1, 2. Nemene la hnei Saulo hna troa kuca e Damaseko?

 KOLA ha easenyi trootro la itre trahmanyi kowe la traon e Damaseko, nge tru la elëhni angatr. Angatr a troa hule qa ngöne la itre hnalapa la itretre drei Iesu, itre hna xele ma wang. Troa oth me xomi angatr a tro Ierusalema kowe la Hnakootr Ka Tru.

² Saulo la ka elemeken la tronge i angatr, nge ka hane fe hë angeice ihumuth. a Angeice fe hi lo ka hane sine lo itre ka tranyi Setefano hnei etë, ketre atre drei Iesu. (Itre hu. 7:57–8:1) Saulo a axösisine la itretre drei Iesu e Ierusalema, nge uti fe hë ngöne la itre xaa traon. Angeic a ajan troa apatren la hmi cili lo hna hape, “Gojeny.”—Itre hu. 9:1, 2; wange ju la hna eköhagen “ Hnëqa i Saulo e Damaseko.”

3, 4. (a) Nemene la ka traqa koi Saulo? (b) Nemene la itre hnyinge nyine tro sa ce wang?

³ Ame hna hudrume pi hi la lai qa hnengödrai, me atimekë Saulo. Nge hna sesëkötr la itre sinetronge i angeic, nge tha ithanata ju hi angatr. Kei pi hi Saulo, miti hë koi angeic, nge drenge ju hi angeic la kola ewekë qa hnengödrai ka hape: “Saulo, Saulo, hnauëne la eö a akötrë ni?” Öni Saulo: “Drei nyipë Joxu?” Hna ketr la hni angeic la kola qaja ka hape: “Eni Iesu, lo hnei eö hna axösisin.”—Itre hu. 9:3-5; 22:9.

⁴ Nemene la ini hne së hna xom qa ngöne la pane hnyinge i Iesu? Nemene la eloine la hne së hna kapa qa ngöne la kola saze hnei Saulo? Nge nemene la ini hne së hna xom qa ngöne la aqane tingetinge la ekalesia thupene la kola saze hnei Saulo?

5, 6. Nemene la ini hne së hna xom qa ngöne la hna qaja hnei Iesu koi Saulo?

⁵ Ame la Iesu a acilë Saulo ngöne la gojeny e Damaseko, tha hnei nyidrëti kö hna hnying ka hape: “Hnauëne la eö a akötrëne la itretre drei  ni?” Ngo öni Iesu pe: “Hnauëne la eö a akötrë ni?” (Itre hu. 9:4) Eje hi, kola akötrë Iesu la kola axösisin la itretre drei nyidrë.—Mat. 25:34-40, 45.

⁶ Maine kola akötrë eö pine la lapaune i eö koi Keriso, the thëthëhmine pi kö laka, öhne hi Iehova me Iesu la itre ewekë ka traqa koi eö. (Mat. 10:22, 28-31) Nyipici tha tro kö nyidroti lai a apatrene la itre akötr. Mekune hi eö lo laka, öhne fe hi Iesu, lo Saulo a hane sine lo kola humuthi Setefano, nge öhne fe hi nyidrë la kola hul la itretre dreng qa ngöne la itre hnalapa i angatr a tro Ierusalema. (Itre hu. 8:3) Ngo tha hnei nyidrëti kö hna apatrene la itre akötr cili. Ngo jëne Iesu, hnei Iehova hna hamën koi Setefano memine la itretre drei Iesu la ixatua ka ijije troa mele nyipici.

7. Nemene la nyine tro eö a kuca matre troa xomihnine la iakötrë?

⁷ Ijiji eö fe hi troa hane xomihnine la iakötrë: (1) e tro eö a mele nyipici ngöne la nöjei pengöne jol, (2) e tro eö a sipo ixatua thei Iehova, (Fil. 4:6, 7) (3) e tro eö a nue Iehova troa të la ngazo, (Rom. 12:17-21) (4) e tro eö a catre mejiune laka, tro kö Iehova a hamëne la trengecatr koi eö, uti hë la tro Nyidrëti a apatrene la itupath.—Fil. 4:12, 13.

