MEKENE 6
Setefano—“Ketre Atr Hna Kapa Hnei Akötresie Nge Ka Tiqa Hnei Men”
Ini koi së qa ngöne la catre i Setefano qëmekene la Hnakootr Ka Tru i angetre Iudra
1-3. (a) Nemene la ewekë ka traqa koi Setefano, nge nemene la aqane ujë i angeic? (b) Nemene la itre hnyinge nyine tro sa ce wang?
SETEFANO a cile qëmekene la Hnakootr, nge 71 lao trahmany ka lapa xötreithi angeic, maine jë, ngöne la ketre hnahag ezine la uma ne hmi e Ierusalema. Kola icasikeu la Hnakootr cili, matre troa kootrë Setefano. Nge itre atr ka tru me hna metrötrën la itre ka iameköti. Ketre, alanyimu la itre xan ka wangacone la itretre drei Iesu. Ame lai ka hë kowe la hnakootr, ke Kaiafa atre Huuj Ka Sisitria, nyidrëti hi lo perezida ngöne lo ijine kola ameköti Iesu. Hapeu hnei Setefano kö hna xou?
2 Ame la ijine cili, kola ketrepengöne hnei Setefano. Kola goeë angeic hnene la itre atrene la Hnakootr, nge ame la qëmeke i angeic ke “kola ceitu me iqëmeke ne angela.” (Itre hu. 6:15) Ame la itre ka tro fë maca i Iehova, ene la itre angela, ke ka tingeting me lolo pala hi angatr. Celë hi ka mama thei Setefano, nge goi öhne fe hnene lo itre ka iameköti ka elëhni. Pine nemen matre ka tingeting angeic?
3 Hetre itre ini ka tru hne së hna troa xome qaathei Setefano. Loi e tro fe sa atre la kepin matre hë angeice jë kowe la Hnakootr. Tune kaa la aqane isigöline angeic la lapaune i angeic ekö? Nge tro sa nyitipu angeic tune kaa?
“Angatr a Agomegomëne Jë La Nöj” (Itre Huliwa 6:8-15)
4, 5. (a) Pine nemen matre Setefano la ketre atr hna wangatrun ngöne la ekalesia? (b) Nemene la alien la hna hape Setefano “ketre atre hna kapa hnei Akötresie nge ka tiqa hnei men”?
4 Setefano la ketre hna wangatrune ngöne la ekalesia ka hnyipixe. Hna qaja ngöne lo tane mekune hne së hna ce wange hë, laka angeice fe hi lo ketre, thene lo ala 7 ka xatuane la itre aposetolo. Kola mama la ipië i angeic ngöne la itre iamamanyikeu hnei angeic hna kuca. Easa e ngöne la tusi Itre Huliwa 6:8 laka, angeice pala hi a kuca la itre “nyine hain me itre hatrene ka tru,” tune la itre xaa aposetolo. Easë mina fe a e laka, “ketre atre hna kapa hnei Akötresie nge ka tiqa hnei men.” Nemene la aliene lai?
5 Ame la hnaewekë qene Geres “atre hna kapa hnei Akötresie” ke kolo fe hi a hape, atr ka “loi hni.” Ame Setefano, ke ka ihnim, ka loi thiina, nge hna hnim hnei itre atr. Celë hi matre canga ketr hi la hni ne la itre atr hnene la aqane ithanatane angeic la nyipici. Hnene la uati hmitrötr matre tiqa ha angeic hnei men. Nge tha hnei angeice kö hna pi mama fë la itre hnei angeic hna atreine kuca, ngo hnei angeice pe hna qaja aloinyi Iehova me wangatrune la itre atr. Celë hi matre xou angeice catr hnene la itre ithupëjia.
6-8. (a) Nemene la lue trengathoi hna qaja göi Setefano, nge pine nemen? (b) Pine nemen matre Setefano la ketre tulu koi së enehila?
6 Alanyimu la itre trahmany ka traqa troa ithanata me angeic, ngo “thatreine kö angatre cile koi angeic, ke tru kö la inamacane i angeic qaathene la ixatua ne la uati hmitrötr.” a Angatr a elëhni matre “hnei angatre hna tro juetrë” me upe la itre xan troa silitrengathoi angeic. Hnei angatr hna “agomegomëne jë la nöj, me itre qatre ne la nöj, me itretre cinyihan,” matre hna tro sai Setefano kowe la Hnakootr Ka Tru. (Itre hu. 6:9-12) Hnene la itre ithupëjia hna qaja la lue ewekë: hnei angeic hna silitrengathoi Mose me Akötresie. Hna tune kaa?
