1-6. Qaja jë la ketre ceitun ka amaman laka, itre Temoë Iehova a cainöj ngöne la nöjei pengöne götran.

 AME e Ghana, ame la teritoar ne cainöje i Rebeka, ketre nekö jajiny Temoë, ke uma ne ini angeic. Ka hetre itusi palahi e hnine la watrenge i angeic. Ame la ijine récréation, angeic a thele ijine troa cainöj. Matre alanyimu la itre ka ini Tusi Hmitrötr me angeic.

² Ame pena e Madagascar, ketre hnapet ka tru e Afrik, lue pionie a trongëne la 25 lao kilomet hnine la hedredrei. Nyidroti a thupa la itre gojenyi matre ini Tusi Hmitrötr memine la itre atr ngöne la ketre tribu gaa nanyi catr.

³ Nge ame e Paraguay, hnene la itre Temoë ka saene qa ngöne la 15 lao nöj, hna cane la ketre he ka 45 tonnes ka ijije troa atë la 12 lao atr. Hnei angatr hna cane lai he, matre cainöj kowe la itre atr ka lapa ezine la hneopegejë Paraguay me Paraná. Celë fe hi ka aijijë angatr troa ketr la itre atr ngöne la itre nöj gaa nanyi catr.

⁴ Ame e Alaska lo ijine keukawa, ke itre trejine hi lai a cainöj atruny. Angatr a cile ngöne la itre hna xepe ne itre he me cile fë itre itus ngöne la nöjei qene hlapa ke, hetre touristes ka traqa qa ngöne la itre xaa nöj. Nyimutre fe la itre tribu gaa nanyi catr, matre itre trejin a xomi avio matre xatuane la angetre Aleut, Athabascan, Tsimshian, me Klinket troa hane drenge la maca.

⁵ Ame pena e Texas e Etazini, ame la teritoare i Larry, ka lapa fë ikatr ke, ene la pital hnei angeic hna lapa ngön. Ngacama ka adikape angeic, ngo tha cile kö angeice cainöj. Angeic a cainöjëne la maca ka loi memine la mejiune i angeic laka, tro hmaca kö angeic elanyi a tro, fene la musi ne la Baselaia i Iehova.—Is. 35:5, 6.

⁶ Nge ame e Birmanie, hnene la itre trejin hna xomi he qa Mandalay koi köni drai, matre troa hane sine la ketre asabele ngöne la götrane kolopi. Tru la itre itus hnei angatre hna xome trongëne matre troa cainöj  kowe la itre atr hune la he. Ame la kola cile la he ngöne la ketre nöj, ke angatre fe hi lai a ut me itre itus troa cainöj. Matre ame la kola elë la itre atr hune la he, ke angatre hmaca hi lai a cainöj, kösë “ketre teritoare i angatr pena ha ka hnyipixe.”

7. Nemene la aqane qejepengöne la itre nyipici göne la Baselaia hnene la itre Temoë Iehova, nge pine nemen?

⁷ Kola amamane hnene la itre hna melën celë laka, itre Temoë Iehova ‘a qejepengöne hnyawa koi itre atr la itre nyipici göne la Baselaia i Akötresie.’ (Itre hu. 28: 23) Angatr a fenifeni qëhnelö, informel, cinyanyi tus me telefon. Angatr a thele la ijine ka loi troa cainöj e hnine la itre kar, me ngöne la itre park, me ngöne la hna huliwa. Nyimu aqan, ngo casi hi la hne së hna isine troa traqa kow, ene la troa cainöjëne la maca ka loi kowe la itre atr ngöne la nöjei götran.—Mat. 10:11.

8, 9. (a)Pine nemen matre, ketre iamamanyikeu la aqane kökötr la huliwa ne cainöj? (b) Nemene la hnying hna amejën, nge nemene la ka troa xatua së troa sa la hnyinge cili?

