HANAWANGE la ewekë ka traqa enehila. Hna helë Adamu me Eva, qa ngöne la hlapa ka mingöming e Edena. Atre fe hi nyipunieti la kepine lai?

Pine laka, hnei nyidroti hna kuca la ketre ewekë ka ngazo catr, haawe, hnei Iehova hna atë koi nyidroti la pun. Nemen la ewekë ka ngazo, hnei nyidroti hna kuca?

Hnei nyidroti hna ena la wathebo i Akötresie. Hnei Akötresie hna nue nyidro, troa xeni wen la nöjei sinöe ne la gatran. Ngo caasi pe hi la sinöe hnei nyidroti hna troa thaa ketr, ke, maine tro nyidroti a xeni wen la sinöe cili, tro hë nyidroti a mec. Ewekë i Akötresieti pe kö la isinöe cili. Kola hape, thaa loi kö la tro sa xom la ifekë ewekën. Ngo nemen la ewekë ka traqa?

Ame ngöne la ketre ijine Eva caasi ngöne la hlapa, ithanata jë hi koi nyiidro hnene la ketre un. Ketre ewekë la! Hnene la öni hna upi Eva troa xeni wen la sinöe, nge celë hi lo sinöe lai hnei Akötresie hna wathebo nyidroti troa xeni wen. Ketre mina, ame la Iehova a xupe la itre un, thaa hnei nyidrëti kö hna kuca matre tro angatr a hane ithanata tui atr. Kolo hi lai a amaman, ka hape, hetre atre aithanata nyën. Drei lai ka aithanatan la un?

Thaa Adamu kö. Celë hi matre, ijije troa qaja ka hape, kolo ketre e ange hna pane xupe hnei Akötresie ekö, qëmeken troa xup la ihnadro. Angatre hi lo hna hape, itre angela, itre xupuana i Akötresie hna thatreine troa öhne hnei lue meke ne atr. Hna traqa la pi draië kowe la ketre e angatr. Kola ajan troa hane musi tui Akötresie. Ame la aja i angeic, tro la itre atr a drengethenge angeic, ngo thaa tro hmaca kö a drei Akötresie. Celë hi angela lai, ka aithanatane lo un.

Hnene la angela cili hna amenu Eva. Hnei angeic hna qaja koi Eva, ka hape, maine tro nyidroti a xeni wen la sinöe hna wathebon hnei Akötresie, tro hë nyidroti a tui Akötresie; celë hi matre hna mejiun kowe la trenge ewekë cili hnei Eva. Haawe, nyidroti a xeni ju la wene la sinöe, ketre tui Adamu mina fe. Ase hë nyidroti ena la trenge wathebo i Akötresie, ene pe luuzi pi lo göhnë gaa mingöming hna hnëkën koi nyidro.

Ngo hetre ijine troa mingöminge hmaca la fene hnengödrai asë, tune ekö lo hlapa e Edena. Tro hmaca pë hë së lai a öhne trongën la nyine tro fe së a hane kuca, matre hamëne la göqa së göi troa amingömingön hmaca la ihnadro. Ngo enehila, tro së a pane wang la pune koi Adamu me Eva.