7 Hnei angatr hna silitrengathoi ka hape, hnei Setefano hna qaja angazone “la götrane gaa hmitrötre,” ene la uma ne hmi e Ierusalema. (Itre hu. 6:13) Ketre, hnei angatr hna qaja fe ka hape, hnei angeic hna qaja angazone me saze la itre Trenge Wathebo i Mose, hna amë hnene la itre perofeta. Ka jole catre lai, ke ame kowe la angetre Iudra, ke ka tru catr la hnë hmi, memine la trenge Wathebo i Mose, memine fe la itre xaa Wathebo hna iahnithekeun. Celë hi matre öni angatr, loi tro angeic a mec!
8 Haawe! Tha sesëkötre kö së laka, kolo pala hi a thele jën hnene la itre xaa hmi troa ajolë së. Ame enehila, ke itre he ne hmi pala hi a ce huliwa memine la itre mus, matre troa akötrëne la itre Temoë Iehova. Tro sa ujë tune kaa la kola silitrengathoi së? Xomi ini jë së qa ngöne la tulu i Setefano.
Ketre Nyine Anyipicine La “Akötresie Ka Lolo” (Itre Huliwa 7:1-53)
9, 10. Nemene la aqane qaja angazone la cainöje i Setefano, ngo nemene la nyine tha tro pi kö sa thëthëhmin?
9 Tune lo hne së hna qaja, ka lolo la qëmekei Setefano tune la angela, la angeic a lapa drenge la kola upezö angeic. Matre öni Kaiafa: “Nyipici lai?” (Itre hu. 7:1) Matre hnei Setefano hna sa!
10 Hnene la itre xan hna qaja angazone la cainöje i Setefano ka hape, ngacama tru la hnei angeic hna ithanata, ngo tha ase kö angeic jelethoine la itre ka upezö angeic. Ame pe, hnei angeic hna amamane la ketre ini göne la aqane troa “atreine sa” kowe la itre ka qaja angazone la maca ka loi. (1 Pet. 3:15) Tha thëthëhmine kö së laka, hna nyizö angeice lo ka hape, atr ka jelengazone la uma ne hmi, memine la Trenge Wathebo i Mose. Ame la angeic a sa, hnei angeic hna amexeje la köni ijine hna melën hnene la angetre Isaraela. Tro sa ce wange la köni ijine cili.
11, 12. (a) Nemene la aqane qejepengöi Aberahama hnei Setefano? (b) Pine nemene matre Setefano a qeje Iosefa?
11 Hneijin ne la itre keme ne lapa. (Itre Huliwa 7:1-16) Hnei Setefano hna pane qeje Aberahama, lo hna metrötrën hnene la angetre Iudra pine la lapaune i angeic. Qaane ju hi lai, öni angeic göi Iehova, hnene la “Akötresie ka lolo,” hna mama koi Aberahama ekö e Mesopotamia. (Itre hu. 7:2) Ame ekö, nyidrë a lapa trenyiwa ngöne la Nöj Hna Thingehnaean. Nge pë palakö uma ne hmi me Trenge Wathebo i Mose. Hapeu, ka nyipiewekë kö la itre ewekë cili matre troa mele nyipici koi Iehova?
12 Ame la itre ka drei Setefano, ke itre ka wangatrunyi Iosefa fe, matra i Aberahama. Matre hnei Setefano hna amekunën la hna kuca hnene la itre trejine me Iosefa, itre kem ne la itre tribu e Isaraela laka, hnei angatr hna axösisin la atr ka meköt, me salemë angeic matre nyi hlu. Ame pe, angeice hi la hnei Iehova hna iën troa amelene la angetre Isaraela qa ngöne la jiin. Eje hi, canga öhne hi Setefano laka, ceitune hi la hna melën hnei Iosefa me Iesu. Ngo tha hnei angeice kö hna qaja la mekune cili, ke aja i angeic tro la itre atrene la Hnakootr a pane lapa troa drei angeic.
13. Tune kaa la aqane jelethoi angatr hnene la itre hna qaja hnei Setefano göi Mose, nge nemene la hnei angeic hna qaja catrën?
