Hanawang: Kola easenyi Brian hnene la lue sine ce elo i angeic, nge kola traqa la xou koi angeic. Alua thele nyidro ngöne la wiik troa upi angeic troa ufi sixa. Nge, kolo hmaca a uku angeic enehila.

Önine la pane nekö trahmany:

Ame la angeic a hape “sine ce elo,” angeice hi lai a nango nyi hatr, me jelë la ketre ewekë qa ngöne la pos ne trauzizi angeic, me liin koi Brian.

Brian a goeëne la sixa ngöne la wanakoime ne la nekö trahmany. Nge Brian a xoue catr.

Maine Brian ju eö, nemene la hnei eö hna troa kuca?

Atre kö la lue sine ce elo i Brian la hnei nyidro hna kuca? Hnei nyidroti kö hna ketre sipu mekun troa ufi sixa? Ohea. Hna uku nyidroti pena hnene la itre xa sine ce elo i nyidro. Aja i nyidro troa kepe nyidro hnei angatr, matre hnei nyidro hna nue angatr troa musinë nyidro.

Maine tro epuni a cil kowe la itupath ka tune la, nemene la aqane tro sa hane cile catr qëmekene la ihuli ne la itre sine ce elo?

1. CANGA HNËKË JË

   Öni Tusi Hmitrötr: “Ame la ate maca meke, te, kola goeëne la ngazo, me za ; ngo ite wangadrapa kö a tro, nge hete thupenë hë.”—Ite Edomë 22:3.

   Ijije hi tro eö a canga atre la jol ka troa traqa koi eö. Pane mekune jë laka, eö a öhne la ca lapa ne la itre sine ce elo i eö e cahmijë, nge angatr a ufi sixa. E tro eö a canga hnëkëne la nyine kuca, ka hnëkë hë eö lai troa cile kowe lai jol.

2. PANE MEKUNE JU

   Öni Tusi Hmitrötr: “Loi e hetrenyi la mekuthetheu ka loi.”—1 Peteru 3:16, MN.

   Waipengöi eö jë, me hape, ‘E tro ni a nyitipune la ka ala nyimu, nemene la thangane lai koi ni?’ Nyipici laka, tro la itre sine ce elo i eö a nyipi ewekë eö. Ngo, nemene hë la pengöi eö e thupen? Aja i eö kö troa amadrinëne la itre sine ce elo i eö, nge angazone pë hë la sipu pengöi eö?—Esodo 23:2.

3. AXECIË MEKUNE JË

   Öni Tusi Hmitrötr: “Kola qou [maine, hmek] la ate ka inamacan.”—Ite Edomë 14:16.

   Hetre ijine laka, tro sa axecië mekun, me kepe thangane itre ej. Tusi Hmitrötr a qeje Iosefa, me Iobu, me Iesu ka hape, itre atr ka axeciëne la itre mekune ka loi. Nge, kolo fe a qeje Kaina, Esau, me Iudra ka hape, itre atr ka axeciëne la itre mekun ka ngazo. Ame eö ke, nemene la hnei eö hna troa kuca?

Öni Tusi Hmitrötr: “Nyipici jë.” (Salamo 37:3, MN) Maine ase hë eö mekune la itre ethan, nge ka xecie hnyawa e kuhu hni eö la mekuna i eö, tro hë eö lai a öhne laka, tha jole kö koi eö troa qaja hnyawane la pengöi eö.

The xou kö, tha eö kö lai a troa cainöj kowe la itre sine ce elo i eö. Qaja ju hi ka hape, WAEA, nge loi ju hi lai. Maine pena, e eö a ajane matre mama hnyawa pi la mekuna i eö, qaja jë ka hape:

• “Tha tro jë kö ni a kuca lai!”

• “Tha ka kuca kö ni la ewekë cili!”

• “Atre hi eö lo pengöi eni!”

Ame la ka nyipi ewekë tre, ene la troa sa, nge loi e xeci e kuhu hni eö. Tro eö lai a öhne laka, tro hë la itre sine ce elo i eö a canga nue eö!

E kola hnyima sai eö ke? Nge, e qaja jë koi eö ka hape, “Eö a ue, eö a qene föe?” Atre ju eö ka hape, aqane ihnyima sai hi lai ne la itre sine ce elo, nge aqane ihuli angatre lai. Nemene la aqane tro eö a ujë? Hane hi la lue aqan.

• Nue angatre pi troa hnyima sai eö. (“Nyipici epun, eni a xou!” Eö a nango qaja jë la kepin.)

• Sa jë. Qaja jë la kepine matre xele kö eö, nge huliwane jë la inamacane i angatr. (“Ase hë ni olen, öninge pala kö ka hape, ka inamacane eö matre troa ufi sixa!”)

Maine kolo pala hi a hnyima sai eö hnene la itre sine ce elo i eö, nue angatre pi! Traqa eö lapa, tro hë lai a jole catr koi eö. E tro eö a trotriji angatr, eö hi lai a amamane ka hape, tha qanyi itre xane kö troa saze la sipu pengöi eö.

Eje hi laka, thatreine kö eö troa kötrene la ihuline la itre sine ce elo i eö. Ngo, ijiji eö hi troa axeciëne la nyine tro eö a kuca, me qaja hnyawane la pengöi eö, me musinëne la mele i eö. Eö kö la ka troa axecië mekun! —Iosua 24:15.