Ase hë hane qaja koi hmunë la ketre ewekë?— * Hetre ewekë e hnine la Tusi Hmitrötr, lo hna hëne ka hape “ewekë ka sihngödi” qaathei Akötresie. Kola hëne ka hape, ka sihngödri ke pëkö atr ekö ka atre. Goi thatre fe la itre angela. Pi tro kö hmunë a hane atre lai ewekë cili?—

Ame ekö qa catr, hnei Akötresieti hna xup la pane trahmanyi me pane föe. Adamu me Eva la lue ëje i nyidro. Hnei Akötresieti hna ami nyidro hnine la ketre gatrane ka mingöming, Edena la ëjen. Maine drengethenge Akötresieti ju hnei Adamu me Eva, ke paradraiso asë hë la ihnadro enehila, tune e Edena. Nge mele pala kö nyidro memine la itre nekö i nyidro hnine la Paradraiso, nge tha tro kö a hane mec. Ngo mekune hi hmunë lo hnei Adamu me Eva hna kuca?—

Tha hnei Adamu kö me Eva hna drengethenge Akötresie, celë hi kepine matre tha easë kö enehila a mele e hnine la paradraiso. Ngo ase hë Akötresieti ekö qaja ka hape, tro Nyidrëti a kuca matre paradraiso asë jë la ihnadro, nge matre tro la nöjei atr a mele madrine uti hë epine palua. Nemene jë la aqane tro Nyidrëti a kuca? Qaane ekö, pë pi kö ka atre la ewekë cili ka sihngödr.

Ame hë la Iesu a traqa e celë fen, nyidrëti hë a qaja amamane jë la ewekë cili kowe la itre atr. Öni nyidrë, ka hape ame lai ewekë ka sihngödr, tre Baselaia i Akötresie. Nge hnei Iesu hna upe la itre atr troa sipone jëne la thithi matre traqa pi la Baselaia cili. Ke eje hi lai ka troa kuca matre paradraiso asë jë la ihnadro.

Madrine kö hmunë la hmunë a atre la ewekë celë?—Tha tro kö hmunë a thëthëhmine laka, tro hmekuje hi la itre ka drei Iehova a mele e hnine la Paradraiso. Tru catre la itre trahmanyi me föe ka drei Iehova, hna qaja e hnine la Tusi Hmitrötr. Pi tro kö hmunë a hane atre la pengö i angatr?— Nga tro hë nyiso a ce wange la pengö i angatr, memine la aqane tro sa hane tui angatr.