⁸ Itre trejine fe, epuni kö a hane sine la itre ka cainöj ngöne la 235 lao nöj? Maine eje hi, ke epuni fe hi la ka akökötrene la huliwa ne cainöjëne la Baselaia! Ketre iamamanyikeu la huliwa cili! Ke ngacama kola icilekeu, nge hetre wathebo i mus, me itre jole ka tru me iaxösisi, ngo itre Temoë Iehova a cainöjëne la Baselaia ngöne la nöjei nöj.

⁹ Nyipici iamamanyikeu! Hnauëne laka, pëkö ketre ewekë, nge goi thatreine fe la icilekeu i Satana a apujene la huliwa ne cainöj? Loi tro sa pane mekune hnyawa lo ka traqa ekö lo ijine ne la itre pane keresiano, ke easa öhn laka, itre Temoë Iehova hi a sisedrëne la huliwa ne cainöj, hna nyiqane hë ekö.

10. Nemene la hnei Iesu hna kuca ngöne la mele i nyidrë, nge nemene la hnei nyidrëti hna trotrohnin göne la huliwa i nyidrë?

¹⁰ Hnei Iesu Keriso, Atre Acile la ekalesia, hna nue la mele i nyidrë troa cainöjëne la maca ka loi ne la Baselaia i Akötresie. Öni nyidrë ngöne la ketre drai: “Tro fe ni a cainöjëne la itre maca ka lolo ne la Baselaia i Akötresie kowe la itre xa traon, ke celë hi kepin matre upi ni jë.” (Luka 4:43) Atre hi nyidrë laka, tha ijiji nyidrëti kö troa afenesine casin la huliwa cili. Öni nyidrë qëmekene tro nyidrëti a mec ka hape, troa cainöjëne la maca ka loi “ngöne la nöjei nöj asë.” (Mar. 13:10) Troa eatrëne tune kaa lai, nge hnei drei?

11. Nemene hnëqa ka tru la hnei Iesu hna ahnith kowe la itretre dreng? Nge nemene la ka troa xatua angatr?

¹¹ Thupene la hna amele Iesu hmaca, hnei nyidrëti hna mama kowe  la itretre dreng. Nyidrëti a ahnith e cili la ketre hnëqa ka tru koi angatr. Öni nyidrë: “Qa ngöne lai, tro jë nyipunie, nge inine jë la nöjei atr qa ngöne la nöjei nöj troa xötrethenge ni. Bapataiso angatre jë ngöne la ëje i Kaka, me ngöne la ëje ne la Nekön, memine la uati hmitrötr. Ini angatre jë troa trongëne lo nöjei ewekë hnenge hna amekötine koi nyipunie. Nge hanawang, tro pala hi ni a ce me nyipunie uti hë la troa nyipune la fene celë.” (Mat. 28:19, 20) Öni Iesu: “Tro pala hi ni a ce me nyipunie.” Nyidrëti hi lai a ahnith laka, tro nyidrëti a xatua angatr ngöne la huliwa ne cainöj me inine la itre atr. Ka nyipiewekë la ixatua i Iesu, ke thenge la hnei nyidrëti hna thingehnaean: ‘Tro la nöjei nöj a methinë angatr.’ (Mat. 24:9) Ngo hetre ketre ixatua hmaca kö koi angatr. Öni Iesu qëmekene tro nyidrëti a elë hnengödrai, tro pala kö angatr a catr hnene la uati hmitrötr, nge tro fe angatr a itretre anyipici nyidrë “ngöne la nöjei götrane gaa nany ne la fene hnengödrai.”—Itre hu. 1:8.

