Sesëkötre ju hi Annette lo kola xolouthi angeic, me kuië angeic e kuhu hnadro. Öni Annette: “Hnenge hna jipa, me thel troa sue, ngo thatreine kö ni. Hnenge hna uku angeic, me hnaiwanakoim koi angeic, me xe angeic, me hna iwaca, ame hnei angeic hna li hele ni, pë ju hi trenge catreng.”

Maine Annette ju eö, nemene la hnei eö hna troa kuca?

Maine ame koi eö, ka hmek eö ngöne la eö a tro jidr, mekuna i hmo lai. Öni Tusi Hmitrötr: “Tha traqa pa la maloe ca . . . nge kete pëkö ihnimi gufa thene la ate wangate hmekun ; ngo ame la ijine memine la ewekë ka xulu, te, kola traqa koi angat’ asë.”—Ate Cainöj 9:11.

Nyimutre la itre thöth ka tui Annette laka, thatre kö angatr la ka angazo angatr. Nge ame itre xan, hna angazonyi angatr hnene la ketre sinee i angatr maine ketre atrene la hnepe lapa i angatr. Treene hi lao macatre i Natalie, nge hna angazonyi angeic hnene la ketre thöth ka lapa ezi angeic. Öni Natalie: “Pine laka tru la xoung, nge eni fe a hmahma matre tha canga qajaqaja kö ni.

Ka hleuhleu pala hi la hni Annette. “Eni pala hi a mekune la jidri cili, tro ni ekö a jipa catr. Ngo thupene lo kola li hele ni, eni pë hë a lapa hnö ju. Pëkö xa ewekë hnenge hna atreine kuca, ngo ame koi ni ke, maine ju ijijinge hi.”

Ame koi Natalie, angeice la ka thel. “Loi ju kö ekö e tro ni a drei kaka me nenë, ke hnenge hna mejiune kowe la sipu mekunang. Tha mano kö nyidro qaja koi ni me jining ka hape, tha tro kö a iananyi la kola ce elo e kuhu qëhnelö. Ngo, hnenge hna tha idrei. Matre öning, hnenge hna thele tro la nekö trahmanyi ka lapa ezi hun a angazo ni. Hnene la ewekë cili hna akötrëne fe la hnepe lapang. Celë hi ka ahleuhleune catrëne la meleng.”

Maine eö a mekune tui Annette me Natalie, the thëthëhmine kö ka hape, tha aja i eö kö troa angazo eö. Itre xan a wange acone la ewekë cili, me qaja ka hape, pengöi trahmanyi kö lai. Ketre, öni angatr, e hna angazone la ketre jajiny, hnei angeice kö lai hna thel. Ngo, pëkö atr ka ajane troa angazo angeic. Maine hna traqa lai koi eö, tha hnei eö kö lai hna thel!

Ngacama, “tha hnei eö kö lai hna thel,” ngo tha ka hmaloi kö troa melën. Ame itre xan, angatr a lapa fë e kuhu hni angatr la hnei angatr hna melën ke, akötr koi angatr troa mekune hmaca la ijine cili. Ngo, drei la ka madrine la eö a lapa fë la itre mekune cili? Eö maine la ka angazonyi eö? Hanawang la nyine troa kuca.

Öni Iobu, atr ka hleuhleu ngöne la ketre ijin ka hape: “Tro ni a ewekë ngöne la haite la hning.” (Iobu 10:1) Tui Iobu, e tro eö a ithanatane lai memine la ketre atr hnei eö hna mejiune kow, tro eö lai a kapa la ewekë ka traqa koi eö. Tro ha uqa e cili la hni eö qa ngöne la itre mekune ka iajolë.

Hna jele nyipicine lai hnei Annette. Öni angeic: “Hnenge hna ithanatane lai kowe la ketre enehmung, ame hnei angeic hna upi ni troa ithanata kowe la lue qatre thup. Celë hi hnenge hna kuca, nge madrine pi hë ni. Anyimua lapa nyidro ezi eni, me hamëne la itre ithanata hnenge hna ajane troa dreng laka, tha hnenge kö hna thel la ewekë cili. Tha hnenge pi kö hna thel.”

