PËHË hneimeke i Adamu me Eva, hnene la nöjei pengöne jol ka traqa koi nyidro e trön la hlapa e Edena. Tro nyidroti a catre huliwa, matre troa hetre xen. Thaa itre sinöe ka mingöminge caasi hmaca kö la ka cia xötreithi nyidro, ngo itre feja ka ithinyi fe hë. Drei la itre ewekë ka traqa koi Adamu me Eva, pine la hna thaa drei Akötresie, ketre, thaa lue enehmu i Nyidrëti hmaca kö nyidro.

Nge meci la pune ka ngazo catr nyine tro nyidroti a menuën. Hnei Akötresieti lo hna ahnith, ka hape, maine troa xeni qa ngöne la sinöe hna wathebo nyidroti troa xeni wen, haawe tro hë nyidroti a mec. Celë hi matre, ame ju fe kö lo nyidroti a xeni wen la isinöe, ene pe tithi nyidroti ju hi hnene la mec. Qene hmo la troa thaa dreng la hna amekötin hnei Akötresie!

Kolo pë hë a hnaho hnei nyidro, thupene lo hna ihelë qa ngöne la hlapa e Edena. Drei la kepine matre, ame la itre nekö i nyidro, tro fe angatre asë a hane qatr me mec.

Eje hi, maine hnei Adamu ju me Eva hna drengethenge Iehova, thaa tro kö nyidroti a hleuhleu, ngo tro pe nyidroti a manathith, ene la troa mele madrin me itre nekö i nyidro! Troa eje pala hi thei nyidroti la mele ka loi nge uti hë epin palua, ngöne la ihnadro. Pëkö atr ka troa qatr, me wezipo, me mec.

Ame la aja i Akötresie, tre, ene la tro la itre atr a mele madrin epine palua, nge Nyidrëti hmaca a ahnith laka, troa traqa elany la ijine cili. Haawe tro hmaca ha a Paradraiso la fene hnengödrai asë, nge tro ha jilapa la egöcatr thene la itre atren. Tro ha tingetinge hmaca la aqane imelekeu ne la itre atr me Akötresie, nge tro mina fe angatr a iloi.

Thaa sinee i Akötresieti hmaca kö Eva. Nge qa ngöne lai hetre pun ka ngazo, ngöne laka, tro nyiidro a hnaho hnine la hace me akötr. Ame la pun la thaa idrei i Eva, hleuhleu hë la mele i angeic.

Hnei Adamu me Eva hna hnahon la itre nekönatr trahmanyi me jajiny. Hnei nyidroti hna ati ëjen la nekö i nyidro haetra, Kaina. Ame la hnaaluen, tre, Abela. Nemen la ewekë ka traqa, kowe la lue nekö trahmanyi cili? Atre fe hi nyipunie la ka traqa koi nyidro?