13 Hneijine i Mose. (Itre Huliwa 7:17-43) Qea catr la hnei Setefano hna qeje Mose. Ka lolo catr, ke ame la itre xaa atrene la Hnakootr, ke itre Sadukaio, nge angatre hmekuje hi a kapa la itre hna cinyihan hnei Mose, ngo tha Tusi Hmitrötr asë kö. Hnei angatre lo hna qaja ka hape, hnei angeic hna jelengazo Mose. Matre ame la itre hnei angeic hna qaja, ke kola jelethoi angatr, me amaman laka, ka tru Mose memine la itre Trenge Wathebo koi Setefano. (Itre hu. 7:38) Öni angeice fe, ame la kola 40 lao macatre i Mose, ke hna xele ma wai angeic hnene lo itre hnei angeic hna hnim. Nge 40 lao macatre thupen, xele palahi angatr ma kapa la musi angeic. b Hane hi la hnei angeic hna qaja catrën: hnene pala hi la nöje i Akötresie hna xele ma kapa la itre hnei Iehova hna acil matre troa musi koi angatr.
14. Nemene la hnei Setefano hna amekunën kowe la itre ka drei angeic, la angeic a qeje Mose?
14 Hnei Setefano hna amekunën la itre ka drei angeic la hna qaja hnei Mose ka hape, troa cile elany la ketre perofeta ka tui nyidrë e Isaraela. Drei jë lai? Nge troa kepe angeic tune kaa? Tro pë hë Setefano a qaja ngöne la pune la cainöje i angeic. Ngo hetre hnei angeic hmaca kö hna qaja: hnei Mose hna atre qaathei Iehova laka, ijije hi troa ahmitrötrëne la hnadro, tune lo hnadro xötreith la isinöe ka palulu, lo Iehova a ithanata koi angeic. Hapeu, ijije kö troa hmi ngöne hi la ca götran, tune la uma ne hmi e Ierusalema? Tro sa ce wang.
15, 16. (a) Hnauëne laka, Setefano a qaja ka hape, ka nyipiewekë la itat? (b) Tune kaa la aqane qejepengöne Setefano la uma ne hmi?
15 Itat memine la uma ne hmi. (Itre Huliwa 7:44-50) Hnei Setefano hna amekunën kowe la Hnakootr ka hape, qëmeken troa xupe la itre uma ne hmi e Ierusalema, hnei Akötresie hna upi Mose troa xupe la ketre itat, nyine ajöne trongën thatraqane la hmi. Hapeu, drei la ka troa qaja ka hape, pëkö enyipiewekën la itat, nge e cili pe lo hnei Mose hna hmi koi Akötresie?
16 Ame ekö, ame la Solomona a xupe la uma ne hmi e Ierusalema, hnei Akötresie hna hamëne la ketre ini ka nyipiewekë catr ngöne lo angeic a thith. Öni nyidrë: “Eje hi laka, tha tro kö la Ka Draië Catr a lapane la itre uma hna xupe hnei wanakoim,” tune la hna qaja hnei Setefano. (Itre hu. 7:48; 2 A. l. ite Jo. 6:18) Ijiji Iehova hi troa huliwane la ketre uma ne hmi matre troa eatrëne la aja i Nyidrë, ngo e pëkö uma ne hmi, tro kö Nyidrëti lai a eatrëne la aja i Nyidrë. Ngo hnauëne kö laka, kola mekun hnene la itre hlue i Akötresie ka hape, tro la hmi ka wië a lapa ngöne la ketre uma hna xup hnei wanakoim? Ketre mekune lai ka upi Setefano troa qaja la trengewekë i Isaia: “Öni Iehova, ‘Theronenge la hnengödrai, nge ihnadro la tane la lue cang. Matre nemene uma la hnei nyipunie hna troa xupe thatraqai ni? Maine ekaa la hnë manong? Nge hapeu, tha huliwa ne la lue imenge kö la nöjei ewekë hna xup?’ ”—Itre hu. 7:49, 50; Is. 66:1, 2.
17. Nemene la aqane amamane Setefano la mekuna ne la itre atrene la Hnakootr? (b) Nge nemene la aqane cil angeic kowe la aqane waiewekë i angatr?