Hnei Natalie hna ithanatane lai kowe la keme me thine i angeic. Öni angeic: “Hnei nyidroti hna akeukawanyi ni, me xatua ni troa ithanatane lai. Matre tha hleuhleu menu kö ni, nge tha lapa fë wesitre kö ni.”

Hnei Natalie fe hna thele ixatua jëne la thithi, öni angeic: “Ixatua ka tru koi ni la troa ithanata koi Akötresie ke, jole pi hë koi ni troa fe la hning kowe la ketre atr. Matre, ame la eni a thith, tha xounge kö troa qaja asë la aliene hning. Celë hi ka atingetingëne la hning.”

Loi e tro fe eö a atre laka, hetre “ijine aloin.” (Ate Cainöj 3:3) Nyipiewekëne jë la mele i eö, ene la götrane ngönetrei, ngo memine fe la mekun. Mano hnyawa ju. Nge, ame la ka sisitria tre, ene la troa lapa qal koi Iehova Akötresie, Atre iakeukawan.—2 Korinito 1:3, 4.

E uku eö jë troa kuca la ewekë ka sis, qaja catrëne jë ka hape, “The kuca kö lai!” maine pena, “Hule pi la wanakoime i eö qa lai!” The xou kö e traqa jë la nekö trahmanyi triji eö ke, hnei eö a qaja lai. E nue eö pi hë hnei angeic, kolo hi lai a hape, tha ka loi kö angeice koi eö! Meköt e tro eö a hetre trahmanyi ka metrötrëne la ngönetrei eö, memine la itre ini hnei eö hna mejiune kow.

“Ame ngöne la hna ini, itre nekö trahmanyi a hule qa hutrö la isoutiëng, me qaja la itre ithanata ka iahmahmany ka hape, tro ni lai a lolo e hnenge hna ce meköl me angatr.”—Coretta.

Ame koi eö, angatr a

1. Qene hnyima me angeic?

2. Wesiwes koi angeic?

3. Iakötrë hnei thiina ka sis?

“Ame ngöne la kar, hnene la nekö trahmany hna qeje trenge ka sisi koi ni, me ea la wanakoimeng. Ame hnenge hna lepe trij la wanakoime angeic, me helë angeic. Goeë ni jë hi hnei angeic ceitu me ketre hmo.”—Candice.

Ame koi eö, nemene la hna kuca koi Candice?

1. Kola qene hnyima me angeic?

2. Kola wesiwesi koi angeic?

3. Iakötrë hnei thiina ka sis?

“Ame lo macatre hnapan, hnene la nekö trahmanyi hna majemine qaja la ihnimi angeic koi eni, nge aja i angeic troa iatre me ni, ngacama eni pala hi a thipëne la sipo i angeic. Ame itre xa ijine, angeic a jieji la wanakoimeng, ame hnenge hna sewe angeic, ngo tha drei ni kö. Ame la ketre ijin, eni a thil troa sile la lue butreng, ame hnei angeic hna lepe la hutröng.”—Bethany.

Ame koi eö:

1. Kola qene hnyima me angeic?

2. Kola wesiwesi koi angeic?

3. Iakötrë hnei thiina ka sis?

Ame la mekune ka loi ka sa lai köni hnying tre, ene la C.

Nemene la aliene la kola hape, kola akötrë angeic hnei thiina ka sis?

Ame la kola hape, kola akötrë së hnei thiina ka sis tre, hna kuca lapane hnene la ala cas, nge tha cile kö ngacama anyimua qaja së troa hmaca.

Loi e tro sa nyipiewekëne la kola iakötrë ketre hnei thiina ka sis ke, tro lai a traqa kowe la ixolouth.