12. Nemene la itre hnying hna sa ngöne la tusi Itre Huliwa, nge hnauëne laka, nyipiewekë tro sa atre lai?

¹² Matre easa pane hnying ka hape: Hnene kö la itre aposetolo me itre pane keresiano hna wangatrune la hnëqa i angatr? Hapeu, hnei angatre kö hna cainöjëne hnyawa la Baselaia, ngacama ala xalaithe hi angatr, nge tru la iakötrë? Hnei angatre kö hna kapa la ixatua qa hnengödrai memine la uati hmitrötre i Iehova ngöne la huliwa? Kola sa la itre hnyinge cili ngöne la tusi Itre Huliwa. Nge nyipiewekë fe koi së troa atre la itre hna qaja, pine laka öni Iesu, troa sisedrëne la huliwa cili “uti hë la troa nyipune la fene celë.” Haawe, hnëqa ne hi la itre nyipi keresiano, nge easë fe itre Temoë Iehova, ka mel ngöne la hneijine la pun. Celë hi matre nyipiewekë koi së troa trotrohnine hnyawa la hna qaja ngöne la tusi Itre Huliwa.

13, 14. (a) Drei la ka cinyanyine la tusi Itre Huliwa, nge hna tune kaa? (b) Kola qeje nemen ngöne la tusi Itre Huliwa?

¹³ Drei la ka cinyanyine la tusi Itre Huliwa? Tha hna qaja kö la ëjen, ngo ame la easa nyiqane e, ke kola mama laka, casi hi la ka cinyanyine la Evangelia i Luka me Itre Huliwa. (Luka 1: 1-4; Itre hu. 1: 1, 2) Celë hi matre hna mekune pala hi laka, Luka “lo droketre me trejine hnimina” la ka cinyanyine la tusi Itre Huliwa. (Kol. 4: 14) Kola qaja la itre hna melën ngöne la 28 lao macatre. Hna nyiqane lo macatre 33 M.K. la Iesu a elë e hnengödrai, uti hë lo macatre 61 M.K. lo kola akalabusi Paulo e Roma. Ame la Luka a qaja ka hape, “angatr” me “hun,” ke easë hi lai a trotrohnine laka, ame la itre hna melën ngöne la ijine cili, ke ce me Luka fe hi. (Itre hu. 16: 8-10; 20: 5; 27: 1) Ketre atr ka ithel  lae Luka, matre ame la itre hnei angeic hna cinyanyin, ke itre hna qaja mekötine koi angeic hnei Paulo, Banaba me Filipo me itre xane ju kö.

¹⁴ Kola qeje nemen ngöne la tusi Itre Huliwa? Ame ngöne la Evangelia i angeic, ke Luka a cinyanyine la itre hna kuca me qaja hnei Iesu. Nge ame ngöne la tusi Itre Huliwa, ke kola qaja la itre hna kuca hnene la itretre drei Iesu. Ame la itusi celë, ke kola qejepengöne la huliwa ne la itre atr ‘ka thatre tus nge itre atr menu hi.’ (Itre hu. 4:13) Kolo fe a qaja la aqane acile la ekalesia, memine la aqane trongene ej. Kolo mina fe a amamane la aqane cainöje me waiewekë ne la itre pane keresiano. (Itre hu. 4:31; 5:42) Kolo fe a amamane la ixatua ne la uati hmitrötr ngöne la huliwa ne cainöj. (Itre hu. 8:29, 39, 40; 13:1-3; 16: 6; 18: 24, 25) Eje mina fe a amexej la tane ka tru ne la Tusi Hmitrötr, ene la aqane ahmitrötrëne la ëje i Akötresie hnene la Baselaia laka, Keriso la joxu. Ame ngöne la pun, kola qaja la aqane catre cainöj la itre keresiano, ngacama hetrenyi pala hi la itre icilekeu.—Itre hu. 8:12; 19: 8; 28: 30, 31.

15. Nemene la thangan e tro sa inine la tusi Itre Huliwa?

¹⁵ Tro sa inine hnyawan la tusi Itre Huliwa matre acatrene la lapaune së. E tro sa lapa mekune hnyawa la catr memine la huliwa ne la itretre drei Iesu, ke tro lai a ketri së me upi së troa nyitipu angatr. Nge ka xatua së hi lai troa kuca la hnëqa së, ene la troa ‘inine la itre atr.’ Hna kuca la itusi celë matre xatua epun troa inine me sin ajuin la tusi Itre Huliwa.

