LOTA me lapa i angeic a ce mele me Aberahama e Kanana. Ame ngöne la ketre ijin, Aberahama a qaja koi Lota ka hape: ‘Tru catre hë hnei öni nyiso, nge co pë hë la nöj. Eni a sipo eö matre tro pe nyiso a isa ije. Maine tro eö a xom la gojenyi celë, tre, tro pë hë ni a xom la ketre gojeny.’

Ame hnei Lota hna goeën la nöj. Nge angeic a öhne ju lai götran gaa mingöming, gaa hmu me cepunikë la aqane cian la hnitr, ka lolo hnyawa hi kowe la itre si i angeic. Ketre götran e hnine lo itre hnehlapa ne Ioridrano. Hnei Lota hna tro kowe la götrane cili, angeic me hnepe lapa i angeic me itre öni i angeic. Matre hnei angatre hë hna jilapa e Sodroma.

Kola mele hnine la ngazo hnene la angetre Sodroma. Ame pe, Lota la ketre atr ka lolo thiinan, ngo hna akötrën la hni i angeic hnene la aqane ujë ne la angetre Sodroma. Hace koi Akötresieti la aqane mele i angatr. Ame hnei nyidrëti hna upe la lue angela troa thuemacanyi Lota la hnei Nyidrëti hna axeciën, ene laka, tro hë Nyidrë a apaatren e Sodroma memine lai traon ezin, ene Gomora.

Haawe hna qaja hnene la lue angela koi Lota ka hape: ‘Nyimenyime jë! Xome jë la ifënekö i eö, me lue nekö i eö jajiny qaa celë!’ Ngo kola huli hmiitr hnei Lota me hnepe lapa i angeic, ame hnene la lue angela hna e angatr, me kötresai angatr ananyin la traon. Hna qaja hnene la ketre angela ka hape: ‘Kötre jë matre mele eö, the xei kö, nge the cile kö ngöne la hnapapa; kötre jë kowe la wetr, wanga meci pi eö.’

Hna drengethenge hnei Lota me lue nekö i angeic jajiny, nge hnei angatr hna kötr qaa Sodroma. Thaa cile pi kö angatr, maine xei pena hutrö eë. Ngo ame ju pë hë ifënekö i Lota, thaa drengethenge kö nyidroti la hna amekötin. Nango qea ha thupene la hna kötr, nyidroti a cile ju me xei hmaca hutrö eë. Ene pe alase ka cile meköti ju pe hi nyiidro. Öhnyi nyidroti hi hnei nyipunieti ngöne la iatr?

Hetre ini nyine tro së a xom. Kola amaman koi së ka hape, Akötresieti a amelen la itre atr ka drengethenge Nyidrë, ngo meci la pun koi itre ka thaa idrei.