8, 9. Tune kaa jë Anania la angeic a kapa la hnëqa qaathei Iesu?

⁸ Thupene la hnei Saulo hna sa ka hape, “Drei nyipë Joxu?” Öni Iesu jë hi: “Mejë jë, nge tro jë kowe la traon, nge tro pë hë a qaja koi eö la nyine kuca.” (Itre hu. 9:6) Ka ti la lue meke i Saulo, matre hna eatrongë angeic kowe la uma i angeic e Damaseko, nge e cili, köni drai ne thith me tha xeni angeic. Ketre, hnei Iesu hna qeje angeic kowe la ketre atre drei nyidrë ne la traon, ene Anania “atr hna qaja atrun hnene la angetre Iudra ka mel e cili.”—Itre hu. 22:12.

⁹ Pane mekune jë së, la kola jol la mekuna i Anania! Hnei Iesu He ne la ekalesia, hna ië angeic troa kuca la ketre  hnëqa ka ketrepengön. Ketre hnëqa ka tru la troa itrony me Saulo! Matre öni angeic: “Joxu, anyimua drei mejene hë ni la atre cili, me aqane axösisin angeice la itre atre i nyipë ka hmitrötr e Ierusalema. Nge enehila, hna nue angeic hnene la itre tane i angetre huuj troa othe la itre ka hëne la ëje i nyipë.”—Itre hu. 9:13, 14.

10. Nemene la ka mama thei Iesu ngöne la nyidrëti a ithanata me Anania?

¹⁰ Tha hnei Iesu kö hna elëhni koi Anania la angeic a qaja la mekuna i angeic. Ngo hnei Iesu pe hna qaja la itre hna amekötin, memine la kepine matre nyidrëti a ajan tro angeic a wai Saulo. Öni nyidrë: “Hnenge hna iëne la atre cili troa tro fë trongëne la ëjeng kowe la itre nöj, me itre joxu, me itre nekö i Isaraela. Nge tro ni a amamane hnyawa koi angeic  la nöjei akötr hnei angeic hna troa melën pine la ëjeng.” (Itre hu. 9:15, 16) Ame hnei Anania hna canga trongëne la hna upi angeic. Matre hnei angeic hna tro koi Saulo me hape: “Saulo, trejin, hnene la Joxu Iesu ka mama koi eö ngöne lo eö pala kö ngöne la gojeny, hna upi ni matre goe hmaca jë eö, nge matre tiqa pi eö hnei uati hmitrötr.”—Itre hu. 9:17.

11, 12. Nemene la hne së hna inin göi Iesu, Anania me Saulo?

¹¹ Tru catr la itre ithuemacany ka mama göi Iesu, Saulo me Anania. Tune lo hna qaja ha, Iesu hi la ka elemeken la huliwa ne cainöj. (Mat. 28:20) Ngacama tha nyidrëti kö a ithanata meköt kowe la itre atr enehila, ngo nyidrëti pe a iujine la huliwa ne cainöj, jëne la hlue ka nyipici me ka inamacan, hnei nyidrëti hna acil hune la itre atrene la hnalapa. (Mat. 24:45-47) Hnene la Lapa ne Xomi Meköt hna aijijëne la itre ka cainöj, me itre pionie, me itre mesinare troa thele la itre atr ka ajan troa atrepengöi Keriso. Tune la hna qaja hnene lo mekene hnapan, alanyimu la itre atr hna öhne hnene la itre Temoë Iehova, ke hnei angatr hna thith.—Itre hu. 9:11.

