Hanawang: Lue treu petre hi ne iöhnyi Maria me Mika, ngo kösë ame koi Maria, ekö catre hë angeic atre Mika. Nyidroti pala hi a iupi fë macakeu, nge tha mano kö nyidro itelefonekeu ngöne la drai, matre kösë iatre hnyawa ha nyidro! Ngo ame hë enehila, tha ajane hë Mika tro hi a ithanata, hetre hnei angeic hna nango mekun.

Ame ngöne la lue treu ka ase hë, Mika me Maria a ie me iba. Nge aja i Maria tro hi a hmaca e cili. Nge ame ngöne la ketre götran, xele angeic ma nue Mika. Kösë ka mingöminge angeic e ce Mika me angeic. Ngo öni angeic, ‘öi pe, lue ka iaja nyiho . . . ’

Maine macatre ne tro hë epuni a iatre me ketre, nge maine Maria ju eö, nemene la hnei eö hna troa kuca?

Nemene la ewekë ka traqa e traqa ju eö thupa la feu rouge? Pine laka, hnei eö hna ena la wathebo, tro eö lai a xeni pun. Ceitune hi lai e tro eö a ena la itre wathebo göi thiina, tune la wathebo celë: “Iananyipi nyipunie memine la kuci ngazo.”—1 Thesalonika 4:3.

Nemene la itre thangane ka ngazo qa ngöne la hna ena la wathebo celë? Öni Tusi Hmitrötr: “Ame la ate kuci ngazo, te, kola nyipi angazone la ngönetei angeic.” (1 Korinito 6:18) Nemene la aliene lai?

 Hane cahu itre thangane ka ngazo hna öhne hnene la itre ka inamacane thene la itre thöth ka melëne lai.

• KA HULIWA LA MEKUTHETHEU. Önine la itre thöth ka ce meköle trefëne ngo tha faipoipo petre kö ka hape, angatr a hace fë e thupen.

• IMEKUHNI. Thupene la hna kuci ngazo hnene la lue thöth, nyidroti a isa thele ka hape, ‘Drei la itre xa atr hnei angeic hna ce meköle memin?’

• HLEUHLEU. Ame la aja i jajiny, tre, ketre nekö trahmanyi ka troa thupë angeic, ngo tha tro kö a elo angeic. Nge ame pena la nekö trahmany, tha ajane kö angeic la jajinyi ka canga kei kowe la sipo i angeic, ene la troa ce meköl.

• Ini: E hnei eö hna kei kowe la kuci ngazo, tro eö lai a methinëne la ngönetrei eö, ke luzi hë la nyipi jajinyi eö maine nekö trahmanyi eö. (Roma 1:24) Ka sisitria catre la ngönetrei eö e troa adron!

Amamane jë ka hape, eje thei eö la catr troa ‘iananyi memine la kuci ngazo.’ (1 Thesalonika 4:3) Nge e faipoipo hë eö elany, tro hë eö lai a ce meköle trefëne e hnine la faipoipo. Nge tha tro kö a traqa koi eö la hleuhleu, me hace fë la itre ewekë hna kuca ekö, tune lo itre thöth ka ce meköle trefëne ngo tha faipoipo petre kö.—Ite Edomë 7:22, 23; 1 Korinito 7:3.

• Tro kö la atr ka hnimi eö a thele troa angazone la ngönetrei eö me hni eö?

• Tro kö la atr ka nyipiewekë eö a thele troa angazone la imelekeu i eö me Akötresie?—Heberu 13:4.