Ame ngöne la itre xa ijin, kola hnyima sai së, maine elëhni pena koi së hnene la itre atr, e tro sa qeje Iehova koi angatr. Nge ma tro hë së lai a xele ma qeje Iehova hmaca e thupen. Hna hane kö traqa koi hmunë la ewekë celë?— Kola qaja e hnine la Tusi Hmitrötr la pengöne la ketre nekö trahmanyi ka hnimi Iehova, nge ka mekune ka hape tha tro hmaca kö angeic a qeje Iehova. Ieremia la ëje i angeic. Tro nyiso a ce wange la pengö i angeic.

Ame ekö la Ieremia a nekö trahmany, hnei Iehova hna upi angeice troa qaja kowe la itre atr ka hape, tha tro hmaca kö angatr a kuca la itre ewekë ka ngazo. Jole catre koi Ieremia, ke angeic a xou. Öni angeice koi Iehova: ‘Thatre kö ni ka hape, tro ni a qeje nemen. Nge nekönatre pala kö ni la.’ Ngo öni Iehova e sa ka hape: ‘The xou kö. Ce eni me eö.’

 Haawe, Ieremia pë hë a nyiqaane tro fë jë kowe la itre atr lo maca, ka hape, maine tha saze kö angatr, tro ha traqa koi angatre la itre ewekë ka ngazo. Ngo nemene fe la mekuna i hmunë, hnene kö la itre atr hna drei Ieremia?— Ohea. Hnei angatre pe hna hnyima sai angeic, me elëhni koi angeic. Goi thele fe angatre troa humuthi angeic! Nemene ju hë la hna mekune hnei Ieremia?— Angeic a xou nge öni angeic: ‘Tha tro hmaca kö ni a qeje Iehova.’ Ngo hapeu, nyipici kö?— Ohea. Thatreine kö tro Ieremia a tha qeje Iehova, ke tru pala ha la ihnimi angeice koi Nyidrë. Hnene la ewekë cili matre Iehova a thupë Ieremia.

Hna thupë Ieremia ngöne lo ijine kola pane kuië angeic hnene la itre atr ka ngazo thiina kowe la hnaope hna sin, nge ka si trëtr me dro. Tha hna thu a i angeice kö, maine thue ime i angeice pena. Hnene lo itre atr ka ngazo thiina hna nuaxöji Ieremia pe, matre tro angeic a mec. Ngo mele ju kö Ieremia, ke ce Iehova me angeic!

Nemene la hna ini hmunë hnene la tulu i Ieremia?— Hna traqa koi angeice la xou ngöne la itre xa ijin, ngo tha hnei angeice kö hna cile troa qeje Iehova. Ame la hmunë a qeje Iehova ngöne la itre xa ijin, tre troa hnyima sai hmunë, maine elëhni koi hmunë hnene la itre atr. Maine jë tro hë hmunë a hmahma, maine xou. Ngo the cile kö troa qeje Iehova. Tro kö Nyidrëti a ce me hmunë, tune lo aqane xatua Ieremia hnei Nyidrë.