¹² Hnei Anania hna kapa madrine la hnëqa nge hna amanathithi angeic. Canga kapa kö eö la kola upi eö troa cainöjëne la nyipici, ngacama eö a nango xou? Ame koi itre xan, ke nango jol troa fenifeni qëhnelö me ithanata koi itre trenyiwa. Ame itre xan, ke jol troa cainöj kowe la itre sine huliwa, e cahu hna tro me jëne telefon, maine cinyanyi tus. Hnei Anania hna elëhune la xou i angeic, matre hnei angeic hna aijijë Saulo troa kapa la uati hmitrötr. b Hnei angeic hna eatrëne la hnëqa i angeic, ke hnei angeic hna mejiune koi Iesu, me goeë Saulo tune la ketre trejine me angeic. Tro sa elëhun la itre xou së tui Anania, e tro sa mejiune laka, Iesu hi la ka elemeken la huliwa ne cainöj, me hnim la itre atr, me goeë angatr kösë itre trejine hë me easë.—Mat. 9:36.

13, 14. Maine eö a ini Tusi Hmitrötr me mekun troa xomi bapataiso, nemene la ini hnei eö hna xome qa ngöne la tulu i Saulo?

¹³ Hnei Saulo hna canga trongëne la itre hnei angeic hna inin. Thupene lai, hnei angeic hna xomi bapataiso, me ce huliwa memine la itretre drei Iesu qa Damaseko. Ngo tha eje hmekuje kö lai, “qane ju hi lai, angeic a canga qeje Iesu jë hnine la itre sunago me hape, Iesu hi la Nekö i Akötresie.”—Itre hu. 9:20.

 ¹⁴ Maine eö a ini Tusi Hmitrötr, me mekun troa xomi bapataiso, hapeu, eö kö a canga trongëne la hnei eö hna inin tui Saulo? Eje hi, hnei Saulo hna öhne la iamamanyikeu i Iesu, celë hi lai ka upi angeic troa trongën la itre hnei angeic hna inin. Ngo tha angeic casi kö la ka öhne la itre iamamanyikeu i Iesu. Hnene fe la itre xaa Faresaio hna öhne la Iesu a aloine la ketre atr ka fitre im, nge alanyimu la angetre Iudra ka atre ka hape, hnei Iesu hna amele Lazaro. Ngazo pe, alanyimu thei angatr ka xele ma drei Iesu, me pi humuthi nyidrë. (Mar. 3:1-6; Ioane 12:9, 10) Ngo ame Saulo, ke saze hnyawa ha angeic. Hnauëne kö laka, Saulo a kapa la maca ngo tha itre xane kö? Pine laka, angeic a xoue Akötresie ngo tha itre atre kö. Nge hna ketri angeic hnene la aqane utipi angeic hnei Iesu. (Fil. 3:8) Maine tro eö a ujë tun, eje hi laka, pëkö ketre ewekë ka troa sewe eö troa hane cainöj, me kökötr uti hë la troa xomi bapataiso.

15, 16. Nemene la hnei Saulo hna kuca e hnine la itre sunago, nge tune kaa la aqane ujë ne la angetre Iudra e Damaseko?

¹⁵ Pane mekune jë së! Kola sesëkötr me elëhni la ka alanyimu la kola öhnyi Saulo a cainöjë Iesu ngöne la itre sunago! Nge kola isa hnyinge ka hape, “Tha angeice kö lo ka axösisine la itre ka qaja la ëje cili e Ierusalema?” (Itre hu. 9:21) Ame la Saulo a qaja la kepin matre saze pi angeic, angeice fe hi lai “a amamane hnyawa laka, Iesu hi la Keriso.” (Itre hu. 9:22) Ngacama amamane ju hë angeic, ngo tha itre atr asë kö la ka kapa. Ame la itre xan, ke ka catre kuci qenenöj, me pi tru matre tha kapa kö angatr la maca. Ame pe, hnei Saulo hna catr.

¹⁶ Köni macatre thupen, angetre Iudra ne Damaseko pala hi a icilekeu me angeic. Hnei angatr hna thele troa humuthi angeic. (Itre hu. 9:23; 2 Kor. 11:32, 33; Gal. 1:13-18) Ame la Saulo a atre lai, hnei angeic hna canga tro qa ngöne la traon, nge hnene la itretre dreng hna autinyi angeic qa ngöne la hag, hnine la ketre treng. Luka a qaja ka hape, ‘itretre dreng’ la ka xatua angeic troa kötr lai jidri cili. (Itre hu. 9:25) Kolo hi lai a amaman ka hape, hetre ka kapa la maca hna tro fë hnei Saulo e Damaseko, nge itretre drei Iesu fe hë angatr.

