MAINE traqa pi koi nyipunieti la ketre matran atr, nge kola sasaith la hune qëhnelö ne la umëtë la eqea i angeic, öni nyipunieti ju hë ka hapeu? Hane petre hi la ketre hmae ka hoea! Hna hetrenyi ekö e celë fen, la itre atr ka qea hmae. Hna qaja hnei Tusi Hmitrötr ka hape, itre angela la itre keme i angatr. Nemen la pengö i angatr?

Hnene lo angela ka ngazo, ene Satana hna haöth e celë fen, hnei hleuhleu me iakötrë. Hnei angeic mina fe hna tupath, troa apoizinën la itre xaa angela. Hna drei angeic hnei itre xan. Itre ka nue trij lo götrane qa hna athip hnei Akötresie, me uti fen eë, me nyi ngönetrei ne atr. Matre atre fe hi nyipunieti la kepin?

Hna qaja hnei Tusi Hmitrötr ka hape, hnene laka, hnei angatr hna öhn la emingömingön la itre jajiny, ene pe cia pi hi la aja thei angatr, troa ce mele trefën me nyudren. Haawe, uti pi hi angatr kowe la fen, troa xomi nyudren nyine föi angatr. Ngazo atraqatr la hna kuca, pine laka, e koho hnengödrai la hna ami angatr.

Qa ngöne la hna ce meköl trefën hnene la itre angela memin la itre föe, ene pe hnahone pi hi la itre xaa pengöne nekönatr. Thaa isazikeu kö la kola xötrei mala, ngo e thupene hë, ketre pengöne kö la etrun! Ceitune hi la aqane canga tru trootro la ngönetrei, memine la trenge catr ne la itre nekönatre cili, uti hë la kola hoea la itre hmae i nyudren.

Ka ngazo catr la itre atr ka qea hmaen cili. Hnene la aqane tru ne la trenge catre i angatr, haawe, angatr a qanangazon la itre atr. Angatr a thel troa ngazo asë la nöjei atr.

Thuepene hë la hna meci hnei Enoka, hetrenyi fe ngöne la ihnadro la ketre atr ka loi thiina. Noa la ëje i angeic. Ka drengethenge Akötresieti pala hi Noa.

Ame ngöne la ketre ijin, hnei Akötresie hna ahnithe koi Noa, ka hape, Nyidrëti a troa apaatren la itre atr ka ngazo. Ngo tro pë hë Nyidrëti a amele angeic, memin la hnepe lapa i angeic, me itre öni i angeic. Tune kaa la aqane aeatrën Akötresie la mekuana i Nyidrë?