Nekönatre petre kö Samuela, nge nyëne fe hë a hane huliwa, me mel e hnine la uma maano i Iehova, ene lo hnë traqa itronyi hnene la itre atr troa hmi. Atre hi hmunë la kepine matre tro jë Samuela a tro cili ngöne la uma maano i Iehova? Tro nyiso a pane ce ithanatane la pengö i Hana, thine i Samuela.

Ekö hë Hana ajane troa hetre nekönatr, ngo tha hnaho kö eahlo. Haawe, eahlo pë hë a thithi jë koi Iehova me sipo Nyidrë troa xatua eahlo. Hnei eahlo hna sisinyi ka hape, maine tro eahlo a hnahone la nekönatre trahmany, tro hë eahlo a upi nyëne kowe la uma maano, matre tro nyën a mele me huliwa e cili. Hnei Iehova hna kapa la sipo i eahlo, ke hnei eahlo hna hnahone la nekönatre trahmany. Hnei eahlo hna ati ëje i nyën, Samuela. Ame hë la kola könitre, maine foa lao macatre i Samuela, Hana pë hë a xomi nyëne jë kowe la uma maano i Akötresie, matre tro pë hë nyën a huliwa koi Nyidrëti e cili.

Eli ekö lo atre huuje ka tru e cili hnine la uma maano. Kolo fe a hane huliwa e cili hnene la lue nekö i nyidrëti trahmany. Ngo maine atre hi hmunë lo, ame la uma maano, tre uma lai hnë troa hmi koi Akötresie, nge hnë troa kuca la itre huliwa ka loi. Ngazo pe, tha loi kö la huliwa ne la itre nekö i Eli. Nge öhne hi Samuela la itre huliwa ka ngazo hnei nyidroti hna kuca. Ngo hapeu, hnei Samuela kö hna xome la thiina ne la lue nekö i Eli?— Ohea, hnei nyëne pala hi hna kuca la itre ewekë ka loi, tune lo aqane ini nyën hnene la keme me thine i nyën.

Maine ju, nemene ekö la nyine tro Eli a kuca kowe la lue nekö i nyidrë?— Ka loi ekö tro nyidrëti a haji nyidro. Nge ka loi fe tro nyidrëti a upi nyidro, matre tha tro hmaca kö nyidroti a huliwa hnine la uma i Akötresie. Ngo tha celë kö lai hna kuca hnei Eli, ene pe elëhni jë hi Iehova koi Eli me lue nekö i nyidrë. Nge Iehova pë hë a mekune ju troa haji angatr.

Ame ju hi ngöne la ketre jidri ne kola meköle hnei Samuela, drenge hë nyën la kola hë ka hape: ‘Samuela!’ Nyenyape jë hi nyëne koi Eli, ngo öni Eli: ‘Tha eni kö la ka hë  hmunë.’ A lua traqa hmaca tune lai. Ame hë lai hnaakönin, öni Eli koi Samuela ka hape, e drenge hmaca jë nyëne la kola hë nyën, tro nyën a sa ka hape: ‘Iehova fe, ewekë jë; eni a drei Nyipë.’ Haawe, Samuela pë hë a kuca ju tune lai. Öni Iehova jë hi koi Samuela: ‘Qaja ju koi Eli ka hape, tro ni a nyithupene koi angeice me hnepe lapa i angeic, la itre huliwa ka ngazo hnei angatre hna kuca.’ Ame koi hmunë ke, ka hmaloi kö koi Samuela troa tro fë la maca celë koi Eli?— Ohea, tha ka hmaloi kö. Ame pe, ngacama kola xou hnei Samuela, ngo hnei angeice kö hna trongëne la hnei Iehova hna upi angeic troa kuca. Nge hnei Iehova hna aeatrëne lo ewekë hnei Nyidrëti hna qaja. Hna humuthe la lue nekö i Eli, nge ketre meci fe hë Eli.

Ketre tulu ka loi, la tulu i Samuela. Hnei angeice pala hi hna kuca la ewekë ka loi, ngacama öhne hi angeice la itre xa atr e kuca la itre ewekë ka ngazo. Nge tune kaa fe hmunë? Tro fe kö hmunë a catre kuca la itre ewekë ka loi, tui Samuela? Maine tro hmunë a tui angeic, tro hë hmunë a amadrinë Iehova, me kem me thine i hmunë.