17. (a) Nemene la aqane ujë ne la fami eö kowe la itre nyipici ne la Tusi Hmitrötr? (b) Nemene la nyine tro pala hi sa kuca, nge pine nemen?

¹⁷ Ame la eö a qaja kowe la fami eö, me itre sine i eö, me kowe la itre xan la itre hnei eö hna inin, eö jë a mekun laka, tro asë hi angatr a kapa la itre nyipici qa hnine la Tusi Hmitrötr. Maine jë, hna drei eö hnei itre xan, ngo tha angatr asë kö. Nge kola xele ma wai eö hnene la itre xaa atrene la fami eö. (Mat. 10:32-38) Ngo e tro eö a catre inine la aqane troa huliwane la Tusi Hmitrötr, me trongën la hna qaja, ke thatre kö së elany, ma tro ha saze la itre ka icilekeu me eö.—Itre hu. 17:2; 1 Pet. 2:12; 3:1, 2, 7.

18, 19. (a) Nemene la ka traqa la Banaba a isigöli Saulo? (b) Tune kaa la aqane tro sa nyitipu Banaba me Saulo?

 ¹⁸ Ame la Saulo a traqa e Ierusalema, me qaja ka hape, ketre atre drei Iesu hë angeic, hna luelue hnene la itre keresiano. Ngo hnei Banaba hna isigöli Saulo, matre hna kepe angeic hnene la itre aposetolo, nge hnei Saulo hna pane ce lapa me angatr. (Itre hu. 9:26-28) Ka hmeke Saulo, ngo tha hmahma kö angeic troa cainöjëne la maca ka loi. (Rom. 1:16) Matre hnei angeic hna catr cainöj e Ierusalema, lo götrane hnei angeic hna axösisine la itretre drei Iesu. Ame la angetre Iudra qa Ierusalema a öhne laka, ase hë nuetriji angatr hnei Saulo, hnei angatr hna thele troa humuthi angeic. “Matre ame hë la kola öhne lai hnene la itre trejin, angatr a xomi angeice jë a tro Kaisaria, me upi angeice Taraso eë.” (Itre hu. 9:30) Hnei Saulo hna drengethenge Iesu jëne la ekalesia, celë hi ka amele angeic memine la itre trejin.

¹⁹ Hnei Banaba hna ce huliwa me Saulo. Celë hi lai ka acatren la imelekeu i nyidro, lue ka catre nyihlue i Iehova. Haawe, tui Banaba, eö kö a catr xatuane la itre ka hnyipi traqa ngöne la ekalesia, ene la troa ce cainöj, me xatua angatr troa acatrene la imelekeu i angatr me Iehova? Maine eje hi, tro hë eö a kepe manathith. Nge maine eö a xötrei cainöj tui Saulo, tro kö eö lai a kapa la ixatua hna hamën? Ame la eö a ce huliwa memine la ketre trejine ka macaj, tro hë eö lai a maca ngöne la huliwa ne cainöj, me madrin, nge tro hë eö lai a hetre nyipi sinee uti hë epine palua.

20, 21. Nemene la hna kuca hnene la itre hlue i Iehova ekö me enehila ngöne la ijine tingeting?

²⁰ Thupene la hna saze me xatua Saulo, “ame hna tingetinge pi la itre ekalesia e Iudra, me Galilaia, me Samaria.” (Itre hu. 9:31) Nemene la hna kuca hnene la itretre drei Iesu ngöne la “ijine loi” cili? (2 Tim. 4:2) Kola qaja ngöne la xötr ka hape, kola “kökötr” la ekalesia. Hnene la itre aposetolo memine la itre trejine ka elemeken, hna acatren la lapaun ne la itretre drei Iesu me iujine la ekalesia matre tro ej “a xoue Iehova, me mele thenge la mene ne la uati hmitrötr.” Tui Peteru, hnei angeic hna huliwane la ijine cili troa xatuane la itretre drei Iesu qa Lida me Sarona. Jëne la hnei angeice hna catr, alanyimu hë thei angatr ka ‘mejiune koi Joxu.’ (Itre hu. 9:32-35) Tha hna hane kö amenune la itretre drei Iesu hnene la itre xaa mekun, ngo hnei angatre pe hna itö ixatua me cainöjëne la maca ka loi. Celë hi matre “kolo pala hi a elë la etrune la itretre dreng.”