17 Ame la eö a dreng la cainöje i Setefano, hapeu, mama kö koi eö la mekuna ne la itre atrene la Hnakootr? Hnei angeice fe hna amamane laka, nyimu aqane tro Akötresie a eatrën la aja i Nyidrë. Nge tha Nyidrëti kö a xötrethenge la itre mekuna i atr. Ame la itre ka mekune ka hape, troa atrune la uma ne hmi e Ierusalema, memine la itre hna majemine thenge la Wathebo i Mose, ke thatre hnyawa kö angatr la nyipi aliene la Wathebo memine la uma ne hmi. Kola mama hnyawa koi së ngöne la trengewekë i Setefano la hnyinge celë: Hapeu, tha easë kö lai metrötrëne la Wathebo memine la uma ne hmi la easa drengethenge Iehova? Eje hi, kola mama ngöne la cainöje i angeic laka, hnei angeic hna isigöline hnyawa la itre huliwa i angeic, ke hnei angeic hna catre drengethenge Iehova.
18. Tro sa nyitipu Setefano tune kaa?
18 Nemene la hna ini së hnene la cainöje i Setefano? Ketre keresiano ka atre hnyawa la Itre Hna Cinyihan. Tui angeic, loi e tro fe sa hane catre inine la Tusi Hmitrötr matre “maca troa tro fë la nyipici.” (2 Tim. 2:15) Hetre ini fe hne së hna xome qa ngöne la aqane maca me metrötre i Setefano. Ame la itre ka drei angeic, ke tha canga elëhni kö angatr. Ke tha hnei angeice kö hna isi ithanata, ngo hnei angeice pe hna qaja la itre mekun ka tru hnei angatr hna wangatrun. Hnei angeic mina fe hna amamane la metrötr la angeic a hëne la itre qatr, “itre kem.” (Itre hu. 7:2) Qa së mina fe troa qaja hnyawane la itre nyipici ne la Tusi Hmitrötr “cememine la menyike me metrötr atraqatr.”—1 Pet. 3:15.
19. Nemene la maca ne iameköti hnei Setefano hna qaja nyipine la Hnakootr?
19 Haawe, tha tro kö la xoue atr a sewe së troa cainöjëne la maca ka loi i Akötresie; the azaene kö la maca ne iameköti Iehova. Setefano hi la ketre tulu koi së ngöne la götrane cili. Öhne hi angeic laka, tha hna ketr kö la itre atrene la Hnakootr hnene la itre trengewekë i angeic. Matre hnene la uati hmitrötr hna xatua angeic troa nyipune la cainöj me hape, ceitui angatre hi memine la itre qaaqa i angatr, itre ka nuetriji Iosefa, Mose me itre perofeta asë. (Itre hu. 7:51-53) Eje hi, hnei angatr mina fe lo hna humuthe la Mesia, lo hnei Mose me itre perofeta hna thingehnaean. Mama pi hi laka, angatre hnyawa hi lo itre ka eni Wathebo!
“Iesu Joxu, Eni Ha Nue La Melenge Koi Nyipë” (Itre Huliwa 7:54–8:3)
“Drenge jë hi angatre lai, elëhni jë hi angatr, matre angatr a thele jë troa lepi angeic.”—Itre Huliwa 7:54
20, 21. Tune kaa la aqane ujë ne la Hnakootr Ka Tru kowe la itre hna qaja hnei Setefano, nge tune kaa la aqane akeukawanyi angeic hnei Iehova?
20 Hnene la nyipici hna qaja hnei Setefano matre kola elëhni catr la itre ka iameköti. Thatreine hë angatre xomihni, matre angatre ha kiki nyiö. Ame hë cili, angeic a wangatrehmekun laka, tha tro kö angatr a utipi angeic, tune lo aqane pë utipine i angatr koi Iesu.
21 Loi e troa catre hnei Setefano matre cile catr qëmekene la itre ewekë ka troa traqa. Hna akeukawanyi angeic hnene la iamamanyi qaathei Iehova. Nemene la hnei angeic hna öhn? La lolo i Akötresie, nge Iesu a cil ngöne la götrane maca ne la Keme i nyidrë! Ame la angeic a qejepengöne la itre hnei angeic hna öhn, hnene la itre atrene la Hnakootr hna thinge la itre hnangenyë i angatr. Pine nemen? Eue hi lo, hnei Iesu hna qejepengöne kowe la Hnakootr cili ka hape, nyidrëti hi la Mesia, nge easenyi hë tro nyidrëti a lapa ngöne la götrane maca ne la Keme i nyidrë. (Mar. 14:62) Nge kola jelenyipicine lai hnene la iamamanyi celë. Hnene la Hnakootr hna thoi me humuthe la Mesia! Haawe, hnei angatr hna ce axeciën troa tranyi Setefano hnei etë. c
22, 23. Hnauëne laka ceitu hi la aqane meci Setefano memine la Maseta i angeic, nge hnauëne laka, tro sa catre mejiun tui Setefano?