16. Nemene la köni eloine la itusi celë?

¹⁶ Nemene la köni eloine la itusi celë? (1) ej a acatren la mejiune së laka, Iehova a sajuën la huliwa ne cainöj me ini, jëne la uati hmitrötre i Nyidrë, (2) jëne la tulu ne la itre pane keresiano, ej a thue aja së troa cainöj, (3) ej a upi së troa metrötrën la organizasio i Iehova, me itre ka xomiujine la huliwa ne cainöj, memine fe la itre ka thupëne la itre ekalesia.

17, 18. Ka tune kaa la itusi celë, nge nemene la ka xatua së göne la ini Tusi cas?

¹⁷ Ka tune kaa la itusi celë? Hna thawa koi 8 lao götran, nge itre ej a isa qejepengöne la itre xötr ngöne la tusi Itre Huliwa. Ame la itre mekene tus, ke tha itre eje kö a qejepengöne la itre xötr, ngo kolo pe a amamai së la itre ini nyine tro sa isa xom. Hna nyiqane la itre mekene hnene la mekun ka tru, nge e thupen kola anyipicin hnene la tusi Itre Huliwa.

 ¹⁸ Hetre itre xaa eloine la itusi celë ke, ka xatua së göne la ini Tusi cas. Tro la itre iatr a xatua së troa lapa mekun la itre ewekë ka traqa ekö, me trotrohnine la itre xötr. Hetrenyi fe la itre hna eköhagen, ka xatua së troa atre la itre hlue i Iehova ekö nyine tro sa nyitipun. Itre ej fe a qaja la itre götran, me ewekë ka traqa ekö, me itre qenenöj me itre xaa atre ju kö.

19. Nemene la aqane tro sa isa waipengö së?

¹⁹ Tro fe la itusi celë a xatua eö troa ketre waipengö i eö hnyawa. Ka hekö ju hë së cainöj maine ka xötrei, ngo loi e tro pala hi sa xomi ijine troa wang ka hape, easë pala hi a amë panëne la huliwa ne cainöj, nge madrine pala hi së troa kuca la huliwa cili. (2 Kor. 13:5) Nge isa hnyinge jë ka hape: ’Hapeu, ka tru pala hi koi ni la huliwa ne cainöj, tune ekö lo eni a xomi bapataiso? (1 Kor. 7:29-31) Eni kö a catre cainöj? (1 Thes. 1:5, 6) Eni kö a isine tro pala hi a cainöj me ini itre atr?’—Kol. 3:23.

20, 21. Pine nemen matre hohopatre pe hi la ijine tro sa cainöj, nge nemene la nyine tro epuni a kuca?

²⁰ Mekune pala kö së laka, hnei Keriso hna ahnithe koi së la ketre huliwa ka sisitria, ene la troa cainöj me inine la itre atr. Kola tro la itre drai, nge hohopatre pe hi la ijine tro sa cainöj. Easenyi catre hë la pune la fene celë, matre ijine hi la troa amelene la itre atr. Ngo thatre kö së ka hape, ije atr pala kö ka ajan troa atre Iehova. (Itre hu. 13:48) Ngo hnëqa së troa xatua angatr, e ijine petre kö.—1 Tim. 4:16.

²¹ Celë hi matre nyipiewekë tro sa xötrethenge la tulu ne la itre pane keresiano ka catre cainöj ekö. Epi tro la itusi celë a hamë aja koi eö troa catre cainöj! Epi tro fe ej a acatren e kuhu hni eö la trenge aja troa “qejepengöne hnyawa la itre nyipici göne la Baselaia i Akötresie.”—Itre hu. 28:23.