²¹ Ame lo pune lo itre macatre 2000, “hna tingetinge” la mele ne la itre Temoë Iehova e cailo fen. Ame lo itre mus ka akötrë angatr ekö, ke  pëhë mejen, nge goi apëne fe lo itre wathebo göi cainöj. Alanyimu la itre Temoë Iehova ka catr cainöj ngöne la ijine cili, matre tru catr la itre atr ka drei angatr.

22. Nemene la nyine tro eö a kuca ngöne la itre ijine loi?

²² Hapeu, eö kö a huliwane hnyawane la itre ijine loi? Maine eö a mele ngöne la ketre nöj tha hna wathebone kö la hmi së, thupëne kö, ke tro Satana lai a iaö eö, troa aja mo hune la itre huliwa ne la Baselaia. (Mat. 13:22) Thupëne kö! Catre jë pe huliwa koi Iehova ngöne la itre ijine loi. Ijine hi lai troa catr cainöj me acatren la lapaun ne la itre atrene la ekalesia. The thëthëhmine kö laka, tha ka huti kö la itre ijine cili.

23, 24. (a) Nemene la itre ini hne së hna xome qa ngöne la hna melën hnei Tabitha? (b) Nemene la nyine tro sa catr kuca?

²³ Hane hi la ka traqa kowe la ketre atre dreng, Tabitha la ëjen maine Doreka, ka mele e Iopa ezin e Lida. Hnei angeic hna huliwane hnyawane la traeme me itre mo i angeic. Eje hi, “ka majemine catre angeic hamëne la itre ahnahna ne utipin hnei angeice hna kuca.” Ngo ame la ijine cili, wezipo ju hi angeic me mec. c Matre tru la hleuhleu thene la itretre dreng qa Iopa, uti fe hë la itre sine föe hnei angeic hna xatuan. Hna hë Peteru kowe la hnalapa hna amë la wezipo, matre e cili, hnei angeic hna kuca la ketre iamamanyikeu laka, tha hna hane kuca hnene la ketre aposetolo i Iesu. Thupene la hna thith, Peteru a amele Tabitha ju! Pane mekune jë së, la madrin ne la itre sine föe memine la itretre dreng la kola hë angatr kowe la hnahag, me öhne laka, mele hmaca ha Tabitha. Celë hi lai ka hnëkë angatr troa catr kowe la itre itupath ka troa traqa. Eje hi “hna hlemu ngöne la nöje Iopa asë la ewekë cili, matre ala nyimu la itre ka hane mejiune kowe la Joxu.”—Itre hu. 9:36-42.

²⁴ Lue ini ka nyipiewekë catr koi së qa ngöne la hna melën hnei Tabitha. (1) Ka hopatre hi la mel. Matre nyipiewekë troa atre la ëje së hnei Akötresie e ijine pala kö! (Ate cai. 7:1) (2) Troa catre la mejiune së kowe la melehmaca. Hnei Iehova hna öhne la itre ewekë ka loi hna kuca hnei Tabitha, matre hnei Nyidrëti hna amanathithi angeic. Maine tro sa mec qëmekene Amagedro, ke tha tro kö Nyidrëti  lai a thëthëhmine la itre huliwa ka lolo hne së hna kuca, me amele së hmaca. (Heb. 6:10) Melëne ju hë së la itre “ijine jol” maine “ijine loi,” ngo catre pi pe së cainöjëne la maca ka loi göi Iesu.—2 Tim. 4:2.