22 Ceitune hi la aqane meci Setefano memine la Maseta i angeic. Lue ka tingeting, ka catr mejiune koi Iehova, nge hnei nyidroti fe hna nue la ngazo ne la itre ka akötrë nyidro. Öni angeic: “Iesu Joxu, eni ha nue la melenge koi nyipë.” Maine jë mama pala hi koi angeic la Neköi atr me Keme i nyidrë. Atre hnyawa hi angeic la itre trengewekë i Iesu celë ka hape: “Eni la mele hmaca me mel.” (Ioane 11:25) Thupene lai, hnei angeic hna thith me sue ka hape: “Iehova fe, the e kö la ngazo celë koi angatr.” Ase jë hi angeice qaja lai, meci pi hi angeic.—Itre hu. 7:59, 60.
23 Angeice hi la hna pane axösisin thene la itretre drei Iesu. (Wange ju la hna eköhagen “ Setefano—Hna Axösisin? Maine Ka Anyipicin?”) Nge tha angeice casi kö la hna troa axösisine tune lai. Uti hë enehila, hna humuthe pala hi la itre hlue i Iehova ka mele nyipici hnene la itre he ne hmi, me itre politik memine la itre xaa ithupëjia. Tui Setefano, nyipiewekë tro fe sa catre mejiun. Musi hë Iesu enehila, nge nyidrëti a huliwane la mene ne la Keme i nyidrë. Celë hi matre, pëkö ka atreine sewe nyidrë troa amelene hmaca la itretre drei nyidrë.—Ioane 5:28, 29.
24. Tune kaa la aqane ixatua i Saulo ngöne la kola axösisi Setefano, nge nemene la thangane la meci angeic?
24 Saulo a goeëne la itre ewekë ka traqa. Aja i angeice fe tro Setefano a mec, matre angeic a thupëne la itre iheetre ne la itre ka tranyi Setefano hnei etë. Nge e thupen, Saulo hi lo ka elemekene la itre icilekeu ka traqa kowe la itre keresiano. Ngo ka hetre thangane la meci Setefano. Hnene hi la tulu i angeic, hna acatrene la trenge aja ne la itre keresiano troa mele nyipici me hun ngöne la icilekeu. Kolo palahi a hace fë hnei Saulo (hna hëne enehila ka hape, Paulo) la hnei angeic hna kuca ngöne la iaxösisi. (Itre hu. 22:20) Angeice fe hi lo ka hane ixatua matre troa humuthi Setefano, ngo angeic a trotrohnin e thupene laka, “ketre ka silitrengathoi Akötresie [angeic], me iaxösisi, me pi tru.” (1 Tim. 1:13) Eje hi, tha ase kö Paulo thëthëhmi Setefano memine lo cainöje i angeic. Ketre, hnei Paulo fe hna hane xome la itre xaa mekune i Setefano ngöne la angeic a cile fë cainöj. (Itre hu. 7:48; 17:24; Heb. 9:24) Kola tro la itre drai, nge hnei angeic hna xötrethenge la tulu ne lapaun me catr ne la trahmany cili, “ketre atre hna kapa hnei Akötresie nge ka tiqa hnei men,” ene Setefano. Nge ame easë ke, tro kö sa hane kuca tun?
a Ame la itre xaa ithupëjia, ke kolo itre atrene la “Sunago i Ange Hlue Hna Nuamacan.” Maine jë, ke kolo itre hna othe ekö nge hna nue hmaca hnene la angetre Roma. Maine pena, ke kolo itre hlue hna nuamacan me ka hane xome la hmi i angetre Iudra. Ame itre xan, ke itretre Kilikia, tui Saulo qa Taraso. Tha hna qaja kö ka hape, Saulo fe thene lo angetre Kilikia ka thatreine cil koi Setefano.
b Cainöje i Setefano hmekuje hi la ka qaja la itre ithuemacanyi göi Mose, tune la ini hnei angeic hna kapa e Aigupito, la macatre i angeic lo angeic a kötr, me etrune la itre macatre ne lapa angeic e Midiana.
c Tha nyipi mama kö ngöne la wathebo i angetre Roma ka hape, meköt kowe la Hnakootr Ka Tru i angetre Iudra troa amekötine troa ihumuth. (Ioane 18:31) Ketre, ame la kola mec hnei Setefano, ke hna humuthi angeic hnene la itre atr ka elëhni, ngo tha hna amekötine pe hnene la Hnakootr.
