. The wangacone kö la ahnahna cili! E maine tro eö a catr, ke tro hë eö a madrine troa catre cainöjëne la “maca ka loi göi Iesu.”—Itre hu. 8:35.
a Tha tro kö a imenun me Filipo aposetolo. Ame la Filipo celë, ke kolo hna qaja ngöne la mekene 5, angeice fe thene lo ala “sevene lao trejin trahmanyi ka hlemu loi” hna iën troa thewe xen e nöjei drai kowe la itre sine föe ka qene Geres me Heberu e Ierusalema.—Itre hu. 6:1-6.
b Ame ekö, ame la itre ka xötrei drei Iesu, ke kola ië angatr hnene la uati hmitrötr ngöne la angatr a xomi bapataiso. Eje hi lai ka aijijë angatr troa joxu me atre huuj, me Iesu e hnengödrai. (2 Kor. 1:21, 22; Hna ama. 5:9, 10; 20:6) Ngo ame celë, tha hna iëne kö la itretre dreng la angatr a xomi bapataiso. Ngo hnei angatre pe hna kapa la uati hmitrötr, memine la atreine troa kuca la itre iamamanyikeu, thupene lo Peteru me Ioane a ati ime hui angatr.
c Tha hnene kö la atre Aithiope hna aca tro sesë troa xomi bapataiso. Pine laka, hnei angeic hna xom la hmi i angetre Iudra, matre atre hë angeic la Itre Hna Cinyihan, tune la itre hna perofetan göne la Mesia. Ame hë la angeic a atre la hnëqa i Iesu ngöne la aja i Akötresie, ijiji angeice hë troa xomi bapataiso.