Itre Trejine Fe, Ka Cainöjëne La Maca Ka Loi:

Pane mekune jë ka hape, eö la ketre aposetolo, nge eö hune la wetr e Elaio. Mama pi hi Iesu koi eö. Qëmekene tro nyidrëti a elë hnengödrai, öni nyidrë: “Tro nyipunie a kapa la men, e traqa pi la uati hmitrötr koi nyipunie. Nge tro hë nyipunie a itretre anyipici ni e Ierusalema, me ngöne la nöje Iudra asë, me e Samaria, me ngöne la nöjei götrane gaa nany ne la fene hnengödrai.” (Itre hu. 1:8) Nemene la mekuna i eö e cili?

Tro hë eö a mekune ka hape, tru palaha la huliwa. Nge öni eö, “Tha alanyimu kö së, matre tro sa cainöj tune kaa ‘ngöne la nöjei götrane gaa nany ne la fene hnengödrai’?” Nge mekune palahi eö lo hna qaja hnei Iesu qëmekene tro nyidrëti a mec, ka hape: “Tha draië kö la hlu hune la maseta i angeic. Haawe, e hnei angatr hna axösisi ni, tro fe angatr a hane axösisi nyipunie; ngo maine hnei angatre hna drengethenge la hnenge hna amekötin, tro angatre lai a hane drei nyipunie. Nge tro angatr a kuca la itre ewekë cili koi nyipunie pine la ëjeng, ke thatre kö angatre la Atre upi ni.” (Ioane 15:20, 21) Matre öni eö jë hi: ‘Tro ni a atreine cainöje tune kaa qëmekene la icilekeu me akötr?’

Easë asë a hnyinge tune lai enehila, ke hnëqa së itre Temoë Iehova troa cainöjëne la maca ka loi “ngöne la nöjei götrane gaa nany ne la fene hnengödrai,” me “ngöne la nöjei nöj.” (Mat. 28:19, 20) Troa eatrëne tune kaa la huliwa, nge ase hë perofetane laka, troa icilekeu?

Tusi Itre Huliwa a qaja la aqane xatuane Iehova la itre aposetolo, memine la itre pane keresiano ekö. Eje hi lai ka aijijë angatr troa kuca hnyawane la hnëqa i angatr. Hna kuca la itusi celë, matre xatua eö troa atrepengöne la aqane huliwa ne la itre hlue i Iehova ekö, me easë enehila. Tha kolo hmekuje kö a qaja la huliwa, ngo kolo fe a qaja la itre nyine kuca matre eatrën la huliwa. Haawe, celë hi ka troa acatrene la mejiune i eö laka, Iehova Akötresieti pala hi a xomi iujine la organizasio i Nyidrë e celë fen.

Eahuni a ajane me thithi fë laka, tro la tusi celë ka qejepengöne la tusi Itre Huliwa, a acatrene la mejiune i eö jëne la ixatua i Iehova, memine la uati hmitrötre i Nyidrë. Epi tro ej a ithuecatre koi eö troa ‘qejepengöne hnyawa kowe la itre atr la itre nyipici göne la Baselaia i Akötresie,’ me xatua angatr troa xötrëne la gojenyi ne mel!—Itre hu. 28:23; 1 Tim. 4:16.